36 C
Phnom Penh

ប្រជាពលរដ្ឋ​រាប់រយ​គ្រួសារ​បានរុះរើ​និង​រំកិលផ្ទះដោយសារ​ការ​បាក់​ច្រាំងទន្លេ

ដោយ ឌឹ ខេមបូឌា ដេលី

បទវិភាគ

ក្រុម​​​មន្ត្រី​​​បាន​​​ជូន​ដំណឹង​កាល​​​ពីម្សិលមិញ​​​ថា ការ​​​បាក់​​​ច្រាំ​​​ង​​​ទន្លេ​​​មេគង្គ​​​ក្នុង​​​ស្រុក​​​ស្រីសន្ធរ​​​ខេត្ត​​​កំពង​​​់​​​ចាម​​​ បាន​​​បណ្តាល​​​ឲ្យ​​​ប្រជា​​​ពល​​​រដ្ឋ​​​១៨​​​គ្រួសារ​​​រុះ​​​រើ​​​ផ្ទះ​​​សំបែងរបស់​​​ខ្លួន និង​​កំពុង​​គំរាម​​​កំហែង​​​ដល់​​​ប្រជា​​​ពល​​​រដ្ឋ​​​រាប់​​​រយ​​​គ្រួសារផ្សេង​​​ទៀត។

លោក យ៉ាន យ៉េត មេឃុំ​​​កោះ​​​អណ្តែត​​​បាន​​​មាន​​​ប្រសាសន៍​​​ថា យ៉ាង​​​ហោច​​​ណាស់​​​ផ្ទះ​​​ចំនួន​​​១៦​​​ខ្នង​​​ត្រូវ​​​បាន​​​រុះរើ និង​​​រំកិល​​​​​​ចាប់​​​តាំង​​​ពី​​​ដើម​​​ខែ​​​កក្កដា​មក​​​ដោយ​​​សារ​​​ការ​​​បាក់​​​ច្រាំង​​​ទន្លេ​​​។ លោក​​​បាន​​​មាន​​​ប្រសាសន៍​​​ថា “ផ្ទះ​​​១០០​​​ខ្នង​​​ទៀត​​​នៅ​​​ក្នុង​​​ភូមិ​​​គគីរ​​​ ប្រហែល​​​ត្រូវ​​​​​​រុះ​​​រើ​​​​​​​​​​​​​​​ប្រសិន​​​បើ​​​នៅ​​​តែ​​​បន្ត​​​បាក់​​​ច្រាំង​​​ទន្លេ​​​ដូច្នេះ។ ឥឡូវ​​​នេះ​មាន​ការ​​​បាក់​​​ច្រាំង​​​ទន្លេ​​​កាន់​​​តែ​​​ខ្លាំង​​​ឡើង​​​ៗ​​​ពី​​​ព្រោះ​​​​​​ទឹក​កំពុង​​​​ឡើង​​​ ហើយ​​​ខ្យល់​​​ខ្លាំង​​​បណ្តាល​​​ឲ្យ​​​ទឹក​​​រលក​​​បោក​​​បំបាក់​​​ច្រាំង​​​ទន្លេ”។

លោក យ៉េត បាន​​​មាន​​​ប្រសាសន៍​​​ថា ការ​​​បាក់​​​ច្រាំង​​​ទន្លេ​​​មាន​​​ប្រវែង​​​រហូត​ដល់​​​១គីឡូ​​​មែ៉ត្រ ហើយ​​​នៅ​​​ក្នុង​​​កន្លែង​​​មួយ​​​ចំនួន​​​ទៀត​​​បាន​​​បាក់​​​ចូល​រហូតដល់​​១០​​​ម៉ែត្រ​​​ឯណោះ។ លោក​​​បាន​​​មាន​​​ប្រសាសន៍​​​ថា អាជ្ញាធរ​​​បាន​​​ជួយ​​​​​​អ្នក​​​ភូមិ​​​ក្នុង​​​ការ​​​រុះ​​​រើ និង​​​រំកិលផ្ទះសំបែង​​​ពួក​​​គាត់​​​ ហើយ​​​បាន​​​ចាប់​​​ផ្តើម​​​ដឹក​​​សម្ភារផ្គត់ផ្គង់​​​ទៅ​​​កាន់​​​ដីផ្សេងទៀត​នៅក្នុង​តំបន់នោះ​​​។ លោក​​​បាន​​​មាន​​​ប្រសាសន៍​​​ថា “យើង​​​មិនដឹង​​​ថា តើ​​​ត្រូវ​​​រកវិធីទប់​​​ស្កាត់​​​ដូច​​​ម្តេច​​​ឡើយ​​​ ពីព្រោះ​​​វា​​​ជា​​​គ្រោះ​​​មហន្ត​​​រាយ​​​ធម្មជាតិ​​​”។

