31 C
Phnom Penh

លោក​​​ ហ៊ុន សែន បដិសេធ​​​ផែន​​​ការ​​​បើក​​​ការិយាល័យ​​​ពាណិជ្ជកម្ម​​​ជាមួយ​​​តៃវ៉ាន់​​​

ដោយ ឌឹ ខេមបូឌា ដេលី

បទវិភាគ

លោក​​​នាយក​​​រដ្ឋមន្ត្រី​​​ ហ៊ុន សែន បាន​​​មាន​​​ប្រសាសន៍​​​កាល​​​ពី​​​ថ្ងៃសុក្រ​​​ថា លោក​​​នឹង​​​បដិសេធ​​​ការ​​​បើក​​​ការិយាល័យ​​​ពាណិជ្ជកម្ម​​​តៃវ៉ាន់​​​នៅ​​​ប្រទេស​​​កម្ពុជា​​​ ដោយសារ​​​ការ​​​គោរព​​​​​​តាម​​​នយោបាយ​​​ចិនតែ​​​មួយ​​​​​​របស់​​​រដ្ឋាភិបាល​​​ បើ​​​ទោះ​​​ជា​​​មេ​​​ដឹក​​​នាំ​​​ជំនួញ​​​ជា​​​ច្រើន​​​នាក់​​​អំពាវ​​​នាវ​​​ឲ្យ​​​មាន​ជំហាន​​​អនុវត្ត​​​​​​ន៍​​​ថែម​​​ទៀត​​​ ដើម្បី​​​​​​ជំរុញ​​ការ​​​វិនិយោគ​​​ពី​​​កោះ​​​តៃ​​​វ៉ាន់​​​ក៏​​​ដោយ។

បណ្តាញ​​​ព័ត៌មាន​​​តៃ​​​វ៉ាន់​​​បាន​​​រាយការណ៍​​​នៅ​​​សប្តាហ៍​​​នេះ​​​ថា ក្រុម​​​ប្រឹក្សា​​​អភិវឌ្ឍ​​​ន៍​​​ពាណិជ្ជ​​​កម្ម​​​តៃវ៉ាន់​​​ (TAITRA) នឹង​​​បើក​​​ការ​​​ិយាល័យ​​​ពាណិជ្ជកម្ម​​​មួយ​​​ក្នុង​​​រាជ​​​ធានី​​​ភ្នំពេញ​​​នៅ​​​ខែ​​​ក្រោយ ជា​​​ជំហាន​​​មួយ​​​ដែល​​​ក្រុម​​​តំណាង​​​ពាណិជ្ជ​​​កម្ម​​​ក្នុង​​​ស្រុក​​​បាន​​​និយាយ​​​ថា នឹង​​​ជំរុញ​​​សេដ្ឋ​​​កិច្ច​​​របស់​​​ប្រទេស​​​កម្ពុជា។

ថ្លែង​​​នៅ​​​ឯ​​​កិច្ច​​​ប្រជុំ​​​គណៈ​​​រដ្ឋ​​​មន្ត្រី​​​កាល​​​ពី​​​ម្សិលមិញ លោក​​​ ហ៊ុន សែន បាន​​​បញ្ជា​​​ក្រសួង​​​ការ​​​បរទេស​​​ឲ្យ​​​កាសែត​​​ រស្មី​​​កម្ពុជា ធ្វើ​​​ការ​​​កែ​​​តម្រូវ​​​អត្ថ​​​បទ​​​ទំព័រ​​​មុខ​​​មួយ​​​ដែល​​​ដក​​​ស្រង់​​​ពី​​​គេហ​​​ទំព័រ​​​​​​ព័ត៌​​​មាន​​​ តៃវ៉ាន់​​​​​​​​​ តៃ​​​ប៉ិ ថាមស៍​ ដែល​​​បាន​​​រាយការណ៍​​​ថា រដ្ឋាភិបាល​​​កម្ពុជា​​​បាន​​​យល់​​​ព្រម​​​នឹង​​​ផែន​​​ការ​​​នេះ​ហើយ។

លោក ហ៊ុន សែន បាន​​​មាន​​​ប្រសាសន៍​​​ថា “អត្ថ​​​បទ​​​នេះ​​​មាន​​​លក្ខណៈ​​​រសើប​​​ណាស់​​​ចំពោះ​​​នយោបាយ​​​ការបរទេស​​​របស់​​​ប្រទេស​​​កម្ពុជា​​​ ដែល​​​អនុវត្ត​​​នយោបាយ​​​ចិន​​​តែ​​​មួយ​​​យូរ​​​មក​​​ហើយ​​​”។

លោក​​​នាយក​​​រដ្ឋ​​​មន្ត្រី ដែល​​​បាន​​​បិទ​​​ការិយាល័យ​​​សេដ្ឋកិច្ច​​​និង​​​វប្បធម៌​​​ក្រុង​​​តៃប៉ិ កាល​​​ពី​​​ឆ្នាំ​​​១៩៩៧ ព្រោះ​​​អ្វី​​​ដែល​​​លោក​​​​​​​​​​​បាន​​​អះ​​​អាង​​​ គឺ​​​ការ​​​ផ្តល់​​​មូលនិធិ​​​តៃ​​​វ៉ាន់​​​ដល់​​​គណបក្ស​​​ហ៊្វុន​​​ស៊ិនប៉ិច ក្នុង​​​ការ​​​ប្រយុទ្ធ​​​គ្នា​​​នៅ​​​ឆ្នាំ​​​នោះ​​​ បាន​​​លើ​​​ក​​​ឡើង​​​ជា​​ថ្មី​​​នូវ​​​នយោបាយ​​​រដ្ឋាភិបាល​​​ហាម​​​ប្រាម​​​មិន​​​ឲ្យ​​​មាន​​​តំណាង​តៃ​​​វ៉ាន់​​​ជា​​​ផ្លូវ​​​ការ​​​នៅ​​​កម្ពុជា។

លោក ហ៊ុន សែន បាន​​​មាន​​​ប្រសាសន៍​​​ថា “ទី​​​១​​​ វា​​​ជា​​​នយោបាយ​​​ផ្លូវ​​​ការ​​​របស់​​​យើង ​​​​​​មិន​​​អនុញ្ញាត​​​ឲ្យ​​​តៃ​វ៉ាន់​​​មាន​​​ការ​​​ិយាល័យ​​​នៅ​​​ប្រទេស​​​កម្ពុជា​​​ទេ ទោះ​​​ជា​​​ក្នុង​​​កាលៈទេសៈ​​​ណា​​​ក៏​​​ដោយ។ ទី២ យើង​​​មិន​​​អនុញ្ញាត​​​ឲ្យ​​​មាន​​​ពិធី​​​ជាតិ​​​ [តៃ​​​វ៉ាន់]​​​ ណាមួយ​​​ ឬ​​​ការ​​​បង្ហូត​​​ទង់​​​ជាតិ​​​តៃវ៉ាន់​​​លើ​​​ទឹក​​​ដី​​​របស់​​​ប្រទេស​​​កម្ពុជា​​​ទេ​​​ ទោះ​​​ជា​​​នៅ​​​តាម​​​សណ្ឋាគារ ឬ​​​កន្លែង​​​ផ្សេង​​​ទៀត​​​ក៏​​​ដោយ​​​”។ លោក​​​បាន​​​បន្ថែម​​​ថា “ជា​​​ពិសេស​​​យើង​​​មិន​​​អនុញ្ញាត​​​ឲ្យ​​​ទេ ​​​ពីព្រោះ​​​តៃវ៉ាន់​​​គ្រាន់​​​តែ​​​ជា​​​ខេត្ត​​​មួយ​​​របស់​​​ប្រទេស​​​ចិន​​​​​​​​​ប៉ុណ្ណោះ​​​”។

លោក ងួន ម៉េង​​​តិច អគ្គនាយក​​​សភា​​​ពាណិជ្ជ​​​កម្ម​​​កម្ពុជា​​​​​​​​​​​​​​​ (CCC) បាន​​​បដិសេធ​​​មិន​​​អធិប្បាយ​​​លើ​​​បញ្ហា​​​នយោបាយ​​​ទេ​​​ ប៉ុន្តែ បាន​​​មាន​​​ប្រសាសន៍​​​ថា មជ្ឈមណ្ឌល​​​ពាណិជ្ជ​​​កម្ម​​​អាច​​​ជា​​​មធ្យោបាយ​​​ពាណិជ្ជកម្ម​​​​​​ដ៏​​​មាន​​​តម្លៃ​។

លោក​​​បាន​​​មាន​​​ប្រសាសន៍​​​ថា “​​​ក្រុម​​​ហ៊ុន​​​តៃវ៉ាន់​​​ជាច្រើន​​​ទៅ​​​វិនិយោគ​​​នៅ​​​ប្រទេស​​​វៀតណាម​​​ ហើយ​​​នាំ​​​ទៅ​​​ជាមួយ​​​នូវ​​​ប្រាក់​​​ដ៏​​​ច្រើន​​​ ប៉ុន្តែ ប្រទេស​​​កម្ពុជា​​​មិន​​​បាន​​​ទទួល​​​[ការ​​​វិនិយោគ] ​​​ច្រើន​​​ពី​​​តៃវ៉ាន់​​​ទេ​​​ ហេតុ​​​ដូច្នេះ​​​ហើយ​​​ ខ្ញុំ​​​បាន​​​ស្នើ​​ទៅ​​​រដ្ឋាភិបាល​​​សុំ​​​ឲ្យ​មាន​​​មជ្ឈមណ្ឌល​​​ពាណិជ្ជកម្ម​​​មួយ​​​ជា​​​មួយ​​​​​​តៃ​វ៉ាន់​​​”។

លោក​​​ ម៉េង​​​តិច បាន​​​ឲ្យ​​​ដឹង​​​ទៀត​​​ថា ក្រុមប្រឹក្សា​​​ពាណិជ្ជកម្ម​​​តៃ​វ៉ាន់​​​​​​បាន​​​ប្រាប់​​​លោក​​​ថា ពួក​​​គេ​​​បាន​​​ទាក់​​​ទាញ​​​ការ​​​វិនិយោគ​​​មាន​​​ទឹក​​​ប្រាក់​​​៣២​​​ពាន់​​​លាន​​​ដុល្លារ​​​នៅ​​​វៀតណាម​​​ ហើយ​​​លោក​​​បាន​​​ប៉ាន់​​​ប្រមាណ​​​ថា ប្រទេស​​​កម្ពុជា​​​អាច​​​ទទួល​​​បាន​​​១០​​​ពាន់​​​លាន​​​ដុល្លារ​​​ ឬ​​​ច្រើន​​​ជាង​​​នេះ​​​ពី​​​តៃវ៉ាន់​​​ “ប្រសិន​​​បើ​​​យើង​​​មាន​​​​​​ការ​គ្រប់គ្រង​និង​​​បទប្ប​​​ញ្ញត្តិ​​​ល្អ​​​”។

លោក​​​ ឡារី កៅ (Larry Kao) អនុ​​​ប្រធាន​​​សមាគម​​​ពាណិជ្ជកម្ម​​​តៃវ៉ាន់​​​នៅ​​​កម្ពុជា​​​ (TCAC)​​​បាន​​​ប៉ាន់​​​ប្រមាណ​​​ថា មាន​​​ក្រុម​​​ហ៊ុន​​​របស់​​​តៃ​​​វ៉ាន់​​​​​​៥.០០០ ឬ៦.០០០​​​ក្រុមហ៊ុន​​​បើក​​​រក​​​ស៊ី​​​នៅ​​​កម្ពុជា​​​សព្វ​​​ថ្ងៃ​​​នេះ​​​ ដោយ​​​លោក​​​បាន​​​បន្ថែម​​​ថា ការិយាល័យ​​​ពាណិជ្ជកម្ម​​​​​​មួយ​​​នឹង​​​ទាក់​​​ទាញ​​​បាន​​​ការ​​​វិនិយោគ​​​ថែម​​​ទៀត។

លោក​​​បាន​​​មាន​​​ប្រសាសន៍​​​ថា “ខ្ញុំ​​​សង្ឃឹម​​​ថា ការិយាល័យ​​​នេះ​​​អាច​​​ត្រូវ​​​បង្កើត​​​ឡើង​​​ ដោយ​​​គ្មាន​​​បញ្ហា​​​ណា​​​មួយ​​​ទេ​​​ ប៉ុន្តែ គេ​​​ត្រូវ​​​ធ្វើ​​​ដោយ​​​ប្រុង​​​ប្រយ័ត្ន​​​ ពីព្រោះ​​​ស្ថាន​​​ទូត​​​ចិន​​​អាច​​​មាន​​​ការ​​​ជំទាស់ ពី​​​ព្រោះ​​​អ្វី​​​ក៏​​​ដោយ​​​ពាក់​​​ព័ន្ធ​​​នឹង​​​តៃវ៉ាន់ គេ​​​អាច​​​ជំទាស់​​​”។

លោក​​​ កៅ បាន​​​ឲ្យ​​​ដឹង​​​ទៀត​​​ថា ការ​​​ប្រកាន់​​​ខ្ជាប់​​​ដ៏​​​តឹង​​​រឹុង​​​របស់​​​កម្ពុជា​​​ចំពោះ​​​នយោបាយ​​​ចិនតែ​​​​​​មួយ​​​មិន​​​មាន​​​ផល​​​ប៉ះពាល់​​​អវិជ្ជ​​​មាន​​​លើ​​​ការ​​​វិនិយោគ​​​មក​​​ពី​​​តៃ​​​វ៉ាន់​​​ទេ។

លោក​​​បាន​​​មាន​​​ប្រសាសន៍​​​ថា “ពួក​​​គេ​​​គ្រាន់​​​តែ​​​សម្រេច​​​ចិត្ត​​​ធ្វើ​​​ការ​​​វិនិយោគ​​​​​​ប៉ុណ្ណោះ​​​ដោយ​​​សារ​​​បរិយាកាស​​​ជំនួញ។ ស្ថាន​​​ការ​​​នយោបាយ​​​ជា​​​កង្វល់​​​មួយ ប៉ុន្តែ ទំនាក់​​​ទំនង​​​រវាង​​​កោះ​​​តៃវ៉ាន់​​​ និង​​​ប្រទេស​កម្ពុជា​​​[នៅ​​​តែ​​​ដដែល​​​] ជា​​​យូរ​​​ណាស់​​​មក​​​ហើយ​​​ ហើយ​​​ពួក​​​គេ​​​មិន​​​គិត​​​ថា វា​​​នឹង​​​ផ្លាស់​​​ប្តូរ​នៅ​​​ពេល​​​ណា​​​មួយ​​​ឆាប់ៗ​​​នោះ​​​ទេ​​​”។

លោក​​​ ឆេង ហុង​​​ប៉ អ្នក​​​នាំ​​​ពាក្យ​​​ស្ថាន​​​ទូត​​​ចិន​​​បាន​​​មាន​​​ប្រសាសន៍​​​ថា លោក​​​ “គ្មាន​​​សិទ្ធិ​​​ធ្វើ​​​អត្ថាធិប្បាយ​​​អំពី​​​បញ្ហា​​​នេះ​​​ទេ​​​”។ លោក​​​បាន​​​មាន​​​ប្រសាសន៍​​​ទៀត​​​ថា “ប៉ុន្តែ ខ្ញុំ​​​គិត​​​ថា រដ្ឋាភិបាល​​​កម្ពុជា​​​បាន​​​ថ្លែង​​​យ៉ាង​​​ច្បាស់​​​ហើយ​​​នូវ​​​ជំហរ​​​របស់​​​ខ្លួន​​​​​​អំពី​​​បញ្ហា​​​នេះ​​​”៕ មានិត​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស