តាមការរំពឹងទុកថាសិស្សនិស្សិតស្ត្រីបម្រើសេវាផ្លូវភេទនិងនារីផ្សព្វផ្សាយស្រាបៀរនឹងជួបជុំគ្នានៅពហុកីឡាដ្ឋានអូឡាំពិកក្នុងរាជធានីភ្នំពេញនៅរសៀលថ្ងៃសៅរ៍នេះដើម្បីឆ្លុះបញ្ចាំងពីភាពចាំបាច់នៃការដាក់អំពូលភ្លើងបំភ្លឺផ្លូវនានានិងការរៀបចំក្រុងដែលផ្តោតលើយេនឌ័រដើម្បីទប់ស្កាត់អំពើហិង្សានិងការរំលោភបំពានដែលស្ត្រីរស់នៅតាមទីក្រុងកំពុងប្រឈម។
អង្គការសិទ្ធិមនុស្សមួយឈ្មោះថា ActionAid ដែលស្ថិតក្នុងចំណោមអង្គការចំនួន១១នៅពីក្រោយយុទ្ធនាការ ” ទីក្រុងមានសុវត្ថិភាពសម្រាប់ស្ត្រី” បានចេញសេចក្ដីថ្លែងការណ៍មួយថាការដាក់អំពូលភ្លើងបំភ្លឺមិនបានល្អផ្លូវថ្នល់មានសភាពងងឹតនិងកង្វះការធ្វើគោលនយោបាយរួមជាមួយនឹងឥរិយាបថសង្គមចាក់ឫសយ៉ាងជ្រោះជាកត្តាមួយចំនួនដែលធ្វើឲ្យស្ត្រីមានការភ័យខ្លាចនៅក្នុងតំបន់ក្រុង។
យោងតាមលោកស្រីខារ៉ូលីន ម៉ាកខូសលែន (Caroline McCausland) នាយកអង្គការ ActionAid ប្រចាំប្រទេសកម្ពុជាបានឲ្យដឹងថាយុទ្ធនាការនៅថ្ងៃសៅរ៍នេះត្រូវបានរៀបចំឡើងដើម្បីឆ្លើយតបទៅនឹង ” អារម្មណ៍ភ័យខ្លាចដែលមានកម្រិតខ្ពស់” ជាពិសេសក្នុងចំណោមស្ត្រីអំឡុងពេលយប់នៅតាមផ្លូវនានាក្នុងរាជធានីភ្នំពេញនិងតំបន់ក្រុងផ្សេងៗទៀត។
លោកស្រីបានមានប្រសាសន៍តាមទូរស័ព្ទកាលពីថ្ងៃសុក្រថា ” កម្រិតនៃអំពើហិង្សាពិតប្រាកដគឺពិបាកកំណត់ណាស់ដោយសារតែជនរងគ្រោះមិនបានរាយការណ៍។ពួកគេភ័យខ្លាចចំពោះការទៅរកនគរបាលនិងឥរិយាបថរបស់នគរបាលចំពោះពួកគេនៅពេលពួកគេទៅរាយការណ៍ពីបទល្មើសបែបនេះ។ជាពិសេសក្រុមងាយរងគ្រោះបំផុតគឺស្ត្រីបម្រើសេវាផ្លូវភេទកម្មករកាត់ដេរស្ត្រីផ្សព្វផ្សាយស្រាបៀរនិងសិស្សនិស្សិត។ភាគច្រើនពួកគេបានជួបប្រទះករណីស្ទាក់ប្លន់និងការបំពានដោយពាក្យសម្ដី។ពួកគេមានអារម្មណ៍ភ័យខ្លាចនៅពេលយប់”។
លោកឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍ថាសាលារាជធានីមានគម្រោងដាក់អំពូលភ្លើងបំភ្លឺផ្លូវបន្ថែមទៀត។លោកថ្លែងថា ” ខ្ញុំគិតថាអំពូលភ្លើងសាធារណៈសំខាន់ខ្លាំងណាស់ហើយខ្ញុំទទួលស្គាល់ថាមានចំណុចខ្វះចន្លោះខ្លះនៅក្នុងការដាក់អំពូលភ្លើងសាធារណៈ”។
ទោះជាយ៉ាងណាលោកបានលើកឡើងថាលោកគិតថាបញ្ហាទាំងនេះដែលស្ត្រីកំពុងប្រឈមនៅតាមតំបន់ក្រុងមានមិនច្រើនទេ។លោកបានបន្តថា ” ពាក់ព័ន្ធនឹងបញ្ហាមានអារម្មណ៍ភ័យខ្លាចឬគ្មានសុវត្ថិភាព ខ្ញុំគិតថាមានតែមួយចំនួនតូចប៉ុណ្ណោះក្នុងចំណោមប្រជាពលរដ្ឋទូទៅនៅក្នុងរាជធានី”៕សុខុម