កម្មករជាង១.០០០នាក់នៅរោងចក្រស្បែកជើង ស៊ុនវែល នឹងចូលធ្វើការវិញនៅថ្ងៃនេះបន្ទាប់ពីរោងចក្របានយល់ព្រមតាមការទាមទារមួយចំនួនរបស់កម្មករដែលធ្វើកូដកម្មសុំដំឡើងប្រាក់ខែ និងលក្ខខណ្ឌការងារល្អប្រសើរ។
លោក សៀង សម្បត្តិ ប្រធានសហព័ន្ធសហជីពមិត្តភាពកម្មករ ដែលតំណាងឲ្យកម្មករបានមានប្រសាសន៍ថា ពួកគេបានទទួលយកការផ្តល់ឲ្យរបស់រោងចក្រ គឺប្រាក់ឧបត្ថម្ភប្រចាំឆ្នាំចំនួន៥០ដុល្លារ ប្រាក់គាំពារសុខភាព៥ដុល្លារក្នុងមួយខែ និងបំពាក់ឧបករណ៍ការពារសុវត្ថិភាពឲ្យបានប្រសើរជាងមុន ដូចជាសម្លៀកបំពាក់ការពារជាដើម។
លោក សម្បត្តិ បានមានប្រសាសន៍ថា “កម្មករបានយល់ព្រមចូលធ្វើការវិញ ពីព្រោះពួកគេត្រូវការប្រាក់សម្រាប់ចំណាយប្រចាំថ្ងៃ ហើយពួកគេបានឈានដល់កិច្ចព្រមព្រៀងជាមួយតំណាងរោងចក្រ”។
ការបញ្ចប់កូដកម្មដែលសម្របសម្រួលដោយអាជ្ញាធរសង្កាត់ និងមន្ត្រីក្រសួងការងារកើតឡើងរយៈពេលជិតពីរសប្ដាហ៍ បន្ទាប់ពីបានចាប់ផ្ដើមដំបូងនៅខាងក្រៅរោងចក្រនេះនៅតាមផ្លូវវេងស្រេង ក្នុងខណ្ឌពោធិ៍សែនជ័យ។
កម្មករដែលទទួលបានប្រាក់ខែ១០៥ដុល្លារក្នុងមួយខែ បានចាប់ផ្ដើមទាមទារប្រាំពីរចំណុច រួមទាំងប្រាក់សម្រាប់ធ្វើដំណើរ និងប្រាក់ឧបត្ថម្ភថ្លៃឈ្នួលផ្ទះចំនួន១៥ដុល្លារក្នុងមួយខែ ដែលមិនត្រូវបានផ្ដល់ឲ្យ។
មន្ត្រីរោងចក្របានយល់ព្រមពិចារណារ៉ាប់រងការបង់ពន្ធប្រាក់ខែឲ្យកម្មករនៅពេលអនាគត ជាការទាមទារដំបូងមួយទៀតរបស់កម្មករ។
កម្មករឈ្មោះ រស់ សាវ៉ាត អាយុ៣៤ឆ្នាំបាននិយាយថា គាត់រីករាយណាស់ដែលសហជីពនិងតំណាងរោងចក្របានចរចាឈានដល់កិច្ចព្រមព្រៀង ប៉ុន្តែបានព្រមានធ្វើកូដកម្មទៀត ប្រសិនបើរោងកច្រមិនគោរពពាក្យសន្យារបស់ខ្លួន។
គាត់បាននិយាយថា ” យើងនឹងធ្វើកូដកម្មម្ដងទៀត ប្រសិនបើរោងចក្រមិនគោរពកិច្ចព្រមព្រៀងរវាងតំណាងកម្មករ និងរោងចក្រ”។
អ្នកស្រី លីវ ឈីវម៉ី ប្រធានរដ្ឋបាលនៅរោងចក្រនេះបានមានប្រសាសន៍ថា កូដកម្មបានបណ្ដាលឲ្យក្រុមហ៊ុនខាតបង់ហិរញ្ញវត្ថុយ៉ាងច្រើន។ អ្នកស្រី ម៉ី បានមានប្រសាសន៍ថា បើទោះជាការខាតបង់នេះមិនទាន់ត្រូវបានគណនាក៏ដោយ ក៏វាមានចំនួនច្រើនដែរ។
អ្នកស្រីបានមានប្រសាសន៍ថា “កូដកម្មបានធ្វើឲ្យប៉ះពាល់យ៉ាងខ្លាំងដល់រោងចក្រ ដូច្នេះរោងចក្រត្រូវកាត់ប្រាក់ប្រចាំថ្ងៃរបស់កម្មករ៥០ភាគរយអំឡុងការធ្វើកូដកម្ម។ ការទាមទាររបស់ពួកគេមិនសមហេតុផលទេ ប៉ុន្តែប្រធានរបស់យើងយល់ពីតម្រូវការសម្រាប់ការរស់នៅរបស់កម្មករ”៕ សារុន