កាលពីម្សិលមិញអភិបាលខណ្ឌជ្រោយចង្វា បានបញ្ជាឲ្យក្រុមហ៊ុនឯកជនដែលដឹកនាំគម្រោងអចលនទ្រព្យតម្លៃ៣.០០០លានដុល្លារនៅជ្រោយចង្វា បញ្ឈប់ជាបណ្ដោះអាសន្ននូវការបូមខ្សាច់ដាក់លើដី ដែលមានជម្លោះជាមួយប្រជាជនមូលដ្ឋានប្រហែល៤០គ្រួសារ ប៉ុន្តែបានជំរុញប្រជាជនទាំងនោះឲ្យពិចារណាអំពីការផ្ដល់សំណង។
ក៏ប៉ុន្តែគ្រួសារទាំងនោះបានច្រានចោលសំណើរបស់លោកអភិបាល ឃ្លាំង ហួត និងបាននិយាយថា ពួកគេនឹងប្ដឹងក្រុមហ៊ុនOverseas Cambodian Investment Corporation (OCIC) ទៅសាលារាជធានី។
លោក យ៉ា លាងហាក់ អាយុ៤០ឆ្នាំបាននិយាយក្រោយពីចេញពីការប្រជុំជាមួយលោក ឃ្លាំង ហួត និងលោក ទូច សំណាង អ្នកគ្រប់គ្រងគម្រោង OCIC ថា ” យើងនឹងតវ៉ាទៅសាលារាជធានីហើយផ្ដល់ឲ្យពួកគេនូវជម្រើសពីរ៖ ទី១ គឺកាត់ដីរបស់យើងចេញពីដីរបស់ក្រុមហ៊ុន ហើយអនុញ្ញាតឲ្យយើងរស់នៅទីនោះដោយសុខសាន្ត ទី២ ផ្ដល់ឲ្យយើងនូវសំណងដែលស្មើនឹងតម្លៃដីរបស់យើង”។
លោកអភិបាលបានរៀបចំកិច្ចប្រជុំនេះដើម្បីព្យាយាមស្វែងរកដំណោះស្រាយមួយសម្រាប់ប្រជាជនប្រហែល៤០គ្រួសារ ដែលមិនព្រមប្រគល់ដីរបស់ខ្លួនទៅឲ្យក្រុមហ៊ុន OCIC។ កិច្ចប្រជុំនេះធ្វើឡើងនៅការិយាល័យខណ្ឌជ្រោយចង្វា ដែលស្ថិតក្នុងទីបរិវេណជាមួយទីស្នាក់ការខណ្ឌរបស់គណបក្សប្រជាជនកម្ពុជាកាន់អំណាច និងមានសន្តិសុខ OCIC យាមការពារ។
អ្នកភូមិជាច្រើននាក់បានបង្ហាញបង្កាន់ដៃដែលបញ្ជាក់ថា ពួកគេបានកាន់កាប់ដីដែលពួកគេកំពុងរស់នៅនោះតាំងពីការដួលរលំរបបខ្មែរក្រហមជាងបីទសវត្សរ៍មកហើយ។ ប្រសិនបើពិតមែន គ្រួសារប្រជាជនទាំងនេះមានសិទ្ធិស្របច្បាប់ទទួលបានប័ណ្ណកម្មសិទ្ធិដី។
ក្រោយពីកិច្ចប្រជុំ លោក ឃ្លាំង ហួត បានអញ្ជើញអ្នកយកព័ត៌មាន និងតំណាងអង្គការមិនមែនរដ្ឋាភិបាលចូលការិយាល័យរបស់លោក។ លោកបានមានប្រសាសន៍ថា ” ខ្ញុំសន្យាថា នឹងមិនមានការបូមខ្សាច់ទេ រហូតដល់ប្រជាជនមានការព្រមព្រៀង។ ខ្ញុំសន្យាថា នឹងមិនមានអំពើហិង្សាប្រើលើប្រជាជនឡើយ”។
ប៉ុន្តែមិនទាន់ឃើញមានដំណោះស្រាយទេកាលពីរសៀលម្សិលមិញ ខណៈដែលលោកអភិបាលខណ្ឌ និងក្រុមហ៊ុន OCIC មិនបានបន្ថែមអ្វីទៅនឹងសំណើផ្ដល់សំណង ដែលក្រុមអ្នកភូមិបានបដិសេធរួចទៅហើយ គឺអគារក្នុងប្លុកផ្ទះល្វែងនៅខាងក្នុងទីបរិវេណយាមការពារដោយសន្តិសុខក្រុមហ៊ុន OCIC។
លោក ស សំអុល ជាអ្នកភូមិម្នាក់បាននិយាយថា ” ខ្ញុំមិនអាចទៅរស់នៅក្នុងអគារនេះបានទេ។ វាមិនធំល្មមសម្រាប់គ្រួសារខ្ញុំ ដែលសមាជិកប្រាំមួយនាក់ឡើយ”។ទាហានជើងទឹកអាយុ៥១ឆ្នាំរូបនេះ ដែលបម្រើការនៅកងនាវាកម្ពុជា បាននិយាយថា ជម្លោះដីនេះគឺជាការធ្វើតេស្តភក្ដីភាពរបស់លោក។ លោកបាននិយាយថា “ខ្ញុំបានខិតខំជួយប្រទេសនេះអស់រយៈពេល៣១ឆ្នាំ។ ប្រសិនបើខ្សាច់ហូរចេញពីបំពង់នោះជាថ្មី ខ្ញុំនឹងលែងមានកម្លាំងបម្រើប្រទេសរបស់ខ្ញុំទៀតហើយ”៕ មានិត