37 C
Phnom Penh

សំណុំរឿងពាក់ព័ន្ធ​ការស្លាប​់​មេបញ្ជាការ​កងរាជអាវុធហត្ថ​មិន​ទាន់បញ្ជូនទៅតុលាការ​

ដោយ ឌឹ ខេមបូឌា ដេលី

បទវិភាគ

មន្ត្រី​ទទួល​បន្ទុក​ស៊ើប​អង្កេត​ការ​ស្លាប់​របស់​លោក ហម មុត មេបញ្ជាការ​កង​រាជ​អាវុធ​ហត្ថ​ក្រុង​ប៉ោយ​ប៉ែត​នៅ​សណ្ឋាគារ​មួយ​ក្នុង​រាជ​ធានីភ្នំពេញកាលពី​ដើម​ខែ​នេះ​ បាន​និយាយ​កាលពី​ម្សិលមិញ​ថា តាម​ពិត​សំណុំរឿង​ពាក់ព័ន្ធករណីមនុស្សឃាតដោយ​អចេតនា​នេះ​មិន​ទាន់​ត្រូវបាន​​បញ្ជូន​ទៅ​តុលាការ​ទេ​។

សណ្ឋាគារ​ ម៉ីដលែន​ ស្ថិត​នៅក្នុង​ខណ្ឌ​ទូល​គោក​ ដែល​លោក ហម មុត មេបញ្ជាការ​កង​រាជ​អាវុធ​ហត្ថ​ក្រុង​ប៉ោយ​ប៉ែត បាន​ធ្លាក់​ពី​​ជាន់​ទី៤​ស្លាប់​​តាម​ប្រឡោះ​ជណ្ដើរ​យន្ត​ ដែល​ជា​សណ្ឋា​គារ​របស់​លោក ជ្រៀង សុផាន់ អភិបាល​រង​រាជ​ធានី​ភ្នំពេញ។​ស៊ីវ ​ចាន់​ណា/ ខេមបូឌា ​ដេលី​
សណ្ឋាគារ​ មីដលែន​ ស្ថិត​នៅក្នុង​ខណ្ឌ​ទូល​គោក​ដែល​លោក ហម មុត មេបញ្ជាការ​កង​រាជ​អាវុធ​ហត្ថ​ក្រុង​ប៉ោយ​ប៉ែត បាន​ធ្លាក់​ពី​​ជាន់​ទី៤​ស្លាប់​​តាម​ប្រឡោះ​ជណ្ដើរ​យន្ត​ ដែល​ជា​សណ្ឋា​គារ​របស់​លោក ជ្រៀង សុផាន់ អភិបាល​រង​រាជ​ធានី​ភ្នំពេញ។​ស៊ីវ ​ចាន់​ណា/ ខេមបូឌា ​ដេលី​

លោក ហម មុត ដែលមាន​អាយុ​៣៩​ឆ្នាំ​ បាន​ធ្លាក់​ពី​​ជាន់​ទី៤​ស្លាប់​​តាម​ប្រឡោះ​ជណ្ដើរ​យន្ត​ដែល​មិន​ទាន់​សាងសង់រួច​​នៅ​សណ្ឋាគារ​ Midland ដែល​​កាន់កាប់ដោយ​​លោក ជ្រៀង សុផាន់ អភិបាល​រង​រាជ​ធានី​ភ្នំពេញ បន្ទាប់ពី​លោក​ត្រឡប់​មកពី​ដើរ​កម្សាន្ត​ពេលយប់​​ទៅ​ដល់បន្ទប់របស់លោក​វិញ​នៅ​​ពេល​រំលងអធ្រាត្រថ្ងៃ​ទី​៨ ខែ​កក្កដា។

លោក ប៉ុល ដាវី មេបញ្ជា​ការ​រង​កង​រាជ​អាវុធ​ហត្ថ​រាជ​ធានី​ភ្នំពេញ​បាន​មាន​ប្រសាសន៍​មួយ​ថ្ងៃ​​ក្រោយ​មក​ថា ការ​ស៊ើប​អង្កេតអំពីការ​ស្លាប់​នេះ​បាន​បញ្ចប់​ ហើយ​សំណុំ​រឿង​នេះ​ត្រូវ​​បាន​​បញ្ជូន​ទៅ​​តុលាការ។ លោក​បាន​មាន​ប្រសាសន៍​ថា លោក​ ជ្រៀង សុផាន់​ ប្រឈម​នឹង​ការ​ចោទ​ប្រកាន់​ពី​បទ​មនុស្ស​ឃាត​ដោយ​អចេតនា​តាម​មាត្រា​២០៧​នៃ​ក្រម​ព្រហ្មទណ្ឌ​ ដោយ​សារ​លោក​មិន​បាន​ដាក់​រនាំង​បិទ​ប្រឡោះ​ជណ្ដើរ​យន្ត​ដែល​មិន​ទាន់​សាង​សង់​រួច​​នៅ​​សណ្ឋាគារ​របស់​លោក​។

ប៉ុន្តែ​លោក​វរសេនីយ៍​ទោ ផាន់ តារាវុធ អនុ​ប្រធាន​ផ្នែក​​យុត្តិធម៌​កង​រាជ​អាវុធ​ហត្ថ​រាជ​ធានី​ កាលពី​ម្សិលមិញ​​បាន​បដិសេធ​ការ​អះអាង​នេះ​។

លោក​បានមាន​ប្រសាសន៍​ថា “រឿងក្តីនេះ​ស្ថិត​នៅ​ក្នុង​ដៃ​របស់​ខ្ញុំ ហើយ​យើង​មិន​ទាន់​បាន​បញ្ជូន​ទៅ​តុលាការ​នៅ​ឡើយ​ទេ ពីព្រោះយើងកំពុង​ស៊ើប​អង្កេត​។

លោក​បាន​បន្ថែម​ថា ” យើង​មិនមានពេល​ទំនេរ​ដើម្បីជួប​ជាមួយ​ម្ចាស់​សណ្ឋាគារ​ពិភាក្សា​អំពី​ការ​ផ្ដល់​សំណង់​ដល់​គ្រួសារ​ជន​រងគ្រោះឡើយ​ ពីព្រោះ​យើ​ង​ជាប់​រវល់​”។

វរសេនីយ៍ទោ តារាវុធ បាន​មាន​ប្រសាសន៍​ថា ការ​ចរចា​រវាង​លោក ជ្រៀង សុផាន់ និង​ក្រុម​គ្រួសារ​លោក ហម មុត កំពុង​តែបន្ត​។

លោក ហេង វីរៈ ក្រឡាបញ្ជី​សាលា​ដំបូង​រាជ​ធានី​ភ្នំពេញ ដែល​ទទួល​បន្ទុក​រឿង​ក្ដី​ព្រហ្ម​ទណ្ឌ​ក៏បាន​បញ្ជាក់ផងដែរ​ថា លោក​មិន​ទាន់​បាន​ទទួល​សំណុំ​រឿង​ពាក់ព័ន្ធការ​ស្លាប់​លោក ហម មុត ពី​កង​រាជ​អាវុធ​ហត្ថ​នៅ​ឡើយ​ទេ។

កាលពី​ម្សិលមិញ លោកវរសេនីយ៍ឯក​ ដាវី បាន​បដិសេធ​មិន​ធ្វើ​អត្ថាធិប្បាយ​។ លោក​​បាន​មាន​ប្រសាសន៍​ថា លោក​ជាប់​ប្រជុំ​ ហើយ​បន្ទាប់​មក​មិន​បាន​លើក​ទូរស័ព្ទ​ទៀតទេ។

នៅ​សណ្ឋាគារ​នោះ គុយ លាន បុគ្គលិក​ផ្នែក​​​ទទួល​ភ្ញៀវ​បាន​និយាយ​ថា ច្រក​ចូល​ទៅកាន់​ប្រឡោះ​ជណ្ដើរ​យន្ត​ត្រូវ​បាន​ដាក់​ឈើ​បាំង​ ប៉ុន្តែ​បាន​និយាយ​ថា អ្នក​យក​ព័ត៌មាន​អាច​មើលបាន​​បន្ទាប់​ពី​ម៉ោង​១០​យប់​។

នៅ​ពេល​ត្រូវ​បាន​ទាក់​ទង​តាម​ទូរស័ព្ទ លោក ជ្រៀង សុផាន់ អភិបាល​រង​រាជ​ធានី​ភ្នំពេញ និង​ជា​ម្ចាស់​សណ្ឋាគារ​នេះ​​ឆ្លើយ​យ៉ាង​សាមញ្ញចំពោះ​សំណួរ​ជាច្រើន​ រួម​ទាំង​សំណួរ​ពាក់​ព័ន្ធ​ការ​វិវឌ្ឍ​ស្ដី​ពីការ​ចរចា​ផ្ដល់​សំណង​ដល់​ក្រុម​គ្រួសារ​ជន​រង​គ្រោះ​ថា ” ខ្ញុំ​មិន​ដឹង​ទេ​” ៕ សារុន

(រាយការណ៍​បន្ថែម​ដោយ AlexWillemyns)​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស