29 C
Phnom Penh

រាជ​រដ្ឋាភិបាល​ណែនាំ​បង្ហាញ​គោល​នយោបាយ​កសិកម្ម​ថ្មី

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ ក្រសួង​កសិកម្ម​បានចេញ​សេចក្តី​ព្រាង​គោល​នយោបាយ​មួ ដើម្បី​ពង្រឹង​វិស័យ​កសិកម្ម ដោយ​អប់រំ​កសិករអំពី​របៀប ចូល​ដល់​ទី​ផ្សារ​ប្រសើរ​ឡើង និង​បង្កើន​ផលិត​ភាព​របស់​ខ្លួន ដោយ​ប្រើ​វិធី​ធ្វើ​កសិកម្ម​ប្រកប​ដោយ​ចីរភាព។

គោល​នយោបាយ​បង្កើត​ផលិត​ភាព​កសិកម្ម​នេះ ដែល​ព្រាងដោយ​មាន​កិច្ចសហការ​ជាមួយ USAID សំដៅ​ដោះ​ស្រាយ​ផលិត​ភាព​ក្នុង​គ្រួសារ​កសិករ​ដែល​មាន​ដី​តូចៗ ដែល​ជា​មធ្យម​ប្រហែល​ពីរ​ហិកតា តាម​រយៈ​ការ​ផ្សព្វផ្សាយ​ចំណេះ​ដឹង​តាម​កម្មវិធី​ទូរទស្សន៍​និង​វិទ្យុ គួបផ្សំ​ជាមួយ​ការ​បង្ហាត់​បង្ហាញ​ដល់​ទី​កន្លែង​ផង។

ទិសដៅ​របស់​គោល​នយោបាយ​នេះ គឺ​ត្រូវបង្កើន”ប្រសិទ្ធ​ភាព​និងប្រសិទ្ធផល​នៃ​ការ​ទទួល​បានចំណេះ​ដឹង​កសិកម្ម ព័ត៌មាន និង​បច្ចេក​វិជ្ជា​ថ្មី​របស់​កសិករនិង​សហគមន៍​កសិកម្ម ដើម្បី​បង្កើន​ផលិត​ភាព​កសិកម្ម ដោយ​ជំរុញ​ពិពិធ​កម្ម ពាណិជ្ជភាវូបនីយ​កម្ម និងការ​គ្រប់គ្រង​ធនធាន​ធម្មជាតិ​ប្រកប​ដោយ​ចីរភាព”។

យុទ្ធ​សាស្ត្រ​មួយ​នឹង​ត្រូវ​រៀបចំ​កម្មវិធី​និង​ធ្វើ​សកម្ម​ភាព​ក្នុង​ស្រុក​នីមួយៗ ក្នុង​កិច្ច​សហការ​ជាមួយ​អ្នក​ស្រាវជ្រាវ​កសិកម្ម អង្គការNGO ធនាគារ និង​វិស័យ​ឯកជនផងដែរ។

លោក សូរខាន់ រិទ្ធីគុណ អគ្គនាយក​នៃ​អគ្គនាយក​ដ្ឋាន​កសិកម្ម​នៅ​ក្រសួង​កសិកម្ម បាន​មាន​ប្រសាសន៍​ថា លោក​សង្ឃឹម​ថា គោលនយោបាយ​នេះ​នឹង​ជួយ​ពង្រឹង​កិច្ច​ប្រឹងប្រែង​របស់​អង្គការ​នានា​ដែល​ធ្វើ​ការ​ក្នុង​វិស័យ​កសិកម្ម​នេះ។

លោក​បាន​មាន​ប្រសាសន៍​ថា “សេវាកម្ម​បង្កើន​ផលិត​ភាព​កសិកម្ម ដែល​ផ្តល់​ដោយ​បណ្តា​ទីភ្នាក់ងារ​រដ្ឋាភិបាល​នៅ​មាន​កម្រិត ដោយសារ​ខ្វះ​ធនធាន​មនុស្ស​និង​សម្ភារ​កសិកម្ម​នៅ​គ្រប់​កម្រិត​ទាំងអស់ ការ​វិនិយោគ​តិចតួច​ក្នុង​ផ្នែក​កសិកម្ម និង​ការ​គ្មាន​បច្ចេក​វិទ្យា​គ្រប់គ្រាន់”។

ដោយ​មាន​ចំនួន​២៧,៥​ភាគរយ​នៃ​ផលិតផល​ក្នុង​ស្រុក​សរុប កសិកម្ម​ជា​ប្រភព​សំខាន់​នៃ​ចំណូល​ប្រមាណ​៨០​ភាគរយ​របស់ពល​រដ្ឋ​កម្ពុជា។ “យុទ្ធ​សាស្ត្រ​ចតុ​កោណ”របស់​រដ្ឋាភិបាល​សម្រាប់​ការ​អភិវឌ្ឍន៍​សេដ្ឋ​កិច្ច បញ្ចូល​កសិកម្ម​ជា​វិស័យ​មួយ​ចំណោម​វិស័យ​ចម្បង​បួន ដែល​ត្រូវ​ការ​ធ្វើ​ឲ្យ​ប្រសើរ​ឡើង រួម​ជាមួយ​ហេដ្ឋារចនា​សម្ព័ន្ធ ការ​អភិវឌ្ឍ​វិស័យ​ឯកជន និង​កម្លាំង​ពលកម្ម​ជំនាញ។

លោក ស្រី ចន្ធី អ្នក​វិភាគ​កសិកម្ម​ឯករាជ្យ បាន​មាន​ប្រសាសន៍​ថា គោលនយោបាយ​នេះ នឹង​មាន​ប្រយោជន៍​ដល់​កសិករ ដោយ​ផ្តល់​ឲ្យ​កសិករ​នូវ​ការ​បណ្តុះ​បណ្តាល​អនុវត្ត​ផ្ទាល់​នៅ​នឹង​កន្លែង។ ប៉ុន្តែ លោក​បាន​មាន​ប្រសាសន៍​ថា ការអនុវត្ត​គឺ​ជា​ការ​សំខាន់។

អ្នក​វិភាគ​កសិកម្ម​ឯករាជ្យ​រូប​នេះបាន​ឲ្យ​ដឹង​ថា “ជោគជ័យ ឬ បរាជ័យនៃ​គោល​នយោបាយ​នេះ ផ្អែក​លើ​ធនធាន​មនុស្ស ដៃគូ​ស្ថាប័ន និង​លទ្ធភាព​ហិរញ្ញវត្ថុ ពីព្រោះបន្ទាប់ពី​យើង​មាន​គោល​នយោបាយ​នេះ យើង​ត្រូវ​មាន​កម្មវិធី​ជា​ច្រើន​ដើម្បី​អនុវត្ត”។​​ “ជា​ឧទាហរណ៍ ផ្នែក​សាធារណៈ​បង្កើត​គោល​នយោបាយ​និង​បទប្បញ្ញត្តិ ដើម្បី​គ្រប់គ្រង​ការ​អនុវត្ត​ទាំង​នេះ រីឯ​វិស័យ​ឯកជន​ផ្តល់​សេវា​នានា។ វិស័យ​ទាំង​ពីរ ត្រូវ​ធ្វើ​កិច្ចការ​ផ្សេង​គ្នា”៕​ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស