បើទោះជាមានភាពតានតឹងនាពេលថ្មីៗជុំវិញការវិលត្រឡប់មកវិញដ៏គំហុកនៃពលករខ្មែរ ដែលភៀសខ្លួនចេញពីការបង្ក្រាបដោយរបបយោធាថៃលើពលករខុសច្បាប់ក្ដី ក៏ក្រុមមន្ត្រីរដ្ឋាភិបាលបាននិយាយថា ស្ថានការណ៍រវាងប្រទេសទាំងពីរល្អជាធម្មតាកាលពីម្សិលមិញ អំឡុងពិធីអបអរខួបទី៦នៃការចុះបញ្ជីប្រាសាទព្រះវិហារជាសម្បត្តិបេតិកភណ្ឌពិភពលោក។
លោក ទៀ បាញ់ រដ្ឋមន្ត្រីក្រសួងការពារជាតិបានមានប្រសាសន៍ថា ជម្លោះព្រំដែនជុំវិញបរិវេណប្រាសាទ ដែលបានឈានទៅដល់ការប្រយុទ្ធគ្នាចុងក្រោយកាលពីឆ្នាំ២០១១នោះ លែងជាកង្វល់ដល់ប្រជាជនដែលរស់នៅក្នុងតំបន់នោះទៀតហើយ។ លោកបានមានប្រសាសន៍ថា ” នេះមិនមែនជាបញ្ហាដែលប្រទេសណាមួយចង់បាននោះទេ។ ឥឡូនេះ ស្ថានការណ៍គឺស្រួលជាងមុន”។
ថ្លែងទៅកាន់ទាហាន នគរបាល មន្ត្រីរដ្ឋាភិបាល និងនិស្សិតប្រហែល១.០០០នាក់ ដែលមកជួបជុំគ្នាក្នុងឱកាសនេះ លោក ជុច ភឿន ប្រធានអាជ្ញាធរជាតិប្រាសាទព្រះវិហារ ក៏បានគូសបញ្ជាក់អំពីសារៈសំខាន់នៃទំនាក់ទំនងល្អជាមួយប្រទេសថៃដែរ។ លោកបានមានប្រសាសន៍ថា “មិនមានបញ្ហារវាងអាជ្ញាធររបស់យើង និងអាជ្ញាធរថៃទេ ហើយកងទ័ពក៏មានទំនាក់ទំនងធម្មតាជាមួយគ្នាដែរ”។
ក្នុងសាលក្រមដែលចេញកាលពីខែវិច្ឆិកាឆ្នាំនោះ តុលាការអន្តរជាតិក្រុងឡាអេបានសម្រេចថា ទឹកដីជុំវិញប្រាសាទព្រះវិហារជារបស់ប្រទេសកម្ពុជា ប៉ុន្តែបានបដិសេធសំណើរបស់ប្រទេសកម្ពុជា សុំឲ្យកំណត់បន្ទាត់ព្រំដែននៅជិតប្រាសាទនេះ៕ មានិត