បន្ទាប់ពីឧទ្ធម្ភាគចក្រប្រភេទ Z-9 ផលិតនៅប្រទេសចិនបានធ្លាក់ចូលទៅក្នុងទឹកក្នុងរណ្ដៅជីកដីមួយកន្លែងស្ថិតក្នុងខណ្ឌដង្កោ រាជធានីភ្នំពេញ កាលពីព្រឹកថ្ងៃច័ន្ទ ដែលមានមន្ត្រីយោធាប្រាំរូបជិះនៅលើនោះ គេបានបញ្ជូនក្រុមមួយឲ្យទៅជួយស្រង់សាកសពមនុស្សបួននាក់ដែលបានស្លាប់នៅក្នុងហេតុការណ៍នោះ។
គេបានទូរស័ព្ទទៅមន្ត្រីសង្កាត់ជ្រោយចង្វា ដែលជាកន្លែងទីលំនៅរបស់អ្នកនេសាទជនជាតិចាមអាយុ៦៤ឆ្នាំម្នាក់ ឈ្មោះ សារី រ៉ូម៉ាល។ បើទោះណាជាលោកមិនដែលទទួលបានការបណ្ដុះបណ្ដាលផ្នែកជួយសង្គ្រោះក៏ដោយ ក៏លោក រ៉ូម៉ាល មានបទពិសោធច្រើនក្នុងការស្រង់សាកសពដែរ។
លោកបាននិយាយនៅផ្ទះរបស់លោកស្ថិតនៅមាត់ទន្លេសំដៅដល់ស្ពានមិត្តភាពជប៉ុននៅក្បែរនោះថា ” ខ្ញុំមានបទពិសោធច្រើនដោយសារមនុស្សទាំងអស់ដែលបានលោតពីលើស្ពានជ្រោយចង្វានេះឯង។
លោកបានបន្ថែមថា ” ចាប់តាំងពីរបប ប៉ុល ពត មកខ្ញុំបានស្រង់មនុស្សចំនួន១៦១នាក់ ហើយបន្ទាប់ពីពួកគេបានលោតទឹក ប៉ុន្តែខ្ញុំមិនចាំថា មានសាកសពប៉ុន្មាននាក់ទេ”។
វាជាការងារបន្ថែមពីលើការងាររបស់លោកជាអ្នកនេសាទ និងអ្នករត់ទូកដនៅលើបឹងទន្លេសាប ហើយការងានេះហើយដែលបានធ្វើឲ្យលោក ទៀ បាញ់ រដ្ឋមន្ត្រីក្រសួងការពារជាតិ ចាប់អារម្មណ៍ចំពោះរូបលោកនៅពេលមានហេតុការណ៍នេះ។
លោកឧត្តមសេនីយ៍ ទៀ បាញ់ បានមានប្រសាសន៍កាលពីម្សិលមិញថា ” យើងបានសុំឲ្យអ្នកនេសាទខ្មែរអុីស្លាមជួយ ពីព្រោះពួកគាត់ជាអ្នកជំនាញខាងមុជទឹករកសាកសព”។
ឧត្តមសេនីយ៍ សឹង សំណាង មេបញ្ជាការកងទ័ពអាកាសនៃកងយោធពលខេមរភូមិន្ទបានមានប្រសាសន៍ថា ប្រសិទ្ធភាពរបស់អ្នកនេសាទទាំងនេះអាចជាមេរៀនសម្រាប់ទាហានរបស់លោក។ លោកបានមានប្រសាសន៍ថា ” វាជាទឹកភក់។ បើទោះណាជាយើងមានឧបករណ៍ទំនើបស្វែងរកក៏ដោយ ក៏យើងមិនអាចរកសាកសពឃើញដែរ”។
លោកបានបន្ថែមថា “ខ្មែរអុីស្លាមបានរកសាកសពទាំងនោះឃើញ ពីព្រោះពួកគាត់បានប្រើយុទ្ធសាស្ត្រផ្ទាល់ខ្លួន ដែលពួកគាត់ធ្លាប់ស្វែងរកមនុស្សផ្សេងទៀតដែលបានលោតទឹកសម្លាប់ខ្លួន។តាមពិតយើងគួរប្រើបទពិសោធដ៏ល្អនេះពីខ្មែរអុីស្លាមរបស់យើង។
ឧត្តមសេនីយ៍ សំណាង ក៏បានមានប្រសាសន៍ផងដែរថា ប្រអប់ខ្មៅរបស់ឧទ្ធម្ភាគចក្រដែលមន្ត្រីយោធាលើកឡើងថា ជាមធ្យោបាយតែមួយគត់ដើម្បីស្វែងរកមូលហេតុដែលនាំឲ្យឧទ្ធម្ភាគចក្រធ្លាក់ ត្រូវបានស្រង់កាលពីថ្ងៃអង្គារ។
លោកបានមានប្រសាសន៍ថា ” គណៈកម្មាធិការរួមមួយនឹងនាំយកសម្ភារពីប្រទេសចិនមកអានទិន្នន័យនេះ…ហើយបន្ទាប់មកយើងនឹងបញ្ជូនទិន្នន័យទៅប្រទេសចិនដើម្បីពិនិត្យ”។
ប៉ុន្មានម៉ោងបន្ទាប់ពីឧទ្ធម្ភាគចក្រនេះធ្លាក់កាលពីថ្ងៃច័ន្ទ អ្នកនេសាទជនជាតិអុីស្លាម១៥នាក់មកពីជ្រោយចង្វា និងប្រាំនាក់ទៀតមកពីសង្កាត់ច្រាំងចំរេះ២ដែលនៅជាប់មាត់ទន្លេ បានយកឧបករណ៍នេសាទរបស់ខ្លួនទៅកាន់កន្លែងនោះ។
លោក រ៉ូម៉ាល បានមានប្រសាសន៍ថា រណ្ដៅដីនោះត្រូវបានបែងចែកក្នុងចំណោមក្រុមរបស់លោក អ្នកមុជទឹកមកពីមជ្ឈមណ្ឌលសកម្មភាពកំចាត់មីនកម្ពុជា និងទាហានកងយោធពលខេមរភូមិន្ទមកពីកងពលតូចលេខ៩១១។ ប៉ុន្តែមានតែអ្នកនេសាទដែលមានឧបករណ៍ស្វែងរកសាមញ្ញរបស់ខ្លួនទេ ដែលអាចស្រង់យកសាកសពទាំងបួននាក់ចេញពីទឹក។
ឧបករណ៍ទាំងនោះត្រូវបានទម្លាក់តាមខ្សែ ហើយអ្នកនេសាទទាំងនេះបានរាវរករហូតពួកគេចាប់បានសម្លៀកបំពាក់របស់ជនរងគ្រោះម្នាក់ បន្ទាប់មកពួកគេពីរបីនាក់ទៀតបានមុជទឹកទៅស្រង់សាកសពឡើងលើ។ អ្នកនេសាទមកពីជ្រោយចង្វាទាំងនេះបានរកឃើញសាកសពចំនួនបី ដែលក្នុងនោះឧត្តមសេនីយ៍ ទៀ បាញ់ បានផ្ដល់ប្រាក់ដល់ពួកគេចំនួន២.០០០ដុល្លារ។
លោក រ៉ូម៉ាល បាននិយាយថា ” ខ្ញុំមានអារម្មណ៍រំភើបនៅពេលដែលខ្ញុំរកសាកសពឃើញ។ ខ្ញុំគិតថា ត្រូវតែជួយ ហើយខ្ញុំសប្បាយចិត្តនៅពេលដែលខ្ញុំអាចជួយស្រង់មនុស្សចេញពីក្នុងទឹក”៕ សារុន