យោងតាមក្រុមមន្ត្រីបានឲ្យដឹងថា សាលារាជធានីកំពុងជីកកន្លែងចាក់សំរាមថ្មីមួយ ដែលមានទំហំ៨ហិកតា នៅជិតពន្ធនាគារព្រៃស ពេលដែលកន្លែងចាក់សំរាមសព្វថ្ងៃ ដែលទទួលសំរាមប្រហែល១.៥០០តោនក្នុងមួយថ្ងៃ នឹងត្រូវពេញនៅខែធ្នូ។
លោក ងូ ចំរើន ប្រធានការិយាល័យគ្រប់គ្រងសំរាមខណ្ឌដង្កោបានមានប្រសាសន៍ថា ” ឥឡូវនេះ យើងកំពុងជីកកន្លែងចាក់សំរាមថ្មីមួយនៅចម្ងាយប្រហែល៦០០ម៉ែត្រពីកន្លែងចាក់សំរាមចាស់ ដែលនឹងពេញនៅខែធ្នូ ដូច្នេះហើយយើងកំពុងរៀបចំសម្រាប់ឆ្នាំ២០១៥”។
លោក ចំរើន បានឲ្យដឹងទៀតថា កន្លែងចាក់សំរាមថ្មីនេះនឹងត្រូវប្រើសម្រាប់រយៈពេល៥ឆ្នាំបន្ទាប់ ប៉ុន្តែលោកបានបន្ថែមថា មិនមានគម្រោងដោះស្រាយក្លិនស្អុយនៅក្នុងតំបន់ជុំវិញកន្លែងនោះទេ។ លោកបានមានប្រសាសន៍ថា “យើងនឹងបំបាត់ក្លិននោះបាន ប្រសិនបើយើងមានប្រព័ន្ធបំបាត់ក្លិន ប៉ុន្តែយើងមិនមាន [ប្រព័ន្ធណាមួយ]ទេ ពីព្រោះគ្មានអ្នកវិនិយោគ ហើយសាលារាជធានីគ្មានលទ្ធភាពធ្វើដោយខ្លួនឯងទេ ពីព្រោះខ្វះថវិកា”។
អំឡុងពិធីបើកការដ្ឋានស្ថាបនាផ្លូវថ្មីមួយខ្សែទៅពន្ធនាគារព្រៃសកាលពីថ្ងៃព្រហស្បតិ៍ លោក បា៉ សុជាតិវង្ស អភិបាលរាជធានីភ្នំពេញ បានសម្ដែងអារម្មណ៍មិនសប្បាយចិត្តចំពោះក្លិនស្អុយ ដែលសាយភាយនៅតំបន់នោះ ហើយបានផ្ដល់យោបល់ឲ្យដាំដើមឈើជុំវិញកន្លែងចាក់សំរាម ដើម្បីទប់ក្លិនស្អុយ។
លោកក៏បានឆ្លៀតឱកាសនេះរិះគន់ក្រុមហ៊ុនស៊ីនទ្រី ជាក្រុមហ៊ុនប្រមូលសំរាមក្រុងតែមួយគត់ ដែលបានធ្វើឲ្យលោក ប៉ា សុជាតិវង្ស មិនសប្បាយចិត្តម្ដងហើយម្ដងទៀត ដោយសារការខកខានសម្អាតផ្លូវក្នុងក្រុង។ លោកបានមានប្រសាសន៍ថា ” ខ្ញុំពិតជាសោកស្ដាយដែលក្រុមហ៊ុនស៊ីនទ្រី ហាក់ដូចជាមិនសូវសហការជាមួយសាលារាជធានីលើបញ្ហាប្រមូលសំរាម ហើយពួកគេធ្វើឲ្យប្រជាពលរដ្ឋមិនសប្បាយចិត្ត ដោយសារការងារយឺតយ៉ាវរបស់ពួកគេ”។
នៅលើគេហទំព័ររបស់ខ្លួន សាលារាជធានីក៏បានប្រកាសឲ្យដឹងពីគម្រោងបង្កើតផ្លូវថ្មើរជើងមួយខ្សែប្រវែងជាង៤.០០០ម៉ែត្រតពីផ្លូវដែលមានស្រាប់តាមបណ្ដោយមាត់ទន្លេទៅស្ពានមុនីវង្ស។
យោងតាមសាលារាជធានីបានឲ្យដឹងថា ជំហានដំបូងនឹងធ្វើផ្លូវថ្មើរជើងមួយខ្សែប្រវែង៩៥០ម៉ែត្រពីសាលសន្និសីទចតុមុខទៅដល់ស្ពានកោះពេជ្រ។ ជំហានទី២ នឹងមានប្រវែង៣.២០០ម៉ែត្រពីស្ពានកោះពេជ្រទៅដល់ស្ពានមុនីវង្ស។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា លោកមិនបានដឹងថា គម្រោងទំាងនេះនឹងត្រូវចំណាយប្រាក់ប៉ុន្មាន ពេលណានឹងត្រូវស្ថាបនា ឬក្រុមហ៊ុនណាខ្លះនឹងចូលរួមក្នុងការធ្វើផ្លូវនេះទេ៕ មានិត