យោងតាមមន្ត្រីក្រសួងមហាផ្ទៃបានឲ្យដឹងថា ការិយាល័យលិខិតឆ្លងដែននឹងត្រូវបង្កើតនៅក្នុងខេត្តចំនួនប្រាំមួយបន្ថែមទៀត ដើម្បីជួយសម្រួលដំណើរការធ្វើចំណាកស្រុកសាជាថ្មីសម្រាប់ពលករកម្ពុជា ដែលនឹងត្រឡប់ទៅប្រទេសថៃវិញ។
លោក ម៉ៅ ច័ន្ទតារា ប្រធាននាយកដ្ឋានលិខិតឆ្លងដែននៅក្រសួងមហាផ្ទៃបានឲ្យដឹងថា ការិយាល័យថ្មីកំពុងត្រូវបានបង្កើតឡើងនៅក្នុងខេត្តកំពង់ចាម ព្រៃវែង ស្វាយរៀង សៀមរាប កំពង់ធំ និងតាកែវ។ លោកបានមានប្រសាសន៍ថា ខេត្តទាំងនេះជាខេត្តធំៗដែលមានពលរដ្ឋជាច្រើនបានចេញទៅធ្វើការនៅក្រៅប្រទេស។ បច្ចុប្បន្ន យើងកំពុងរៀបចំសម្ភារមួយចំនួនមានដូចជា កុំព្យូទ័រ ដើម្បីបញ្ចូលព័ត៌មាន កាមេរ៉ា និងសម្ភារស្រដៀងៗនេះជាដើម”។
ការបង្កើតនេះត្រូវបានធ្វើឡើងបន្ទាប់ពីមានសេចក្ដីប្រកាសមួយកាលពីសប្ដាហ៍មុន ដែលថា ការិយាល័យដូចគ្នានេះនឹងត្រូវបង្កើតឡើងនៅតាមខេត្តជាប់ព្រំដែនមួយចំនួនដូចជា ខេត្តឧត្តរមានជ័យ បន្ទាយមានជ័យ ប៉ៃលិន និងខេត្តកោះកុងជាដើម។
យោងតាមសារាចររួមចុះថ្ងៃទី១៤ ខែកក្កដា ដែលចេញ និងចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ និងលោក អុិត សំហេង រដ្ឋមន្ត្រីក្រសួងការងារ ការិយាល័យនៅក្នុងខេត្តទាំង១០នេះនឹងត្រូវផ្ដល់សិទ្ធិឲ្យរៀបចំឯកសារសម្រាប់ពលករចំណាកស្រុក។
ពលករចំណាកស្រុកប្រហែល២៥០.០០០នាក់ បានវិលត្រឡប់មកប្រទេសកម្ពុជាវិញកាលពីខែមុន បន្ទាប់ពីការបង្ក្រាបលើពលករខុសច្បាប់ដោយរដ្ឋាភិបាលយោធាថៃ។
រដ្ឋាភិបាលបានកាត់បន្ថយតម្លៃធ្វើលិខិតឆ្លងដែនពី១២៤ដុល្លារមកត្រឹម៤ដុល្លារ ដើម្បីជំរុញឲ្យពលករចំណាកស្រុកទទួលបានឯកសារស្របច្បាប់ មុនពេលត្រឡប់ទៅប្រទេសថៃ ប៉ុន្តែពលកររាប់ពាន់នាក់ត្រូវបានបញ្ជូនត្រឡប់មកព្រំដែនវិញដោយអាជ្ញាធរថៃ បន្ទាប់ពីព្យាយាមចូលដោយខុសច្បាប់ម្ដងទៀត។
លោក ធី លុនឌី ប្រធានមន្ទីរការងារខេត្តប៉ៃលិនបានឲ្យដឹងថា ឥឡូវនេះ មន្ទីរការងារខេត្តមានលទ្ធភាពចេញលិខិតបញ្ជាក់ពី ” ឋានៈពលករចំណាកស្រុក” ឲ្យពលករចំណាកស្រុក ដែលតម្រូវឲ្យមានលិខិតនេះដើម្បីធ្វើលិខិតឆ្លងដែនបានហើយ។ កាលពីមុនលិខិតបែបនេះគឺត្រូវបានចេញដោយក្រសួងការងារតែប៉ុណ្ណោះ។
លោក លុនឌី បានមានប្រសាសន៍ថា ពួកគេគ្រាន់តែត្រូវការកិច្ចសន្យាការងារ ឬប័ណ្ណធ្វើការងារបណ្ដោះអាសន្នប៉ុណ្ណោះដើម្បីទទួលបានឯកសារនេះ។
លោក គោស៊ុំ សារឿត អភិបាលខេត្តបន្ទាយមានជ័យបានឲ្យដឹងថា ដោយសារតែអាជ្ញាធរថៃនៅតែបញ្ជូនពលករកម្ពុជាត្រឡប់មកវិញក្នុងចំនួនយ៉ាងច្រើន ហេតុដូច្នេះ វាមានសារៈសំខាន់ណាស់ ដែលពលករចំណាកស្រុកប្រើប្រាស់ការិយាល័យលិខិតឆ្លងដែនថ្មី ដើម្បីធ្វើឲ្យការធ្វើការងារនៅក្នុងប្រទេសថៃរបស់ពួកគេស្របច្បាប់។ លោកបានមានប្រសាសន៍ថា [បច្ចុប្បន្ននេះ] ជារៀងរាល់ថ្ងៃមានពលករចំណាកស្រុកខុសច្បាប់ជាមធ្យមពី៣០០ទៅ៤០០នាក់ត្រូវបានបញ្ជូនត្រឡប់មកវិញ”៕ គឹមហឿន