នៅពេលលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិចេញពីកិច្ចចរចា ដែលបានបញ្ចប់ការធ្វើពហិការមិនចូលសភារបស់គណបក្សប្រឆាំងកាលពីថ្ងៃទី២២ ខែកក្កដា លោក សម រង្ស៊ី បានមានប្រសាសន៍ថា តំណាងរាស្ត្រជាប់ឆ្នោតទាំង៥៥រូបរបស់គណបក្សលោក នឹងស្បថចូលកាន់មុខតំណែងនៅក្នុងរដ្ឋសភានៅសប្តាហ៍ក្រោយ។
កាលពីពីរថ្ងៃមុន លោក សម រង្ស៊ី បានមានប្រសាសន៍ថា តំណាងរាស្ត្រជាប់ឆ្នោតរបស់គណបក្សសង្គ្រោះជាតិនឹងស្បថចូលកាន់មុខតំណែងក្នុងរយៈពេលប៉ុន្មានថ្ងៃ។
ពេលនេះវាហាក់ដូចជាថា កាលបរិច្ឆេទសម្រាប់ការស្បថចូលកាន់តំណែងនឹងមិនត្រូវបានជ្រើសរើសទេ យ៉ាងហោចណាស់ក៏រហូតដល់សប្តាហ៍ក្រោយដែរ ហើយការពិភាក្សារវាងគណបក្សទាំងពីរដើម្បីដាក់បញ្ចូលខ្លឹមសារលម្អិត នៃកិច្ចព្រមព្រៀងនេះឲ្យទៅជាលាយលក្ខណ៍អក្សរ បានផ្អាករហូតដល់ថ្ងៃច័ន្ទ។
កាលពីម្សិលមិញ លោក សម រង្ស៊ី បានមានប្រសាសន៍អំពីព័ត៌មានដែលលើកឡើងថា ការចរចាត្រូវបានពន្យារពេលមួយសប្តាហ៍នេះថា “ខ្ញុំជាអ្នកដំបូងគេដែលភ្ញាក់ផ្អើលចំពោះរឿងនោះ”។
កាលពីថ្ងៃច័ន្ទ គណបក្សទាំងពីរបានជ្រើសរើសលោកស្រី ពុង ឈីវកេក ឲ្យធ្វើជាសមាជិកទី៩ដែលមានអព្យាក្រឹតភាព នៃគណៈកម្មាធិការជាតិរៀបចំការបោះឆ្នោត (គ.ជ.ប.) ថ្មី។ ក្រុមការងារទ្វេភាគីចំនួនបី ទទួលបន្ទុកផ្នែកពិភាក្សាសម្រេចលើខ្លឹមសារលម្អិតនៅក្នុងការអនុវត្តកិច្ចព្រមព្រៀងកាលពីសប្តាហ៍មុន បានជួបពិភាក្សាគ្នាជាលើកដំបូងនៅសប្តាហ៍នេះ។
លោក សម រង្ស៊ី បានមានប្រសាសន៍ថា “ក្រុមការងារទី១ ទទួលបន្ទុកផ្នែកបទបញ្ជាផ្ទៃក្នុងនៃរដ្ឋសភា ការងារចប់រួចរាល់ហើយ វាគួរឲ្យពេញចិត្តជាខ្លាំង។ សម្រាប់ក្រុមការងារពីរទៀត វាខុសគ្នាឆ្ងាយណាស់ ហើយយើងមានការភ្ញាក់ផ្អើលយ៉ាងខ្លាំង។ អ្នកចរចាមកពីគណបក្សប្រជាជនកម្ពុជា បានស្នើសុំឲ្យជំនួបលើកក្រោយធ្វើឡើងនៅដំណាច់សប្តាហ៍នេះ សម្រាប់ក្រុមការងារទទួលបន្ទុកផ្នែករដ្ឋធម្មនុញ្ញ ហើយនៅថ្ងៃច័ន្ទ សម្រាប់ធ្វើវិសោធនកម្មច្បាប់បោះឆ្នោត។ យើងសូមស្នើឲ្យធ្វើការទាំងយប់ទាំងថ្ងៃ ទោះបីជាចុងសប្តាហ៍ក៏ដោយ ប្រសិនបើយើងចង់ឈានដល់ការព្រមព្រៀងឆាប់រហ័ស ហេតុអ្វីត្រូវរង់ចាំរហូតដល់ដំណាច់សប្ដាហ៍នេះ ឬសប្ដាហ៍ក្រោយ?”។
លោក ជាម យៀប អ្នកនាំពាក្យគណបក្សប្រជាជនកម្ពុជា ដែលស្ថិតក្នុងចំណោមមន្ត្រីប្រាំរូបរបស់គណបក្សកាន់អំណាច នៅក្នុងក្រុមការងារធ្វើកំណែទម្រង់បោះឆ្នោត បានមានប្រសាសន៍ថា គណបក្សរបស់លោកនឹងទទួលយកការធ្វើវិសោធនកម្មច្បាប់។
