យោងតាមប្រធាននាយកដ្ឋានលិខិតឆ្លងដែននៃក្រសួងមហាផ្ទៃ បានឲ្យដឹងថា ការិយាល័យច្រកចេញចូលតែមួយចំនួនបួនកន្លែងដើម្បីរៀបចំឯកសារសម្រាប់ប្រជាពលរដ្ឋខ្មែរ ដែលចង់ទៅរកការងារស្របច្បាប់ធ្វើនៅក្នុងប្រទេសថៃនឹងបើកនៅថ្ងៃអង្គារ បន្ទាប់ពីក្រសួងចេញសារាចរណែនាំមួយកាលពីសប្ដាហ៍មុនស្តីពីការពង្រឹងការអនុវត្តវិធានការបន្ថែមដើម្បីដោះស្រាយករណីពលករទេសន្តរប្រវេសន៍ខ្មែរដែលទើបវិលត្រឡប់ពីប្រទេសថៃ។
លោក ម៉ៅ ច័ន្ទតារា ប្រធាននាយកដ្ឋានលិខិតឆ្លងដែន បានមានប្រសាសន៍ថា ការិយាល័យទាំងបួនដែលស្ថិតនៅតាមបណ្ដាខេត្តនៅជាប់ព្រំដែនជាមួយប្រទេសថៃ គឺខេត្តឧត្តរមានជ័យ ខេត្តបន្ទាយមានជ័យ ខេត្តប៉ៃលិន និងខេត្តកោះកុង នឹងត្រូវបើកនៅថ្ងៃអង្គារ ហើយកំពុងរង់ចាំឯកសារពីក្រសួងការងារដើម្បីបញ្ជាក់ថា តើបុគ្គលណាគួរទទួលបានលិខិតឆ្លងដែន។
លោកបានមានប្រសាសន៍ថា ” យើងកំពុងរង់ចំាឯកសារពីក្រសួងការងារ”។ លោកបានបន្ថែមថា ពលករត្រូវតែមានឯកសារត្រឹមត្រូវមុនពេលចេញលិខិតឆ្លងដែនឲ្យនៅការិយាល័យតាមខេត្តទាំងបួននេះ។
ពលករខ្មែរប្រហែល២៥០.០០០នាក់បានវិលត្រឡប់មកប្រទេសវិញកាលពីខែមុន ដោយសារភ័យខ្លាចចំពោះការបង្ក្រាបពីសំណាក់របបយោធាថៃមកលើពលករខុសច្បាប់។ ជាការខំប្រឹងប្រែងដើម្បីសម្រួលឲ្យមានការធ្វើចំណាកស្រុកឡើងវិញនោះ កាលពីខែមុនរដ្ឋាភិបាលបានបញ្ចុះតម្លៃធ្វើលិខិតឆ្លងដែនពី១២៤ដុល្លារមកត្រឹម៤ដុល្លារសម្រាប់ពលករដែលចង់ទៅធ្វើការនៅប្រទេសថៃ។
ប៉ុន្តែពលកររាប់រយនាក់កំពុងត្រូវបានអាជ្ញាធរថៃចាប់បញ្ជូនត្រឡប់មកកម្ពុជាវិញជារៀងរាល់ថ្ងៃនៅឡើយ បន្ទាប់ពីព្យាយាមឆ្លងដែនត្រឡប់មកវិញដោយខុសច្បាប់។ មន្ត្រីមូលដ្ឋាន និងពលករនិយាយថា ការខំប្រឹងប្រែងរបស់រដ្ឋាភិបាលដើម្បីផ្ដល់បណ្ដាញស្របច្បាប់សម្រាប់ពលករមានការយឺតយ៉ាវពេក។
លោក អុិត សំហេង រដ្ឋមន្ត្រីក្រសួងការងារ បានចេញសារាចរណែនាំមួយកាលពីថ្ងៃអង្គារ ស្តីពីផែនការរបស់ក្រសួងសម្រាប់បញ្ជូនពលករទៅធ្វើការនៅប្រទេសថៃដោយស្របច្បាប់។
សារាចរណែនាំនោះលើកឡើងថា ពលករដែលចង់បានលិខិតឆ្លងដែនពីការិយាល័យថ្មីទាំងបួននេះ ត្រូវតែមានកិច្ចសន្យាការងារជាមួយទីភ្នាក់ងារជ្រើសរើសពលករនៅកម្ពុជា ឬជាមួយក្រុមហ៊ុនដែលទទួលឲ្យធ្វើការ។
មុនពេលឆ្លងចូលទៅប្រទេសថៃ ពលករក៏ត្រូវមានប័ណ្ណពលករកម្ពុជាទៅធ្វើការនៅបរទេស ដែលចុះហត្ថលេខាដោយអគ្គនាយកនៃអគ្គនាយកដ្ឋានការងារក្រសួងការងារនៅក្នុងទីក្រុងភ្នំពេញផងដែរ។
នៅពេលដែលពួកគេទទួលបានលិខិតឆ្លងដែន និងឯកសារសម្រាប់ចូលទៅប្រទេសថៃហើយ ពលករក៏ត្រូវមានរូបថត៤គុណ៦សម្រាប់បិទនៅលើបែបបទនៅខាងភាគីថៃផងដែរ៕ គឹមហឿន