មេបញ្ជាការរងកងទ័ពអាកាស និងនាយទាហានបីរូបផ្សេងទៀតបានបាត់បង់ជីវិតកាលពីព្រឹកម្សិលមិញ នៅពេលឧទ្ធម្ភាគចក្រយោធាមួយគ្រឿងធុន Z-9 ផលិតនៅប្រទេសចិន បានធ្លាក់ចូលរណ្តៅដីមានទឹកដ៏ធំមួយ អំឡុងពេលហ្វឹកហ្វឺនតាមទម្លាប់ធម្មតានៅបែ៉កនិរតីរាជធានីភ្នំពេញ។ 
ហេតុការណ៍ធ្លាក់ឧទ្ធម្ភាគចក្រនេះបានកើតឡើងនៅម៉ោងជាង៩ព្រឹក ក្នុងសង្កាត់ព្រៃស ខណ្ឌដង្កោ នៅពេលឧទ្ធម្ភាគចក្រនេះព្យាយាមចុះចតនៅលើដីកៀកនឹងមាត់រណ្តៅដ៏ធំនេះ។
វីដេអូឃ្លីបដែលថតបានដោយអ្នកឃើញហេតុការណ៍ដែលរៀបរាប់ថា ឧទ្ធម្ភាគចក្រនេះហោះចុះហោះឡើង ប្រហែល១០ដងមុនពេលវាធ្លាក់នោះ បង្ហាញពីសកម្មភាពឧទ្ធម្ភាគចក្រនេះជិតចុះដល់ដីទៅហើយ មុនពេលវាហោះឡើងវិញ ហើយដាំក្បាលចូលក្នុងរណ្តៅ។
នាយឧត្តមសេនីយ៍ មឹុង សំផន រដ្ឋលេខាធិការក្រសួងការពារជាតិដែលបានចុះទៅបញ្ជាប្រតិបត្តិការសង្គ្រោះដោយផ្ទាល់ បានមានប្រសាសន៍ថា មន្ត្រីយោធាចំនួនបួនរូបបានបាត់បង់ជីវិត ហើយមួយរូបទៀតត្រូវបានអ្នកភូមិជួយសង្គ្រោះ។
លោកបានបញ្ជាក់អត្តសញ្ញាណអ្នកស្លាប់ទាំងបួននាក់ ដែលមានដូចជា ឧត្តមសេនីយ៍ត្រី អៀង វណ្ណារិទ្ធិ មេបញ្ជាការរងទ័ពអាកាស ដែលជាប្រធានសាលាហ្វឹកហ្វឺនបើកឧទ្ធម្ភាគចក្ររបស់យោធា វរសេនីយ៍ត្រី អ៊ុក ប៊ុណ្ណាហា វរសេនីយ៍ត្រី ថន វណ្ឌី និងវរសេនីយ៍ត្រី ខាំ ប៊ុនណាន។
មនុស្សទី៥ដែលជិះលើឧទ្ធម្ភាគចក្រនេះគឺលោក ចេង សុខសំបូរ ដែលជាសិស្សនាយទាហានមួយរូបកំពុងហ្វឹកហាត់បើកបរឧទ្ធម្ភាគចក្រ ត្រូវបានសង្គ្រោះពីហេតុការណ៍ធ្លាក់ឧទ្ធម្ភាគចក្រនេះ និងត្រូវបានបញ្ជូនទៅមន្ទីរពេទ្យកាល់ម៉ែតនៅម៉ោងប្រហែល១០ និង២០នាទីព្រឹក។ ខ្សែវីដេអូបានបង្ហាញពីទិដ្ឋភាពលោក ចេង សុខសំបូរ សន្លប់ និងស្លៀកពាក់ស៊ីវិលបន្ទាប់ពីត្រូវបានសង្គ្រោះ។
លោក ជា ចាន់សារឿន កម្មករកាត់ដេរម្នាក់ដែលបានឈប់សម្រាកពីការងារ និយាយថា នៅពេលគាត់កំពុងទទួលទានអាហារនៅផ្ទះរបស់គាត់ក្បែរនោះ ក៏ឮសំឡេងឧទ្ធម្ភាគចក្រហោះក្រឡឹងរណ្តៅនេះ នៅពេលវាព្យាយាមចុះចតម្តងហើយម្តងទៀត។
កម្មកររូបនេះនិយាយទៀតថា ” ពេលនោះខ្ញុំបានឮសំឡេងផ្ទុះ នៅពេលវាប៉ះត្រូវទឹក។ នៅពេលឧទ្ធម្ភាគចក្រលិចបាត់ចូលទៅក្នុងទឹក ប្រហែល៥នាទីក្រោយមក ក៏មានបុរសម្នាក់អណ្តែតឡើងមក គាត់ពិតជាអាយុថ្លៃណាស់”។
សាកសពមនុស្សបួននាក់ទៀតត្រូវបានស្រង់ចេញពីទឹកនៅចន្លោះម៉ោង៤រសៀលដល់ម៉ោង៦ល្ងាច បន្ទាប់ពីប្រតិបត្តិការមុជទឹករុករកដ៏ធំ។
កាលពីម្សិលមិញ គេមិនទាន់ដឹងច្បាស់ពីមូលហេតុដែលឧទ្ធម្ភាគចក្រនេះធ្លាក់នៅឡើយទេ។ មន្ត្រីមានវត្តមាននៅកន្លែងកើតហេតុ រួមទាំងលោក ទៀ បាញ់ រដ្ឋមន្ត្រីក្រសួងការពារជាតិ ដែលបានពណ៌នាពីរណ្តៅដីមានទឹកដ៏ធំនេះថា ជា ” រណ្តៅនរក”ផងដែរនោះ បានប្រាប់ក្រុមអ្នកយកព័ត៌មាន ឲ្យរង់ចាំរកឃើញប្រអប់ខ្មៅនៅក្នុងឧទ្ធម្ភាគចក្រនេះសិន ដើម្បីទទួលបានព័ត៌មានបន្ថែមទៀត។
នៅកន្លែងកើតហេតុ បុគ្គលិកថែទាំឧទ្ធម្ភាគចក្រម្នាក់នៅមូលដ្ឋានទ័ពអាកាសពោធិ៍ចិនតុង ដែលឧទ្ធម្ភាគចក្រ Z-9 ហោះចេញពីទីនោះបាននិយាយថា ឧទ្ធម្ភាគចក្រនេះគ្មានបញ្ហាបច្ចេកទេសទេ។
“ វាមិនអីទេ គ្មានបញ្ហាទេ” នេះជាការលើកឡើងរបស់បុរសរូបនេះ ដែលសុំមិនបញ្ចេញឈ្មោះរបស់ខ្លួន ប៉ុន្តែ ស្លៀកពាក់ឯកសណ្ឋាន ដែលមានស្លាកសញ្ញាសាជីវកម្មឧស្សាហកម្មអាកាសចរណ៍ចិន (AviationIndustryCorporationofChina )ដែលជាក្រុមហ៊ុនផលិតឧទ្ធម្ភាគចក្រ Z-9 នេះ”។
មន្ត្រីជាច្រើននាក់បានចាប់ផ្តើមទៅដល់កន្លែងកើតហេតុនៅម៉ោងប្រហែល១០ព្រឹក ដោយបំណែកតូចមួយនៃតួឧទ្ធម្ភាគចក្រអណ្តែតលើផ្ទៃទឹក ហើយមានមនុស្សជិត២.០០០នាក់សម្លឹងមើលទៅជញ្ជាំងរណ្តៅដ៏ធំនេះ។
ដោយចុះទៅក្នុងរណ្តៅទឹកនេះជាមួយទាហានឯកសណ្ឋាននៅម៉ោងប្រហែល១១ព្រឹក នាយឧត្តមសេនីយ៍ ហ៊ុល សំអុ៊ន មេបញ្ជាការកងពលតូចដឹកជញ្ជូនលេខ៩៩បានប្រាប់ទាហានឲ្យចាប់ផ្តើមមុជទឹករុករកមន្ត្រីបាត់ខ្លួនទាំងបួននាក់។ លោកបានបញ្ជាទៅកូនទាហានថា ” ពួកហ្អែងមកមើល ឬមកជួយមនុស្ស? ចុះទឹក”។
ដោយស្រាតខោអាវសស់តែខោទ្រនាប់ ទាហានទាំងនេះចាប់ផ្តើមហែលទឹកដើម្បីស្រង់យកតួឧទ្ធម្ភាគចក្រ។ អូប័រពីរគ្រឿងដែលគ្មានម៉ាស៊ីន ត្រូវបានចងខ្សែទម្លាក់ចុះទៅទឹក។
ក្រុមសង្គ្រោះមួយក្រុមបានទៅដល់កន្លែងកើតហេតុមុនម៉ោង១បន្តិច ហើយបានចាប់ផ្តើមប្រើខ្សែពួរ និងធុងខ្យល់អុកស៊ីហ្សែន ដើម្បីមុជទឹករុករកជនរងគ្រោះ និងស្រង់ ឧទ្ធម្ភាគចក្រឡើងលើគោក។
ពេលមុជរកឃើញឧទ្ធម្ភាគចក្រ Z-9 ដែលស្ថិតក្នុងចំណោមឧទ្ធម្ភាគចក្រ១២គ្រឿងទទួលបានកាលពីឆ្នាំមុន ក្រោមឥណទានជិត២០០លានដុល្លារ និងកិច្ចព្រមព្រៀងទិញលក់ជាមួយរដ្ឋាភិបាលចិន ក្រុមសង្គ្រោះបានចាប់ផ្តើមទាញឧទ្ធម្ភាគចក្រនេះយឺតៗចេញពីទឹក។
ប្រហែល១ម៉ោង បន្ទាប់ពីឧទ្ធម្ភាគចក្រ Z-9 បានអណ្តែតមកលើផ្ទៃទឹកជាលើកដំបូង សាកសពម្នាក់ក្នុងចំណោមសាកសពនាយទាហានទាំងបួននាក់ ដែលស្លាប់នៅក្នុងហេតុការណ៍ធ្លាក់ឧទ្ធម្ភាគចក្រនេះ ត្រូវបានស្រង់ចេញពីទឹក ដើម្បីបញ្ជូនចូលរថយន្តសង្គ្រោះបន្ទាន់ ដោយមានសាច់ញាតិម្នាក់យំដើរតាមសព។
៥នាទីក្រោយមក សាកសពនាយទាហានទី២ត្រូវបានរកឃើញពីឧទ្ធម្ភាគចក្រ ហើយសែងដាក់រថយន្តសង្គ្រោះបន្ទាន់។
សមាជិកក្រុមដោះមីនក្រោមទឹកនៃមជ្ឈមណ្ឌលសកម្មភាពកំចាត់មីនកម្ពុជា បានទៅដល់កន្លែងកើតហេតុភ្លាម ក៏ជួយរកសាកសពពីរនាក់ទៀត ដែលមិនទាន់បានរកឃើញក្នុងឧទ្ធម្ភាគចក្រ Z-9នៅឡើយ។
លោក មឹុង សំផន រដ្ឋលេខាធិការក្រសួងការពារជាតិ ដែលចុះដឹកនាំប្រតិបត្តិការសង្គ្រោះនេះ បានមានប្រសាសន៍បញ្ជាក់តាមទូរស័ព្ទថា សាកសពទាហានពីរនាក់នេះត្រូវបានរកឃើញពីទឹកនៅម៉ោងប្រហែល៦ល្ងាច។
នៅឯមន្ទីរពេទ្យកាល់ម៉ែត ដែលលោក ចេង សុខសំបូរ ជាអ្នកនៅរស់ពីគ្រោះថ្នាក់នេះកំពុងសម្រាកទទួលការព្យាបាល លោក ហៀង សេង ដែលជាឪពុកមារបស់លោក ចេង សុខសំបូរ បានលើកឡើងថា ក្មួយប្រុសរបស់គាត់បានដឹងខ្លួនឡើងវិញហើយ ប៉ុន្តែ ស្ថានភាពមិនទាន់នឹងននៅឡើយទេ។
លោក ហៀង សេង បានមានប្រសាសន៍ថា ” គាត់បានប្រាប់ខ្ញុំថា គាត់បានបើកបរកន្លះម៉ោងហើយ ហើយបន្ទាប់មកក៏បានផ្លាស់ប្តូរឲ្យទៅអ្នកហ្វឹកហាត់បើកបរវិញម្តង ពេលនោះវាក៏បានធ្លាក់ចុះមកក្រោម។ គាត់និយាយថា គាត់មិនដឹងពីមូលហេតុពិតប្រាកដដែលនាំឲ្យមានការធ្លាក់ឧទ្ធម្ភាគចក្រនេះ [ ហើយ ] គាត់គ្រាន់តែដឹងថា វាធ្លាក់នៅពេលវាប៉ះត្រូវទឹក”។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍នៅឯមន្ទីរពេទ្យថា រដ្ឋាភិបាលជាអ្នកចេញថ្លៃការព្យាបាលរបួសលោក ចេង សុខសំបូរ។ ទោះជាយ៉ាងណា វេជ្ជបណ្ឌិត ឈួយ ម៉េង ប្រធានផ្នែកសង្គ្រោះបន្ទាន់កម្រិតធ្ងន់បានមានប្រសាសន៍ថា របួសរបស់គាត់ជារបួសស្រាលប៉ុណ្ណោះ។
ពន្យល់ពីរូបស្គែនដែលបង្ហាញថា លោក ចេង សុខសំបូរ មិនបានរងរបួសធ្ងន់ លោកឈួយ ម៉េង មានប្រសាសន៍ទៀតថា ” គាត់របួសត្រង់មាត់ និងរបួសជាច្រើននៅលើដងខ្លួន [ ប៉ុន្តែ ] គាត់នៅតែអាចដកដង្ហើមបានល្អ និងមានសម្ពាធឈាមល្អ ស្មារតីរបស់គាត់ធម្មតា ហើយដៃនិងជើងរបស់គាត់អាចកម្រើកបានធម្មតាដែរ”៕ សុខុម
(រាយការណ៍បន្ថែមដោយ ឃី សុវុឌ្ឍី)