លោកបានមានប្រសាសន៍ទៀតថា “យើងមិនអាចធ្វើវិសោធនកម្មអ្វីមួយដោយគ្មានការសិក្សាលម្អិតបានទេ ពីព្រោះយើងមិនចង់ឃើញគណបក្សនយោបាយដទៃទៀតធ្វើពហិការមិនចូលរដ្ឋសភា ឬប្រើប្រាស់លេសផ្សេងដើម្បីចោទប្រកាន់ថា មានការលួចបន្លំនៅក្នុងការបោះឆ្នោតឡើយ។ តាមពិត ពិធីស្បថចូលកាន់មុខតំណែងអាចធ្វើនៅពេលណាក៏បាន សូម្បីថ្ងៃនេះក៏បាន ហើយពេលនោះយើងអាចបន្តការចរចាអំពីកំណែទម្រង់បោះឆ្នោត និងការធ្វើវិសោធនកម្មច្បាប់ និងរដ្ឋធម្មនុញ្ញក្នុងពេលតែមួយ។ គណបក្សសង្គ្រោះជាតិកំពុងតែពន្យារពេលស្បថចូលកាន់មុខតំណែង”។
លោក សក់ សេដ្ឋា រដ្ឋលេខាធិការក្រសួងមហាផ្ទៃ ដែលជាប្រតិភូមួយរូបរបស់គណបក្សប្រជាជនកម្ពុជា នៅក្នុងក្រុមការងារកំណែទម្រង់បោះឆ្នោតដែរនោះ បានមានប្រសាសន៍ថា ការចរចាកាលពីម្សិលមិញ មានរយៈពេលពីរម៉ោង ហើយថា គណបក្សទាំងពីរបានសម្រេចផ្អាករហូតដល់ថ្ងៃច័ន្ទ។
លោក សក់ សេដ្ឋា បានលើកឡើងថា វាមិនសមហេតុផលទេ ដែលទាមទារឲ្យលាតត្រដាងការចរចា ដើម្បីពន្លឿនការស្បថចូលកាន់មុខតំណែងរបស់តំណាងរាស្ត្រទាំង៥៥រូបមកពីគណបក្សសង្គ្រោះជាតិ។
លោកថ្លែងថា “សម្រាប់ច្បាប់បោះឆ្នោត យើងត្រូវការពេលវេលា វាមិនមែនត្រូវការពេលតែពីរបីថ្ងៃនោះទេ។ ដោយមានដំណោះស្រាយខាងនយោបាយ កាលពីថ្ងៃទី២២ យើងនឹងនៅតែត្រូវការពិភាក្សាអំពីបញ្ហាសំខាន់ៗមួយចំនួនដូចជា គ.ជ.ប. បញ្ជីឈ្មោះបោះឆ្នោត និងស្វ័យភាពថវិការបស់ គ.ជ.ប. ជាដើម”។
លោក សក់ សេដ្ឋា បានបដិសេធថា ការពន្យារពេលនេះមិនបានបង្ហាញថាមានបញ្ហាទេ។ លោកមានប្រសាសន៍ថា “វាជារឿងវិជ្ជមាន។ នោះជាមូលហេតុដែលយើងបានព្រមព្រៀងពិភាក្សាគ្នានៅថ្ងៃច័ន្ទក្រោយ”។
ក្រោមកិច្ចព្រមព្រៀងកាលពីថ្ងៃទី២២ ខែកក្កដា លោក ហ៊ុន សែន បានយល់ព្រមតាមសំណើធ្វើកំណែទម្រង់ជាច្រើនដើម្បីសម្រួលឲ្យការបោះឆ្នោតនាពេលអនាគតមានភាពត្រឹមត្រូវនិងយុត្តិធម៌ ជាថ្នូរនឹងការទទួលស្គាល់របស់គណបក្សសង្គ្រោះជាតិចំពោះលទ្ធផលនៃការបោះឆ្នោតដ៏ចម្រូងចម្រាសកាលពីឆ្នាំមុន តាមរយៈការទទួលយកអាសនៈរបស់ខ្លួននៅក្នុងរដ្ឋសភា។
ជាសញ្ញាបង្ហាញពីសុច្ឆន្ទៈភ្លាមៗរវាងគណបក្សទាំងពីរ លោកស្រី ពុង ឈីវកេក ត្រូវបានគណបក្សទាំងពីរសម្រេចជ្រើសរើសនៅសប្ដាហ៍នេះឲ្យធ្វើជាសមាជិក គ.ជ.ប. ទ្វេភាគីថ្មីមួយ ជំនួស គ.ជ.ប. បច្ចុប្បន្នដែលគ្រប់គ្រងដោយគណបក្សប្រជាជនកម្ពុជា។
ប៉ុន្តែ គណបក្សសង្គ្រោះជាតិបានលើកឡើងថា ខ្លួនចង់បង្ហើយ និងចេញផ្សាយជាសាធារណៈនូវសេចក្តីព្រាងធ្វើវិសោធនកម្មរដ្ឋធម្មនុញ្ញ បទបញ្ជាផ្ទៃក្នុងនៃរដ្ឋសភា និងច្បាប់បោះឆ្នោត មុនពេលតំណាងរាស្ត្ររបស់ខ្លួនស្បថចូលកាន់មុខតំណែង។
លោក គួយ ប៊ុនរឿន សមាជិកមួយរូបនៃគណៈកម្មាធិការអចិន្ត្រៃយ៍របស់គណបក្សសង្គ្រោះជាតិ និងជាប្រធានក្រុមការងារធ្វើកំណែទម្រង់ការបោះឆ្នោតរបស់គណបក្សនេះបានមានប្រសាសន៍ថា ជំនួបកាលពីម្សិលមិញ ត្រូវផ្អាកយ៉ាងហោចណាស់មួយថ្ងៃដើម្បីឲ្យគណបក្សទាំងពីរពិចារណាអំពីគោលជំហររបស់ខ្លួន។
លោកបានលើកឡើងថា “ដោយសារតែទំហំការងារធ្វើវិសោធនកម្មច្បាប់បោះឆ្នោតទូលំទូលាយខ្លាំង ក្រុមការងារទាំងពីរចាំបាច់ត្រូវធ្វើការសិក្សាស្រាវជ្រាវ និងស្វែងរកសំអាងផ្សេងៗដើម្បីយកទៅជជែកគ្នាលើកក្រោយទៀត”។
លោក គួយ ប៊ុនរឿន មានប្រសាសន៍បន្តថា ការងារដែលនៅសេសសល់របស់ក្រុមការងារនេះ គឺការសម្រេចលើយន្តការដោះស្រាយបញ្ហាបញ្ជីឈ្មោះបោះឆ្នោតទូទាំងប្រទេសដើម្បីរាប់បញ្ចូលប្រជាពលរដ្ឋរាប់សែននាក់ ដែលមិនអាចបោះឆ្នោតបានកាលពីឆ្នាំមុន និងមិនទាន់បានសម្រេចពីរបៀបជ្រើសរើសសមាសភាពនៃគណៈកម្មការបោះឆ្នោតថ្នាក់ខេត្ត និងឃុំសង្កាត់។
លោក ម៉ៅ មុនីវណ្ណ តំណាងរាស្ត្រជាប់ឆ្នោតមកពីគណបក្សសង្គ្រោះជាតិបានមានប្រសាសន៍ថា កិច្ចពិភាក្សាអំពីកំណែទម្រង់រដ្ឋសភារវាងលោក ឈាង វុន តំណាងរាស្ត្រមកពីគណកប្សប្រជាជនកម្ពុជា និងលោក យ៉ែម បុញ្ញប្ញទ្ធិ អ្នកនាំពាក្យគណបក្សប្រឆាំង ពេលខ្លះមានសភាពក្ដៅគគុក ប៉ុន្តែបានឈានដល់ការព្រមព្រៀងគ្នាលើយន្តការអនុវត្តន៍ដើម្បីធានាថា រដ្ឋមន្ត្រីបង្ហាញមុខនៅចំពោះមុខរដ្ឋសភានៅពេលត្រូវកោះហៅ។
លោកមានប្រសាសន៍ទៀតថា “វាមានន័យថា សមាជិករដ្ឋសភាត្រូវមានសិទ្ធិកោះហៅនាយករដ្ឋមន្ត្រី និងរដ្ឋមន្ត្រីផ្សេងទៀតឲ្យចូលមកឆ្លើយបំភ្លឺនៅរដ្ឋសភា។ ប្រសិនបើពួកគាត់មិនបង្ហាញមុខក្នុងរយៈពេលប្រាំពីរថ្ងៃដូចមានចែងនៅក្នុងរដ្ឋធម្មនុញ្ញទេនោះ សមាជិកជាង៣០រូបនៃរដ្ឋសភាអាចសរសេរញត្តិស្ដីបន្ទោសទៅរដ្ឋាភិបាលបាន”។
លោក គួយ ប៊ុនរឿន បានទទួលស្គាល់ថា ក្រុមការងាររបស់លោកទទួលបន្ទុកផ្នែកកំណែទម្រង់ច្បាប់បោះឆ្នោត កំពុងពន្យារពេលដំណើរការនេះ ដោយគណបក្សសង្គ្រោះជាតិមានបំណងធ្វើឲ្យប្រាកដថា ការបោះឆ្នោតលើកក្រោយនឹងប្រព្រឹត្តទៅដោយយុត្តិធម៌។ លោកមានប្រសាសន៍ថា ” ក្រុមការងារពីរទៀតនឹងមិនចំណាយពេលវេលាច្រើនដូចកិច្ចការធ្វើវិសោធនកម្មច្បាប់បោះឆ្នោតទេ”៕ សុខុម