27.5 C
Phnom Penh

មន្ត្រី​​​គណបក្ស​​​សង្គ្រោះ​​​ជាតិ​​​ត្រូវ​​​បាន​​​ដោះ​​​លែងឲ្យ​​​នៅ​​​ក្រៅ​​​ឃុំ​​​​​​ពី​​​ពន្ធនាគារ​​​ព្រៃ​​​ស

ដោយ ឌឹ ខេមបូឌា ដេលី

បទវិភាគ

តំណាង​​​រាស្ត្រ​​​ជាប់​​​ឆ្នោត​​​ប្រាំពីរ​​​រូប​​​របស់​​​គណបក្ស​​​សង្គ្រោះ​​​ជាតិ និង​​​មន្ត្រី​​​បក្ស​​​សង្គ្រោះ​​​ជាតិ​​​មួយ​​​រូប​​​ទៀត​​​ដែល​​​ត្រូវ​​​បាន​​​​​​ចោទ​​​ប្រកាន់​​​ពី​​​បទ​​​ដឹក​​​នាំ​​​កុបកម្ម​​​ និង​​​ញុះញង់​​​ឲ្យ​​​ប្រពឹត្ត​​បទ​​​ឧក្រិដ្ឋ​​​ ត្រូវ​​​បាន​​​ដោះ​​​លែងឲ្យ​​​នៅ​​​ក្រៅ​​​ឃុំ​​​​​​ពី​​​ពន្ធ​​​នាគារ​​​ព្រៃ​​​ស​​​នៅម៉ោង​​​ប្រហែល​​​៥​​​ល្ងាច​​​ម្សិលមិញ​​​។photo-prisoners-released

បុគ្គល​​​ទាំង​​​ប្រាំបី​​​រូប​​​នេះ​​​ត្រូវ​​​បាន​​​ចាប់​​​ខ្លួន​​​កាល​​​ពី​​​សប្តាហ៍​​​មុន​​​ដោយ​បាន​ចូលរួម​​​នៅ​​​ក្នុង​​​ការ​​​តវ៉ា​​​មួយ​​​កាល​​​ពី​​​ថ្ងៃ​​​ទី​​​១៥​​​ខែ​​​កក្កដា ដើម្បី​​​ដក​​​បម្រាម​​​​​​បាតុកម្ម​​​​​​លើ​​​ទីលាន​​​ប្រជា​​​ធិបតេយ្យ ដែល​​​បាន​​​ផ្ទុះ​​​អំពើ​​​ហិង្សា​​​ នៅ​​​ពេល​​​ក្រុម​​​អ្នក​​​តវ៉ា​​​បាន​​​វាយ​​​តប​​​ទៅ​​​សន្តិសុខ​​​ខណ្ឌ​​​ដូន​​​ពេញ​​​វិញ ធ្វើ​​​ឲ្យ​​​ពួក​​​គេ​​​មួយ​​​ចំនួន​​​រង​​​របួស​​​ធ្ងន់​​​។

ការ​​​ដោះ​​​លែង​​​ពួក​​​គាត់​​​ធ្វើ​​​ឡើង​​​តែ​​​ប៉ុន្មាន​​​ម៉ោង​​​ប៉ុណ្ណោះ​​​ បន្ទាប់ពី​​​លោក សម រង្ស៊ី ប្រធាន​​​​​​គណបក្ស​​​សង្គ្រោះ​​​ជាតិ​​​បាន​​​ឈានដល់កិច្ច​​​ព្រម​​​ព្រៀង​​​ជាមួយ​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន ដើម្បី​​​បញ្ចប់​​​ការ​​​ជាប់​​​គាំង​​​ផ្នែក​​​នយោបាយ​​​រយៈ​​​ពេល​​​មួយ​​​ឆ្នាំ និង​​​ឲ្យ​​​តំណាង​​​រាស្ត្រ​​​ជាប់​​​ឆ្នោត​​​ទាំង​​​៥៥​​​របស់​​​គណបក្ស​​​ប្រឆាំង​​​ស្បថ​​​ចូល​​​កាន់​​​តំណែង​​​ក្នុង​​​រដ្ឋសភា​​​។

លោក​​​ស្រី ម៉េង សុភារី មេធាវី​​​តំណាង​​​លោកស្រី មូរ សុខហួរ តំណាង​​​រាស្ត្រ​​​ជាប់​​​ឆ្នោត​​​មក​​​ពី​​​គណបក្ស​​​សង្គ្រោះ​​​ជាតិ​​​ បាន​​​​​​មាន​​​ប្រសាសន៍​​​កាល​​​ពីម្សិលមិញថា តុលាការ​​​បាន​​​យល់​​​ព្រម​​​ដោះ​​​លែង​​​អ្នក​​​ជាប់​​​ឃុំ​​​ទាំង​​​ប្រាំបីរូប​​​ ដោយ​​​ផ្អែក​​​លើ​​​បី​​​ចំណុច​​​។

លោកស្រី​​​មាន​​​ប្រសាសន៍​​​បន្ត​​​ថា “ចំណុច​​​ទី​​​១​​​ គឺ​​​ថា [ ការ​​​ដោះ​​​លែង​​​ពួក​​​គាត់​​​ ]​​​​​​​​​​​​​​​ ចាំបាច់​​​នៅ​​​ក្នុង​​​ស្ថាន​​​ភាព​​​បច្ចុប្បន្ន​​​។ ទី២ ពួក​​​គាត់​​​មិន​​​បង្ក​​​ការ​​​គំរាម​​​កំហែង​​​ដល់​​​នីតិវិធី​​​សើុប​​​អង្កេត​​​ និង​​​ទី​​​៣​​​ព្រះ​​​រាជ​​​អាជ្ញា​​​មិន​​​ជំទាស់​​​”។

តំណាង​​​រាស្ត្រ​​​ជាប់​​​ឆ្នោត​​​មក​​​ពី​​​គណបក្ស​​​សង្គ្រោះ​​​ជាតិ​​​ដូច​​​ជា លោក កែវ ភិរម្យ លោក ម៉ែន សុថាវរិន្ទ្រ លោក ហូរ​​​ វ៉ាន់ លោក រៀល​​​ ខេមរិន្ទ្រ លោក នុត រុំ​​​ដួល​​​ និង​​​លោក ឡុង​​​ រី ព្រម​​​ទាំង​​​លោក អឿ ណារិទ្ធ ជំនួយ​​​ការ​​​របស់​​​លោកស្រី​​​ មូរ​​​ សុខហួរ​​​ ប្រធាន​​​កិច្ច​​​ការ​​​សាធារណៈ​​​របស់​​​គណបក្ស​​​សង្គ្រោះ​​​ជាតិ​​​ផង​​​ដែរ​​​ បាន​​​លេច​​​មុខ​​​ចេញ​​​ពី​​​មណ្ឌល​​​អប់​​​រំ​​​កែប្រែ​​​​​​ទី១​​​នៃ​​​ពន្ធ​​​នាគារ​​​ព្រៃ​​​ស នៅ​​​វេលា​​​ម៉ោង​​​ប្រហែល​​​៤ និង​​​៤៥​​​នាទី​​​រសៀល​​​។

ប្រហែល​​​១០​​​នាទី​​​ក្រោយ​​​មក​​​ លោក​​ស្រី មូរ សុខ​​​ហួរ​​​ បាន​​​ដើរ​​​ចេញ​​​ពី​​​មណ្ឌល​​​អប់​​​រំ​​​កែ​​​ប្រែ​​​ទី២​​​សម្រាប់​​​ស្ត្រី​​​នៃ​​​ពន្ធនាគារ​​​ព្រៃ​​​ស​​​ដោយ​​​មាន​​​សេរីភាព​​​ឡើង​​​វិញ​​​ ហើយ​​​ទទួល​​​បាន​​​ការ​​​ស្វាគមន៍​​​រាក់​​​ទាក់​​​ពី​​​អ្នក​​​ស្មោះ​​​ស្ម័គ្រ​​​នឹង​​​គណបក្ស​​​ជាង​​​៥០០នាក់​​​ដែល​​​បាន​​​ច្រៀង​​​រាំ និង​​​គ្រវី​​​ទង់​​​ជាតិ​​​នៅ​​​កណ្តាល​​​ភ្លៀង​​​អស់​​​រយៈ​​​ពេល​​​រាប់​​​ម៉ោង មុន​​​ពេល​​​គេ​​​ដោះ​​​លែង​​​លោកស្រី​​​។

ដៃកាន់​​​ផ្កា​​​ឈូក​​​ និង​​​ទង់​​​ជាតិ​​​ខ្មែរ​​​លើក​​​ឡើង​​​លើ​​​ លោកស្រី មូរ សុខ​​​ហួរ បាន​​​ស្រែក​​​ថា “នេះ​​​គឺ​​​សេរីភាព​​​។ នេះ​​​គឺ​​​លទ្ធិ​​​ប្រជា​​​ធិប​​​តេយ្យ។ គ្មាន​​​លក្ខខណ្ឌ​​​អ្វី​​​ទេ​​​ចំពោះ​​​ការ​​​ដោះ​​​លែង​​​រូប​​​ខ្ញុំ។វា​​​គឺ​​​ជា​​​គំនិត​​​ស្នេ​​​ហា​​​ជាតិ​​​របស់​​​គណបក្ស​​​ទាំង​​​អស់”។

បណ្តា​​​អ្នក​​​កាសែត​​​ និង​​​អ្នកគាំទ្រ​​​បាន​​​ចោម​​​រោម​​​​​​លោក​​​ស្រី​​​ មូរ សុខហួរ នៅ​​​ពេល​​​លោក​​​ស្រី​​​ត្រូវ​​​បាន​​​ដោះ​​​លែង។ ចំណែក​​​ឯ​​​បុរស​​​ៗ​​​ត្រូវ​​​បាន​​​ដោះ​​​​​​លែង​​​ក៏​​​មិន​​​ខុស​​​គ្នា​​​ដែរ គឺ​​​ពួក​​​គាត់​​​​​​ត្រូវ​​​បាន​​​ចោម​​​រោម​​​ដោយ​​​សាច់​​​ញាតិ អ្នក​​​កាសែត​​​ និង​​​អ្នក​​​គាំទ្រ ដែល​​​បាន​​​ទម្លុះ​​​ជួរ​​​នគរបាល​​​ដើម្បី​​​ចូល​​​ទៅ​​​ជិត​​​ពួក​​​គាត់​​​។

បុគ្គល​​​ទាំង​​​ប្រាំ​​​បី​​​រូ​​​ប​​​នេះ​​​ជាប់​​​ចោទ​​​ពី​​​បទ​​​ញុះ​​​ញង់​​​អ្នក​​​គាំទ្រ​​​ឲ្យ​​​វាយ​​​សន្តិសុខ​​​ខណ្ឌ​​​និង​​​ពី​​​បទ​​​ដឹក​​​នាំ​​​កុបកម្ម​​​​​​​​​​​​​​​​​​ ជា​​​ការ​​​ចោទ​​​ប្រកាន់​​​ដែល​​​បណ្តា​​​អង្គការ​​​សិទ្ធិ​​​មនុស្ស​​​និយាយ​​​ថា ជា​​​ហេតុ​​​ផល​​​នយោបាយ។ ការ​​​ចោទ​​​ប្រកាន់​​​សំខាន់​​​ជាង​​​គេ​​​ គឺ​​​ការ​​​អះ​​​អាង​​​ថា មេ​​​ដឹក​​​នាំ​​​គណបក្ស​​​សង្គ្រោះ​​​ជាតិ​​​បាន​​​ត្រៀម​​​រៀប​​​ចំ​​​បាវ​​​អង្ករ​​​ដាក់​​​ពេញ​​​ទៅ​​​ដោយ​​​ដំបង​​​ឈើ​​​ស្រស់​​​​យក​​​ទៅ​​​កន្លែង​​​តវ៉ា​​​ និង​​​ប្រើ​​​ប្រាស់​​​ដើម្បី​​​ទប់​​​ទល់​​​នឹង​​​កង​​​កម្លាំង​​​សន្តិសុខ​​​។

នៅ​​ឯសន្និ​​​សីទកាសែត​​​កាល​​​ពី​​​សប្តាហ៍មុន​​​លោក ឈាង វុន តំណាង​​​រាស្ត្រ​​​ជាន់ខ្ពស់​​​មក​​​ពី​​​គណបក្ស​​​ប្រជា​​​ជន​​​កម្ពុជា បាន​​​បង្ហាញ​​​រូប​​​ភាព​​​វីដេអូ​​​បង្ហាញ​​​ពី​​​សកម្ម​​​ភាព​​​មនុស្ស​​​ម្នាក់​​​លើក​​​បាវ​​​ដំបង​​​ឈើ​​​ពីរ​​​បាវ​​​ចាក់​​​ទៅលើ​​​ផ្លូវ​​​ ហើយ​​​បាន​​​អះ​​​អាង​​​ថា ដំបង​​​ទាំ​​​ងនោះ​​​ជា​​​អាវុធ​​​របស់​​​ “​​​ក្រុម​​​អនាធិបតេយ្យ​​​” នៃ​​​គណបក្ស​​​សង្គ្រោះ​​​ជាតិ​​​។

ទោះ​​​ជា​​​យ៉ាង​​​ណា​​​ រូប​​​ភាព និង​​​វី​​​ដេអូ​​​ផ្សេង​​​ទៀត​​​ស្តី​​​ពី​​​ហេតុការណ៍​​​ប៉ះ​​​ទង្គិច​​​គ្នា​​​នេះ បាន​​​បង្ហាញ​​​យ៉ាង​​​ច្បាស់​​​ក្រឡែត​​​ថា បាវ​​​ដំបង​​​ដូចគ្នា​​​នេះ​​​ត្រូវ​​​បាន​​​លើក​​​ចុះ​​​ពី​​​រថយន្ត​​​មួយ​​​គ្រឿង​​​របស់​​​សាលា​​​រាជធានី ដោយ​​​សន្តិសុខ​​​ខណ្ឌ​​​ ដែល​​​បាន​​​ចែក​​​ចាយ​​​គ្នា​​​មុន​​​ពេល​​​ដើរ​​​ឆ្ពោះ​​​ទៅ​​​ក្រុម​​​បាតុករ​​​៕​​​សុខុម​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស