មជ្ឈដ្ឋានពាណិជ្ជកម្មនៅប្រទេសកម្ពុជាទំនងជាមានអារម្មណ៍ធូរស្រាលក្នុងចិត្ត បន្ទាប់ពីមានព័ត៌មានកាលពីថ្ងៃអង្គារ អំពីការបញ្ចប់ភាពទាល់ច្រកនយោបាយជិតមួយឆ្នាំ ដែលបានបណ្តាលឲ្យវិនិយោគផ្ទាល់ពីបរទេសថយចុះ។
យោងតាមលោក គ្រិស ហុបដិន (Chris Hobden) មន្ត្រីប្រមូលទិន្នន័យនៅក្រុមហ៊ុនអចលនទ្រព្យ CB Richard Ellis (Cambodia) Co. Ltd បានឲ្យដឹងថា ភាពទាល់ច្រកដែលនាំឲ្យមានការតវ៉ាជាសាធារណជាច្រើនលើក ជាពិសេសកាលពីចុងឆ្នាំមុន បានធ្វើឲ្យវិនិយោគិនដ៏មានសក្តានុពលជាច្រើននាក់ដកខ្លួនចេញពីទីផ្សារក្នុងស្រុក។ លោកបានមានប្រសាសន៍កាលពីម្សិលមិញថា “ភាពមិនប្រាកដប្រជាខាងនយោបាយ ហើយជួនកាលមានចលាចលស៊ីវិលផងនោះ ច្បាស់ណាស់បាននាំឲ្យវិនិយោគិនមានសក្តានុពលជាច្រើននាក់ពន្យារពេលមិនចូលទីផ្សារកម្ពុជា”។
លោកបានមានប្រសាសន៍បន្ថែមទៀតថា “ស្របពេលដែលមនុស្សភាគច្រើនចងចាំក្នុងចិត្តថា ប្រទេសកម្ពុជានៅតែមានស្ថិរភាពនយោបាយគ្រាន់បើ ភាពទាល់ច្រករវាងគណបក្សប្រជាជនកម្ពុជានិងគណបក្សសង្គ្រោះជាតិ ក៏បានធ្វើឲ្យខូចប្រយោជន៍ដល់ការវិនិយោគបរទេសយ៉ាងជាក់ច្បាស់”។
លោក ហុបដិន បានបន្ថែមថា វាឆាប់ពេកនៅឡើយក្នុងការវាយតម្លៃ ថាតើសំខាន់យ៉ាងណាដែលផលនៃដំណោះស្រាយនយោបាយនឹងមានលើវិនិយោគិន ប៉ុន្តែថា “ច្បាស់ណាស់ វាជាជំហានមួយក្នុងទិសដៅត្រឹមត្រូវ”។
បើទោះជាការប៉ាន់ប្រមាណកំណើនសេដ្ឋកិច្ចនៅតែខ្ពស់ប្រហែល៧ភាគរយ សម្រាប់ឆ្នាំទី៣ជាប់ៗគ្នា បន្ទាប់ពីការបោះឆ្នោតខែកក្កដាឆ្នាំមុនក៏ដោយ ក៏ធនាគារអភិវឌ្ឍន៍អាស៊ីបាននិយាយក្នុងទស្សនវិស័យរបស់ខ្លួនឆ្នាំនេះថា ស្ថានភាពនយោបាយបានធ្វើឲ្យខូចជំនឿទុកចិត្តអ្នកវិនិយោគទុន និងបានបង្អាក់ផលិតកម្មក្នុងឧស្សាហកម្មដ៏ធំបំផុតរបស់ប្រទេសនេះ គឺផលិតកម្មវិស័យកាត់ដេរ។
ទស្សនវិស័យនេះដែលត្រូវបានផ្សព្វផ្សាយកាលពីខែមេសា មានខ្លឹមសារថា “រំហូរចូលវិនិយោគទុនផ្ទាល់ពីបរទេសសុទ្ធមានទំហំ១,៣ពាន់លានដុល្លារ ក៏ប៉ុន្តែតួលេខនោះបង្ហាញការធ្លាក់ចុះពីឆ្នាំមុន មួយផ្នែកដោយសារភាពតានតឹងនយោបាយ ក្រោយពីការបោះឆ្នោតជាតិខែកក្កដាឆ្នាំ២០១៣”។
លោក ហ្គ្រែន ណាក់ឃី (Grant Knuckey) នាយកប្រតិបត្តិធនាគារ ANZ Royal បានមានប្រសាសន៍ថា ដំណោះស្រាយនេះនឹងជំរុញឲ្យមានការបណ្តាក់ទុនពីសំណាក់វិនិយោគិន និងបង្កើនកំណើនសេដ្ឋកិច្ចរបស់ប្រទេសនេះ។ លោកបានឲ្យដឹងតាមអុីម៉េលថា “ភាពទាល់ច្រកនេះមានផលប៉ះពាល់មួយផ្នែកលើសេចក្តីសម្រេចវិនិយោគទុន ការសម្រេចចិត្តចូលទីផ្សារ និងការបង្កើតការងារមួយចំនួន។
សំខាន់បំផុត គឺ សេដ្ឋកិច្ចមិនដើរអស់សក្តានុពល ប៉ុន្តែវានៅតែដំណើរការល្អសមល្មម”។ លោកបានមានប្រសាសន៍បន្តថា “ដូច្នេះ ផលប៉ះពាល់ខ្លាំងនៃដំណោះស្រាយេនះ គឺផ្អែកលើការជឿទុកចិត្ត ហើយបន្ទាប់មក ការសម្រេចចិត្តវិនិយោគនិងការជួលបុគ្គលិក។ ការនេះនឹងកើតឡើងទៅតាមការប្រើប្រាស់និងសេដ្ឋកិច្ចទូលំទូលាយ”។
លោក ច័ន្ទ វាសនា នាយកប្រតិបត្តិក្រុមហ៊ុនវិជ្ជាជីវៈគណនេយ្យ APV ក្នុងស្រុក បានមានប្រសាសន៍ថា ការបញ្ចប់ភាពទាល់ច្រកនេះនឹងធ្វើឲ្យប្រទេសកម្ពុជាអាចទាក់ទាញការវិនិយោគបានច្រើនជាងមុន ធៀបទៅនឹងប្រទេសថៃជាគូប្រជែងក្នុងតំបន់ ដែលសព្វថ្ងៃស្ថិតនៅក្រោមរដ្ឋាភិបាលយោធា និងប្រទេសវៀតណាម ហើយនឹងឈានទៅរកកំណើនផ្នែកវិនិយោគទុនផ្ទាល់ពីបរទេស ក្នុងពេលបីឆ្នាំបន្ទាប់។
លោក វាសនា មានប្រសាសន៍ថា “ពិតណាស់ វាទាក់ទាញការវិនិយោគផ្ទាល់ពីបរទេស បន្ទាប់ពីការទាល់ច្រកនយោបាយត្រូវបានដោះស្រាយ ដែលធ្វើឲ្យបរិយាកាសវិនិយោគនៅប្រទេសកម្ពុជាប្រសើរជាងប្រទេសជិតខាង”។ មានិត