លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិ បានប្រើមហាសន្និបាតជាតិលើកទី១របស់គណបក្សប្រឆាំង ដែលរួបរួមគ្នានេះដើម្បីអំពាវនាវទៅអ្នកគំាទ្រកំុឲ្យបោះបង់ចោលគណបក្ស បន្ទាប់ពីខ្លួនបានធ្វើកិច្ចព្រមព្រៀងកាលពីសប្តាហ៍មុន ជាមួយរដ្ឋាភិបាលដើម្បីចូលរដ្ឋសភា។
ដោយមិនមានឱកាសធ្វើបាតុកម្ម និងការចូលរួមច្រើនចាប់តាំងពីមានការហែក្បួនតវ៉ាយ៉ាងធំកាលពីចុងឆ្នាំមុនដើម្បីបណ្តេញលោកនាយករដ្ឋមន្ត្រី ហ៊ុន សែន ចេញពីអំណាចនោះ មេដឹកនាំគណបក្សប្រឆាំងបានអំពាវនាវឲ្យអ្នកគាំទ្ររបស់ខ្លួនគិតអំពីការរីកចម្រើនដ៏លឿនរបស់គណបក្សចាប់តាំងពីគណបក្សនេះបានបង្កើតដំបូងកាលពីខែកក្កដា ឆ្នាំ២០១២។
លោក សម រង្ស៊ី បានស្រែកទៅកាន់អ្នកគាំទ្រលោក ដែលអង្គុយជាជួរក្រោមដំបូលតង់នៅលើសួនមុខវត្តបទុមថា “ដំណាក់កាលទី១របស់យើងគឺការធ្វើបាតុកម្មទាមទារយុត្តិធម៌ ហើយឥឡូវនេះយើងឈានដល់ដំណាក់កាលទី២ គឺស្វែងរកដំណោះស្រាយតាមរយៈការចរចា និងសន្តិភាព”។
មេដឹកនាំគណបក្សប្រឆាំងរូបនេះបានមានប្រសាសន៍ថា ការព្រមព្រៀងជាមួយគណបក្សប្រជាជនកម្ពុជា ដើម្បីធ្វើឲ្យសមាជិកគណបក្សសង្គ្រោះជាតិបានចូលទៅក្នុងរចនាសម្ព័ន្ធរបស់គណៈកម្មាធិការជាតិរៀបចំការបោះឆ្នោត (គ.ជ.ប.) ជាស្ថាប័នដែលគណបក្សប្រជាជនកម្ពុជាគ្រប់គ្រងជាយូរមកហើយនោះ គឺជាជំហានដ៏សំខាន់នៅក្នុងការវិវឌ្ឍរបស់គណបក្សសង្គ្រោះជាតិឆ្ពោះទៅរកការដឹកនាំរដ្ឋាភិបាល។
លោក សម រង្ស៊ី បានមានប្រសាសន៍ថា “ឲ្យតែមាន គ.ជ.ប.ថ្មី ឯករាជ្យ និងមានអព្យាក្រឹតធ្វើការដើម្បីលទ្ធិប្រជាធិបតេយ្យ និងយុត្តិធម៌នោះ យើងនឹងឈ្នះមិនខាន ហើយនេះគឺជាអ្វីដែលយើងកំពុងដោះស្រាយ។ បន្ទាប់ពីមានការផ្លាស់ប្តូរ គ.ជ.ប. និងសមាសភាព គ.ជ.ប.ហើយ យើងនឹងឈ្នះ ហើយដឹកនាំប្រទេស ហើយយើងនឹងធ្វើឲ្យមានការផ្លាស់ប្តូរដើម្បីសង្គ្រោះជាតិ។
យោងតាមលទ្ធផលផ្លូវការនៅក្នុងការបោះឆ្នោតកាលពីឆ្នាំមុន គណបក្សសង្គ្រោះជាតិដែលច្របាច់បញ្ចូលគ្នានេះបានទទួល៥៥អាសនៈ រីឯគណបក្សប្រជាជនកម្ពុជាទទួលបាន៦៨អាសនៈ។ លទ្ធផលនេះបានធ្វើឲ្យបាត់បង់ក្តីសង្ឃឹមរបស់លោក ហ៊ុន សែនដែលថា មានអ្នកបោះឆ្នោតគាំទ្រគណបក្សលោកស្ទើរតែទាំងអស់ ហើយបានធ្វើឲ្យមានការតវ៉ារាប់ខែប្រឆាំងរូបលោក។
នៅឯសន្និបាតកាលពីម្សិលមិញ ដែលជាសន្និបាតលើកដំបូងក្នុងប្រវត្តិសាស្ត្ររបស់គណបក្សនេះ អ្នកគាំទ្រគណបក្សប្រហែល២.០០០នាក់បានចូលរួមជាមួយសមាជិកក្រុមប្រឹក្សាជាតិ និងសមាជិកក្រុមប្រឹក្សាឃុំសង្កាត់ជាប់ឆ្នោតរបស់គណបក្សសង្គ្រោះជាតិប្រហែល៥.០០០នាក់។
នៅពិធីមហាសន្និបាតនេះ គេបានដាក់អេក្រង់អិលស៊ីឌីធំៗនៅតាមផ្លូវដើរនៅចន្លោះតង់កៅស៊ូ ដើម្បីឲ្យអ្នកនៅឆ្ងាយពីវេទិកា ដែលមិនអាចមើលឃើញអាចមើលឃើញបាន ហើយអ្នកថតរូបភាពម្តងចាប់យកវាគ្មិននៅលើវេទិកា ម្តងចាប់យកតំណាងរាស្ត្រជាប់ឆ្នោតនៅក្បែរនោះ និងអ្នកចូលរួមជាច្រើនទៀត។
លោក កឹម សុខា ដែលជាអតីតតំណាងរាស្ត្រគណបក្សប្រជាធិបតេយ្យសេរីនិយមព្រះពុទ្ធសាសនា បន្ទាប់ពីការបោះឆ្នោត១៩៩៣ និងជាសមាជិកព្រឹទ្ធសភាមកពីគណបក្សហ្វុ៊នសិុនបិុចក្រោយឆ្នាំ១៩៩៨ បានប្រាប់អ្នកចូលរួមថា លោកដឹងច្បាស់ពីគ្រោះថ្នាក់ក្នុងការសហការជាមួយគណបក្សប្រជាជនកម្ពុជា។
ប៉ុន្តែ អនុប្រធានគណបក្សសង្គ្រោះជាតិរូបនេះ បានបញ្ជាក់ថា គណបក្សមិនចូលរួមជាមួយគណបក្សប្រជាជនកម្ពុជាក្នុងរដ្ឋាភិបាលចម្រុះទេ ហើយនៅតែធ្វើជាគណបក្សប្រឆាំងដដែល។
លោក កឹម សុខា បានមានប្រសាសន៍ថា “ដើម្បីពង្រឹងប្រជាប្រិយភាពរបស់យើង និងដើម្បីឈ្នះឆ្នោតនាពេលឆាប់ៗនេះ គណបក្សសង្គ្រោះជាតិនឹងមិនចូលក្នុងរដ្ឋាភិបាលជាមួយគណបក្សប្រជាជនកម្ពុជានៅក្នុងអាណត្តិទី៥នេះឡើយ។ ប្រសិនបើយើងចូលរួមនៅក្នុងរដ្ឋាភិបាល យើងនឹងស្អុយ”។
ប៉ុន្តែ លោក កឹម សុខា ក៏បានទទួលស្គាល់ដែរថា ជោគជ័យនៃកិច្ចព្រមព្រៀងជាមួយគណបក្សប្រជាជនកម្ពុជាដែលមានប្រវត្តិជាយូរមកហើយមិនគោរពកិច្ចព្រមព្រៀងជាមួយគូប្រជែងនោះ អាស្រ័យលើការសហការពីគណបក្សកាន់អំណាច។
លោកបានមានប្រសាសន៍ថា “មិនថា ល្អឬអាក្រក់ទេ វាអាស្រ័យលើឆន្ទៈរបស់គណបក្សទាំងពីរ និងភាពស្មោះត្រង់ជាមួយគ្នា។ ប្រសិនបើយើងស្មោះត្រង់ជាមួយគ្នា ប្រទេសរបស់យើងនឹងមានសំណាងល្អ សប្បាយរីករាយ និងមានការរីកចម្រើនសម្រាប់ប្រជាពលរដ្ឋប៉ុន្តែ ប្រសិនបើគណបក្សមួយក្បត់គណបក្សមួយទៀត ប្រជាពលរដ្ឋនឹងវិនិច្ឆ័យ”។
សមាជិកក្រុមប្រឹក្សាជាតិគណបក្សសង្គ្រោះជាតិដែលបានមកចូលរួមសន្និបាតនេះ ក៏បានលើកឡើងលើវេទិកាដែរថា ពួកគេត្រៀមខ្លួនគាំទ្រកិច្ចព្រមព្រៀងជាមួយគណបក្សប្រជាជនកម្ពុជា ថ្វីបើកិច្ចព្រមព្រៀងនេះមិនសូវមានសង្ឃឹមក៏ដោយ។
លោក សួន ចំរើន សមាជិកក្រុមប្រឹក្សាជាតិមកពីខេត្តបាត់ដំបងបាននិយាយថា មន្ត្រីគណបក្សជាច្រើនមានការភ្ញាក់ផ្អើលចំពោះការប្រកាសអំពីកិច្ចព្រមព្រៀងនេះ ប៉ុន្តែបានទទួលយកកិច្ចព្រមព្រៀងនេះ។
លោក ចំរើន បាននិយាយថា “ទោះបីជាកិច្ចព្រមព្រៀងនេះមិនត្រូវគោលបំណងរបស់យើងក៏ដោយ ក៏យើងយល់ថា កិច្ចព្រមព្រៀងនេះជាជម្រើសល្អ និងសមហេតុផលសម្រាប់គណបក្សសង្គ្រោះជាតិនៅក្នុងស្ថានភាពបែបនេះ”។
លោកបាននិយាយថា “សមាជិកក្រុមប្រឹក្សាខេត្តបាត់ដំបងទាមទារឲ្យមេដឹកនាំជាន់ខ្ពស់គណបក្សសង្គ្រោះជាតិធានាចំពោះមុខប្រជាពលរដ្ឋនៅទីនេះថា ពួកគាត់នឹងមិនចូលរដ្ឋសភារហូតដល់មានការអនុវត្តកិច្ចព្រមព្រៀងនេះសិន ព្រោះយើងដឹងថា គណបក្សប្រជាជនកម្ពុជាបានឆបោកគណបក្សហ្វុ៊នសិុនបិុច”។
នៅលើវេទិកានោះ លោក សម រង្ស៊ី បានរំឭកដល់អ្នកចូលរួមថា គណបក្សសង្គ្រោះជាតិត្រូវបានអនុញ្ញាតឲ្យបើកស្ថានីយទូរទស្សន៍មួយ ហើយលោកបានមានប្រសាសន៍ថា គណបក្សមានហេតុផលក្នុងការទទួលយកអ្វីដែលខ្លួនអាចទទួលយកបាន ដើម្បីឲ្យមានការផ្ទេរអំណាចដោយសន្តិវិធីពីគណបក្សប្រជាជនកម្ពុជា។
លោក សម រង្ស៊ី បានមានប្រសាសន៍ថា “សូមបងប្អូនគិតឲ្យបានច្បាស់ថា ត្រូវធ្វើអ្វីដែលយើងអាចធ្វើបាននៅពេលនេះ ដើម្បីជៀសវាងការបង្ហូរឈាម។ យើងកំពុងជៀសវាងហានិភ័យ និងចំណាយពេលតិច ប៉ុន្តែ ត្រូវចាត់វិធានការឲ្យបានច្បាស់លាស់ និងប្រាកដប្រជាដើម្បីសម្រេចគោលបំណងរបស់យើង”។
ក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិនឹងជួបគ្នានៅថ្ងៃនេះដើម្បីពិភាក្សាអំពីដំណោះស្រាយចុងក្រោយនៃការកែទម្រង់នយោបាយ ដែលមាននៅក្នុងកិច្ចព្រមព្រៀងកាលពីសប្តាហ៍មុន។
កង្វល់ពិសេសមួយរបស់គណបក្សប្រឆាំងគឺការជ្រើសរើសសមាជិកទី៩របស់ គ.ជ.ប.ដែលត្រូវជ្រើសរើសដោយមានការព្រមព្រៀងពីគណបក្សទាំងពីរ។ ប៉ុន្តែ យោងតាមកិច្ចព្រមព្រៀងកាលពីសប្តាហ៍មុន ប្រសិនបើមិនមានការព្រមព្រៀងគ្នាលើសមាជិកទី៩ទេ នឹងរក្សាទុក គ.ជ.ប.បច្ចុប្បន្នដដែល។
លោក សម រង្ស៊ី បានមានប្រសាសន៍កាលពីម្សិលមិញថា ប្រសិនបើគណបក្សទាំងពីរអាចព្រមព្រៀងគ្នាតាមអ្វីដែលមាននៅក្នុងកិច្ចព្រមព្រៀងនេះ តំណាងរាស្ត្រជាប់ឆ្នោតទាំង៥៥រូបរបស់គណបក្សសង្គ្រោះជាតិនឹងស្បថចូលកាន់តំណែងនៅថ្ងៃអង្គារ៕គឹមហឿន