26 C
Phnom Penh

អ្នកធ្វើរបាយការ​ណ៍អង្គការ​សហប្រជាជាតិ​ម្នាក់​ចូលរួម​អំពាវនាវកុំឲ្យ​ព្រះមហាក្សត្រ​ឡាយព្រះហស្តលេខាលើ​ច្បាប់​ស្តីពី​តុលាការ

ដោយ ឌឹ ខេមបូឌា ដេលី

បទវិភាគ

អ្នក​ធ្វើ​របាយការណ៍​ពិសេស​របស់​អង្គការ​សហ​ប្រជា​ជាតិអំពី​ឯករាជភាព​ចៅក្រម និង​មេធាវី​ កាលពី​ម្សិលមិញ​បានចូល​រួម​ជាមួយ​តំណាង​អង្គការ​សង្គម​ស៊ីវិល​អំពាវ​ដល់​ព្រះ​មហា​ក្សត្រ​ នរោត្តម សីហមុនី កុំឲ្យ​ឡាយ​ព្រះហស្តលេខា​លើ​ច្បាប់​ចំនួន​បី​ស្ដីពី​ប្រព័ន្ធតុលាការ​ ដែលពួកគេ​គិត​ថា នឹង​ធ្វើ​ឲ្យ​មាន​ការ​ត្រួត​ត្រា​កាន់តែខ្លាំងរបស់​ស្ថាប័ន​នីតិប្រតិបត្តិ​ទៅ​លើ​ប្រព័ន្ធ​តុលាការ​។

លោកស្រី Gabriela Knaul​ បាន​ថ្លែង​សុន្ទរកថា​នៅ​ក្នុង​ទីក្រុង​ភ្នំពេញ​លើក​ឡើង​អំពី​ការ​បារម្ភ​ជុំវិញ​ច្បាប់​ទាំង​នេះ ខណៈ​ដែល​តំណាង​អង្គការ​សង្គម​ស៊ីវិល​ម្នាក់​បាន​ដាក់​ញត្តិ​នៅ​​ព្រះ​បរម​រាជ​វាំង​អំពាវ​នាវ​ឲ្យព្រះ​មហាក្សត្រ​ នរោត្តម សីហមុនី​ ជំរុញ​ឲ្យ​មាន​ការ​កែប្រែ​ច្បាប់​ទាំង​នេះ ដែល​សំដៅ​បង្កើត​​ប្រព័ន្ធ​តុលាការ​ឯករាជ្យ​។

លោក សៀ ភារម្យ ប្រធាន​ក្រុម​ការ​ងារ​ពិសេស​សិទ្ធិលំនៅដ្ឋាន​ បាន​ប្រគល់​ញត្តិ​ដែល​ចុះ​ហត្ថលេខា​ដោយអង្គការ​មិនមែន​រដ្ឋាភិបាល​​ចំនួន​ប្រាំមួយ​ទៅ​តំណាង​ខុទ្ទកាល័យ​ព្រះ​បរម​រាជវំាង​​នៅម៉ោង​ប្រហែល​៩​និង​៣០​នាទី​ព្រឹក​ មុន​ពេល​ជិះ​រ៉ឺម៉ក​ម៉ូតូកង់បី​នៅ​ក្នុង​ទីក្រុង​ យក​​​ញត្តិ​​ដូច​គ្នា​នេះ​ទៅ​ដាក់​នៅ​ស្ថានទូត​ចំនួន​១០​ រួម​ទាំង ស្ថានទូត​អាមេរិក និង​សហភាព​អឺរ៉ុប​ផងដែរ។

ដោយ​សំដៅ​ដល់​ច្បាប់​ស្ដីពី​ការ​រៀបចំ​ និង​ការ​ប្រព្រឹត្ត​ទៅ​នៃ​ស្ថាប័ន​តុលាការ​ ច្បាប់​ស្ដីពី​ការ​រៀបចំ​ និងការ​ប្រព្រឹត្ត​ទៅ​នៃ​ឧត្តម​ក្រុម​ប្រឹក្សា​នៃ​អង្គចៅក្រម និង​ច្បាប់​ស្ដីពី​លក្ខន្តិកៈ​ចៅក្រម និង​ព្រះរាជ​អាជ្ញា ​លោក សៀ ភារម្យ បាន​មាន​ប្រសាសន៍​ថា ” ព្រះមហាក្សត្រ​គួរ​មាន​ព្រះ​រាជ​តម្រិះ​ឲ្យ​បាន​ល្អិត​ល្អន់​អំពី​ច្បាប់​ទាំង​បី​នេះ​ ពីព្រោះ​វានឹង​មាន​ផល​ប៉ះ​ពាល់​អវិជ្ជមាន​ទៅ​លើ​ប្រព័ន្ធ​តុលាការ​​ប្រសិន​បើ​ច្បាប់​ទាំងនេះចូល​ជា​ធរមាន​នោះ​”។

បើ​ទោះ​ជា​មាន​ការ​ជំទាស់​ជា​ច្រើន​ក៏​ដោយ ក៏​រដ្ឋសភា​ឯកបក្ស​ និង​ព្រឹទ្ធ​សភា បាន​អនុ​ម័ត​ច្បាប់​ទាំង​បី​នេះ​ដោយ​គ្មានការ​កែប្រែដែរ​ក្នុង​រយៈពេល​ពីរ​ខែ​មក​នេះ​។ បន្ទាប់​ពី​ក្រុម​ប្រឹក្សា​ធម្មនុញ្ញ​បានអនុម័ត​យល់​ព្រម​លើ​ច្បាប់​ទាំង​នេះ​កាលពី​ដើម​ខែ​នេះ គឺ​ត្រូវ​ការ​តែ​ព្រះហស្ត​លេខា​របស់​ព្រះ​មហាក្សត្រ​មួយ​ទៀត​ប៉ុណ្ណោះ​​សម្រាប់​ការ​អនុម័ត​ច្បាប់​ទាំង​នេះ​។

លោកស្រី Gabriela Knaul​ ដែល​មក​បំពេញ​ទស្សនកិច្ច​នៅ​ប្រទេស​កម្ពុជា​ក្រៅ​ផ្លូវការ​បាន​វិភាគ​អំពី​ច្បាប់​ទាំង​នេះ​នៅ​សន្និសីទ​មួយ​ ដែល​រៀបចំ​ឡើង​ដោយ​វិទ្យាស្ថាន​សិទ្ធិ​មនុស្ស​របស់​គណៈមេធាវី​អន្តរជាតិ​។

លោកស្រី​បាន​មាន​ប្រសាសន៍​ថា មាត្រា​មួយ​ចំនួន​នៅ​ក្នុង​ច្បាប់​ទាំង​នេះ​បង្ហាញ​ពី​បញ្ហា​ធ្ងន់​ធ្ងរ​ពាក់​ព័ន្ធ​នឹង​ការ​ធានា​​ឲ្យ​មាន​ឯករាជភាព​ប្រព័ន្ធ​តុលាការ​ ពីព្រោះ​ច្បាប់​ទាំង​នេះ​ផ្ដល់​អំណាច​លើស​លប់​ដល់​ស្ថាប័ន​នីតិប្រតិបត្តិ​ទៅ​លើស្ថាប័ន​តុលាការ​”។

លោកស្រី Gabriela Knaul​ បាន​មាន​ប្រសាសន៍​ថា វា​ក៏​ “​សំខាន់​ផងដែរចំពោះ​ការ​ធានា​ថា ការ​ផ្ដល់​មូលនិធិ​សម្រាប់ប្រព័ន្ធ​តុលាការ​មិន​ត្រូវ​មាន​ការ​ជ្រៀត​ជ្រែក​ពី​​ប្រព័ន្ធ​តុលាការ​ឡើយ​”។ ឯករាជភាព​នៃ​ប្រព័ន្ធ​តុលាការ​អាច​ត្រូវ​បាន​ប៉ះ​ពាល់​​​ប្រសិន​បើ​ប្រព័ន្ធ​តុលាការ​ត្រូវ​បាន​ផ្ដល់​ហិរញ្ញវត្ថុ​ដោយ​ស្ថាប័ន​នីតិ​ប្រតិបត្តិ​​​ ដូច​ដែល​មាន​ចែង​នៅ​ក្នុង​ច្បាប់​ស្ដីពីការ​រៀបចំ​ប្រព័ន្ធ​តុលាការ​។

លោកស្រី​បាន​មាន​ប្រសាសន៍​ថា ” នៅ​ដំណាក់​កាល​បច្ចុប្បន្ន​នៃច្បាប់​ទាំង​បីស្តីពី​កំណែ​ទម្រង់​​ប្រព័ន្ធ​តុលាការ​ ខ្ញុំ​សូមអំពាវ​នាវ​ដល់​ព្រះករុណា​ជាម្ចាស់​ជីវិត​តម្កល់លើត្បូង​ក្នុង​នាម​ជា​អ្នកធានា​ដល់​ឯករាជភាព​ប្រព័ន្ធ​តុលាការ និង​ធានាដល់​សុខុមាលភាព​សង្គម​ខ្មែរ​ កុំ​ឲ្យ​អនុម័ត​សេចក្ដី​ព្រាង​ច្បាប់ទាំង​នេះក្នុង​អត្ថន័យ​ដូច​​សព្វ​ថ្ងៃ​នេះ​ឡើយ​”៕ សារុន​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស