នគរបាលនិងម្ចាស់រថយន្តបាននិយាយកាលពីម្សិលមិញថា កូនប្រុសមន្ត្រីខេត្តកណ្ដាលអាយុ៣៥ឆ្នាំម្នាក់ត្រូវបានចាប់ខ្លួនកាលពីថ្ងៃច័ន្ទ បន្ទាប់ពីបុរសរូបនេះបានខ្ចីរថយន្តមិត្តភក្ដិរបស់ខ្លួនយកទៅបញ្ចាំនៅកាស៊ីណូណាហ្គាវើលក្នុងតម្លៃ១២.០០០ដុល្លារ។
លោក វ៉ន ដាវិន កូនប្រុសលោក ទាវ សាវឿន ប្រធានមន្ទីរពន្ធដារខេត្តកណ្ដាល ដែលអះអាងថា ជាជំនួយការផ្ទាល់របស់លោកនាយករដ្ឋមន្ត្រី ហ៊ុន សែន ដែរនោះត្រូវបានចោទប្រកាន់ពីបទខ្ចីរថយន្តលុចស៊ីសរបស់មិត្តភក្ដិម្នាក់ឈ្មោះ តាល់ ឆន កាលពីយប់ថ្ងៃទី១១ ខែឧសភា។
យោងតាមលោក តាល់ ឆន ដែលជាអនុប្រធាននាយកដ្ឋានតាំងទីលំនៅថ្មីនៅក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា បន្ទាប់មកជននេះបានយករថយន្តទៅបញ្ចាំនៅកាស៊ីណូណាហ្គាវើលភ្លាម ដើម្បីយកលុយលេងល្បែង។
លោក តាល់ ឆន បានមានប្រសាសន៍ថា “ខ្ញុំបានព្យាយាមទូរស័ព្ទទៅជននេះរយៈពេលជាច្រើនថ្ងៃ ហើយនៅពេលខ្ញុំបានជួបគាត់ ខ្ញុំបានសួរគាត់ថា ‘ឯណាឡានរបស់ខ្ញុំ?’ គាត់បានប្រាប់ខ្ញុំថា គាត់បានយកទៅបញ្ចាំនៅកាស៊ីណាណាហ្គាវើល ក្នុងតម្លៃ១២.០០០ដុល្លារ”។
លោក តាល់ ឆន បានខ្ចីប្រាក់គេយកទៅលោះរថយន្តរបស់លោក ហើយបានដាក់ពាក្យបណ្ដឹងប្ដឹងមិត្តភក្ដិរបស់ខ្លួនទៅក្រសួងមហាផ្ទៃ និងនគរបាលនៅក្នុងសង្កាត់ទន្លេបាសាក់ ខណ្ឌចំការមន ដែលនៅជិតកាស៊ីណូណាហ្គាវើល ប៉ុន្តែគ្មានប្រយោជន៍ឡើយ។
ទីបំផុត កាលពីថ្ងៃច័ន្ទគាត់បានឃើញជនល្មើសរូបនេះនៅខាងក្រៅពន្ធនាគារព្រៃស កន្លែងដែល ដាវិន បានទៅសួរសុខទុក្ខមិត្តភក្ដិម្នាក់ដែលគាត់បានជួបកាលពីឆ្នាំមុន ខណៈពេលកំពុងអនុវត្តទោសតាមការចោទប្រកាន់ពីបទឆបោកពីមុន។ ជាមួយនឹងសាច់ញាតិពីរនាក់ដែលគាត់បាននាំទៅជាមួយ លោក តាល់ ឆន បានចាប់ វ៉ន ដាវិន ជាប់នៅពេលដែលជននេះបានចេញពីពន្ធនាគារ រុញឡើងជិះម៉ូតូភ្លាមៗ រួចដឹកទៅប៉ុស្តិ៍នគរបាលទន្លេបាសាក់តែម្ដង។
លោក សុខ សំអ៊ុត នាយប៉ុសិ៍សង្កាត់បានបញ្ជាក់ពីការចាប់ខ្លួននេះ ហើយបានមានប្រសាសន៍ថា ដាវិន ត្រូវបានយកទៅឃុំខ្លួន ហើយបញ្ជូនទៅនគរបាលខណ្ឌដើម្បីធ្វើការសាកសួរ។ លោកបានមានប្រសាសន៍ថា “ម្ចាស់រថយន្តបានចាប់ខ្លួន ដាវិន រួចប្រគល់ទៅឲ្យអាជ្ញាធរកាលពីរសៀលម្សិលមិញ [ថ្ងៃច័ន្ទ]”។
លោក ហ៊ាង ថារ៉េត អធិការរងនគរបាលខណ្ឌចំការមន បានមានប្រសាសន៍ថា បន្ទាប់ពី ដាវិន ត្រូវបានសាកសួរ ជននេះនឹងត្រូវបញ្ជូនទៅសាលាដំបូងរាជធានីភ្នំពេញនៅថ្ងៃនេះ ដើម្បីប្រឈមនឹងការចោទប្រកាន់ពីបទឆបោក។
នៅពេលត្រូវបានទាក់ទងកាលពីម្សិលមិញ លោក សាវឿន ដែលជាមន្ត្រីពន្ធដារបានមានប្រសាសន៍ថា លោកបានកាត់កាលកូនប្រុសរបស់លោករយៈពេលជាង១០ឆ្នាំមកហើយ ដោយសារតែឥរិយាបថមិនល្អរបស់យុវជនរូបនេះ។
លោកបានមានប្រសាសន៍ថា “ខ្ញុំនឹងមិនអន្តរាគមន៍ឲ្យដោះលែងកូនប្រុសរបស់ខ្ញុំឡើយ ពីព្រោះខ្ញុំបានព្យាយាមអប់រំវាច្រើនលើកច្រើនសាមកហើយ តែវាមិនស្ដាប់ខ្ញុំជាឪពុកទាល់តែសោះ ដូច្នេះខ្ញុំសូមឲ្យតុលាការចាត់ការទៅតាមច្បាប់”៕ សារុន