ព្រះរាជអាជ្ញារងម្នាក់បាននិយាយថា កាលពីម្សិលមិញសាលាដំបូងខេត្តព្រះវិហារបានចោទប្រកាន់ទាហានម្នាក់ពីបទមនុស្សឃាត និងប្រើប្រាស់អាវុធខុសច្បាប់បន្ទាប់ពីជននេះបានបាញ់សម្លាប់យុវជនអាយុ១៨ឆ្នាំម្នាក់ ដោយកាំភ្លើង អាកា-៤៧ កាលពីថ្ងៃសៅរ៍ នៅក្នុងស្រុកគូលែន។
យោងតាមលោក ស្រេង វុទ្ធា ព្រះរាជអាជ្ញារងបានឲ្យដឹងថា ទាហានរូបនេះឈ្មោះ ពឿន បាស់ អាយុ៣០ឆ្នាំនៅកងពលតូចលេខ៤១បានសារភាពប្រាប់មន្ត្រីតុលាការថា ខ្លួនបានបាញ់យុវជនម្នាក់ឈ្មោះ ទ្រី ចំរើន អំឡុងការប៉ះទង្គិចពាក្យសម្ដីគ្នាជាមួយអ្នកភូមិមូលដ្ឋានជុំវិញព្រំប្រទល់ដីនៅក្នុងតំបន់នេះ។
លោក វុទ្ធា បានមានប្រសាសន៍ថា ” ចុងចោទរូបនេះបានសារភាពថា គាត់បានបាញ់គំរាមអ្នកភូមិមែន ពីព្រោះពួកគាត់មិនព្រមឈប់ធ្វើស្រែលើដីដែលគាត់អះអាងថា ជាកម្មសិទ្ធិរបស់គាត់”។
ឪពុករបស់ ទ្រី ចំរើន បាននិយាយកាលពីថ្ងៃច័ន្ទថា យុវជនរូបនេះត្រូវបានបាញ់ខណៈពេលកំពុងថតរូបឈ្មោះ បាស់ នៅពេលដែលទាហានរូបនេះបានព្យាយាមប្រាប់ឲ្យអ្្នកភូមិមូលដ្ឋាន១០គ្រួសារចាកចេញពីដីរបស់ខ្លួន តាងនាមឲ្យវរសេនីយ៍ត្រីកងយោពលខេមរភូមិន្ទម្នាក់។
លោក វុទ្ធា បានមានប្រសាសន៍ថា តុលាការក៏បានចោទប្រកាន់ឈ្មោះ បាស់ នេះពីបទប្រើប្រាស់អាវុធខុសច្បាប់ផងដែរ ពីព្រោះកាំភ្លើងអាកា-៤៧ ដែលជននេះបានប្រើមិនមែនជាកម្មសិទ្ធិរបស់ខ្លួនឡើយ ប៉ុន្តែជននេះបានខ្ចីពីទាហានម្នាក់ទៀត។
លោក ស៊ី គិរី ស្នងការនគរបាលខេត្តព្រះវិហារ បានមានប្រសាសន៍ថា បុរសឈ្មោះ បាស់ នេះត្រូវបានឃុំខ្លួននៅពន្ធនាគារខេត្តបន្ទាប់ពីធ្វើការចោទប្រកាន់៕ សារុន