យោងតាមនគរបាលបានឲ្យដឹងថា និពន្ធនាយកកាសែតម្នាក់ និងជនកាប់ឈើខុសច្បាប់ម្នាក់ទៀតត្រូវបានចាប់ខ្លួនពីបទបាញ់ប្រហារមន្ត្រីរដ្ឋបាលព្រៃឈើជាន់់ខ្ពស់មួយរូបនៅក្នុងខេត្តមណ្ឌលគិរីកាលពីដើមខែនេះ។
លោក ពុំ ពឿន អាយុ៤៨ឆ្នាំជានិពន្ធនាយកកាសែតបុរីអង្គរ ត្រូវបានចាប់ខ្លួននៅក្នុងរាជធានីភ្នំពេញកាលពីថ្ងៃអាទិត្យ។ ចំណែកឯជនកាប់ឈើខុសច្បាប់ ឈ្មោះ លេន កំរី អាយុ៣៧ឆ្នាំត្រូវបានចាប់ខ្លួននៅផ្ទះរបស់ជននេះក្នុងខេត្តត្បូងឃ្មុំ កាលពីថ្ងៃសុក្រ។
សាលាដំបូងខេត្តមណ្ឌលគិរី នឹងសាកសួរអ្នកទាំងពីរនៅថ្ងៃនេះជុំវិញការបាញ់ប្រហារលោក ហេង ចន្ត្រា នាយរងផ្នែករដ្ឋបាលព្រៃឈើក្រុងសែនមនោរម្យ ដែលតាមសេចក្តីរាយការណ៍ថា ពេលលោកកំពុងតាមដានជនកាប់ឈើខុសច្បាប់ រថយន្តរបស់លោកត្រូវគេឃាត់ ហើយលោកក៏ត្រូវគេបាញ់ចំដៃតែម្តងកាលពីថ្ងៃទី៤ ខែកក្កដា។
លោក សូរ សុវណ្ណ ស្នងការរងខេត្តមណ្ឌលគិរីបានមានប្រសាសន៍ថា ឈ្មោះ លេន កំរី បានសារភាពថា ខ្លួនពិតជាបានបាញ់ប្រហារលោក ហេង ចន្ត្រា មែន។ លេន កំរី និយាយថា រូបគេបានបើកការបាញ់ប្រហារដោយសារតែលោក ហេង ចន្ត្រា មិនព្រមចុះពីរថយន្តនិយាយជាមួយខ្លួន។
ទោះជាយ៉ាងណា លោក សូរ សុវណ្ណ បានមានប្រសាសន៍ថា លេន កំរី មានហេតុផលផ្សេងទៀតនៅក្នុងតំបន់មួយនៃប្រទេសកម្ពុជា កន្លែងដែលការកាប់ឈើខុសច្បាប់ពីសំណាក់មន្ត្រី និងជនឆ្លៀតឱកាសផ្សេងៗទៀត បានឈានទៅដល់ការប្រឈមមុខដាក់គ្នាដោយហិង្សាក្នុងរយៈពេលប៉ុន្មានខែថ្មីៗនេះ។
លោកមានប្រសាសន៍ថា “នេះគឺគ្រាន់តែជាលេសដោះសារប៉ុណ្ណោះ។ វាប្រាកដជាពាក់ព័ន្ធនឹងការសងសឹក”។ លោកបានបន្តថា លេន កំរី គឺជាឈ្មួញឈើតូចតាចម្នាក់។
ពេលទាក់ទងកាលពីម្សិលមិញ លោក ខៃ យូឡាយ ចាងហ្វាងកាសែតបុរីអង្គរបានមានប្រសាសន៍ថា ប្រពន្ធរបស់លោក ពុំ ពឿន បានប្រាប់លោកថា ប្តីរបស់គាត់បានចេញទៅយកព័ត៌មានក្នុងនាមជាអ្នកកាសែត។ លោកបានមានប្រសាសន៍ថា “គាត់បានប្រាប់ប្រពន្ធរបស់គាត់ថា គាត់ចេញទៅយកព័ត៌មាន ប៉ុន្តែ គាត់មិនបានប្រាប់ខ្ញុំទេ ទុកឲ្យច្បាប់ជាអ្នកដោះស្រាយទៅចុះ”។
លោក ហេង ចន្ត្រា ដែលអះអាងថា បានដកហូតឈើប្រណីតបានជាង១០០ម៉ែត្រគូបនៅក្នុងរយៈពេលបីខែមកនេះ កំពុងតាមដានការដឹកជញ្ជូនឈើើខុសច្បាប់ឆ្ពោះទៅព្រំដែនវៀតណាមនៅយប់ដែលលោកត្រូវគេបាញ់ប្រហារ។
នៅម៉ោងប្រហែល១០យប់នោះ រថយន្តមួយគ្រឿងបានបើកស្កាត់មុខរថយន្តលោកបង្ខំឲ្យលោកឈប់។ ភ្លាមនោះលោកបានបត់រថយន្ត ហើយបើកចេញ ប៉ុន្តែ ជនល្មើសបានបើកដេញតាមលោក ហើយស្កាត់ផ្លូវលោកម្តងទៀតមុនពេលដើរតម្រង់មករកលោកទាំងមានកាំភ្លើងក្នុងដៃ៕ សុខុម