29 C
Phnom Penh

​កង​រាជ​អាវុធ​ហត្ថ​បាញ់​រថយន្ត​សង្ស័យ​ដឹក​ឈើ​ខុស​ច្បាប់បណ្តាល​ឲ្យ​​មនុស្ស​ម្នាក់​ស្លាប់

ដោយ ឌឹ ខេមបូឌា ដេលី

បទវិភាគ

យោងតាម​នគរ​បាល​បាន​ឲ្យ​ដឹង​ថា បុរស​ម្នាក់​បាន​ស្លាប់ និង​បុរស​ម្នាក់​ទៀត​បាន​រង​របួស​ធ្ងន់នៅ​ពេល​ដែល​កង​​រាជ​អាវុធហត្ថ​បាន​បាញ់​រថយន្ត​មួយ​គ្រឿង​ដែល​សង្ស័យ​ដឹក​ឈើ​ខុស​ច្បាប់​ចេញ​ពី​ព្រៃការ​ពារ​នៅ​ស្រុក​កែវ​សីមា ក្នុង​ខេត្ត​មណ្ឌល​គិរី កាលពីយប់​ថ្ងៃ​ពុធ​។

វ៉ាន់ សុផានិត អាយុ​២៥​ឆ្នាំ​ ជា​អ្នក​បើក​បរ​រថយន្តនោះ​បាន​ស្លាប់​បន្ទាប់ពី​ត្រូវ​បាន​បាញ់​ធ្លាយ​ទ្រូង។ ផាត ស៊ូកានី អាយុ​២២​ឆ្នាំ​​ ជាកូន​ចុង​របស់​មេបញ្ជាការ​រង​ក​ង​រាជ​អាវុធ​ហត្ថ​េខត្ត​នេះ​ក៏​ត្រូវ​បាន​បាញ់​ចំ​ដង​ខ្លួន​ដែរ​ ហើយ​ត្រូវ​បានបញ្ជូន​ទៅ​ព្យាបាល​របួស​ធ្ងន់​នៅ​ក្នុង​ប្រទេស​វៀតណាម។

យោងតាម​លោក ញ៉ែម វណ្ណី មេបញ្ជាការ​កង​រាជ​អាវុធ​​ហត្ថ​ខេត្ត​មណ្ឌល​គិរី បាន​ឲ្យ​ដឹង​ថា ផេង សុខេង ដែល​នគរ​បាល​និយាយ​ថា ជា​អ្នក​បាញ់នោះ​ គឺ​ជា​មន្ត្រី​កង​រាជ​អាវុធ​ហត្ថ​លើ​ផ្ទៃ​ប្រទេស​ ដែល​ត្រូវ​បាន​បញ្ជូន​ទៅ​ខេត្តនេះ​ឲ្យ​ជួយ​ការ​ពារ​ព្រៃ​ឈើ​នៅ​ស្រុក​​កែវសីមា។

លោក វណ្ណី បាន​និយាយ​ថា រថយន្ត​ដែល​មាន​មនុស្ស​ជិះ​បួន​នាក់​នេះ​ មិន​ព្រម​​ឈប់​នៅ​កន្លែង​ត្រួត​ពិនិត្យ​ទេ​ នៅ​ពេល​ដែល​បើក​បរ​ចេញពីព្រៃ​នេះ​ ដោយ​ធ្វើ​ឲ្យ​មន្ត្រី​នៅ​ទី​នោះ​បាញ់​ព្រមាន​ជាច្រើន​គ្រាប់​ ហើយ​បន្ទាប់​មក​បាន​បាញ់​មួយ​គ្រាប់​ទៅ​លើ​រថយន្តនោះ។

លោក​ វណ្ណី បាន​និយាយ​ថា ” កង​រាជ​អាវុធ​ហត្ថ​​មួយ​ក្រុម​បាន​ហៅ​រថយន្ត​នោះ​ឲ្យឈប់ ពីព្រោះពួកគេ​គិត​ថា មនុស្ស​ទាំង​នោះ​ប្រហែល​ជា​ប្រព្រឹត្ត​បទ​ល្មើស​ណាមួយ​ហើយ ប៉ុន្តែ​ពួកគេ​មិន​បាន​ឈប់​ឡើយ​”។ លោក​បាន​ឲ្យ​ដឹង​ថា ” គ្រាប់​កាំភ្លើង​មួយ​គ្រាប់​ត្រូវ​បាន​បាញ់​ឡើង​លើ​ និង​មួយ​គ្រាប់​ទៀត​បាញ់​ត្រូវ​បុរស​ដែលអង្គុយនៅ​កៅអី​ក្រោយ​ ហើយ​បាន​ប្លាត​ទៅ​​ត្រូវ​បុរស​ដែល​ជា​អ្នក​បើក​បរ​រថយន្ត​”។

លោក​ វណ្ណី បាន​និយាយ​ថា បន្ទាប់ពី​ វា៉ន់ សុផានិត បាន​ត្រូវ​គ្រាប់​ហើយ រថយន្ត​នោះ​បាន​ធ្វើ​ដំណើរ​ទៅមុខ​បាន​ប្រហែល​៣០០​ម៉ែត្រ​មុន​ពេល​ឈប់​​។ មនុស្ស​ដែល​មិន​​រង​របួស​ទាំង​ពីរ​នាក់​​បាន​រត់​ចូលទៅ​ក្នុង​ព្រៃ​។ ក្រុម​មន្ត្រី​ដែល​មាន​បំណង​បញ្ឈប់​រថយន្ត​តូយ៉ូតា​កាមរី​​នេះ ​រួម​មាន​មន្ត្រី​រដ្ឋបាលព្រៃ​ឈើ​ និង​ទាហាន​ ហើយ​បន្ទាប់​មក​បាន​ឆែក​រថយន្ត​នោះ និងមិន​បាន​រក​ឃើញ​ថា រថយន្ត​នោះ​​មាន​ដឹក​ឈើ​ទេ​។

លោក វណ្ណី បាន​និយាយ​ថា លោក​ សុខេង ដែល​ជា​អ្នកបាញ់​ កំពុង​ត្រូវ​បាន​កង​រាជ​អាវុធ​ហត្ថ​ខេត្ត​សាក​សួរ​។ លោក​បាន​មាន​ប្រសាសន៍​ថា ” ការ​ប្រើ​ប្រាស់​អាវុធ​បែ​ប​នេះ​នៅពេល​ដែល​ជនសង្ស័យ​គ្មាន​អាវុធ​ ឬ​ឈរ​ស្ងៀម​នោះ វា​មិន​ត្រឹម​ត្រូវ​ទាល់​តែ​សោះ​​”។

ក្នុង​រយៈ​ពេល​ប៉ុន្មាន​ខែ​ថ្មីៗ​នេះ មាន​ភាព​តានតឹង​ខ្លាំង​ណាស់ពាក់​ព័ន្ធ​ការ​កាប់​ឈើ​ខុស​ច្បាប់​នៅ​ភាគ​ខាង​ត្បូង​ក្នុង​ខេត្ត​មណ្ឌលគិរី ដោយអ្នកភូមិ​ដែ​ល​ពឹង​ផ្អែក​លើ​ព្រៃ​ឈើ​ដើម្បី​​ផ្គត់ផ្គង់​ជីវភាព ​បាន​និយាយ​កាលពី​ខែ​មិថុនាថា ពួកគេ​មិន​អាច​ពឹង​ផ្អែក​លើ​អាជ្ញាធរ​ឲ្យ​ការ​ពារ​ព្រៃ​ឈើ​បានទៀត​ទេ ពីព្រោះ​ពួកគេ​តែង​តែ​ចូល​រួម​នៅ​ក្នុង​ការ​កាប់​ឈើ​ខុស​ច្បាប់​។

កាលពីខែកុម្ភៈ នគរ​បាល​និង​កងរាជ​អាវុធ​ហត្ថ​ខេត្ត​មួយ​ក្រុម​មាន​គ្នា​ជាង​២០​នាក់​បាន​ឡោម​ព័ទ្ធ​ផ្ទះ​ឧត្តម​សេនីយ៍ត្រី​ ឈិត ម៉េង ​​មេបញ្ជាការ​កង​រាជ​អាវុធ​ហត្ថ​ខេត្ត​ នៅ​ក្នុង​ស្រុក​មណ្ឌល​សីមា ដែល​ជាប់​សង្ស័យ​ថា បាន​ជាប់​ពាក់ព័ន្ធ​នៅ​ក្នុង​ការ​រក​ស៊ី​ឈើ​ខុស​ច្បាប់​។

អាជ្ញាធរ​បាន​រក​ឃើញ​ឈើ​ប្រណីត​ជាង​៥០​ដុំ​នៅ​ក្នុង​ផ្ទះ​របស់​ឧត្តម​សេនីយ៍​ត្រី ឈិត ម៉េង ប៉ុន្តែ​មិន​មាន​ការ​ចាប់​ខ្លួនមនុស្ស​ទេ។

កាលពី​ខែ​ឧសភា អំឡុង​ពេល​ឆ្មក់​ចាប់​នៅ​មុន​ពេល​ថ្ងៃ​រះ​ទៅ​លើ​ក្រុម​អ្នក​ដឹក​ឈើ​មួយ​ក្រុម មន្ត្រី​កង​រាជ​អាវុធ​ហត្ថ​ម្នាក់​បាន​ទាញ​កាំភ្លើ​ង​ភ្ជង់​ក្បាល​លោក ស៊ិន វណ្ណវុធ អភិបាល​ស្រុក​កែវ​សីមា មុនពេល​គេ​ច​ខ្លួន​។

កាលពី​ខែ​មករា លោក សុខ រដ្ឋា ជា​អ្នក​ស៊ើប​អង្កេត​នៅ​អង្គការ​អាដ​ហុក បាន​ធ្វើ​ពាក្យ​បណ្ដឹង​ពីបទ​ប៉ុន​ប៉ង​មនុស្ស​ឃាត​ បន្ទាប់ពីអ្នក​បើក​បរ​រថយន្ត​ទំនើប​មួយគ្រឿង​បាន​ប៉ុន​ប៉ង​បុក​សម្លាប់គាត់ ពេល​គាត់​ស៊ើប​អង្កេត​លើ​ការ​អះអាង​ថា ក្រុម​ហ៊ុនមួយ​ដែល​ជា​ក្រុម​ហ៊ុន​របស់​ភរិយា​លោក យឹម លុច អភិបាលរង​ខេត្ត​ បាន​រាន​ដីខុស​ច្បាប់​នៅ​ក្រុង​សែនមនោរម្យ។

កាលពី​ដើម​ខែ​នេះ លោក ហេង ចន្ត្រា នាយខណ្ឌ​រង​រដ្ឋបាល​ព្រៃ​ឈើ​ក្រុង​សែន​មនោរម្យ ត្រូវ​បាន​ជន​ល្មើស​មិន​ស្គាល់​មុខ​ម្នាក់​បាញ់​​នៅពេល​​គាត់​កំពុង​ស៊ើប​អង្កេត​លើ​សេចក្ដីរាយ​ការណ៍​មួយ​ថា រថយន្ត​ដឹក​ឈើ​ប្រណីត​កំពុង​បើក​បរ​ឆ្ពោះទៅ​ព្រំដែន​វៀតណាម​។

លោក ស្វាយ សំអេង អភិបាល​រង​ខេត្ត​ម្នាក់​ទៀត​បាន​និយាយ​ថា បន្ទាប់​ពី​មាន​ឧបទ្ទវ​ហេតុ​កាលពីម្សិលមិញ លោក​បាន​កោះ​ប្រជុំ​ជាមួយ​មន្ត្រី​មូល​ដ្ឋាន​ដើម្បី​ពិភាក្សា​អំពី​​ភាព​អនាធិបតេយ្យ​នៅ​ក្នុង​ខេត្ត​មណ្ឌលគិរី​។

លោក សំអេង បាន​និយាយ​ថា នៅ​ពេល​ដែល​​មាន​ការ​កាប់​ឈើ​​កាន់​តែ​ច្រើន​គ្រប់​គ្រង​លែង​បាន​ និង​មាន​អ្នក​កាប់​ឈើ​កាន់​តែ​ច្រើននោះ មាន​មន្ត្រី និងសកម្មជន​ការ​ពារ​ព្រៃ​​ជា​ច្រើន​បានចុះ​មក​ខេត្តនេះ​ ហើយ​លោក​មិន​បាន​តាម​ដាន​ថា តើ​មន្ត្រី​ណា​​​បាន​ធ្វើ​អ្វី​​ខ្លះ និង​មន្ត្រី​ណា​​បាន​ប្រព្រឹត្ត​ខុស​ច្បាប់​នោះ​ទេ​។

លោក​បាននិយាយ​ថា ” ដើម្បីជៀស​វាង​ភាព​អនាធិបតេយ្យ​ យើង​ត្រូវ​មាន​ការ​ត្រួត​ពិនិត្យ​ឲ្យ​បាន​ហ្មត់​ចត់​ថា មន្ត្រី​ណាខ្លះមក​ចូលរួម​ជាមួយ​កង​រាជ​អាវុធហត្ថ​ និង​ត្រួតពិនិត្យ​លើ​ការ​ប្រើ​ប្រាស់​អាវុធ”៕ គឹមហឿន​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស