34 C
Phnom Penh

ចាប់​ខ្លួនអ្នក​កាសែត​ពីបទ​ប៉ុនប៉ង​គំរាមទារប្រាក់

ដោយ ឌឹ ខេមបូឌា ដេលី

បទវិភាគ

យោង​តាម​អាជ្ញាធរ​មូលដ្ឋាន​បានឲ្យ​ដឹង​ថា អ្នកយក​ព័ត៌មាន​បីនាក់​និង​ចាងហ្វាង​កាសែត​ម្នាក់​ត្រូវ​បាន​ចាប់ខ្លួន​នៅក្នុង​ករណី​ពីរដាច់ដោយ​ឡែកពីគ្នា​បីបទ​ប៉ុនប៉ង​គំរាមទារ​ប្រាក់​ក្នុង​ខេត្ត​ស្ទឹង​ត្រែង​និង​ខេត្ត​ក្រចេះ​កាលពី​ថ្ងៃអាទិត្យ​ បន្ទាប់ពី​ឃាត់​រថយន្ត​​កែច្នែដែលសង្ស័យថា​ដឹក​ឈើ​កាប់រួច​ខុស​ច្បាប់។

លោក ស៊ី សាមាត​ មេបញ្ជាការ​ព្រហ្មទណ្ឌកងរាជ​អាវុធហត​្ថ​ខេត​្ត​ស្ទឹង​ត្រែង​បាន​មាន​ប្រសា​សន៍​កាលពី​ម្សិលមិញថា​ លោក មុំ ម៉ុន អាយុ​៥៤ឆ្នាំ ជា​អ្នក​យក​ព័ត៌មាន​ឲ្យ​កាសែត​សង្គម​ខ្មែរ និងលោក គឹម នឿន អាយុ​២៨ឆ្នាំ​ ជា​អ្នក​យក​ព័ត៌មាន​ឲ្យ​កាសែត​ជាតិ​ខ្មែររស់​​ត្រូវ​បាន​ចាប់ខ្លួន​ជាមួយ​លោក គឹម សុវណ្ណារិទ្ធ អាយុ​៤១ឆ្នាំ ជា​ចាងហ្វាង​កាសែត​នាគរាជ​ និង​ប្រពន្ធ​របស់លោក​ឈ្មោះ ទ្រី ចន្ថា អាយុ​៣២ឆ្នាំ បន្ទាប់ពី​តាម​ចោទថា ពួកគាត​់​បាន​ឃាត់​រថយន្តកែច្នៃ​ពីរគ្រឿង​ដែលដឹក​ឈើ​គ្រញូង​​ក្នុងឃុំ​តាឡាត​ ស្រុក​សេសានកាលពី​ថ្ងៃ​អាទិត្យ។ លោក សាមាត បានមាន​ប្រសាសន៍ថា ” យើង​បាន​ចាប់​ខ្លួន​អ្នក​ទាំង​នេះ​ខណៈ​ដែលពួកគេ​ឃាត់​រថយន្ត​កែច្នៃ​ពីរ​គ្រឿង​គំរាម​ទារ​ប្រាក់​៥០០​ដុល្លារ​ពី​អ្នក​បើក​បរ”។

តាម​ព័ត៌មាន​ថា អ្នក​បើក​បររថយន្ត​បដិសេធ​នឹង​ការ​ទាម​ទារ​របស់​ជនសង្ស័យ ហើយ​បាន​ទូរស័ព្ទ​ទៅ​អាជ្ញាធរ​ដើម្បី​ជម្រាបពួកគាត់​ពី​ហេតុការណ៍​នេះភ្លាមៗ។

លោក​ សាមាត បាន​មាន​ប្រសាសន៍​ថា ” យើង​ទទួល​បាន​ការ​ហៅ​ទូរស័ព្ទ​ពី​ម្ចាស់​រថយន្ត​ ហើយ​យើង​បាន​ទៅកន្លែង​កើត​ហេតុ​ចាប់​ខ្លួន​អ្នក​កាសែត​ទាំង​នេះ​ភ្លាម”។ លោក​បាន​បន្ថែម​ថា ឥឡូវ​នេះ​ចុង​ចោទ​កំពុង​ត្រូវ​ឃុំខ្លួន​នៅ​ទី​បញ្ជាការដ្ឋាន​កង​រាជ​អាវុធ​ហត្ថ​ខេត្ត​ ហើយ​នឹង​ត្រូវ​បញ្ជូន​ទៅ​តុលាការ​នៅថ្ងៃ​នេះ។ លោក សាមាត បាន​មាន​ប្រសាសន៍​ថា នេះ​គឺជា​ករណី​ទី​៥ដែល​អ្នក​យកព័ត៌មាន​ប៉ុនប៉ង​គំរាម​ទារ​ប្រាក់​ពី​រថយន្ត​ដឹកឈើ​ក្នុង​ខេត្ត​ស្ទឹង​ត្រែង​កាលពី​ឆ្នាំមុន​។

យោង​តាម​អធិការ​នគរ​បាល​ស្រុក​ស្នួល​​បាន​ឲ្យ​ដឹង​ថា នៅ​ក្នុងករណី​ដាច់​ដោយ​ឡែក​មួយ​ទៀត អ្នក​យកព័ត៌មាន​ម្នាក់​មកពី​សមាគមឃ្លាំ​មើល​កម្ពុជា ត្រូវ​បាន​ចាប់​ខ្លួន​កាលពី​ថ្ងៃ​អាទិត្យ​ក្នុង​ស្រុក​ស្នួល​ ខេត្ត​ក្រចេះ ដោយ​ចោទ​ថា បាន​ប៉ុន​ប៉ង​គំរាម​ទារ​ប្រាក់​ពី​អ្នក​រត់​តាក់​ស៊ី​ម្នាក់​។

លោក ជា ​ម៉ាប់ អាយុ​២៩​ឆ្នាំ​ តាម​ចោទ​ថា បាន​ឃាត់​អ្នក​រត​់​តាក់​ស៊ី​ដើម្បី​រក​មើល​ឈើ​ខុស​ច្បាប់​។ លោក ចាន់ សុខគីម អធិការ​នគរ​បាល​ស្រុក​បាន​​មាន​ប្រសាសន៍​ថា នៅ​ពេល​លោក​ ម៉ាប់ បាន​ព្យាយាម​គំរាម​ទារ​ប្រាក់​ពី​អ្នក​បើក​បរ​​ដែល​​​មិនបាន​ដឹក​​​ឈើ​​​នោះ​ អ្នក​បើក​បរ​រថយន្ត​បាន​ទូរស័ព្ទ​ទៅ​អាជ្ញាធរ​។ លោកបាន​មាន​ប្រសាសន៍​ថា ” យើង​បាន​ចាប់​ខ្លួន​អ្នក​កាសែតរូប​នេះ ខណៈ​ពេល​គាត​់​កំពុង​ឈប់​រថយន្ត​នៅ​តាម​ផ្លូវ​គំរាម​ទារ​ប្រាក់​ពី​អ្នក​រត់​តាក់​ស៊ី​”។

លោក ម៉ាប់ ត្រូវ​បាន​បញ្ជូនទៅ​សាលា​ដំបូង​ខេត្ត​កាលពី​ម្សិលមិញ ដែល​នៅ​ទីនោះ លោក​ត្រូវ​បាន​ចោទ​ប្រកាន់​ពី​បទ​គំរាម​ទារ​ប្រាក់់៕ សារុន​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស