យោងតាមសេចក្តីថ្លែងការណ៍រួមចេញដោយគណបក្សទាំងពីរបន្ទាប់ពីការចរចាកាលពីព្រឹកមិញនេះឲ្យដឹងថា គណបក្សសង្គ្រោះជាតិបានយល់ព្រមទទួលយកអាសនៈទាំង៥៥របស់ខ្លួននៅក្នុងសភាជាតិ ជាថ្នូរនិងការកែប្រែគណៈកម្មាធិការជាតិរៀបចំការបោះឆ្នោត ដែលគណបក្សសង្គ្រោះជាតិចោទពីបទលួចបន្លំសន្លឹកឆ្នោតក្នុងការបោះឆ្នោតជាតិកាលពីឆ្នាំមុន ជាការគាំទ្រចំពោះគណបក្សប្រជាជនកម្ពុជាកំពុងកាន់អំណាច។
លោកនាយករដ្ឋមន្ត្រី ហ៊ុន សែន និងលោក សម រង្ស៊ី មេដឹកនាំបក្សប្រឆាំងបានបញ្ចប់កិច្ចព្រមព្រៀងអំឡុងការចរចាតាំងពីម៉ោង៩ព្រឹកដល់ម៉ោង២រសៀលនេះ។
សេចក្តីថ្លែងការណ៍នេះមានខ្លឹមសារថា “គណបក្សទាំងពីរព្រមព្រៀងលើដំណោះស្រាយនយោបាយ ដោយធ្វើការរួមគ្នានៅស្ថាប័នសភាជាតិ ដើម្បីឈានដល់ដំណោះស្រាយ ចំពោះបញ្ហាជាតិនានាស្របតាមលទ្ធិប្រជាធិបតេយ្យនិងនីតិរដ្ឋ”។
លោក ស៊ុន ឆ័យ ប្រធានក្រុមអ្នកតំណាងគណបក្សសង្គ្រោះជាតិបានបញ្ជាក់ថា ការព្រមព្រៀងនេះគឺមានន័យថា គណបក្សប្រឆាំងនឹងទទួលយកអាសនៈរបស់ខ្លួននៅសភា ដែលខ្លួនបានធ្វើពហិការតាំងពីខែកញ្ញាមក។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍យ៉ាងខ្លីថា គណបក្សនឹងទទួលយកអាសនៈរបស់ខ្លួន “ក្នុងពេលឆាប់ៗនេះ” ។
សេចក្តីថ្លែងការណ៍ដែលចេញដោយគណបក្សទាំងពីរក្រោយពីការប្រជុំនោះមានខ្លឹមសារថា គណៈកម្មាធិការជាតិរៀបចំការបោះឆ្នោតថ្មីនឹងមានសមាជិក៩រូប គឺ៤រូបជ្រើសរើសដោយគណបក្សប្រជាជនកម្ពុជា ៤រូបទៀតជ្រើសរើសដោយគណបក្សសង្គ្រោះជាតិ និងសមាជិកទី៩ត្រូវជ្រើសរើសដោយសមាជិកសភាជាតិ។
សេចក្តីថ្លែងការណ៍នេះមិនបានបញ្ជាក់ឲ្យដឹងថា សមាជិកទី៩នេះនឹងត្រូវជ្រើសរើសដោយរបៀបណាទេ។
កិច្ចព្រមព្រៀងនេះនិយាយថា សភាជាតិនឹងមានគណបក្សប្រជាជនកម្ពុជាជាប្រធាន ហើយថាគណបក្សកាន់អំណាចនេះនឹងមានអាសនៈចំនួន៧នៅក្នុងគណៈកម្មាធិការអច្ត្រៃយ៍សភាដែលមានសមាជិក១៣រូប។មានិត