37.3 C
Phnom Penh

អ្នកភូមិ​ធ្វើការ​តវ៉ា​បួនថ្ងៃជាប់ៗគ្នាជុំវិញវិវាទដីធ្លីក្នុង​ខេត្តកណ្តាល

ដោយ ឌឹ ខេមបូឌា ដេលី

បទវិភាគ

អ្នកភូមិ​ប្រហែល​២៥០នាក់​បាន​តវ៉ា​ប្រឆាំង​ក្រុម​ហ៊ុន​អភិវឌ្ឍន៍ផានអុីម៉ិច កាលពី​ម្សិល​មិញ ខណៈ​ដែល​មេឃុំ​របស់​ពួកគាត់​ប្រឈម​នឹង​ការ​សាក​សួរ​នៅ​​សាលា​ដំបូង​ខេត្ត​កណ្ដាល​ជុំវិញ​វិវាទ​ដីធ្លី​មួយ។

រយៈ​ពេល​បួន​ថ្ងៃ​ជាប់​ៗ​គ្នា អ្នក​ភូមិ​មក​ពី​ឃុំពញាឮ បាន​ប្រមូល​ផ្ដុំគ្នា​នៅ​មុខ​តុលាការ​ ដោយ​ចោទ​ក្រុម​ហ៊ុន​ផាន​អុីម៉ិចថា បាន​រំលោភ​យក​ដីចំនួន​៦៣​ហិកតា ដែល​ជា​កម្មសិទ្ធិ​របស់​អ្នក​ភូមិ​១៨០​គ្រួសារ។

កាលពី​ខែមុន ក្រុម​ហ៊ុន​អភិវឌ្ឍន៍​នេះ​បាន​ដាក់​ពាក្យ​បណ្ដឹង​ប្ដឹង​អ្នកភូមិ​១២​គ្រួសារ​ថា បាន​បិទ​ផ្លូវ​ និង​ដក​បង្គោល​ព្រំ​ដី​​​ ដែល​នាំឲ្យ​មាន​ការ​កោះហៅអ្នកភូមិមក​សាក​សួរ​​នៅ​តុលាការ​​។

រយៈ​ពេល​ជាង​៤ម៉ោង​បន្ទាប់ពី​ការ​តវ៉ា​កាលពី​ម្សិលមិញ ដែល​បាន​ចាប់​ផ្ដើម​នៅ​ម៉ោង​៨​ព្រឹក លោក​មេឃុំ យូ ផាត់ និង​អ្នក​ភូមិ​ឈ្មោះ លៀង ឡេង អាយុ​៣៧​ឆ្នាំ បាន​ចេញ​ពី​តុលាការ​ ហើយ​ស្រែក​ថា ” សូម​រក​យុត្តិធម៌ជូនលោក​មេឃុំ​របស់​យើង​ផង​!”។

លោក យូ ផាត បាន​និយាយ​នៅខាង​ក្រៅតុលាការ​ថា ” ការ​ចោទ​ប្រកាន់​នេះ​មិន​ពិត​ទេ ពីព្រោះ​អ្នកភូមិ​របស់​ខ្ញុំ​មិន​ដែល​បានលក់​ដី​ទៅ​ឲ្យ​ក្រុម​ហ៊ុន​ណាមួយ​ឡើយ”។

អ្នក​ភូមិឈ្មោះ សេង គឹមអុី អាយុ​៥៣​ឆ្នាំ ដែល​តុលាការ​បាន​សាក​សួរ​ប្ដី​របស់​គាត់​កាលពី​ដើម​សប្ដាហ៍​នេះ​បាន​និយាយ​ថា គ្រួសារ​របស់​អ្នកស្រី​បាន​កាន់​កាប់​ដី​នេះ​តាំង​ពី​ឆ្នាំ​១៩៨០​មក​ម្លេ៉ះ​។

អ្នកស្រី​បាន​សួរ​ថា ” យើងគឺ​ជា​ជន​រងគ្រោះ ដូច្នេះ​ហេតុ​អ្វី​បាន​ជា​ក្រុម​ហ៊ុន​ដាក់​ពាក្យ​បណ្ដឹង​ប្តឹងយើង​ទៅវិញ? ខ្ញុំ​បាន​ធ្វើ​ដំណើរ​​ចម្ងាយ​ជាង​៤០​គីឡូម៉ែត្រមក​ទីនេះ ពីព្រោះ​ខ្ញុំ​ចង់​បាន​យុត្តិធម៌”។

លោក វង្ស ប៊ុនវិសុទ្ធ ព្រះរាជ​អាជ្ញារង​អម​សាលា​ដំបូង​ខេត្ត​បាន​មាន​ប្រសាសន៍​ថា តុលា​ការ​នឹង​បន្ត​ស៊ើប​អង្កេត​រឿង​ក្ដី​នេះ​។ លោក​បាន​មាន​ប្រសាសន៍​ថា ” យើង​បាន​បញ្ចប់​ការ​សាក​សួរ​នៅ​ថ្ងៃ​នេះ​ ហើយយើង​មិនទាន់​បានចោទ​ប្រកាន់​នរណា​ម្នាក់នៅឡើយ​ទេ។ យើង​នឹង​បន្ត​សាក​សួរ​មនុស្ស​ជាច្រើន​​ទៀត ប្រសិន​បើ​យើ​ង​ទទួល​បានពាក្យ​បណ្ដឹង​ពី​មេធាវី​ដើម​ចោទ​”។

លោក ឃឹម សុវណ្ណាវុធ អាយុ​៤៩​ឆ្នាំ ជា​ឧត្តម​សេនីយ៍ទោ​ក្រសួង​មហាផ្ទៃ​ត្រូវ​បាន​សាក​សួរ​នៅ​តុលាការ​កាលពី​ថ្ងៃ​ច័ន្ទ បន្ទាប់ពី​ក្រុម​ហ៊ុន​ផានអុីម៉ិច បាន​ចោទ​លោក​ថា បាន​លក់​ដី​មួយ​ក្បាលរបស់​ក្រុម​ហ៊ុន​កាលពី​ដើម​ឆ្នាំ​នេះ​។

លោក​បាន​មាន​ប្រសាសន៍​ថា “ខ្ញុំ​គាំទ្រ​អ្នក​ភូមិ​ក្នុងការ​ទាមទារ​ដី​នោះ”។ លោក​បាន​បន្ថែម​ថា លោក​​មាន​លិខិត​ទិញ​លក់​ដី​ទំហំ​៨០​ម៉ែត្រ​ក្រឡា​នេះ​ដែល​បាន​ទិញ​កាលពី​ឆ្នាំ​១៩៩៣។

លោក នូ ឡា តំណាង​ក្រុម​ហ៊ុន​ផានអុីម៉ិច បាន​និយាយ​ថា ក្រុម​ហ៊ុន​បាន​ទិញ​ដី​នេះ​ពី​ក្រុម​ហ៊ុន​ឯកជន​មួយ​កាលពី​ឆ្នាំ​១៩៩៦​ ប៉ុន្តែ​បាន​បដិសេធ​មិន​ប្រាប់​ឈ្មោះ​អ្នក​លក់​ទេ។ លោកបាន​មាន​ប្រសាសន៍ថា ” វាជាដី​របស់​ក្រុម​ហ៊ុន​។ យើង​មាន​ប័ណ្ណ​កម្មសិទ្ធិ​ចំនួន​១៤​លើ​ដីនោះ​”៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស