សកម្មជនបរិស្ថានប្រាំបួនរូបដែលត្រូវបានបើកសវនាការជំនុំជម្រះពីបទបំផ្លាញទ្រព្យសម្បត្តិឯកជនក្នុងខេត្តកំពង់ធំបានបដិសេធការចោទប្រកាន់នៅក្នុងតុលាការកាលពីម្សិលមិញដែលថា ពួកគាត់បានបំផ្លាញចម្ការដំឡូងមីរបស់កសិករក្នុងមូលដ្ឋានម្នាក់កាលពីឆ្នាំ២០១១។
សមាជិកប្រាំបួនរូបនៃបណ្តាញប្រជាជនព្រៃឡង់ ជាក្រុមសកម្មជនដែលប្តូរផ្តាច់ការពារព្រៃឡង់ប្រឆាំងនឹងការកាប់ឈើខុសច្បាប់ ត្រូវបានចោទប្រកាន់កាលពីឆ្នាំ២០១១ នៅពេលអ្នកស្រី អ៊ូ រដ្ឋា ជាកសិករក្នុងមូលដ្ឋានម្នាក់បានដាក់ពាក្យបណ្តឹងចោទប្រកាន់ពួកគាត់ថា បានបំផ្លាញចម្ការដំឡូងមីរបស់អ្នកស្រីទំហំមួយហិកតា។ អ្នកស្រីបានទាមទារប្រាក់សំណងចំនួន៤០លានរៀល។
នៅពេលត្រូវបានទាក់ទងបន្ទាប់ពីសវនាការកាលពីម្សិលមិញ សកម្មជន ឈាង វុទ្ធី បាននិយាយថា លោកស្ថិតក្នុងចំណោមមនុស្សប្រហែល៤០នាក់ធ្វើដំណើរចូលព្រៃដើម្បីល្បាតនៅថ្ងៃមានការចោទប្រកាន់នោះនៅពេលពួកគាត់ដើរកាត់ចម្ការរបស់អ្នកស្រី រដ្ឋា។
លោកបានអះអាងថា “កាលពីថ្ងៃទី៦ ខែមិថុនាឆ្នាំ២០១១សកម្មជនប្រហែល៤០នាក់បានទៅព្រៃដើម្បីពិនិត្យមើលការកាប់ឈើខុសច្បាប់ ហើយបានដើរកាត់ចម្ការដំឡូងមីរបស់អ្នកស្រី រដ្ឋា មែន ប៉ុន្តែយើងមិនបានបំផ្លាញអ្វីឡើយ” ជាការអះអាងដែលគាំទ្រដោយសកម្មជនដទៃទៀត។
លោក យុង ផានិត មេធាវីរបស់ពួកគាត់បានមានប្រសាសន៍ថា ភ័ស្តុតាងរបស់អ្នកស្រី រដ្ឋា និងមេធាវីរបស់អ្នកស្រីនៅសវនាការមិនរឹងមាំទេ ដោយសារពឹងផ្អែកតែលើការផ្តល់សក្ខីកម្មពីសាច់ញាតិរបស់ខ្លួន និងរូបថតចម្ការដំឡូងមីដែលត្រូវបានគេដើរជាន់តែប៉ុណ្ណោះ ដែលលោកបានអះអាងថា ត្រូបានបានថតនៅពេលផ្សេង។
ផ្ទុយទៅវិញ ក្រុមសកម្មជនបានចោទលោក ម៉ៅ បុរាណ នាយការិយាល័យនគរបាលព្រហ្មទណ្ឌស្រុកសណ្តាន់ថា បានណែនាំឲ្យអ្នកស្រី រដ្ឋា ដាក់ពាក្យបណ្តឹង។ពួកគាត់បាននិយាយថា លោក បុរាណ បានផ្តោតគោលដៅលើពួកគាត់ដោយសារមានការតវ៉ាញឹកញាប់ពីពួកគាត់ប្រឆាំងក្រុមហ៊ុន CRCKជាក្រុមហ៊ុនចម្ការកៅស៊ូដែលពួកគាត់ចោទថា បានកាប់ឈើខុសច្បាប់ហួសពីព្រំប្រទល់របស់ខ្លួន។ ពួកគាត់បានបន្ថែមថា លោក បុរាណ និងមន្ត្រីរបស់គាត់បានបំបែកការតវ៉ារបស់ពួកគាត់ប្រឆាំងនឹងការកាប់ឈើខុសច្បាប់។
លោក បុរាណ បានមានប្រសាសន៍កាលពីម្សិលមិញថា លោកបានរៀបចំពាក្យបណ្តឹងប្តឹងសកម្មជនទាំងនេះបន្ទាប់ពីអ្នកស្រី រដ្ឋា បានយកពាក្យបណ្តឹងមកដាក់ជាមួយលោកកាលពីឆ្នាំ២០១១ ប៉ុន្តែបានបដិសេធថា មិនបានជំរុញអ្នកស្រីឲ្យធ្វើដូច្នេះទេ។ លោកបានមានប្រសាសន៍ថា “ខ្ញុំបានរៀបចំពាក្យបណ្តឹងនេះតាមច្បាប់។ អ្នកស្រី រដ្ឋា មានភ័ស្តុតាងគ្រប់គ្រាន់ប្រឆាំងសកម្មជនទាំងនេះ។ អ្នកស្រីមានរូបថតបង្ហាញពីការបំផ្លាញចម្ការរបស់អ្នកស្រី ហើយអ្នកស្រីក៏មានសាក្សីមួយចំនួនដែរ”។
គេមិនអាចទាក់ទងអ្នកស្រី រដ្ឋា និងមេធាវីរបស់អ្នកស្រីដើម្បីសុំអត្ថាធិប្បាយបានទេ។ តុលាការនឹងប្រកាសសាលក្រមនៅថ្ងៃទី៦ខែសីហា៕សារុន