អ្នកភូមិប្រហែល១៦០នាក់មកពីស្រុកស្នួល ខេត្តក្រចេះដែលបានជាប់ពាក់ព័ន្ធនឹងវិវាទដីធ្លីជាមួយម្ចាស់ចម្ការម្នាក់គឺជាអ្នកដែលត្រូវបានបណ្តេញចេញថ្មីៗមកស្នាក់នៅក្នុងវត្តសាមគ្គីរង្សី ក្នុងរាជធានីភ្នំពេញ។
អ្នកនាំពាក្យសាលារាជធានីម្នាក់ដែលបានប្រឹងប្រែងម្តងហើយម្តងទៀតក្នុងរយៈពេលប៉ុន្មានខែថ្មីៗនេះដើម្បីរារាំងវត្តនេះមិនឲ្យក្លាយជាកន្លែងជ្រកកោនសម្រាប់អ្នកតវ៉ាមកពីតាមខេត្តបានមានប្រសាសន៍កាលពីម្សិលមិញថា អាជ្ញាធរនឹងស្នើឲ្យអ្នកភូមិចាកចេញ។
អ្នកភូមិប្រហែល១០០នាក់បានមកដល់វត្តនេះកាលពីព្រឹកម្សិលមិញ ហើយអ្នកភូមិ៦៤នាក់ទៀតបានមកដល់នៅពេលរសៀលតាមរថយន្តពីរគ្រឿងបន្ទាប់ពីលោក គង់ ចំរើន ជាលេខានៅខុទ្ទកាល័យលោកនាយករដ្ឋមន្ត្រីបានទទួលយកញត្តិរបស់ពួកគាត់នៅសួនមុខវត្តបទុមក្នុងរាជធានីភ្នំពេញ ដែលស្នើសុំជំនួយក្នុងវិវាទដីធ្លីនេះកាលពីថ្ងៃពុធ។
អ្នកស្រី អ៊ុត សៀងហៃ អាយុ៦៦ឆ្នាំ បាននិយាយកាលពីម្សិលមិញថា “ខ្ញុំនឹងស្នាក់នៅវត្តនេះរហូតដល់សម្តេច ហ៊ុន សែន ចេញលិខិតមួយច្បាប់បញ្ជាឲ្យអាជ្ញាធរខេត្តប្រគល់ដីឲ្យពួកយើងវិញ”។ អ្នកស្រីបានបន្ថែមថា អ្នកភូមិជាច្រើននាក់ទៀតមានគម្រោងចូលមកពីស្រុកស្នួលនៅថ្ងៃនេះ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍ថា អាជ្ញាធរនឹងមិនអត់ឱនចំពោះអ្នកភូមិដែលស្នាក់នៅវត្តនេះឡើយ។ លោកបានមានប្រសាសន៍កាលពីម្សិលមិញថា “យើងនឹងបញ្ជូនមន្ត្រីរបស់យើងទៅពិនិត្យមើល ហើយប្រសិនបើើយើងឃើញមនុស្សស្នាក់នៅទីនោះ យើងនឹងស្នើសុំឲ្យពួកគាត់ត្រឡប់ទៅផ្ទះវិញ ពីព្រោះយើងមិនចង់ឲ្យរឿងតូចកាន់តែធំទៅៗឡើយ”។
ក្រុមអ្នកភូមិដែលអះអាងថា បានចាប់ផ្តើមផ្លាស់មករស់នៅលើដីស្ថិតក្នុងឃុំស្នួលនេះ កាលពីឆ្នាំ២០០០ បានជាប់ពាក់ព័ន្ធនឹងវិវាទដីធ្លីជាមួយក្រុមហ៊ុន Horizon Agriculture Development ដែលបានទិញដីនេះកាលពីឆ្នាំ២០១០ ដើម្បីធ្វើចម្ការដំឡូងមី និងចម្ការម្រេច បន្ទាប់ពីក្រុមហ៊ុន Growest Trading Co. បានឈូសឆាយដីចំនួន១.៥៦២ហិកតា កាលពីពីរឆ្នាំមុននោះ។
ក្រុមការងារថ្នាក់ខេត្ត និងនិស្សិតស្ម័គ្រចិត្តបានចុះមកវាស់វែងដីឲ្យអ្នកភូមិកាលពីឆ្នាំ២០១២ ប៉ុន្តែ មិនបានចេញប័ណ្ណកម្មសិទ្ធិឲ្យឡើយ។
លោក សំ ណាល់ អភិបាលស្រុកស្នួល បានមានប្រសាសន៍កាលពីម្សិលមិញថា “យើងបានវាស់វែងដីនេះសម្រាប់គ្រួសារអ្នកភូមិទាំងនោះ ប៉ុន្តែ ក្រុមហ៊ុនបានដាក់ពាក្យបណ្តឹងមកយើងដោយសួរថា ហេតុអ្វីបានជាយើងវាស់វែងដីរបស់ពួកគេ ដូច្នេះហើយយើងបានប្រគល់ដីនេះទៅឲ្យក្រុមហ៊ុនវិញ បន្ទាប់ពីក្រុមហ៊ុនបានដាក់ពាក្យបណ្តឹង”។
នេះជាករណីទី២ហើយនៅឆ្នាំនេះ ដែលអ្នកភូមិមកពីស្រុកស្នួលបានមកស្នាក់នៅក្នុងវត្តសាមគ្គីរង្សី។ កាលពីខែឧសភា អ្នកភូមិដែលបានជាប់ពាក់ព័ន្ធក្នុងវិវាទដីធ្លីជាមួយក្រុមហ៊ុនចម្ការកៅស៊ូវៀតណាមមិនអើពើនឹងសំណើដដែលរបស់អាជ្ញាធរឲ្យចាកចេញពីវត្តនេះមុនពេលទទួលយកដីសម្បទានសង្គមកិច្ចចំនួន៧៥០ហិកតា។
ព្រះតេជគុណ ថាច់ ហាសំអាង គ្រូសូត្រស្នាំវត្តនេះបានមានសង្ឃដីកាកាលពីម្សិលមិញថា “យើងមានការព្រួយបារម្ភអំពីអាជ្ញាធរ ប៉ុន្តែ យើងមិនបានធ្វើអ្វីខុសទេ។ នេះគឺវត្តអារាម ហើយយើងជួយប្រជាពលរដ្ឋក្រីក្រនៅពេលពួកគាត់ត្រូវការស្នាក់នៅ”៕សារុន