លោក អ៊ុំ​​​ វិបុល ប្រធាន​​​មន្ទីរ​​​ធន​​​ធាន​​​ទឹក​​​ និ​​ង​​​ឧតុនិយម​​​ខេត្ត​​​បាន​​​មាន​​​ប្រសាសន៍​​​ថា បច្ចុប្បន្ន​​​នេះ​​​កម្រិត​​​ទឹក​​​កម្ពស់​​​ដល់​​​១៣,៣៦​​​ម៉ែត្រ បើ​​​ប្រៀបធៀប​​​ទៅ​​​នឹង​​​ខែកក្កដា​​​ឆ្នាំ​​​មុន ដែលមាន​​​កម្ពស់​​​តែ​​​១១,២៧​​​ម៉ែត្រ។

លោក​​​ វិបុល បាន​​​មាន​​​ប្រសាសន៍​​​ថា កម្រិត​​​ទឹក​​​កើន​​​ឡើង​​​និង​​​ការ​​​ផ្លាស់​​​ប្តូរ​​​ចរន្ត​​​ទឹក​ជា​​​ហេតុ​​​នាំ​​​ឲ្យ​​​មានការ​​​បាក​​​់​​​ច្រាំង​​​ទន្លេ​​​ដ៏លឿននៅ​​​ឆ្នាំ​​​នេះ​​​។

លោក លន់ លឹមថៃ អភិបាល​​​ខេត្ត​​​កំពង់​​​ចាម​​​បាន​​​មាន​​​ប្រសាសន៍​​​ថា ការ​រុះ​​​រើ​​​ផ្ទះ​​​របស់​​​អ្នក​ភូមិ​​​ស្ថិត​​​នៅ​​​តាម​​​ដង​​​ទន្លេ​ដោយសារ​​​ការ​​​បាក់​​​ច្រាំង​នោះ​​មិន​​​មែន​​​ជា​​​រឿង​​​ថ្មី​​​ទេ។ លោក​​​បាន​​​មាន​​​ប្រសាសន៍​​​ថា “ពួក​​​គាត់​​​តែង​​​តែ​​​ជួប​​​ប្រទះ​​​ការ​​​បាក់​​​ច្រាំង​​​ទន្លេ​​​។ វាតែង​​​តែ​​​កើត​​​មាន​​​គ្រាន់​​​តែ​​​ធំ ឬ​​​តូច​​​ប៉ុណ្ណោះ”។

លោក លន់ លឹមថៃ បាន​​​ទទួល​​​ស្គាល់​​​ថា កម្រិត​​​ទឹក​​​នៅ​​​ឆ្នាំ​​​នេះ​​​ខ្ពស់​​​ជាង​​​ឆ្នាំ​​​មុន​​​ ប៉ុន្តែ វា​​​មិន​​​ទាន់​​​ដល់កម្រិត​​​ប្រកាស​​​អាសន្ន​​​​​​នៅ​​​ឡើង​​​ទេ។ លោក​​​បាន​​​មាន​​​ប្រសាសន៍​​​ថា “​​អាជ្ញាធរ​​​បាន​​​ត្រៀម​​​ជួយនិង​​​ជម្លៀស​​​ពួក​​​គាត់​​​ទៅ​​​កាន់​​​ទី​​​ទួល​​​សុវត្ថិភាព”។

លោក ចិន ធឿន ប្រធាន​​​ភូមិ​​​គគីរ បាន​​​មាន​​​ប្រសាសន៍​​​ថា ប្រជា​​​ពលរដ្ឋ​​​រាប់​​​រយ​​​គ្រួសារ​​​នៅ​​​ក្នុង​​​ភូមិ​​​របស់​​​លោក ប្រហែល​​​ជា​​​ត្រូវ​​​ផ្លាស់​​​ទី​​​លំនៅ​​​ ប្រសិន​​​បើ​​​ការ​​​បាក់​​​ច្រាំង​​​​​​នៅ​​​តែ​​​បន្ត​​​កើត​​​មាន​​លឿនៗ​បែប​​​នេះ​​​។

លោក​​​បាន​​​មាន​​​ប្រសាសន៍​​​ថា “​​​តំបន់​​​ដែល​​​រង​​​ផល​​​ប៉ះពាល់​​​ធំបំផុត​​​ គឺ​​​ភូមិ​​​របស់​​​ខ្ញុំ។ ខ្ញុំ​​​មាន​​​ការ​​​ព្រួយ​​​បារម្ភណាស់ ពីព្រោះ​​​ច្រាំង​​​ទន្លេ​​​បាក់​​​រៀងរាល់​​​ឆ្នាំ។ យើង​​​​​​មិន​​​ដឹង​​​រក​​​វិធី​​​ទប់​​​ស្កាត់​​​ដូច​​​ម្តេច​​​ឡើយ​​​”៕សារុន​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស