សមាជិកសភាជាប់ឆ្នោតគណបក្សប្រឆាំងបួនរូបត្រូវបានចាប់ខ្លួន និងនាំយកទៅឃាត់ទុកនៅស្នងការដ្ឋាននគរបាលរាជធានីមួយយប់ បន្ទាប់ពីមានការប៉ះទង្គិចគ្នាដោយហិង្សានៅពេលព្រឹករវាងសន្តិសុខខណ្ឌ និងអ្នកតវ៉ារបស់គណបក្សប្រឆាំងនៅជិតទីលានប្រជាធិបតេយ្យ ដែលមានការការពារសន្តិសុខតឹងរ៉ឹង។
លោក គៀត ច័ន្ទថារិទ្ធ អ្នកនាំពាក្យនគរបាលជាតិបានបញ្ជាក់ថា តំណាងរាស្ត្រជាប់ឆ្នោតគណបក្សប្រឆាំងទាំងបួនរូប គឺលោកស្រី មូរ សុខហួរ លោក ហូរ វ៉ាន់ លោក ម៉ែន សុថាវរិន្ទ្រ និងលោក កែវ ភិរម្យ នឹងត្រូវឃុំខ្លួនមួយយប់នៅស្នងការដ្ឋាននគរបាលរាជធានីភ្នំពេញ ប៉ុន្តែបានមានប្រសាសន៍ថា អាជ្ញាធរមិនទាន់បានសម្រេចថា តើត្រូវចាត់វិធានការអ្វីបន្តទៀតទេនៅថ្ងៃនេះ។ លោកបានមានប្រសាសន៍ថា ” សូមរង់ចាំមើលរហូតដល់ព្រឹកថ្ងៃស្អែក”។
មន្ត្រីទាំងបួនត្រូវបានឃាត់ខ្លួនពេញមួយថ្ងៃចំពោះការដឹកនាំការតវ៉ានេះ ដោយគ្មានការចោទប្រកាន់នៅស្នងការដ្ឋាននគរបាល ដែលស្ថិតនៅក្នុងខណ្ឌសែនសុខ។ ការប៉ះទង្គិចគ្នានេះបានកើតឡើងនៅម៉ោងប្រហែល៨ព្រឹក នៅតាមមហាវិថីព្រះនរោត្តម នៅពេលដែលសន្តិសុខខណ្ឌដូនពេញចាប់ផ្ដើមវាយតប់ជាមួយអ្នកតវ៉ា ដែលបានមកពីគ្រប់ទិសទីទៅប្រមូលផ្ដុំគ្នានៅទីនោះ ដើម្បីគាំទ្រការតវ៉ារបស់លោកស្រី មូរ សុខហួរ ប្រឆាំងនឹងការបិទទីលានប្រជាធិបតេយ្យ។
ក្នុងរយៈពេលជាងប្រាំមួយខែមកនេះ លោកស្រី មូរ សុខហួរ បានដឹកនាំការធ្វើបាតុកម្មជាញឹកញាប់ទៅកាន់ទីលានប្រជាធិបតេយ្យ ដែលត្រូវបានបិទដោយបន្លាលួសបន្ទាប់ពីរដ្ឋាភិបាលបានបង្ក្រាបដោយហិង្សាទៅលើការតវ៉ារបស់គណបក្សប្រឆាំង និងការធ្វើកូដកម្មរបស់កម្មកររោងចក្រកាត់ដេរនៅក្នុងទីក្រុងភ្នំពេញកាលពីថ្ងៃទី៣ និងទី៤ខែមករា។
ការប៉ុនប៉ងរបស់លោកស្រីដើម្បីចូលទីលានប្រជាធិបតេយ្យ ជារឿយៗត្រូវបានបញ្ចប់ដោយការបង្ហូរឈាម ដោយសារសន្តិសុខខណ្ឌដូនពេញវាយអ្នកគាំទ្រលោកស្រី និងអ្នកកាសែតដែលមិនព្រមស្ដាប់បញ្ជារបស់ពួកគេ។
ដោយមានស្ថានភាពប្រែប្រួលកាលពីម្សិលមិញ អ្នកតវ៉ាដែលចូលចិត្តលោកស្រី មូរ សុខហួរ បានពាក់បូពណ៌ទឹកក្រូច និងពណ៌លឿងនៅលើអាវរបស់ពួកគេ និងបានវាយតបវិញជាលើកដំបូងបន្ទាប់ពីសន្តិសុខខណ្ឌទាំងនោះចូលមកវាយអ្នកតវ៉ាដែលមិនព្រមចាកចេញពីកន្លែងនោះ។
អ្នកតវ៉ាដែលប្រើបង្គោលទង់ជាតិជ័រ និងដំបងឈើជាអាវុធនោះ បានបំបែកសន្តិសុខខណ្ឌ ដែលសាហាវទាំងនោះ ហើយបានរុញឲ្យពួកគេជាច្រើននាក់ដួលមុនពេលវាយពួកគេយ៉ាងខ្លាំង។ សន្តិសុខមួយចំនួនបានរត់គេចពីការវាយដំ ប៉ុន្តែសន្តិសុខជាច្រើននាក់មិនអាចគេចរួចទេ។
សន្តិសុខម្នាក់ដែលមានឈ្មោះថា ឆាយ ពិទូ ត្រូវបានវាយស្ទើរសន្លប់ ហើយត្រូវបាននាំទៅព្យាបាលនៅមន្ទីរពេទ្យកាល់ម៉ែតជាមួយសន្តិសុខផ្សេងទៀត បន្ទាប់មកនគរបាលបានឃាត់ខ្លួនលោកស្រី មូរ សុខហួរ លោក សុថាវរិន្ទ និងលោក ភិរម្យ នៅពេលដែលពួកគាត់ប៉ុនប៉ងឡើងជិះរថយន្តចេញពីទីលាននេះ។
លោក ឃួង ស្រេង អភិបាលរងរាជធានីភ្នំពេញ បាននិយាយបន្ទាប់ពីការប៉ះទង្គិចគ្នាភ្លាមៗថា ” សន្តិសុខសាលារាជធានីចំនួន៣៧នាក់បានរងរបួស ដែលក្នុងនោះប្រាំមួយនាក់បានរងរបួសធ្ងន់ និងពីរនាក់ទៀតកំពុងស្ថិតនៅក្នុងស្ថានភាពសង្គ្រោះបន្ទាន់ ដោយសាររងរបួសធ្ងន់។ នៅពេលណាមានអំពើហិង្សាកើតឡើង ត្រូវតែចាប់ខ្លួនមេដឹកនាំបាតុកម្មភ្លាមៗមកសាកសួរ និងស៊ើបអង្កេត”។
នៅម៉ោងប្រហែល១០ព្រឹក លោកស្រី មូរ សុខហួរ លោក សុថាវរិន្ទ្រ និងលោក ភិរម្យ ត្រូវបាននាំទៅស្នងការដ្ឋាននគរបាលរាជធានីនៅក្នុងខណ្ឌសែនសុខ។
លោក ជួន ណារិន ស្នងការរងនគរបាលរាជធានី ដែលទទួលបន្ទុកលើប្រតិបត្តិការបង្ក្រាបអ្នកតវ៉ាបាននិយាយថា មេដឹកនាំគណបក្សប្រឆាំងដែលត្រូវបានចាប់ខ្លួនទាំងបីនាក់មិនមែនជាតំណាងរាស្ត្រទេ។ លោកបាននិយាយថា ” មិនមានការចាប់ខ្លួនតំណាងរាស្ត្រទេ នគរបាលគ្រាន់តែចាប់ខ្លួនមនុស្សភ្លីភ្លើបីនាក់ប៉ុណ្ណោះ។ តំណាងរាស្ត្រមិនធ្វើឆ្កួតៗនៅទីលានប្រជាធិបតេយ្យទេ”។
យ៉ាងហោចណាស់តំណាងរាស្ត្រជាប់ឆ្នោតគណបក្សសង្គ្រោះជាតិប្រាំពីររូបទៀត ដែលស្ថិតនៅកន្លែងតវ៉ានេះ គឺលោក ហូរ វ៉ាន់ លោក ឡុង រី លោក រៀល ខេមរិន្ទ្រ លោក ឡុង បូតា លោក នុត រំុដួល លោក ជាម ច័ន្ទនី និងលោក សុខ អ៊ុំស៊ា មិនត្រូវបាននគរបាលចាប់ខ្លួនទេ។ ទោះជាយ៉ាងណា លោក ហូរ វ៉ាន់ ក្រោយមកបានដឹកនាំក្បួនរថយន្តអ្នកគាំទ្រគណបក្សសង្គ្រោះជាតិទៅកាន់ស្នងការដ្ឋាននេះ ហើយក៏ត្រូវបានចាប់ខ្លួនតែម្តង។
លោក អំ សំអាត អ្នកគ្រប់គ្រងបច្ចេកទេសនៅអង្គការលីកាដូ បាននិយាយថា ការតបតដោយហិង្សាពីអ្នកតវ៉ាដែលប៉ុនប៉ងចូលទីលានប្រជាធិបតេយ្យ គឺជៀសមិនផុតទេបន្ទាប់ពីពួកគេត្រូវបានសន្តិសុខវាយដំជាច្រើនខែមកហើយនោះ។
លោក អំ សំអាត បាននិយាយថា “ការប៉ះទង្គិចគ្នាដោយហិង្សានេះកើតឡើងរវាងអ្នកតវ៉ា និងសន្តិសុខរាជធានី ពីព្រោះសន្តិសុខបានធ្វើឲ្យគំនិតហិង្សានេះដិតជាប់ក្នុងចិត្តរបស់អ្នកតវ៉ា។ អ្នកតវ៉ាបានជួបប្រទះនឹងអំពើហិង្សារបស់សន្តិសុខ ហើយអំពើហិង្សាទាំងនេះបានបង្កឲ្យមានកំហឹង និងការសងសឹកពីអ្នកតវ៉ា”។
នៅឯស្នងការដ្ឋាននគរបាលរាជធានី នគរបាលបង្ក្រាបបាតុកម្មប្រហែល១០០នាក់ត្រូវបានដាក់ពង្រាយនៅទីនោះ ហើយយូរៗម្ដងបានព្យាយាមដេញអ្នកកាសែត និងបុគ្គលិកសិទ្ធិមនុស្សចេញពីកន្លែងនោះរហូតដល់ម៉ោង៧យប់ទើបពួកគេបានចាកចេញដោយខ្លួនឯង។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ ដែលមិនមានវត្តមាននៅកន្លែងតវ៉ា ប៉ុន្តែបានទៅជួបសហការីដែលត្រូវបានចាប់ខ្លួនរបស់លោក និងជួបមន្ត្រីនគរបាលនៅពេលរសៀល បានមានប្រសាសន៍ថា លោកមានការចាប់អារម្មណ៍ថា នគរបាលកំពុងស៊ើបអង្កេតអំពីការតវ៉ានៅព្រឹកម្សិលមិញនេះ ហើយនឹងចាប់ខ្លួនមនុស្សផ្សេងទៀត។
លោកបានមានប្រសាសន៍ថា ” ខ្ញុំបានជួបស្នងការនគរបាល ហើយបានសួរពួកគេថា ហេតុអ្វីបានជាពួកគេចាប់ខ្លួនមនុស្សទាំងនេះ។ ស្នងការរូបនេះនិយាយថា ពួកគេរៀបចំធ្វើបាតុកម្ម ដែលនាំឲ្យមានអំពើហិង្សា។ ខ្ញុំបានសួរថា តើលោកនឹងចាប់ខ្លួនមនុស្សប៉ុន្មាននាក់ទៀត? ហើយគាត់បាននិយាយថា នឹងចាប់ខ្លួនម្នាក់ទៀត គឺលោក រៀល ខេមរិន្ទ្រ។ ខ្ញុំគិតថា តំណាងរាស្ត្រទាំងអស់ដែលបានចូលរួមនឹងត្រូវចាប់ខ្លួន”។
កាលពីល្ងាចម្សិលមិញ សាលារាជធានីភ្នំពេញបានចេញសេចក្ដីប្រកាសព័ត៌មានមួយថ្កោលទោសលោកស្រី មូរ សុខហួរ ចំពោះការដឹកនាំអ្នកតវ៉ាអនាធិបតេយ្យ៣០០នាក់ ប្រមូលផ្តុំគ្នាឥតច្បាប់ និងបិទផ្លូវនៅជុំវិញទីលានប្រជាធិបតេយ្យ។
សេចក្ដីប្រកាសព័ត៌មាននេះលើកឡើងថា “សាលារាជធានីភ្នំពេញសូមអំពាវនាវដល់កម្លាំងមានសមត្ថកិច្ច និងស្ថាប័នពាក់ព័ន្ធ ត្រូវធ្វើការស្រាវជ្រាវ និងកំណត់មុខសញ្ញាស្វែងរកជនដៃដល់ និងអ្នកទទួលខុសត្រូវក្នុងហេតុការណ៍ខាងលើកនេះ ដើម្បីផ្តន្ទាទោសតាមនីតិវិធីច្បាប់”។
លោក ឡុង ឌីម៉ង់ អ្នកនាំពាក្យសាលារាជធានីបានបញ្ជាក់ថា សន្តិសុខមួយចំនួនដែលត្រូវបានអ្នកតវ៉ាវាយឲ្យរងរបួសនោះ បានដាក់ពាក្យបណ្ដឹងទៅនគរបាលចំពោះការផ្ទុះអំពើហិង្សានៅកន្លែងតវ៉ានេះ។
ខណៈដែលតំណាងរាស្ត្រទាំងបួននាក់កំពុងត្រូវបានសាកសួរនោះ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានបញ្ជាក់ថា អ្នកតវ៉ាដែលបានវាយបកទៅលើសន្តិសុខខណ្ឌដូនពេញវិញទាំងនេះ គឺជាអ្នកគាំទ្រស្របច្បាប់របស់គណបក្សសង្គ្រោះជាតិ មិនមែនជាអ្នកបន្លំខ្លួន ឬអ្នកនាំរំជើបរំជួល។
លោក បុញ្ញឫទ្ធិ បានមានប្រសាសន៍ថា ” មិនមានភាគីទី៣ទេ ប៉ុន្តែសន្តិសុខទាំងនោះទេ ដែលជាអ្នកចាប់ផ្ដើមប្រើអំពើហិង្សាវាយអ្នកតវ៉ាដូចដែលពួកគេបានធ្វើជាញឹកញាប់កាលពីមុនអ៊ីចឹង។ យើងមានការសោកស្ដាយណាស់ចំពោះការប៉ះទង្គិចគ្នាដោយហិង្សានៅថ្ងៃនេះ”៕គឹមហឿន
(រាយការណ៍បន្ថែមដោយ AlexWillemyns)