40.2 C
Phnom Penh

ស្ត្រី​បម្រើ​ការ​តាម​ផ្ទះ​នៅ​សិង្ហ​បុរី​ដក​ពាក្យ​បណ្តឹង​ដើម្បី​បាន​វិល​ត្រឡប់​មក​ផ្ទះ​វិញ

ដោយ ឌឹ ខេមបូឌា ដេលី

បទវិភាគ

ស្ត្រី​ម្នាក់​ដែលបាន​ចូលរួម​នៅ​ក្នុង​គម្រោង​សាក​ល្បង​របស់​ក្រសួង​ការ​ងារ​​ក្នុង​ការ​បញ្ជូន​​ស្ត្រី​បម្រើ​ការ​តាម​ផ្ទះ​ទៅ​ប្រទេស​សិង្ហបុរី​នោះ បាន​វិល​ត្រឡប់​មក​កម្ពុជា​វិញ​កាលពី​ម្សិល​មិញ បន្ទាប់ពី​បាន​ស្ថិត​នៅ​ក្រោម​ការ​គាំពារ​របស់​អង្គការ​ក្រៅ​រដ្ឋាភិបាល​មួយ​អស់​រយៈ​ពេល​ប៉ុន្មាន​ខែ​មក​។

យោង​តាម​អង្គការ​ក្រៅ​រដ្ឋាភិបាល​បាន​ឲ្យ​ដឹង​ថា ស្ត្រី​ដែល​មានអាយុ​៣៤​ឆ្នាំ​រូប​នេះ បាន​ដាក់​ពាក្យ​បណ្ដឹង​ពី​បទ​បំពាន​ផ្លូវ​ភេទ​ទៅ​នគរ​បាល​ និង​ក្រសួង​ការ​ងារ​សិង្ហបុរី ដើម្បី​ប្ដឹង​ឪពុក​វ័យ​ចំណាស់​របស់​ថៅកែ​នាង​ ប៉ុន្តែ​ត្រូវ​ដក​ពាក្យ​បណ្ដឹង​នោះ​វិញ​ដើម្បី​បាន​ចាក​ចេញ​ពីប្រទេស​នេះ។

លោក ជីវ ផល្លី ប្រធាន​នាយក​ដ្ឋាន​ប្រឆាំង​ការ​ជួញដូរ​មនុស្ស​នៃ​ក្រសួង​មហាផ្ទៃ​កម្ពុជា បាន​មាន​ប្រសាសន៍​ថា មន្ត្រី​របស់​លោក​បាន​ជួប​ពល​ករ​ដែល​វិល​ត្រឡប់​មក​វិញ​នេះ​នៅឯ​អាកាស​យាន​ដ្ឋាន​អន្តរ​ជាតិ​ភ្នំពេញ​កាលពី​ម្សិល​មិញ ប៉ុន្តែ​លោក​មិនព្រមធ្វើ​​អត្ថាធិប្បាយ​បន្ថែម​ទៀត​ទេ។

លោក ផល្លី បាន​មាន​ប្រសាសន៍​ថា ” យើង​បាន​ទទួល​ពល​ករ​ចំណាក​ស្រុក​កម្ពុជា​ម្នាក់​ ដែល​​វិល​​ត្រឡប់​មក​ពី​ប្រទេស​សិង្ហបុរី​នៅថ្ងៃ​នេះ ហើយ​ឥឡូវ​នេះយើង​កំពុង​សាក​សួរ​គាត់។ ខ្ញុំ​មិនអាច​ប្រាប់​លោក​នូវ​​ព័ត៌មាន​បន្ថែម​ទៀត​អំពី​រឿង​នេះ​បានទេ ពីព្រោះ​យើងកំពុង​ធ្វើការ​លើ​រឿង​នេះ​”។

លោកស្រី សារ៉ា ផ្យា​សាណូ ប្រធាន​កម្មវិធី​ប្រឆាំង​ការ​ជួញដូរ​មនុស្ស​ ដែល​ផ្ដល់​មូលនិធិ​ដោយអង្គការ​ USAID ដែល​បាន​ជួយ​បណ្ដុះ​បណ្ដាល​ស្ត្រី​បម្រើការ​តាម​ផ្ទះ​មុនពេល​ពួកគេ​ចាក​ចេញទៅប្រទេស​សិង្ហបុរី និង​ធ្វើការ​ជាមួយ​អង្គការ​នៅ​ប្រទេស​សិង្ហបុរី​ដើម្បី​តស៊ូមតិ​សម្រាប់​សិទ្ធិ​របស់​ពល​ករ​បាន​បញ្ជាក់​ថា ស្ត្រី​អាយុ​៣៤​ឆ្នាំរូប​នេះ​បាន​វិល​ត្រឡប​់​មក​វិញ​ហើយ។

ច្បាប់​សិង្ហបុរី​ចែង​ថា ភាគី​ណាមួយ​ដែលជាប់​ពាក់​ព័ន្ធ​នៅ​ក្នុង​បណ្ដឹង​ទៅ​នគរ​បាល​ ត្រូវ​តែ​ស្ថិត​នៅ​ក្នុង​ប្រទេស​នេះ​រហូត​ដល់​រឿង​ក្ដី​នោះ​ចប់​សព្វ​គ្រប់​។

លោកស្រី ផ្យាសាណូ បាន​និយាយ​ថា ” ច្បាស់​ហើយ​ថា នាង​បាន​ចុះ​ហត្ថលេខា​លើ​លិខិត​ដក​ពាក្យ​បណ្ដឹង​របស់​នាង​ ពីព្រោះ​ច្បាប់​សិង្ហបុរី​តម្រូវ​ឲ្យធ្វើ​បែប​នេះ​។ អង្គការ​ក្រៅ​រដ្ឋាភិបាល​នេះ​ពន្យល់​ប្រាប់​នាង​ថា ប្រសិន​បើ​អ្នក​ចង់​ចាក​ចេញ​ពី​ប្រទេស​សិង្ហបុរី​ អ្នក​ត្រូវ​ដក​ពាក្យ​បណ្ដឹង​របស់​អ្នក ហើយ​នាង​ពិត​​ជាចង់​មក​ផ្ទះ​វិញ​មែន​។

សារាចរ​ណែនាំ​របស់​ក្រសួង​ការងារ​ឲ្យ​ការ​ពារ​ពល​ករ​បម្រើ​ការ​តាម​ផ្ទះ​នៅ​ក្រៅ​ប្រទេស​លើក​ឡើង​ថា ទីភ្នាក់​ងារ​ជ្រើស​រើស​​ពល​ករ​ត្រូវ​តែ​ជួយ​ស្ត្រី​ដែល​រង​ការ​រំលោភ​បំពាន​ ក្នុង​ការ​ធ្វើ​ពាក្យ​បណ្ដឹង​ទៅ​នគរ​បាល​នៅ​ប្រទេស​កម្ពុជា​។

អ្នកស្រី សាមាន ត្រូវ​បាន​ក្រុមហ៊ុន​ហ្វីលីម័រ​បញ្ជូនទៅ​ប្រទេស​សិង្ហបុរី​កាលពី​ខែ​កុម្ភៈ។ ស្ត្រី​បម្រើ​តាម​ផ្ទះ​ពី​រ​នាក់​ទៀត​ ដែ​ល​ត្រូវបាន​ក្រុម​ហ៊ុន​ដដែ​ល​នេះបញ្ជូនទៅ​ប្រទេស​សិង្ហបុរី​នោះ ​បាន​វិល​ត្រឡប់​មក​វិញហើយ​កាល​ពី​ប៉ុន្មាន​សប្ដាហ៍​ថ្មីៗ​នេះ​ ហើយ​បាន​និយាយ​ថា ក្រុម​ហ៊ុន​ហ្វីលីម័រ​បាន​ដ​ក​ហូត​លិខិត​ឆ្លង​ដែន​របស់ពួកគេ​ និង​ឲ្យ​ពួកគេ​ចុះ​ហត្ថលេខា​លើ​កិច្ច​សន្យា​ជំពាក់​បំណុល​។ កាលពី​ម្សិល​មិញ គេ​មិនអាច​ទាក់​ទង​ទាំង​ក្រុម​ហ៊ុន​ហ្វីលីម័រ ​និង​ក្រសួង​ការ​ងារ​សុំ​ការ​អត្ថាធិប្បាយ​បាន​ទេ​៕ គឹមហឿន​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស