ស្ត្រីបម្រើការងារតាមផ្ទះម្នាក់ដែលអះអាងថា ខ្លួនត្រូវបុរសចាស់ជរាដែលខ្លួនមើលថែនៅក្នុងប្រទេសសិង្ហបុរីបៀតបៀនកេរ្តិ៍ភេទ បាននិយាយកាលពីម្សិលមិញថា ស្ថានទូតខ្មែរប្រចាំនៅសិង្ហបុរីមិនអើពើនឹងការសុំជំនួយរបស់គាត់ទេ ហើយបានណែនាំឲ្យគាត់ត្រឡប់ទៅផ្ទះរបស់ជនល្មើសវិញ។
អ្នកស្រី ឡុក សាមាន អាយុ៣៣ឆ្នាំ ដែលបានវិលត្រឡប់មកកម្ពុជាវិញកាលពីថ្ងៃច័ន្ទក៏បាននិយាយដែរថា ទីភ្នាក់ងារជ្រើសរើសពលកររបស់សិង្ហបុរីឈ្មោះថា NationEmployment ដែលបានបញ្ជូនគាត់ឲ្យទៅធ្វើការនៅផ្ទះរបស់បុរសចំណាស់នេះ បានព្យាយាមបំបិទការអះអាងរបស់គាត់។ គាត់និយាយទៀតថា ” [Nation] បានបង្ខំឲ្យខ្ញុំផ្ដិតមេដៃលើឯកសារមួយព្រមព្រៀងមិនប្ដឹងបុរសចំណាស់នេះ”។
អ្នកស្រី ឡុក សាមាន បានធ្វើជាអ្នកមើលថែរបស់បុរសវ័យ៩២ឆ្នាំរូបនេះរយៈពេលប្រហែល៦សប្ដាហ៍ មុនពេលប្ដឹងទៅទីភ្នាក់ងារជ្រើសពលករ NationEmployment ថា បុរសនេះតែងតែវារឡើងលើគ្រែរបស់គាត់ និងស្ទាបអង្អែលគាត់។ គាត់និយាយថា ” ខ្ញុំធ្វើជាអ្នកបម្រើឲ្យបុរសនេះ ប៉ុន្តែគាត់តែងតែបំពានខ្ញុំរាល់យប់ នៅពេលខ្ញុំដេកក្នុងបន្ទប់តែមួយ”។
អ្នកស្រីនិយាយទៀតថា អ្នកស្រីបានប្ដឹងទៅទីភ្នាក់ងារជ្រើសរើសពលករ Nation Employment ហើយបានស្នើសុំផ្ទេរទៅធ្វើការឲ្យថៅកែថ្មី ប៉ុន្តែទីភ្នាក់ងារនេះបែរជាទុកគាត់ឲ្យនៅក្នុងអគាររបស់ខ្លួន ហើយបង្ខំឲ្យគាត់ឲ្យធ្វើការនៅទីនោះដោយគ្មានប្រាក់ខែទៅវិញ។
អ្នកស្រី ឡុក សាមាន និយាយទៀតថា ” ពេលខ្ញុំស្នាក់នៅទីភ្នាក់ងារនេះ ពួកគេឲ្យខ្ញុំហូបបាយដូចបាយជ្រូកអ៊ីចឹង។ ខ្្ញុំបានទៅស្ថានទូតខ្មែរប្រចាំនៅសិង្ហបុរីដើម្បីស្នើសុំជំនួយ ប៉ុន្តែស្ថានទូតបានស្នើឲ្យខ្ញុំធ្វើការឲ្យទីភ្នាក់ងារនេះប្រាំមួយខែទៀត ទើបខ្ញុំអាចត្រឡប់មកស្រុកវិញបាន”។
នៅពេលទៅដល់ប្រទេសសិង្ហបុរីកាលពីខែកុម្ភៈ អ្នកស្រី ឡុក សាមាន បានចុះកិច្ចសន្យាជាមួយក្រុមហ៊ុនឲ្យខ្ចីលុយមួយ ដោយព្រមព្រៀងថា រយៈពេលប្រាំមួយខែដំបូងនៃកិច្ចសន្យាការងាររយៈពេលពីរឆ្នាំ ប្រាក់ចំនួន៣២០ដុល្លារក្នុងចំណោមប្រាក់ខែ៣៨៥ដុល្លារនឹងត្រូវបញ្ជូនមកទីភ្នាក់ងារជ្រើសរើសពលករហ្វីលីម័រ ខេមបូឌា នៅភ្នំពេញ ដែលបានបញ្ជូនគាត់ឲ្យទៅធ្វើការនៅប្រទេសសិង្ហបុរី។
ពេលទាក់ទងបានកាលពីម្សិលមិញ លោក ឡៅ លីហាក់ នាយកគ្រប់គ្រងក្រុមហ៊ុនហ្វីលីម័រ ខេមបូឌា បានមានប្រសាសន៍ថា ស្ត្រីបម្រើការងារតាមផ្ទះដែលបញ្ជូនឲ្យទៅធ្វើការក្នុងប្រទេសសិង្ហបុរី មានតែ៥ឬ៦ភាគរយប៉ុណ្ណោះដែលជួបបញ្ហា ហើយថា រឿងរ៉ាវរបស់អ្នកស្រី ឡុក សាមាន មិនអាចបញ្ជាក់ថា ជាការពិតបានទេ។ លោកបានលើកឡើងបន្តទៀតថា ” យើងមិនអាចស្ដាប់តែម្ខាងបានទេ ហើយយើងក៏មិនអាចចោទប្រកាន់ថៅកែរូបនោះបានដែរ ពីព្រោះពលករចំណាកស្រុករបស់យើងគ្មានភ័ស្តុតាងបញ្ជាក់ថា ថៅកែរូបនោះមានទោសដែរ”។
លោក ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៅក្រសួងមហាផ្ទៃ បានមានប្រសាសន៍ថា លោកបានជំរុញឲ្យអ្នកស្រី ឡុក សាមាន ដាក់ពាក្យបណ្ដឹងផ្លូវការនៅក្នុងប្រទេសកម្ពុជា ខណៈពេលសាកសួរគាត់កាលពីថ្ងៃច័ន្ទ។
លោកបានមានប្រសាសន៍បន្តថា ” ខ្ញុំបានជំរុញឲ្យគាត់ដាក់ពាក្យប្ដឹងថៅកែរូបនោះ ដើម្បីទាមទារសំណងជំងឺចិត្តពីបទបៀតបៀន ប៉ុន្តែគាត់ប្រាប់ខ្ញុំថា គាត់ខ្លាចមិនហ៊ានប្ដឹងទេ ពីព្រោះទីភ្នាក់ងារនោះបានគំរាមគាត់មិនឲ្យប្ដឹង”។ ទោះជាយ៉ាងណា ស្ថានទូតខ្មែរប្រចាំនៅប្រទេសិង្ហបុរីមិនអាចទាក់ទងសុំការបំភ្លឺបានទេពាក់ព័ន្ធនឹងរឿងនេះ៕ សុខុម