លោកកឹម សុខាអនុប្រធានគណបក្សសង្គ្រោះជាតិត្រូវសាលាដំបូងរាជធានីភ្នំពេញកោះហៅទៅសាកសួរកាលពីម្សិលមិញជុំវិញការតវ៉ាមួយរបស់គណបក្សប្រឆាំងដែលបានផ្ទុះអំពើហិង្សាកាលពីថ្ងៃទី១៥ខែកក្កដានិងបង្កើតបានជាលេសឲ្យតុលាការចោទប្រកាន់តំណាងរាស្ត្រជាប់ឆ្នោតប្រាំពីររូបមកពីគណបក្សប្រឆាំងនិងសកម្មជនគណបក្សនេះមួយរូបទៀតពីបទដឹកនាំកុបកម្មនិងញុះញង់ឲ្យប្រព្រឹត្តបទឧក្រិដ្ឋ។
មន្ត្រីគណបក្សសង្គ្រោះជាតិទាំងប្រាំបីរូបនេះត្រូវបានចាប់ខ្លួនប៉ុន្មានថ្ងៃក្រោយពីការតវ៉ានឹងត្រូវបានដោះលែងឲ្យនៅក្រៅឃុំបណ្ដោះអាសន្នកាលពីរសៀលថ្ងៃអង្គារពោលគឺតែប៉ុន្មានម៉ោងប៉ុណ្ណោះបន្ទាប់ពីលោកនាយករដ្ឋមន្ត្រីហ៊ុន សែន និងលោក សម រង្ស៊ីប្រធានគណបក្សប្រឆាំងបានចុះកិច្ចព្រមព្រៀងសម្រាប់គណបក្សប្រឆាំងបញ្ចប់ការធ្វើពហិការរបស់ខ្លួនមិនចូលសភា។
នៅខាងក្រៅតុលាការកាលពីព្រឹកថ្ងៃសុក្រលោក កឹម សុខាបានថ្លែងទៅកាន់ក្រុមអ្នកយកព័ត៌មានថាលោកត្រូវបានចៅក្រមស៊ើបសួរកែវ មុនី សាកសួរប្រហែល១៥នាទី។
លោកកឹម សុខា បានមានប្រសាសន៍ថាលោកបានប្រាប់ចៅក្រមរូបនេះថាលោកកំពុងស្ថិតនៅក្នុងខេត្តកំពង់ចាមកាលពីថ្ងៃទី១៥ ខែកក្កដាហើយលោកមិនពាក់ព័ន្ធនឹងការតវ៉ាដែលក្រុមបាតុករបានប្រើអំពើហិង្សាសងសឹកទៅលើក្រុមសន្តិសុខសណ្ដាប់ធ្នាប់ដែលត្រូវបានបញ្ជូនឲ្យទៅបំបែកការតវ៉ាដើម្បី ” រំដោះទីលានប្រជាធិបតេយ្យ” នោះទេ។
លោកបានមានប្រសាសន៍ថា ” [ចៅក្រមមុនី] មិនបានចោទប្រកាន់ខ្ញុំទេហើយនគរបាលក៏មិនបានចោទប្រកាន់ខ្ញុំដែរ។ពួកគេគ្រាន់តែកោះហៅខ្ញុំទៅសាកសួរប៉ុណ្ណោះពីព្រោះខ្ញុំជាមេដឹកនាំនិងជាសាក្សី”។
ចៅក្រមកែវ មុនី មិនអាចទាក់ទងសុំការបំភ្លឺបានទេពាក់ព័ន្ធនឹងរឿងនេះ។ចំណែកឯលោក អាំង មាលតីប្រធានសាលាដំបូងរាជធានីភ្នំពេញបានបដិសេធមិននិយាយពីរឿងនេះតែម្ដង។
ទោះបីជាមិនទាន់មានការដកការចោទប្រកាន់មកលើមន្ត្រីគណបក្សសង្គ្រោះជាតិទាំងនេះនៅឡើយក្ដីក៏លោក ព្រុំ សុខារដ្ឋលេខាធិការក្រសួងមហាផ្ទៃបានមានប្រសាសន៍កាលពីថ្ងៃអង្គារថាតំណាងរាស្ត្រជាប់ឆ្នោតទាំងនេះនឹងទទួលបានអភ័យឯកសិទ្ធិការពារខ្លួនពីការផ្ដន្ទាទោសប្រសិនបើពួកគាត់ស្បថចូលកាន់មុខតំណែងជាសមាជិករដ្ឋសភា៕ សុខុម