យោងតាមមន្ត្រីមួយរូបបានឲ្យដឹងថា រោងពុម្ពមួយរបស់ជប៉ុនបានដកខ្លួនចេញពីការបោះពុម្ពផ្សាយសៀវភៅមគ្គុទេសក៍របស់វៀតណាម ដែលមានរូបប្រាសាទអង្គរវត្តនៅលើក្របមុខ បន្ទាប់ពីមានការតវ៉ាពីសំណាក់ស្ថានទូតខ្មែរប្រចាំនៅប្រទេសជប៉ុន។
លោក ស៊ឹម វីរៈ លេខាទី១នៅស្ថានទូតខ្មែរប្រចាំប្រទេសជប៉ុន បានលើកឡើងនៅក្នុងសារមួយតាមហ្វេសប៊ុកថា ស្ថានទូតបានធ្វើការតវ៉ាប្រឆាំងនឹងក្រុមហ៊ុនបោះពុម្ពអាស៊ូកា (Asuka Publishing Company) បន្ទាប់ពីប្រជាពលរដ្ឋខ្មែរដែលរស់នៅក្នុងប្រទេសជប៉ុនប្រទះឃើញកំហុសឆ្គងនេះ។
លោកបានសរសេរថា ” ក្រុមហុ៊នបានសូមទោសរួចហើយចំពោះកំហុសឆ្គងរបស់ពួកគេ និងចំពោះការធ្វើឲ្យប្រជាពលរដ្ឋខ្មែរឈឺចាប់។ ក្រុមហ៊ុននឹងបញ្ឈប់ការលក់របស់ខ្លួនរហូតទាល់តែរចនាក្របសៀវភៅថ្មីចប់រួចរាល់”។
លោក អេអុីឈិ អុីស៊ីណុ (Eiichi Ishino) ប្រធានក្រុមហ៊ុនបោះពុម្ព Asuka Publishing Company បានសូមទោសចំពោះកំហុសឆ្គងនេះនៅក្នុងសេចក្ដីថ្លែងការណ៍មួយចុះថ្ងៃទី១៤ ខែកក្កដា ដែលបង្ហោះតាមគេហទំព័ររបស់ក្រុមហ៊ុននេះ។ លោកយល់ថា កំហុសឆ្គងនេះកើតឡើងដោយសារគ្មានការត្រួតពិនិត្យត្រឹមត្រូវមុនពេលបោះពុម្ពផ្សាយ។
លោក ប៉ា ច័ន្ទរឿន នាយកមជ្ឈមណ្ឌលទស្សនវិជ្ជាអនុវត្តន៍ និងសីលធម៌កម្ពុជា ដែលបានចែករំលែករូបភាពសៀវភៅមគ្គុទេសក៍នេះតៗគ្នាជាច្រើននៅតាមហ្វេសប៊ុក បានមានប្រសាសន៍ថា ការប្រើប្រាស់មិនត្រឹមត្រូវនូវនិមិត្តរូបជាតិរបស់ខ្មែរ គឺរសើបណាស់ ដោយសារតែប្រទេសកម្ពុជាធ្លាប់មានប្រវត្តិតានតឹងជាមួយប្រទេសវៀតណាម។
លោកបានមានប្រសាសន៍ទៀតថា ” [គ្រប់ប្រទេសទាំងអស់] តែងតែមិនសប្បាយចិត្ត ពេលឃើញគុណតម្លៃរបស់ខ្លួនត្រូវបានប្រើប្រាស់ដោយមិនត្រឹមត្រូវ។ នៅពេលប្រើប្រាស់អ្វីដែលជាតំណាងឲ្យអត្តសញ្ញាណជាតិរបស់ប្រទេសមួយ ចាំបាច់ត្រូវតែប្រុងប្រយ័ត្ន ជាពិសេសក្នុងចំណោមប្រទេសដែលធ្លាប់មានប្រវត្តិជូរចត់នឹងគ្នា”។
លោក យ៉ូស៊ិហ៊ិរុ៉ ហ៊ីហ្គូឈិ (Yoshihiro Higuchi) មន្ត្រីជាន់ខ្ពស់មួយរូបនៅស្ថានទូតជប៉ុនប្រចាំកម្ពុជា បានលើកឡើងនៅក្នុងអុីម៉េលមួយថា ស្ថានទូតមិនអាចធ្វើអត្ថាធិប្បាយអំពីទង្វើរបស់ក្រុមហ៊ុនឯកជនមួយបានឡើយ។
លោកបានមានប្រសាសន៍បន្តទៀតថា ” ក្នុងរយៈពេលប៉ុន្មានទសវត្សរ៍មកនេះ ប្រទេសជប៉ុន និងប្រទេសកម្ពុជាបានអភិវឌ្ឍ និងពង្រឹងទំនាក់ទំនងទ្វេភាគីជាលំដាប់នៅកម្រិតនិងវិស័យផ្សេងៗគ្នា មិនត្រឹមតែនៅក្នុងទំនាក់ទំនងរវាងរដ្ឋាភិបាល និងរដ្ឋាភិបាលប៉ុណ្ណោះទេ ប៉ុន្តែថែមទាំងកិច្ចសហប្រតិបត្តិការរវាងក្រុមហ៊ុន និងក្រុមហ៊ុន ព្រមទាំងរវាងប្រជាជន និងប្រជាជនផងដែរ ដែលប្រទេសជប៉ុនជឿថា នឹងបន្តទៅទៀតនៅពេលអនាគត”។
លោក កឹម អឿន នាយកមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បានមានប្រសាសន៍ថា លោកមិនចង់ធ្វើអត្ថាធិប្បាយអំពីករណីនេះទេ ប៉ុន្តែលោកយល់ថា ប្រទេសទាំងពីរមានទំនាក់ទំនងល្អនឹងគ្នា។
លោកបានលើកឡើងទៀតថា ” ការបង្កើតមជ្ឈមណ្ឌលនេះឡើង [ជាឧទាហរណ៍] បង្ហាញថា រដ្ឋាភិបាលជប៉ុនចង់ចូលរួមចំណែកក្នុងការអភិវឌ្ឍប្រទេសកម្ពុជា”៕ សុខុម