29 C
Phnom Penh

នគរបាល​រកឃើញ​សាកសព​ជន​រងគ្រោះ​ដោយ​ការ​ចាប់ជំរិត​ក្នុង​រណ្តៅដីមាន​ទឹក​មួយ​កន្លែង​

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​សៅរ៍ នគរ​បាល​ខេត្ត​កំពង់​ស្ពឺ​បាន​រក​ឃើញ​សាក​សពបុរសម្នាក់​ដែល​ត្រូវ​បាន​គេ​ចង​ដៃនិង​ជើង​ហើយ​​យក​ស្កុត​បិទ​មាត់ក្នុង​រណ្តៅដីមានទឹក​មួយ​កន្លែង​​។​គេ​ជឿថា បុរស​នេះ​ត្រូវ​បាន​ចាប់​ជំរិត​កាលពី​​សប្ដាហ៍​មុន​ដើម្បី​ទារ​ប្រាក់​លោះ។

លោក ហេង ពិសិដ្ឋ អាយុ​២៥​ឆ្នាំ​ជាកូន​ម្ចាស់​ហាង​នំប៉័ង ហេង ចេង ដែលមាន​ច្រើន​សាខា នៅ​ខេត្ត​កណ្ដាល​។

លោក សំ សាក់ នាយ​នគរ​បាលព្រហ្មទណ្ឌ​កម្រិង​ធ្ងន់​ខេត្តកំពង់​ស្ពឺ​ បាន​មាន​ប្រសាសន៍​ថា លោក ហេង ពិសិដ្ឋ បាន​បាត​់​ខ្លួនកាលពី​ថ្ងៃ​ព្រហស្បតិ៍ ​គឺ​នៅ​ថ្ងៃ​តែមួយដែល​ក្រុម​គ្រួសារ​បាន​យក​ប្រាក់​លោះទៅ​ឲ្យក្រុម​ជន​ចាប់​ជំរិត​ក្នុង​រាជ​ធានី​ភ្នំពេញ។

លោក​បាន​មាន​ប្រសាសន៍​ថា ” យោង​តាម​នគរ​បាល​ខេត្តកណ្ដាល​ វា​ជាករណី​ចាប់​ជំរិត​។ ជន​សង្ស័យ​បានចាប់​ជំរិត​ជន​រងគ្រោះ​ ហើយ​ទាម​ទារ​ប្រាក់​លោះ​ចំនួន​១០០​.០០០​ដុល្លារ​ពី​គ្រួសារ​ជនរងគ្រោះ​ ហើយ​គ្រួសារ​ជន​រង​គ្រោះ​បាន​យក​ប្រាក់លោះ​ឲ្យ​ពួកគេ​នៅ​យប់​ថ្ងៃ​ទី​១៧ ខែ​កក្កដា”។

លោក សំ សាក់ បាន​បន្ថែមថា នគរ​បាល​បាន​ស្គាល់​អត្តសញ្ញាណ​ជន​សង្ស័យ​ទាំង​នោះ​ហើយ។ លោក​បានមាន​ប្រសាសន៍​ថា ” នគរ​បាល​ខេត្ត​កណ្ដាល​ស្គាល់អត្តសញ្ញាណ​ជន​សង្ស័យ​ទាំង​នោះ​៧០​ភាគរយ​ហើយ។ ខ្ញុំ​មិន​អាច​និយាយ​​ឲ្យ​លើស​ពី​នេះ​បានទេ ពីព្រោះ​នគរ​បាល​ខេត្ត​កណ្ដាល​ទទួល​បន្ទុក​រឿង​នេះ​”។

លោក អុីវ ចំរើន ស្នង​ការ​នគរ​បាល​ខេត្ត​កណ្ដាល បាន​បដិសេធ​មិន​ធ្វើអត្ថាធិប្បាយ​អំពី​ករណី​នេះ​ទេ ពីព្រោះ​ករណី​នេះកំពុង​ស្ថិត​ក្រោម​ការ​ស៊ើប​អង្កេតនៅឡើយ​។

លោក ម៉ក់ ជីតូ ប្រធាន​នាយក​ដ្ឋាន​កណ្ដាល​យុត្តិធម៌​​ក្រសួង​មហាផ្ទៃ​​ ​មិន​​អាច​​បញ្ជាក់​​ថា លោក ហេង ពិសិដ្ឋ ត្រូវ​បាន​ចាប់​ជំរិត​នោះ​ទេ ប៉ុន្តែ​លោក​បាន​មាន​ប្រសា​សន៍​ថា ការ​ស្លាប់​​របស់​ជន​រងគ្រោះ​ត្រូវ​បាន​ចាត់ទុក​ថា ជាករណី​មនុស្ស​ឃាត​។ លោក​បានមាន​ប្រសាសន៍ថា ” វា​ជាករណី​មនុស្ស​ឃាត​ ប៉ុន្តែ​យើង​មិនទាន់​ដឹង​ថា តើ​ជន​រងគ្រោះត្រូវ​គេ​សម្លាប់​ដោយ​មូល​ហេតុ​អ្វី​ឡើយ”។

នៅ​ខេត្ត​កំពង់ស្ពឺ លោក សួន យ៉ុន នាយ​ប៉ុស្តិ៍​ឃុំកក់ ស្រុក​បសេដ្ឋ បាន​មាន​ប្រសាសន៍​ថា សាក​សព​ហើម​ទៅហើយ​នេះ ត្រូវ​បាន​អ្នក​ឃ្វាល​​គោ​ប្រទះឃើញ​កាល​ពី​រសៀល​ថ្ងៃ​សៅរ៍ អណ្តែត​ផ្កាប់​មុខ​ក្នុង​រណ្ដៅ​ដី​​​មាន​ទឹក​មួយ​។ លោក​បាន​បន្ថែមថា អ្នក​ភូមិ​ដែល​បានឃើញ​នគរ​បាល​ស្រង់​សាក​សព​​បាន​និយាយ​ថា សាកសពលោក ហេង ពិសិដ្ឋ ត្រូវ​គេ​ឃើញ​ចង​ជើង​ និង​ដៃចង​ស្លាប​សេក​ ហើយ​ក្បាល​របស់​គាត់​ត្រូវ​គេ​យក​អាវ​យឺត​ពណ៌ស​គ្រប និងមានស្កុត​បិទមាត​់​ទៀត​។ លោក​បាន​មាន​ប្រសាសន៍​ថា សាក​សព​រង​ការ​វាយ​ដំ​ត្រង់​ក្បាល​យ៉ាង​ដំណំ​។

លោក សួន យ៉ុន បាន​មាន​ប្រសាសន៍​ថា លោក​ក៏​បាន​និយាយ​ជាមួយបុរស​ម្នាក់​នៅ​កន្លែង​កើត​ហេតុ​ដែ​ល​បាន​ប្រាប់​ថា ត្រូវ​ជា​សាច់​ថ្លៃ​របស់​លោក ហេង ពិសិដ្ឋ ផងដែរ​។ បុរស​រូប​នោះ​​បាន​ប្រាប់​លោក​ថា ​តាមពិត​​ជន​រងគ្រោះ​ត្រូវ​បាន​ចាប​់ជំរិត​ ប៉ុន្តែ​បាន​អះអាង​ថា ជន​ចាប់​ជំរិត​បាន​ទាម​ទារ​ប្រាក់​លោះ​មិន​មែន​១០០.០០០​ដុល្លារ​ទេ គឺ​​៥០០.០០០​ដុល្លារ​។

លោក​ សួន យ៉ុន បានមាន​ប្រសាសន៍​ថា ” បើ​តាម​សាច់​ញាតិ​ វា​ជា​ការ​ចាប់​ជំរិត​។ ពួកគេ​បាន​ទាម​ទារ​ប្រាក់​លោះ​៥០០.០០០​ដុល្លារ​ ហើយ​ក្រុម​គ្រួសារ​ជន​រងគ្រោះ​បាន​ផ្ដល់​ប្រាក់​ឲ្យ​ពួកគេ​១០០.០០០​ដុល្លារ ប៉ុន្តែ​ជន​សង្ស័យ​ទាំង​នោះ​នៅ​តែ​សម្លាប់​ជន​រងគ្រោះ​ដដែល​”។

ស្ត្រី​ម្នាក់​ដែល​បាន​លើក​ទូរស័ព្ទ​នៅហាង​នំប៉័ង​ ហេង ចេង ក្នុង​ក្រុង​តាខ្មៅ​បាន​និយាយ​ថា អ្នកស្រីត្រូវ​ជា​បង​ប្អូន​ជីដូនមួយ​ ហេង ពិសិដ្ឋ ប៉ុន្តែ​បាន​បដិសេធ​មិន​ប្រាប់​ឈ្មោះ​របស់​អ្នកស្រី​ទេ។ អ្នកស្រី​ក៏​បាន​អះអាង​ផង​ដែរ​ថា ជន​ចាប់​ជំរិត​បាន​ទារ​ប្រាក់​លោះ​៥០០.០០០​ដុល្លារ។ ស្ត្រី​រូប​នេះបាន​និយាយ​ថា “ជន​សង្ស័យ​មាន​គ្នា​ប្រហែល​ប្រាំ​នាក់ ហើយ​ពួកគេ​សុទ្ធ​តែ​ជា​បុរស​។ នគរ​បាល​កំពុង​ស៊ើប​អង្កេត​ករណី​នេះ​។ ខ្ញុំ​មិន​អាច​និយាយ​ឲ្យ​លើស​ពី​នេះ​បានទេ ពីព្រោះ​យើង [ក្រុម​គ្រួសារ​ និងជន​ចាប់​ជំរិត​] ជាអ្នកស្គាល់​គ្នា​”៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស