30 C
Phnom Penh

កាកបាទ​ក្រហម​​ផ្ដល់​អំណោយ​៣៥.០០០​ដុល្លារ​​ជួយ​សន្តិសុខ​រង​របួស​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ម្សិល​មិញ​ថា កាក​បាទ​ក្រហម​កម្ពុជា​បាន​ផ្ដល់​អំណោយជា​ប្រាក់​សរុប​១៤០​លាន​រៀល​ ឬប្រហែល​៣៥.០០០​ដុល្លារ​ជួយ​សន្តិសុខ​៣៧​នាក់​ ដែល​បាន​រង​របួស​បន្ទាប់ពី​រង​ការ​វាយដំ​កាលពី​ថ្ងៃ​អង្គារ ពី​សំណាក់​អ្នក​តវ៉ា​បក្ស​ប្រឆាំង​ ដែល​ទាម​ទារ​ឲ្យ​បើក​ទីលាន​ប្រជា​ធិបតេយ្យ​។

លោក គឹម វុត្ថា ប្រធាន​សន្តិសុខ​ខណ្ឌ​ដូន​ពេញ​ បាន​និយាយ​ថា សន្តិសុខ​របួស​ធ្ងន់​បំផុត​បី​នាក់​ ម្នាក់​ៗ​ទទួល​បាន​១០​លាន​រៀល​ ឬប្រហែល​២.៥០០​ដុល្លារ​ រីឯ​សន្តិសុខ​របួស​ធ្ងន់​១៩​នាក់​ម្នាក់​ៗ​ទទួល​បាន​៥លាន​រៀល​ ឬ​ប្រហែល​១.២៥០​ដុល្លារ។ សន្តិសុខ​របួស​ស្រាល​១៥​នាក់​បាន​ទទួល​១លាន​រៀល​ ឬ​ប្រហែល​២៥០​ដុល្លារ​ក្នុង​ម្នាក់ៗ​។ លោក​បាន​​និយាយ​អំពី​សន្តិសុខ​របួស​ទាំង​នោះ​ថា “ពួកគេ​មិនអី​ទេឥឡូវ​នេះ”។

ការ​ប៉ះ​ទង្គិច​គ្នា​កាល​ពី​ថ្ងៃ​អង្គារ គេ​បាន​ឃើញ​ក្រុម​អ្នក​តវ៉ា​គណបក្ស​ប្រឆាំង​បាន​តដៃ​នឹង​កម្លាំង​សន្តិសុខ​ ដែល​ល្បី​ខាង​ប្រើអំពើ​ហិង្សា​ ដែល​បាន​វាយ​អ្នក​តវ៉ា​គណបក្ស​សង្គ្រោះ​​​ជាតិ​​ជាច្រើន​លើក​ អំឡុង​បាតុកម្ម​ក្នុង​ពេល​៦​ខែ​កន្លង​មក​នេះ។

ប៉ុន្តែ​មិន​ដូច​ការ​ប៉ះ​ទង្គិច​គ្នា​លើក​មុនៗ​ទេ ស្ថាន​ការណ៍​ហិង្សា​​​ប្រែ​​​ក្រឡាស់​​​​នេះ​ បាន​​​ធ្វើ​ឲ្យ​មាន​ការ​អាណិត​អាសូរ​ពី​កាក​បាទ​ក្រហម​កម្ពុជា​ (CRC)។

ការ​ផ្ដល់​អំណោយ​នេះ​គឺ​ជាលើក​ដំបូង​ហើយ​ ដែល​​កាក​បាទ​ក្រហម​កម្ពុជា​ ជា​អង្គការ​ជំនួយ​សង្គ្រោះ​ដឹក​នាំ​ដោយ​លោកស្រី ប៊ុន រ៉ានី ភរិយា​របស់​លោក​​​នាយក​រដ្ឋមន្ត្រី ហុ៊ន សែន បាន​បញ្ជូន​អំណោយ​នេះ​ទៅ​អ្នក​ដែល​រង​របួស​អំឡុង​ការ​ប៉ះ​ទង្គិច​គ្នា​ជា​ច្រើន​លើក​ បន្ទាប់​ពី​ការ​បោះ​ឆ្នោត​ជាតិ​ដ៏ចម្រូង​ចម្រាស​កាលពី​ឆ្នាំ​មុន​។

លោក​ អ៊ុយ សំអាត ប្រធាន​នាយក​ដ្ឋាន​គ្រប់គ្រង​គ្រោះ​មហន្ត​​​រាយ​កាក​បាទ​ក្រហម​កម្ពុជា បាន​បដិសេធ​មិន​ធ្វើ​អត្ថាធិប្បាយ​ ដោយ​បាន​បង្វែរ​សំណួរ​ទៅ​​នាយកដ្ឋាន​ទំនាក់​ទំនង។ លោកស្រី ម៉ែន​ នារីសុភ័គ ប្រធាន​ផ្នែក​ទំនាក់​ទំនង​មិន​អាច​ទាក់​ទង​បាន​ទេ​។

លោក កឹម សុខា អនុ​ប្រធាន​គណបក្ស​សង្គ្រោះ​ជាតិ​បាន​និយាយ​នៅ​សន្និសីទ​ព័ត៌មានមួយ​កាល​ពី​ម្សិលមិញ​ថា អំណោយ​ទាំង​នោះ​​គឺ​ជា​ភ័ស្តុ​តាង​នៃ​ភាព​លម្អៀង​របស់​អង្គការ​នេះ​។ លោក​បាន​និយាយ​ថា ” រឿង​អាក្រក់​ជាង​គេ​គឺ​កាក​បាទ​ក្រហម​កម្ពុជា​នឹង​ហើយ​ ពួកគេ​​ទៅ​ជួយ​តែ​ភាគី​ម្ខាង​ប៉ុណ្ណោះ​។ កាក​បាទ​ក្រហម​កម្ពុជា​ គឺ​ត្រូវ​ជួយ​នរណា​ក៏ដោយ​ដែល​រង​គ្រោះ”។

លោក​ អំ​ សំអាត ប្រធាន​បច្ចេកទេស​នៃ​អង្គការ​សិទ្ធិ​មនុស្ស​​លីកាដូ បាន​និយាយ​ថា លោក​មិនហ៊ាន​បញ្ចេញ​យោបល់​អំពី​ការ​ផ្ដល់​អំណោយ​ពី​កាក​បាទ​ក្រហម​កម្ពុជា​ទេ។ ប៉ុន្តែ​តួនាទី​និង​គោល​ដៅ​របស់​អង្គការ​នេះ​ គឺ​ត្រូវ​ជួយ​សង្គ្រោះ​ប្រជាជន​ពីការ​លំបាក​ ដោយ​គ្មាន​លម្អៀង​នយោបាយ​”។

ក្រៅពី​លុយ​​កាកបាទ​ក្រហម​ សន្តិសុខ​ទាំង​នោះ​បាន​ទទួល​អំណោយ​ពី​មន្ត្រី​ខណ្ឌ​ និង​សាលា​រាជ​ធានី​។ លោក​ ឡុង ឌីម៉ង់ អ្នក​នាំ​​​ពាក្យ​សាលា​រាជ​ធានី​បាន​​​និយាយ​ថា អភិបាល​​​រាជ​ធានី​ ប៉ា សុជាតិវង្ស បាន​ផ្ដល់​អំណោយ​ប្រហែល​១២៥​ដុល្លារ​ដល់​សន្តិសុខ​ម្នាក់​ៗ​ក្នុង​ចំណោម​សន្តិសុខ​របួស​ធ្ងន់​២២​នាក់​​។

លោក​ គួច ចំរើន អភិបាល​ខណ្ឌ​ដូន​ពេញ​ បាន​​​និយាយ​ថា អំណោយ​មាន​ច្រើន​ចាប់​តាំង​ពី​មានការ​ប៉ះ​ទង្គិច​គ្នា​នោះ​មក​​​។ ” ខ្ញុំមិន​ដឹង​ចំនួន​ជាក់​លាក់​ទេ ពីព្រោះ​មាន​សប្បុរស​ជន​ច្រើន​​​ណាស់”៕ មានិត​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស