37 C
Phnom Penh

សាលា​​​រាជធានី​ព្រមាន​​​ចាប់​ខ្លួន​​​អ្នក​​​តវ៉ា​​​ប្រឆាំង​​​វៀតណាម​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​សុក្រ សា​​​លា​​​រាជ​​​ធានី​បាន​​​គំរាម​​​ចាប់​​​ដាក់​​​ពន្ធនាគារ​​​ដល់​​​ទៅ​​​១៥​​​ឆ្នាំ ចំពោះ​​​និស្សិត​​​ដែល​​​មាន​​​ផែនការ​​​តវ៉ា​​​នៅ​​​មុខ​​​ស្ថានទូត​​​វៀតណាម ជំុវិញ​ការ​​​អត្ថាធិប្បាយ​​​ធ្វើ​​​ឡើង​​​កាល​​​ពី​​​ខែ​​​មិថុនា​​​ ដោយ​​​មន្ត្រី​​​ស្ថានទូត​​​ម្នាក់​​​ដែល​​​លើក​​​ឡើង​​​​​​ថា ទឹក​​​ដី​​​កម្ពុជា​​​ក្រោម​​​ជា​​​របស់​​​ប្រទេស​​​វៀតណាម​​​យូរ​​​មក​​​ហើយ​​​ មុន​​​វា​​​​​​ក្លាយ​​​ជា​​​ផ្នែក​​​មួយ​​​នៃ​​​ប្រទេស​​​នេះ​​​ជា​​​ផ្លូវ​​​ការ​​​នៅ​​​ឆ្នាំ​​​១៩៤៩។

សហព័ន្ធ​​​និស្សិត​​​បញ្ញវន្ត​​​កម្ពុជា​​​ មាន​​​ផែនការ​​​​​​ដើរ​​​ក្បួន​​​ទៅ​​​ស្ថានទូត​​​វៀតណាម​​​នៅ​​​ថ្ងៃ​​​ទី​២១​​​ខែ​​​កក្កដា ហើយ​​​ប្រគល់​​​ញត្តិ​​​ អំពាវ​​​នាវ​​​ឲ្យ​​​​​​វៀតណាម​​​ទទួល​​​ស្គាល់​​​ថា ​​​​តាម​​​ប្រវត្តិ​​​សាស្ត្រ​​​ទឹក​​​ដី​​​នេះ​ជា​​​របស់​​​ប្រទេស​​​កម្ពុជា និង​អំពាវនាវ​ឲ្យ​​​ដក​​​សេចក្តី​​​ថ្លែង​​​ការណ៍​​​របស់​​​​​​លោក ត្រាន វ៉ាន់​ថុង មន្ត្រី​​​ទី​​​១​​​ស្ថាន​​​ទូត​​​វៀតណាម។

លោក​​​ ឃួង​​​ ស្រេង អភិបាល​​​រង​​​រាជ​​​ធានី​​​ភ្នំពេញ​​​បាន​​​មាន​​​ប្រសាសន៍​​​ថា “ខ្ញុំ​​​បាន​​​ចេញ​​​សេចក្តី​​​ប្រកាស​​​មួយ​​​រួច​​​ហើយ​​​​​​ហាម​​​ឃាត់​​​ពួក​​​គេ​​​មិន​​​ឲ្យ​​​ដើរ​​​ក្បួន​​​ទេ​​​នៅ​​​ថ្ងៃ​​​ទី​​​២១​​​​​​”។ លោក​​​បាន​​​មាន​​​ប្រសាសន៍​​​ថា “ពេល​​​យើង​​​ហាម​​​ឃាត់​​​ពួកគេ​​​មិន​​​ឲ្យ​​​ធ្វើ​ ហើយ​នៅ​តែ​ធ្វើ​ឲ្យ​ប៉ះ​ពាល់​​​ដល់​​​សាធារណៈ​​​ ដូច្នេះ​​​យើង​នឹង​​​ប្តឹង​ទៅ​​​តុលាការ វា​​​ត្រូវ​តែ​មាន​​​ទោស​​​។ ប្រសិនបើ​​​វា​​​កើត​​​ឡើង​​​នៅ​​​កន្លែង​​​សាធារណៈ​​​ ដូច​​​ជា ទីលាន​​​ប្រជាធិបតេយ្យ​​​ ហើយ​​​មាន​​​អំពើ​​​ហិង្សា​​​ ពួក​​​គេ​​​ត្រូវ​​​ទទួល​​​ទោស​​​​​​ជាប់​​​ពន្ធនាគារ​​​ពី​១០​​​ឆ្នាំ​​​ទៅ​​​១៥​​​ឆ្នាំ​​​”។

លោក​​​ ម៉ៅ ពិសេស ប្រធាន​​​ក្រុម​​​និស្សិត បាន​​​ប៉ាន់​​​ប្រមាណ​​​ថា អ្នក​​​គាំទ្រ​​​១.០០០នាក់​​​នឹង​​​ចូល​​​រួម​​​ជាមួយ​​​លោក​ក្នុង​​​ការ​​​ដាក់​​​ញត្តិ​​​ទៅ​​​ស្ថាន​​​ទូត​​​​​​វៀតណាម​​​​​​ បារាំង​​​ អាមេរិក​​​ អឺរ៉ុប រុស្ស៊ី  និង​​​ចិន​​​។ លោក​​​បាន​​​មាន​​​ប្រសាសន៍​​​ថា “ក្នុង​​​កិច្ច​​​ប្រជុំ​​​មួយ​​​ សាលា​​​រាជធានី​​​បាន​​​ព្រមាន​​​យើង​​​ថា ប្រសិន​​​បើ​​​យើង​​​ដើរ​​​ក្បួន​​​ យើង​​​នឹង​​​ត្រូវ​​​ចាប់​​​ខ្លួន​​​​​​​​​​​​​​​​​​​​​​​​​​​​​​​​​​​​”។

លោក​​​បាន​​​បន្ថែម​​​ថា “យើង​​​នឹង​​​ហែ​ក្បួន​​​​​​ ពីព្រោះ​​​យើង​​​មិន​​​ចង់​​​​ឲ្យ​​​ទឹក​​​ដី​​​កម្ពុជា​​​ក្រោម​​​របស់​​​យើង​ត្រូវ​​​បាត់​​​បង់​​​ពី​ប្រវត្តិសាស្ត្រ​​​ដ៏​​​យូរ​​​នេះ​​​ទេ​​​ ដូច្នេះ​​​យើង​​​ត្រូវ​​​ការ​​​ឲ្យ​​​ប្រជាជន​​​កម្ពុជា​​​ឲ្យ​​​យល់​ដឹង”។ “ប្រសិន​​​បើ​​​យើង​​​មិន​​​ធ្វើ​​​ឲ្យ​​​វៀតណាម​​​និយាយ​​​ថា កម្ពុជា​​​ក្រោម​​​ជា​​​ទឹក​​​ដី​​​កម្ពុជា​​​ទេ​​នោះ​ នៅ​​ពេល​​​អនាគត​​​ ប្រវត្តិសាស្ត្រ​​​របស់​​​យើង​​​នឹង​​​លែង​​​ពិតហើយ។ យើង​​​ត្រូវ​​​ការ​​​ស្ថាន​​​ទូត​​​ផ្សេង​​​ទៀត​​​ជួយ​​​ដោះ​​​ស្រាយ​​​បញ្ហា​​​នេះ​​​”។

កម្ពុជា​​​ក្រោម​​​គឺ​​​ជា​​​អាណា​​​និគម​​​ក្រោម​​​ការ​​​គ្រប់​​​គ្រង​​​របស់​​​បារាំង​​​រវាង​​​ឆ្នាំ​​​១៨៦២​​​ដល់​​​ឆ្នាំ​​​១៩៤៩​​​ ដោយ​​​ពេល​​​នោះ​​​វា​​​ត្រូវ​​​បាន​​​ប្រគល់​​​ជា​​​ផ្លូវ​​​ការ​​​ទៅ​​​ប្រទេស​​​វៀតណាម។

កាល​​​ពី​​​ថ្ងៃ​​​ទី​​​៨​​​ ខែ​​​កក្កដា ការ​​​តវ៉ា​​​លើក​​​ដំបូង​​​ប្រឆាំង​​​ការ​​​ថ្លែង​​​របស់​​​អ្នក​​​ការ​​​ទូត​​​វៀត​​​ណាម​​​រូប​​​នេះ​​​ ត្រូវ​​​បាន​​សន្តិសុខ​​​ខណ្ឌ​​​ចំការ​​​មន​ដែល​​​ពាក់​​​មួក​​​​​​សុវត្ថិភា​ព​​​ បំបែក​​​យ៉ាង​​​ហិង្សា។ ក្នុង​​​សេចក្តី​​​ថ្លែង​​​ការណ៍​​​មួយ​​​​​​ចេញ​​​កាល​​​ពី​​​ថ្ងៃ​​​សុក្រ អង្គការ​​​សិទ្ធិ​​​ជន​​​ជាតិ​​​ដើម​​​ភាគ​​​តិច​​​បាន​​​អំពាវ​​​នាវ​​​ឲ្យ​​​មាន​​​ភាព​​អហិង្សា​​ ប្រសិន​​​បើ​​​ការ​​​តវ៉ា​​​​​​ធ្វើ​​​ឡើង​​​។

អង្គការ​​​នេះ​បាន​​​លើក​​​ឡើង​​​ថា “អាជ្ញាធរ​​​រដ្ឋ​​​គួរ​​​ធានា​​​​​​នីតិរដ្ឋ​​​ និង​​​ធានា​​​សិទ្ធិ​​​ចំពោះ​​​​​​សេរីភាព​​​នៃ​​​ការ​​​ជួប​​​ជុំ​​​ និង​​​ការ​​​បញ្ចេញ​​​មតិ​​​។ អ្នក​​​តវ៉ា​​​ត្រូវ​​​ប្រកាន់​​​ខ្ជាប់​​​គោល​​​ការ​​​ណ៍​​​អហិង្សា​​​ក្នុង​​​ការ​​​បន្ត​​​គោល​​​ដៅ​​​របស់​​​ខ្លួន​​​”៕ មានិត (រាយការណ៍​​​បន្ថែម​​​ដោយ​​​ Lauren Crothers)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស