កាលពីម្សិលមិញ លោកនាយករដ្ឋមន្ត្រី ហ៊ុន សែន បានមានប្រសាសន៍ថា សេចក្ដីរាយការណ៍តាមប្រព័ន្ធផ្សព្វផ្សាយរបស់ថៃស្ដីអំពីការដោះដូរអ្នកទោសរវាងប្រទេសថៃ និងប្រទេសកម្ពុជា គឺមិនត្រឹមត្រូវទេ ទោះបីជាថ្មីៗនេះមានការដោះលែងអ្នកទោស និងការសន្យាដោះលែងអ្នកទោសក្នុងប្រទេសទាំងពីរសុទ្ធតែបង្ហាញពីសញ្ញានៃការដោះដូរក្ដី។
កាលពីថ្ងៃអង្គារ លោក វីរ៉ា ស៊ុមក្វាមឃីដ សកម្មជនជាតិនិយមជ្រុលថៃ ដែលត្រូវបានសាលាដំបូងរាជធានីភ្នំពេញផ្ដន្ទាទោសឲ្យជាប់ពន្ធនាគាររយៈពេលប្រាំបីឆ្នាំពីបទចូលទឹកដីកម្ពុជាដោយខុសច្បាប់ និងបទចារកម្ម ត្រូវបានដោះលែងឲ្យមានសេរីភាពឡើងវិញក្រោយពីទទួលបានការព្រះរាជទានលើកលែងទោសពីព្រះមហាក្សត្រខ្មែរ។ ប៉ុន្មានម៉ោងបន្ទាប់ពីលោក វីរ៉ា សុ៊មក្វាមឃីដ បានទៅដល់ក្រុងបាងកកនៅថ្ងៃស្អែកឡើង ប្រទេសថៃបានប្រកាសផែនការរបស់ខ្លួនដោះលែងប្រជាពលរដ្ឋខ្មែរចំនួន១៤នាក់ ដែលត្រូវបានចាប់ខ្លួនក្នុងពេលថ្មីៗពីបទប្រើប្រាស់ទិដ្ឋាការក្លែងក្លាយ។
លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា កម្ពុជាសង្ឃឹមថាប្រជាពលរដ្ឋខ្មែរទាំង១៤នាក់នោះនឹងត្រូវគេបញ្ជូនត្រឡប់មកវិញនៅថ្ងៃនេះ។ លោកបានមានប្រសាសន៍ទៀតថា “ប៉ុន្តែខ្ញុំមិនច្បាស់ទេ រង់ចំាមើលសិន”។ កាលពីម្សិលមិញ លោក ហ៊ុន សែន បានអះអាងថា សេចក្ដីរាយការណ៍តាមប្រព័ន្ធផ្សព្វផ្សាយរបស់ថៃអំពីការដោះដូរអ្នកទោសគឺមិនត្រឹមត្រូវឡើយ។ លោកបានបញ្ជាក់ថា ” វាមិនមែនជាការដោះដូរទេ វាមិនមែនជាថ្នូរទេ យើងដោះលែងដោយគ្មានលក្ខខណ្ឌឡើយ”។
ចាប់តាំងពីថ្ងៃអង្គារមក រដ្ឋាភិបាលបានព្យាយាមបកស្រាយពាក់ព័ន្ធនឹងការដោះលែងលោក វីរ៉ា ស៊ុមក្វាមឃីដ ភ្លាមៗអំឡុងដំណើរទស្សនកិច្ចរបស់រដ្ឋមន្ត្រីការបរទេសស្ដីទីថៃថា គ្មានអ្វីក្រៅពីកាយវិការសុច្ឆន្ទៈទេ។
លោក ហ៊ុន សែន បានមានប្រសាសន៍បែបនេះនៅក្នុងរាជធានីភ្នំពេញកាលពីម្សិលមិញ អំឡុងពិធីប្រកាសចាប់ផ្ដើមផែនការយុទ្ធសាស្ត្រជាតិសម្រាប់ជនពិការ និងជាការរំឭកខួបប្រាំឆ្នាំនៃការអនុម័តច្បាប់ស្ដីពីការគាំពារ និងការលើកកម្ពស់សិទ្ធិជនពិការ។ លោក ហ៊ុន សែន បានអំពាវនាវឲ្យក្រសួងសង្គមកិច្ច មានការប្រុងប្រយ័ត្ននៅក្នុងការប្រយុទ្ធប្រឆាំងការធ្វើទារុណកម្មកុមារ ដោយលោកបានគូសបញ្ជាក់ពីករណីមួយក្នុងពេលថ្មីៗនេះ ដែលក្មេងវត្តអាយុ៩ឆ្នាំម្នាក់ត្រូវបានព្រះសង្ឃមួយអង្គធ្វើទារុណកម្មអស់រយៈពេលរាប់ខែ។
ព្រះសង្ឃដែលត្រូវបានចាប់ខ្លួន និងផ្សឹកនេះ ត្រូវបានចោទប្រកាន់ពីបទធ្វើទារុណកម្មក្មេងប្រុសរងគ្រោះដោយសាររឿងបន្តិចបន្តួច ដោយការដុតទៀនសម្រក់លើក្មេងរងគ្រោះ ស្រោចទឹកក្ដៅលើ និងឆក់ខ្សែភ្លើងទៀតផង។
លោក ហ៊ុន សែន បានមានប្រសាសន៍ថា “វាជាទង្វើអាក្រក់ជួជាតិដែលព្រះសង្ឃប្រព្រឹត្តបទល្មើសបែបនេះ ហើយអ្នកខ្លះយកកុមារចេញពីមណ្ឌលកុមារកំព្រាដើម្បីធ្វើបាបពួកគេ។ លោកនាយករដ្ឋមន្ត្រីបានមានប្រសាសន៍ទៀតថា ប្រសិនបើយើងមិនអាចការពារ [កុមារទាំងនេះ] បានទេ យើងត្រូវទុកពួកគេឲ្យនៅក្នុងមណ្ឌលកុមារកំព្រា”៕ សុខុម