កម្លាំងរាជអាវុធហត្ថបាននិយាយថា អ្នកក្រុងភ្នំពេញម្នាក់ អាយុ២២ឆ្នាំ ត្រូវបានចាប់ខ្លួនកាលពីម្សិលមិញ បន្ទាប់ពីជននេះបានសារភាពថាបានផ្ញើគ្រាប់បែកខ្ចប់ជាអំណោយទៅហាងកាហ្វេមួយកន្លែង ដើម្បីគំរាមយកប្រាក់ពីម្ចាស់ហាងកាហ្វេនោះ។
យោងតាមលោក ថេន សុវ៉ាន់ មេបញ្ជាការរងកងរាជអាវុធហត្ថក្រុងបានឲ្យដឹងថា ជនសង្ស័យ ថៃ សុភាព ជានិស្សិតឆ្នាំទី៣នៅសាកលវិទ្យាល័យអន្តរជាតិភ្នំពេញ ត្រូវបានចាប់ខ្លួននៅសាខាវីងមួយកន្លែង ក្នុងខណ្ឌសែនសុខ ខណៈដែលជននេះព្យាយាមបើកយកប្រាក់ដ៏ច្រើនពីម្ចាស់ហាងកាហ្វេ។
វរសេនីយ៍ឯក សុវ៉ាន់ មានប្រសាសន៍ថា លោក សុភាព បាននិងប៉ុនប៉ងគំរាមទារប្រាក់ពីលោក យ៉េន យ៉ុនថយ អាយុ២៣ឆ្នាំ ម្ចាស់ហាងកាហ្វេ Prime Cafe នៅខណ្ឌទួលគោក ហើយបានផ្ញើគ្រាប់បែកជាការគំរាម។ បើទោះជាកាលពីថ្ងៃអាទិត្យ នគរបាលបានចាប់ខ្លួន ឈ្មោះ សុខ កក្កដា អតីតបុគ្គលិកម្នាក់នៅហាងកាហ្វេនេះក្តី ក៏លោក សុវ៉ាន់ មានប្រសាសន៍ថា លោក កក្កដា ត្រូវបានបញ្ជាក់ថាមិនពាក់ព័ន្ធ ហើយនឹងត្រូវដោះលែង។
លោកបានឲ្យដឹងថា “ជនសង្ស័យបានគំរាមជំរិតទារ៥.០០០ដុល្លារជាថ្នូរ។ ប្រសិនបើម្ចាស់ហាងមិនព្រមបង់ទេ ជនសង្ស័យនេះនឹងបំផ្ទុះគ្រាប់បែកនោះ”។
វរសេនីយ៍ សុវ៉ាន់ មានប្រសាសន៍ថា លោក យ៉ុនថយ បានទទួលការគំរាមតាមទូរស័ព្ទពីរលើកកាលពីថ្ងៃអាទិត្យនិងថ្ងៃម្សិលមិញនេះ ហើយបានយល់ព្រមផ្ញើប្រាក់៥.០០០ដុល្លារតាមវីង។ ពេលនោះ នគរបាលបានដាក់កម្លាំងនៅតាមសាខាវីងប្រហែល២០កន្លែងក្នុងខណ្ឌទួលគោកនិងខណ្ឌសែនសុខ។
លោកបានឲ្យដឹងថា “យើងបានដាក់កម្លាំងកងរាជអាវុធហត្ថសម្ងាត់ឃ្លាំមើលជនជំរិតទារប្រាក់នេះទទួលយកប្រាក់របស់ជនរងគ្រោះពីសាខាវីង។ នៅម៉ោង១១ព្រឹកថ្ងៃនេះ យើងបានឃើញជនសង្ស័យមកដល់សាខាវីងនៅសង្កាត់ភ្នំពេញថ្មី ខណ្ឌសែនសុខ កម្លាំងរបស់យើងបានចាប់គាត់ពេលកំពុងប្រព្រឹត្តបទល្មើសតែម្តង”។
វរសេនីយ៍ សុវ៉ាន់ បានមានប្រសាសន៍ថា លោក សុភាព មិនបានធ្វើការនៅហាងកាហ្វេនេះទេ និងបានបដិសេធមិនផ្តល់ព័ម៌មានបន្ថែម។
កាលពីថ្ងៃអាទិត្យ បុរសមិនស្គាល់អត្តសញ្ញាណម្នាក់បានមកហាងកាហ្វេនេះ និងបានប្រគល់គ្រាប់បែកធ្វើនៅសូវៀត នៅជាប់កន្លាស់នៅឡើយ លាក់ក្នុងប្រអប់ខ្ចប់ជិតមួយ ទៅឲ្យអ្នកយាមម្នាក់។ ភ្លាមនោះ នគរបាលបានចាប់លោក កក្កាដា អតីតអ្នកគ្រប់គ្រងហាងកាហ្វេនេះ ដែលត្រូវបានបណ្តេញចេញពីការងារកាលពីសប្តាហ៍មុន បន្ទាប់ពីលោក យ៉ុនថយ បាននិយាយថា គាត់សង្ស័យថា កក្កដា ជាប់ពាក់ព័ន្ធក្នុងហេតុការណ៍នេះ។ មានិត