34.8 C
Phnom Penh

តំណាង​រាស្ត្រ​ជាប់​ឆ្នោត​គណបក្ស​សង្គ្រោះ​ជាតិ​ប្រាំ​ពីររូប​រង​ការ​ចោទ​ប្រកាន់​ពី​បទ​ដឹកនាំ​ចលនា​កុបកម្ម

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​រាជ​ធានី​ភ្នំពេញបាន​ចោទ​ប្រកាន់​តំណាង​រាស្ត្រ​ជាប់​ឆ្នោត​គណបក្ស​សង្គ្រោះ​ជាតិ​ចំនួន​ប្រាំពីរ​រូប​ និង​សកម្មជន​គណបក្ស​មួយ​រូប​ពី​បទ​ដឹក​នាំ​ចលនា​កុបកម្ម និង​ពី​បទ​ញុះញង់​ឲ្យ​មាន​ការ​តវ៉ា​ ដែល​បាន​ក្លាយ​ជា​ហិង្សា​កាលពី​ថ្ងៃ​អង្គារ ហើយ​បានបញ្ជូន​តែ​ប្រាំមួយ​នាក់​ប៉ុណ្ណោះ​​ទៅ​ឃុំខ្លួននៅ​ពន្ធនាគារ​ព្រៃស​។front-photo-1 copy

មេធាវីការ​ពារ លោក​ស្រី ម៉េង សុភារី បាន​មាន​ប្រសាសន៍​ថា ក្រុម​នេះ​ត្រូវ​បាន​ចោទ​ប្រកាន់​ពី​បទ​ដឹក​នាំ​ចលនា​កុបកម្ម​តាម​មាត្រា៤៥៩​នៃ​ក្រម​ព្រហ្មទណ្ឌ​ ព្រមទាំងពី​បទ​ញុះញង់​ឲ្យ​ប្រព្រឹត្ត​បទ​ឧក្រិដ្ឋ​តាម​មាត្រា​៤៩៥។

ប្រសិន​បើ​រក​ឃើញ​ពិរុទ្ធភាព​ដូច​ការ​ចោទ​ប្រកាន់​​ទាំង​អស់​នេះ​មែន​ មន្ត្រី​បក្ស​ប្រឆាំង​ដែល​មាន​សញ្ជាតិ​អាមេរិក បារាំង អូស្រាលី និងនូវែល​សេឡង់ នេះអាច​មាន​ទោស​ជាប់​ពន្ធនាគារ​រហូត​ដល់​៣០​ឆ្នាំ។

លោក សំ សុគង់ ជា​មេធាវី​ការ​ពារ​ម្នាក់​ទៀត​បានមាន​ប្រសាសន៍​ថា ចៅក្រម​ស៊ើប​សួរ​ លោក កែវ មុនី មិន​ទាន់​បាន​ដោះលែង​មនុស្ស​ទាំង​ប្រាំមួយ​នាក់​នេះ​ឲ្យនៅ​ក្រៅ​ឃុំ​ទេ រួម​ទាំង​ លោកស្រី មូរ សុខហួរ ប្រធាន​កិច្ច​ការ​សាធារណៈ​របស់​គណបក្ស​សង្គ្រោះជាតិ​​ផង​ដែរ។

លោក សុគង់ បាន​មាន​ប្រសាសន៍តាម​ទូរស័ព្ទ​បន្ទាប់ពី​ស្ថិត​នៅ​តុលាការ​ពេញ​មួយ​ថ្ងៃ​ថា ” ចៅក្រម​សម្រេច​ឃុំខ្លួន​មន្ត្រី​គណបក្ស​សង្គ្រោះ​ជាតិ​ប្រាំមួយ​នាក់​​ជា​បណ្ដោះ​អាសន្ន​សិន។ នៅ​ក្នុង​សំណុំ​ឯកសារ​តុលាការ​ មន្ត្រី​គណបក្ស​សង្គ្រោះ​ជាតិ​ប្រាំបី​រូប​​ត្រូវ​បាន​ចោទ​ប្រកាន់​​ រួម​ជាមួយ​អ្នក​សម​គំនិត​ជាច្រើននាក់​ទៀត​ដែល​មិន​មាន​ការ​បញ្ចេញ​ឈ្មោះ”។

លោក កែវ សុជាតិ ព្រះរាជ​អាជ្ញា​អម​សាលា​ដំបូង​រាជ​​ធានី​បាន​បដិសេធ​មិន​ឲ្យ​គេ​សម្ភាស​ រីឯ​លោកចៅក្រម​ មុនី​ មិនអាច​ទាក់​ទង​បាន​។

លោកស្រី មូរ សុខហួរ រួម​ជាមួយ​នឹង​តំណាង​រាស្ត្រ​គណបក្ស​ប្រឆាំង​ផ្សេង​ទៀត គឺ​លោក ម៉ែន សុថាវរិន្ទ្រ​ និង​លោក កែវ ភិរម្យ ត្រូវ​បាន​ចាប់​ខ្លួន​នៅ​ម៉ោង​ប្រហែល​១០​ព្រឹក​ថ្ងៃ​អង្គារ បន្ទាប់​ពី​ការ​តវ៉ា​ ដែល​ពួកគាត់​បាន​ដឹក​នាំធ្វើ​​នៅ​តាម​មហាវិថី​ព្រះ​នរោត្តម ដើម្បី​ទាម​ទារ​ឲ្យ​បើក​ទីលាន​ប្រជាធិបតេយ្យ​​ ដែល​មាន​ការ​ការ​ពារ​តឹង​រ៉ឹង​ឡើង​វិញ​នោះ បាន​ក្លាយ​ជា​ហិង្សា​។

ក្រុម​អ្នក​តវ៉ា​​ដែ​ល​ពាក់​បូពណ៌​ទឹក​ក្រូច និង​ពណ៌​លឿង បាន​ចាប់​ផ្ដើម​វាយបក​យ៉ាង​ខ្លាំង​ទៅ​លើ​សន្តិសុខ​ខណ្ឌដូនពេញ ដែល​ជារឿយៗ​បាន​វាយ​ដំ​បាតុករ​​ឲ្យ​បែក​ឈាម​​ក្នុង​រយៈ​​ពេល​​ប្រាំមួយ​ខែ​មក​នេះ​​ នៅពេលពួកគេ​អនុវត្ត​បម្រាម​របស់​រដ្ឋាភិបាល​មិន​ឲ្យមានការ​ជួបជុំគ្នា​ជា​សាធារណៈ​។

ពេល​បំបែក​ក្រុម​សន្តិសុខ​ឃោរឃៅ​ដែល​នៅ​ពេល​នេះ​បាន​រត់​គេច​ទៅ​គ្រប់​ច្រក​ល្ហក​នោះ ក្រុម​អ្នក​តវ៉ា​បាន​បង្ហាញ​ការ​អត់​ឱន​តិច​តួច​ ដោយ​ប្រើ​បង្គោល​ទង់​ជាតិជ័រ និង​ដំបង​ឈើ​វាយ​សន្តិសុខ​ទាំង​នោះ។ យ៉ាង​ហោច​ណាស់​សន្តិសុខ​ពីរ​នាក់​ត្រូវ​បាន​បញ្ជូន​ទៅ​សង្គ្រោះ​បន្ទាន់​​​។

លោកស្រី មូរ សុខហួរ លោក សុថាវរិន្ទ្រ និង​លោក ភិរម្យ ត្រូវ​បាន​ចាប់​ខ្លួន​នៅ​ពេល​ដែល​ពួកគាត់​ប៉ុន​ប៉ង​ចាក​ចេញ​ពី​កន្លែង​កើត​ហេតុ​​ជាមួយ​តំណាង​រាស្ត្រ​ជាប់​ឆ្នោត​ម្នាក់​ទៀត​នៅ​កន្លែង​កើត​ហេតុនោះ​ គឺ​លោក ហូរ វ៉ាន់ ដែល​ត្រូវ​បាន​ចាប់​ខ្លួន​ក្រោយ​មក​នៅ​ពេល​លោក​ទៅ​ជួប​មន្ត្រី​ទាំង​បី​នៅ​ស្នង​ការ​ដ្ឋាននគរ​បាល​រាជធានី​។

មន្ត្រី​ទាំង​ប្រាំ​នាក់​ត្រូវ​បាន​ឃុំ​ខ្លួន​នៅ​ស្នង​ការ​ដ្ឋាន​នគរ​បាល​នេះ​មួយ​យប់​។ លោក រៀល ខេមរិន្ទ ជា​តំណាង​រាស្ត្រ​ជាប់​ឆ្នោត​គណបក្ស​សង្គ្រោះ​ជាតិ​ម្នាក់​ទៀត​​ ដែល​មាន​វត្តមាន​នៅ​កន្លែង​តវ៉ា​ត្រូវ​បាន​ចាប់​ខ្លួន​នៅ​ម៉ោង​២​រំលង​អធ្រាត្រ​យប់​ម្សិលមិញ​ នៅ​ពេល​កំពុង​ជិះ​រថយន្ត​ទៅ​ខេត្ត​បាត់​ដំបង។

លោក អឿ ណារិទ្ធ ជា​សកម្មជន​គណបក្ស​ដែល​ធ្វើការ​ឲ្យ​លោកស្រី មូរ សុខហួរ ត្រូវ​បាន​ទាញ​ចេញ​ពី​រថយន្ត​កាល​ពីព្រឹក​ម្សិល​មិញ​នៅ​ខណ្ឌ​ចំការ​មន និង​ត្រូវ​បាន​ចាប់​ខ្លួន​​នៅ​ពេល​ដែល​​អ្នក​គាំទ្រ​គណបក្ស​ប្រឆាំង​បាន​ជួប​ជុំ​គ្នា​នៅ​ជិត​សាលា​ដំបូង​រាជ​ធានី​ភ្នំពេញ អំឡុង​ពេល​សាក​សួរ​។

លោក​មេធាវី សុគង់ បាន​បញ្ជាក់​ប្រាប់​ថា តំណាង​រាស្ត្រ​ជាប់​ឆ្នោត​គណបក្ស​ប្រឆាំង​មួយ​រូប​ទៀត​ដែល​ត្រូវ​បាន​ចោទ​ប្រកាន់​ដែរ​នោះ​ គឺ​លោក ឡុង រី ដែល​ជា​ប្រធាន​ផ្នែក​សន្តិ​សុខ​របស់​គណបក្ស​សង្គ្រោះ​ជាតិ និង​លោក នុត រំដួល។ តំណាង​រាស្ត្រ​ជាប់​ឆ្នោត​ទាំង​ពីរ​មាន​វត្ត​មាន​នៅ​កន្លែង​តវ៉ា​ ប៉ុន្តែ​មិន​ទាន់​ត្រូវ​បាន​ចាប់​ខ្លួន​នៅ​ឡើយ​ទេ​។

យ៉ាង​ហោច​ណាស់​តំណាង​រាស្ត្រ​ជាប់​ឆ្នោត​គណបក្ស​សង្គ្រោះ​ជាតិ​បី​នាក់​​ទៀត គឺ​លោក ជាម ច័ន្ទនី លោក សុខ អ៊ុំស៊ា និង​លោក ឡុង បូតា ក៏​មាន​វត្ត​មាន​នៅ​កន្លែង​តវ៉ា​កាល​​ពី​ថ្ងៃ​អង្គារ​ដែរ ប៉ុន្តែ​មិន​មាន​ឈ្មោះ​នៅ​ក្នុង​ឯកសារ​តុលាការ​ទេ។ ពួកគាត់​ទាំង​បី​នាក់​ស្ថិត​នៅ​ឯ​ទីស្នាក់​ការ​គណបក្ស​សង្គ្រោះ​ជាតិ​នៅ​ក្នុង​ខណ្ឌ​មាន​ជ័យ កាលពី​ព្រឹក​ម្សិលមិញ។

លោក នុត រំដួល ដែល​បាន​លាលែង​ពី​សមាជិក​ព្រឹទ្ធសភា​បន្ទាប់ពី​លោក​បាន​ជាប់​ឆ្នោត​ជា​តំណាង​រាស្ត្រ​នៅ​មណ្ឌល​កំពង់ស្ពឺ នៅ​ក្នុង​ការ​បោះឆ្នោត​ជាតិ​កាលពី​ឆ្នាំ​មុន បានមាន​ប្រសាសន៍​ថា ទាំង​លោក​ និងលោក​ ឡុង រី មិន​បាន​គេច​វេះ​ពី​ការ​ចាប់​ខ្លួន​ទេ។

លោក រំដួល បាន​មាន​ប្រសាសន៍​ថា ” មិន​មាន​ហេតុ​ផល​សម្រាប់​ខ្ញុំ និង ឡុង រី រត់​ឬគេច​ខ្លួន​ទេ ពីព្រោះ​យើង​មិន​បាន​ធ្វើ​អ្វី​ខុស​ឡើយ​។ ការ​ចោទ​ប្រកាន់​មក​លើ​ពួក​យើង​មិន​ពិត​ទាល់​តែ​សោះ​”។

លោក រំដួល បានបន្ថែម​ថា លោក​បាន​ឃើញ​​អ្នក​បន្លំ​ខ្លួនជា​ភាគី​ទី៣​ចូល​ទៅ​កន្លែង​តវ៉ា​កាល​ពី​ថ្ងៃ​អង្គារ ហើយ​បាន​ចាប់​ផ្ដើម​វាយ​សន្តិសុខ​ខណ្ឌ​ដូនពេញ បន្ទាប់ពី​សន្តិសុខ​បាន​ចាប់​ផ្ដើម​បង្ក្រាប​ការ​តវ៉ា​នោះ​ដូច​ធម្មតា ហើយ​បាន​បង្ក​ឲ្យ​មាន​កំហឹង​ដែល​ធ្វើ​ឲ្យ​អ្នក​តវ៉ា​ផ្សេង​ទៀត​បាន​ចូល​រួម​វាយ។

មាន​ប្រសាសន៍​ពី​សាលា​ដំបូង​រាជ​ធានី​ភ្នំពេញ​ បន្ទាប់ពី​ត្រូវ​បាន​ចោទ​ប្រកាន់​ លោកស្រី មូរ សុខហួរ បាន​ច្រាន​ចោល​ការ​លើក​ឡើង​ដែល​ថា ការ​វាយ​តប់​គ្នា​ដោយ​ហិង្សា​រវាង​អ្នក​គាំទ្រ​លោកស្រី និង​សន្តិសុខ​គឺ​ជា​ចលនា​កុបកម្ម​។

លោកស្រី​បាន​មាន​ប្រសាសន៍​តាម​ទូរស័ព្ទ​ថា ” យើង​គ្មាន​កំហុស​១០០​ភាគរយ​​។ អ្វី​ដែល​​យើង​បាន​ធ្វើ​គឺ​ទាម​ទារ​ឲ្យ​មាន​សេរីភាព​នៃ​ការ​បញ្ចេញ​មតិ​ដោយ​អហិង្សា ប៉ុន្តែ​រាល់​ពេល​ដែល​យើង​ធ្វើការ​ជួប​ជុំគ្នា​ដោយ​អហិង្សា​ យើង​បាន​ទទួល​រង​ការ​បង្ក្រាប​ដោយ​ហិង្សា​ពី​សន្តិ​សុខ​ខណ្ឌ”។

“ សន្តិសុខ​ទាំង​នោះ​បាន​បង្ក​អំពើ​ហិង្សា​ និង​បាន​ចាប់​ផ្ដើម​ប្រើ​ហិង្សា​មក​លើ​អ្នក​តវ៉ា​មុន។ កាលពី​ថ្ងៃ​អង្គារ សន្តិសុខ​ទាំង​នោះ​បាន​វាយ​អ្នក​តវ៉ា​ ប៉ុន្តែ​មិន​មាន​អន្តរាគមន៍​ពី​នគរ​បាល​នៅ​ទី​លាន​នោះ​ទេ”។

លោកស្រី មូរ សុខហួរ ក៏បានគាំទ្រ​ការ​លើក​ឡើង​របស់​លោក កឹម សុខា អនុ​ប្រធាន​គណបក្ស​សង្គ្រោះ​ជាតិ​អំឡុង​ពេល​ធ្វើ​សន្និសីទ​កាសែត​ដែល​ថា លោកស្រី និង​តំណាង​រាស្ត្រ​ជាប់​ឆ្នោត​ដែល​ត្រូវ​បាន​ឃុំ​ខ្លួន​ផ្សេង​ទៀត​គួរ​តែ​មាន​អភ័យ​ឯកសិទ្ធិ​រួច​ផុត​ពី​ការ​ផ្ដន្ទាទោស​តាម​ដំណើរ​ការ​បង្កើត​រដ្ឋាភិបាល​កាល​ពី​ឆ្នាំមុន។

លោកស្រី​បាន​ពន្យល់​ប្រាប់​ថា ” ខ្ញុំ​ហ៊ាន​និយាយ​ថា យើង​មាន​អភ័យ​ឯកសិទ្ធិ​ ពីព្រោះ​ ហេង សំរិន ប្រធាន​រដ្ឋសភា​បាន​ប្រកាស​កាលពី​ថ្ងៃ​ទី​២៣ ខែ​កញ្ញា ឆ្នាំ​២០១៣​​ ទទួល​ស្គាល់​តំណាង​រាស្ត្រ​១២៣​រូប​នៅ​រដ្ឋសភា​។ ការ​ប្រកាស​ទទួល​ស្គាល់​នេះ​បង្ហាញ​ថា យើង​មាន​អភ័យ​ឯក​សិទ្ធិ”។

មាត្រា​៧៦​នៃ​រដ្ឋធម្មនុញ្ញ​ចែង​ថា រដ្ឋសភា​​ ” មាន​​សមាជិក​យ៉ាង​តិច​១២០​រូប​”។ គណបក្ស​សង្គ្រោះ​ជាតិ ដែល​ទទួល​បាន​អាសនៈ​៥៥​នៅ​ក្នុង​ការ​បោះ​ឆ្នោត​ដ៏ចម្រូង​ចម្រាស​នេះ​​បាន​លើក​ឡើង​ថា រដ្ឋាសភា​ដែល​ខ្លួន​កំពុង​ធ្វើ​ពហិការ​នេះ​មិន​ស្រប​តាម​រដ្ឋធម្មនុញ្ញ​ទេ ដោយ​សារ​មាន​តែ​តំណាង​រាស្ត្រ​៦៨​រូប​របស់​គណបក្ស​ប្រជា​ជន​កម្ពុជា​ប៉ុណ្ណោះ។

គណបក្ស​ប្រជា​ជន​​កម្ពុជា​បាន​ឆ្លើយ​តប​វិញ​ថា មាន​តំណាង​រាស្ត្រ​១២៣​រូប ​មិន​ថាតំណាង​រាស្ត្រ​៥៥​រូប​មក​ពី​គណបក្ស​សង្គ្រោះ​ជាតិ​សម្រេច​ចូល​រួម​ឬមិនចូល​នោះទេ​។

លោកស្រី​ មូរ សុខហួរ បានមាន​ប្រសាសន៍​ថា ” ប្រសិន​បើ​គេ​មិន​ទទួល​ស្គាល់​យើង​ថា មាន​អភ័យ​ឯកសិទ្ធិ​ទេ វា​បង្ហាញ​ថា រដ្ឋាភិបាល​និង​រដ្ឋសភា​បច្ចុប្បន្ន​មិន​​ស្រប​ច្បាប់​ឡើយ​”។

នៅ​ឯ​សន្និសីទ​កាសែត​នៅ​ម៉ោង​១១​ព្រឹក​ លោក កែវ រ៉េមី អ្នក​នាំពាក្យ​អង្គភាព​ព័ត៌មាន​ និង​ប្រតិកម្ម​រហ័ស​នៃ​ទីស្ដីការ​គណៈរដ្ឋមន្ត្រី​ ដែ​ល​បាន​ចាត់​ទុក​អំពើ​ហិង្សា​កាលពី​ថ្ងៃ​អង្គារ​ថា ជា​សកម្មភាព​អនាធិបតេយ្យរៀប​ចំ​ទុក​ជាមុន​តាម​ហ្វេសប៊ុក​​ដោយ​លោកស្រី មូរ សុខហួរ នោះ បាន​និយាយ​ថា ការ​លើក​ឡើង​អំពី​អភ័យ​ឯកសិទ្ធិ​គឺ​មិន​ត្រឹម​ត្រូវ​ទេ​។

លោក​​​ កែវ​​​ រ៉េមី បាន​​​មាន​​​ប្រសាសន៍​​​ថា “ពួក​​​គេ​​​មិន​​​បាន​ស្បថចូលកាន់ត​ំណែង​នៅ​​​ក្នុង​​​រដ្ឋ​​​សភា​​​ទេ​​​ ហេតុ​​​ដូច្នេះ​​​ហើយ​​​ពួកគេ​​​អាច​ចាប់​​​ខ្លួន​បាន”។

នៅ​​​ពេល​​​ល្ងាច​​​ លោក អង្គ វង្សវឌ្ឍា​​​នា​​​ រដ្ឋ​​​មន្ត្រី​​​ក្រសួ​​​ងយុត្តិធម៌​​​ និង​​​លោក  ព្រំុ សុខា​ រដ្ឋលេខា​​​ធិការ​​​ក្រសួ​​​ងមហាផ្ទៃ​​​ក៏​​​បាន​​​ដឹក​​​នាំ​​​កិច្ច​​​ប្រជុំ​​​បិទ​​​ទ្វារ​​​រយៈ​​​ពេល​​​ពីរ​​​ម៉ោង​​​ជា​​​មួយ​​​អ្នក​​​ការ​​​ទូត​​​បរទេស​​​នៅ​​​ក្រសួ​​​ងយុត្តិធម៌ផង​​ដែរ​​​។

ប្រព័ន្ធ​​​ផ្សព្វ​​​ផ្សាយ​​​មិន​​​ត្រូ​​​វបាន​​​អនុញ្ញាត​​​ឲ្យ​​​ចូល​​​ក្នុង​​​បន្ទប់​​​ទេ​​​ ប៉ុន្តែ អាច​​​មើល​​​តាម​​​បង្អួច​​​ ​នៅ​ពេល​ដែល​​ លោក​​​ ព្រំ​​​ សុខា បាន​ខំប្រឹង​​​ធ្វើការ​ពន្យល់​​​យ៉ាង​​​វែង​​​ពី​​​ការ​​​ចាប់​​​ខ្លួន​​​​​​មន្ត្រី​​​គណ​បក្ស​​​ប្រឆាំង​​​ដល់​​​ភ្ញៀវ​​​រួម​​​មាន​​​​​​លោក វីលៀម​​​ ថូដ ឯកអគ្គរដ្ឋ​​​ទូត​​​អាមេរិក​​​ និង​​​លោក ហ្សង់​​​ ហ្វ្រង់​​​ស័រ​​​កូតាំង​​​ ឯកអគ្គរដ្ឋ​​​ទូត​​​សហភាពអឺរ៉ុប។

បន្ទាប់​​​ពី​​​ជំនួប​​​លោក​​​ ព្រំុ សុខា បាន​​​មាន​​​ប្រសាសន៍​​​ថា អ្នក​​​ការ​​​ទូត​​​បាន​​​សួរ​​​ថា តើ​​​ការ​​​ចាប់​​​ខ្លួន​​​នេះ​​​ទាក់​​​ទង​​​ទៅ​​​នឹង​​​ការ​​​បន្ត​​​ជាប់​​​គាំង​​​នយោបាយ​​​រវាង​​​គណបក្ស​​​ប្រជាជន​​​កម្ពុជា និ​​​ង​​​គណ​​​បក្ស​​​សង្គ្រោះ​​​ជាតិឬ​​​​យ៉ាង​​​ណា ជា​​​ការ​​​ចោទ​​​ប្រកាន់​​​ដែល​​​លោក​​​បាន​​​បដិសេធ​​​។

លោក ព្រំ​​​ុ សុខា បាន​​​ប្រាប់​​​អ្នក​​​យក​​​ព័ត៌​​​មាន​​​ថា ” ប្រសិន​​​បើ​​​ខ្ញុំ​​​ប្រាប់​​នរណា​ម្នាក់​​ឲ្យទៅ​​​ដុត​​​ផ្ទះ​គេ​​ ហើយ​​​អ្នក​នោះ​​ទៅ​ដុត​​ ​​​​​​ខ្ញុំ​​​មិន​​​អាច​​​និយាយ​​​ថា ‘ខ្ញុំ​​​មិន​​​បាន​​​ធ្វើ​​​នោះ​​​ទេ’​​​។ ​​​គេ​​​ត្រូវ​​​តែ​​​ស្វែង​​​រក​​​អ្នក​​​ដែលបាន​បញ្ជា​​​ឲ្យ​​​ដុតដដែល​​​”។

លោក ចន ស៊ីមម៉ុន អ្នក​​​នាំ​​​ពាក្យ​​​ស្ថាន​​​ទូត​​​អាមេរិក​​​បាន​​​លើក​​​​​​ឡើង​​​តាម​​​អីុ​​​ម៉េល បន្ទាប់​​​ពី​​​ជំនួប​​​ថា ស្ថានទូត​​​ចង់​​​ឲ្យ​មាន​ការ​​​ដោះ​​​លែង​​​លោក​​​ស្រី មូរ​​​ សុខ​​​ហួរ​​​ ដែល​​​មាន​​​សញ្ជាតិ​​​អាមេរិក​​​។ លោក​​​បាន​​​មាន​​​ប្រសាសន៍​​​ថា “យើង​​​អំពាវ​​​នាវឲ្យ​​​ដោះ​​​លែង​​​លោក​​​ស្រី​​​ មូរ​​​ សុខ​​​ហួរ​​​ និង​​​សមា​​​ជិកសភា​​​ដទៃ​​​ទៀត​​​ក្នុង​​​ស្មារតី​​​ផ្សះ​​​ផ្សានយោបាយ​​​”។

ស្ថាន​​​ទូត​​​បារាំ​​​ងក៏​​​បាន​​​លើក​​​ឡើង​​​ដែរ​​​​​​ថា ខ្លួន​​​នឹង​​​ផ្តល់​​​ជំនួយ​​​កុង​​​ស៊ុល​​​​​​ជាប្រចាំ​​​ដល់​​​លោក​​​ សុថាវរិន្ទ្រ ដែល​​​មាន​​​សញ្ជាតិ​​​បារាំង​​​។ ស្ថាន​​​ទូត​​​អូស្ត្រា​​​លី​​​ដែល​​​ផ្តល់​​​ជំនួយ​កុង​​​ស៊ុល​​​ដល់​​​ជន​​​ជាតិ​​​​​​​​​​​​​​​នូវែល​​​សេឡង់​​​ បាន​​​លើកឡើង​​​ថា ស្ថានទូត​​​ “ត្រៀម​​​ខ្លួន” ​​​ផ្តល់​​​ជំនួយ​​​ដល់​លោក​​ កែវ ភិរម្យ​​​ ដែល​​​មាន​​​សញ្ជាតិ​​​នូវែល​​​សេឡង់​​​  និ​​​ងលោក រៀល​​​ ខេមរិន្ទ្រ ដែល​​​មាន​​​សញ្ជាតិ​​​អូស្ត្រា​​​លី​​​។

ថ្លែង​​​តាម​​​ទូរស័ព្ទ​​​ពី​​​ប្រទេស​​​បារាំង​​​កាល​​​ពី​​​យប់​​​មិញ លោក​​​ សម រង្ស៊ី មេដឹក​​​នាំ​​​គណបក្ស​​​សង្គ្រោះ​​​ជាតិ​​​ដែល​​​បាន​​​ចាក​​​ចេញ​​​ពី​​​ប្រទេស​​​កម្ពុជា កាល​​​ពី​​​ថ្ងៃ​​​ទី​​​១៤​​​ខែ​​​មិថុនា សម្រាប់​អ្វីដែល​​​​ត្រូវបាន​ប្រកាសថា ជាការ​​​ធ្វើ​​​ដំណើរ​​​​​​រយៈ​​​ពេល​​​បី​​​សប្តាហ៍​​​នោះ បាន​​​មាន​​​ប្រសាសន៍​​​ថា លោក​​​បាន​​​ធ្វើ​​​សន្និសីទតាម​​​ប្រព័ន្ធ Skype កាល​​​ពី​​​ម្សិលមិញ ជាមួយ​​​លោក កឹម សុខា ជា​​​អនុ​ប្រធានគណបក្ស​​​​ និ​​​ងសមាជិក​​​អចិន្ត្រៃ​​​យ៍​​​គណបក្ស​​​សង្គ្រោះ​​​ជាតិ​​​ដែលនៅ​សេសសល់។

លោក សម រង្ស៊ី បាន​​​បដិសេធ​​​មិន​​​​​​ធ្វើ​​​អត្ថាធិប្បាយ​​​ពី​​​អ្វី​​​ដែល​​​ត្រូវ​បាន​​​ពិភាក្សា​​​ឡើយ​​​។ លោក​​​បាន​​​មាន​​​ប្រសាសន៍​​​ថា “ខ្ញុំ​​​នៅ​​​តំបន់​​​ដាច់​​​ស្រយាល​​​ក្នុង​​​ប្រទេស​​​បារាំង​​​ គឺ​​​កោះ​​​មួយ​​​នៅ​​​កណ្តាល​​​សមុទ្រ​​​។ ខ្ញុំ​​​ត្រៀមវិល​​​ត្រឡប់​​​មក​​​វិញ​​​នៅ​​​ពេល​​​ឆាប់​​​ៗ​​​នេះ​​​តាម​​​ដែល​​អាច​​​ធ្វើ​​​ទៅ​​​បាន​​​”៕ គឹម​​​ហឿន

(រាយការណ៍​​​បន្ថែម​​​ដោយ ម៉ិច ដារ៉ា​ ឃួន ណារីម AlexWillemyns និង ColinMeyn)​​​

​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស