32 C
Phnom Penh

ការ​ជួញដូរ​ស្ត្រីខ្មែរទៅរៀបការ​ជាមួយ​បុរសចិន​កើន​ឡើង​

ដោយ ឌឹ ខេមបូឌា ដេលី

បទវិភាគ

បន្ទាប់ពី​​​បង្ខាំង​​​ទុក​​​រំលោភ​​​រយៈ​​​ពេល​​​ប្រាំ​​​បី​​​ខែ​​​ និង​​​បង្ខំ​​​ឲ្យ​​​រំលូត​​​កូន​​​ពីរ​​​លើក​​​ រដ្ឋា ដែល​​​ពេលនោះ​​​​មាន​អាយុ​​​១៧​​​ឆ្នាំ បាន​​​និយាយ​​​ថា នាង​​​បាន​​​រត់​​​ចេញ​​​ពី​​​ផ្ទះ​​​បុរស​​​ជន​​​ជាតិ​​​ចិន​​​ ដែល​​​​​គេ​​​បាន​លក់​​​នាង​​​ទៅ​​​ឲ្យនោះ​​​ ហើយ​​​នាង​​​បានធ្វើដំណើរទៅស្ថានកុង​​​ស៊ុល​​​កម្ពុជា​​​នៅ​​​ក្នុង​​​ខេត្ត​​​គ័ង​​​ចូវ​​​។

រដ្ឋា ដែល​​​ពេល​​​នេះ​​​អាយុ​​​១៨​​​ឆ្នាំ​​​ បាន​​​និយាយ​​​នៅ​​​ខាង​​​ក្រៅ​​​សន្និសីទ​​​កាសែត​​​កាល​​​ពី​​​ម្សិល​មិញ ដែល​​​អង្គការ​​​សិទ្ធិ​​​មនុស្ស​​​អាដ​​​ហុក​​​​​​ បាន​​ផ្សព្វ​​​ផ្សាយ​​​របាយ​​​ការណ៍​​​រយៈ​​​ពេល​​​ប្រាំ​​​មួយ​​​ខែ​ស្តីពី​​​ស្ត្រី​​​ខ្មែរ​​​ដែល​​​ត្រូវ​​​គេ​​​រំលោភបំពាន​​​ក្នុង​​​ប្រទេស​​​ចិន​​​ថា “​​​មន្ត្រី​​​ខ្មែរ​​​ម្នាក់​​​នៅ​​​ទី​​​នោះ​​​បាន​​​ប្រាប់​​​ខ្ញុំ​​​ឲ្យ​​​ត្រឡប់​​​ទៅ​​​ផ្ទះ​​​ប្តី​​​ដែល​​​រំលោភ​​​ខ្ញុំនោះ ដើម្បី​​​ទៅ​​​យក​​​លិខិត​​​ឆ្លង​​​ដែន​​​របស់​​​ខ្ញុំ ប៉ុន្តែ ខ្ញុំ​​​ខ្លាច​​​ត្រូវ​​​គេ​​​រំលោភ​​​ម្តងទៀត ដូច្នេះ​​​ខ្ញុំ​​​មិន​​​ព្រម​​​ត្រឡប់​​​ទៅទេ”​​​។ ​​​រដ្ឋា បាន​​​និយាយ​​​ថា “បន្ទាប់​​​មក​​​មន្ត្រី​​​រូប​​​នោះ​​​បាន​​​​ទូរស័ព្ទទៅ​​​មេខ្យល់​​​ដែល​​​បាន​​​លក់​​​ខ្ញុំ ហើយ​​​​​​ភ្លាម​​​ៗ​​​នោះ​​​ខ្ញុ​​​ំ​​​ត្រូវ​​​បាន​គេ​​​បង្ខាំងទុក​​​នៅ​​​ផ្ទះ​​​មេខ្យល់រូប​​​នោះ”។

តួលេខ​​​ដែល​​​បាន​​​ចេញ ផ្សាយ​​​ដោយ​​​អង្គការ​​​អាដ​​​ហុក​​​កាល​​​ពីម្សិលមិញ បង្ហាញ​​​ថា នៅ​​​ក្នុង​​​រយៈពេល​​​ប្រាំ​​​មួយ​​​ខែ​​​ដំបូង​នៃឆ្នាំ​​​២០១៤​​​ ស្ត្រី​​​ខ្មែរ​​​យ៉ាង​​​តិច​​​២៩​​​នាក់​​​ត្រូវ​​​បាន​​​បញ្ជូន​​​ទៅ​​​ប្រទេស​​​ចិន​​​ ដោយ​​​សន្យា​​​ផ្តល់ការ​ងារ​មាន​ប្រាក់ខែខ្ពស់ ឬ​​​រៀបការ​​​ជាមួយ​​​ប្តី​​​ជាអ្នក​​​មាន​​​​​​ ហើយ​​​ទីបំផុត​បាន​​​​រៀប​​​ការ​ជាមួយបុរសដែល​​រំលោភបំពាន ឬ​​​ត្រូវ​​​បាន​​​លក់​​​ឲ្យ​​ធ្វើពេស្យាចារ។ អង្គការ​​​សិទ្ធិ​​​មនុស្ស​​​ក្នុង​​​ស្រុក​​​នេះ​​​ទទួល​​​បាន​​​តែ​សេចក្តីរាយការណ៍​​​ដូច​​​នេះ​​​តែ​​​ប្រាំ​​​បី​​​ករណីប៉ុណ្ណោះ​​​ក្នុង​​​ឆ្នាំ​​​២០១៣​​​។

លោកស្រី ចាន់​​​ សុគន្ធា ប្រធាន​​​កម្ម​​​វិធី​​​ស្ត្រី​​​ និង​​​​​​កុមារ​​​នៅ​​​អង្គការ​​​អាដ​​​ហុក​​​​​​បាន​​​មាន​​​ប្រសា​សន៍​​​ថា អ្វីដែលគួរ​ឲ្យ​ភ្ញាក់ផ្អើលបំផុត​នោះគឺថា អ្នក​​​ការ​​​ទូត​​​កម្ពុជា​​​ក្នុង​​​ប្រទេស​​​ចិន​​​បាន​​​បដិសេធ​​​មិន​​​ព្រម​​​ជួយ​​​ពល​​​រដ្ឋ​​​របស់​​​ខ្លួន​​​ឡើយ​​​។

លោក​​​ស្រី សុគន្ធា បាន​​​មាន​​​ប្រសាសន៍​​​ថា “មន្ត្រី​​​នៅ​​​ស្ថានកុង​​​ស៊ុល​​​កម្ពុជា និង​​​ស្ថាន​​​ទូត​​​មិន​​​បាន​​​យក​​​​​​ចិត្ត​​​ទុក​​​ដាក់​​​ដោះ​​​ស្រាយ​​​បញ្ហា​​​ទាំង​​​នោះ​​​ឡើយ​​​ ផ្ទុយ​​​ទៅ​​​វិញ​​​បាន​​​បណ្ដោយ​​​ឲ្យ​​​​​​ជន​​​រង​​​គ្រោះ​​​ឈរនៅ​​​មុខ​​​ស្ថាន​​​ទូត​​​ក្នុង​​​អាកាស​​​ធាតុ​​​ត្រជាក់​​​ ដោយ​​​ត្រូវ​​​មូស​​​ខាំ​​​ និង​​​គ្មាន​​​ប្រាក់​​​ទិញ​​​អាហារ​​​បរិភោគ​​​ទៀតផង”។

លោក​​​ស្រី សុគន្ធា បាន​​​បន្ថែម​​​ថា ស្ត្រី​​​ដែលត្រូវ​​​បាន​​​ជួញ​​​ដូរ​​​និង​​​រំលោភ​​​បំពាន​​​ ជារឿយៗ​​​ស្ថិត​​​នៅ​​​ជិត​​ស្ថាន​​​កុង​​​ស៊ុល​​​ ឬ​​​ស្ថាន​​​ទូត​​​ដោយ​សារ​​ខ្លាច​​​​​នគរ​​​បាល​​​ចាប់​​​ខ្លួន​​​ ព្រោះ​​​មិន​​​មាន​​​លិខិត​​​ឆ្លង​​​ដែន​​​ ឬ​​​លិខិត​​​ស្នាម​​​ផ្សេង​​​ៗ។ ដូច​​​គ្នា​​​នេះ​​​ដែរ​​​ ដោយ​​​ស្ត្រី​​​ភាគ​​​ច្រើន​​​ចេះ​និយាយ​​​ភាសា​​​ចិន​​បន្តិចបន្តួច​​​ ឬ​​​មិន​​​ចេះ​​​សោះ​​​​​​ធ្វើ​​​ឲ្យ​​​ពួក​​​គេ​​​មិន​​​អាច​​​ទំនាក់​​​ទំនង​​​ជា​​​មួយ​​​អ្នក​​​ដទៃ​​​បាន​​​។

​​​លោក​​​ស្រី លឹម មុនី ជា​​​អនុ​​​ប្រធាន​​​របស់​លោកស្រី​ សុគន្ធា បាន​​​មាន​​​ប្រសាសន៍​​​ថា​​​ មន្ត្រី​​​ខ្មែរ​​​នៅ​​​ប្រទេស​​​ចិន​​​បាន​​​យក​​​កម្រៃ​​​ច្រើន​ពី​​​មេ​​​ខ្យល់​​​ដែល​​​តាមច្បាប់តម្រូវ​​​ឲ្យ​មាន​ឯកសាររៀប​ការ​សម្រាប់​កូន​ក្រមុំ​ម្នាក់ៗ​ និង​​បកប្រែ​ពី​​​ភាសា​​​ខ្មែរ​​​ទៅ​ជា​​ភាសា​​​ចិន​​​។

លោក​​​ស្រី មុនី បាន​​​មាន​​​ប្រសាសន៍​​​ថា “វា​​​ហាក់​​​ដូច​​​ជា​​​មន្ត្រី​​​នៅ​​​ស្ថាន​​​កុង​​​ស៊ុល និង​​​ស្ថាន​​​ទូត​​​មាន​​​ទំនាក់​​​ទំនង​​​ល្អ​​​ជាមួយ​​​មេខ្យល់​​​អ៊ីចឹង​​​…មន្ត្រី​​​ទាំង​​​នោះ​​​ជួយ​​​បក​​​ប្រែ​​​ឯកសារ​​​ឲ្យ​​​មេខ្យល់​​​ដើម្បី​​​យក​​​លិខិតនោះទៅ​​​ចុះ​​​ឈ្មោះ​​​រៀប​​​អាពាហ៍ពិពាហ៍”។

នៅ​​​ពេល​​​ត្រូវ​​​បាន​​​ទាក់​​​ទង​​​កាល​​​ពី​​​ម្សិលមិញ លោក កុយ គួង អ្នក​​​នាំ​​​ពាក្យ​​​ក្រសួង​​​ការបរទេស​​​បាន​​​មាន​​​ប្រសាសន៍​​​ថា ទន្ទឹម​​​នឹង​​​នោះ​​​ដែរ “យើង​​​មិន​​​បណ្ដោយ​​​ឲ្យ​​​ប្រជា​​​ពល​​​រដ្ឋ​​​របស់​​​យើង​​​រង​​​គ្រោះ​​​ដោយ​​​គ្មាន​​​ការ​​​ជួយ​​​ឡើយ​​​” ស្ត្រី​​​ខ្មែរ​​​ដែល​​​ត្រូវ​​​បាន​​​ជួញដូរ​​​មួយ​​​ចំនួន​​​ ដែល​​​មិន​​​បាន​​​រាយការណ៍​​​ទៅ​​​ស្ថាន​​​កុង​​​ស៊ុល​​​ឲ្យ​​​បាន​​​ត្រឹម​​​ត្រូវ​​​ ប្រហែល​​​ជា​​​ត្រូវ​​​បាន​​​ច្រាន​​​ចោល​​​។

លោក កុយ គួង​​​ បាន​​​មាន​​​ប្រសាសន៍​​​ថា “ប្រសិន​​​បើ​​​គាត់​​​ [ ស្ត្រី​​​ដែល​​​ត្រូវ​​​បាន​​​ជួញដូរ​​​]​​​​​​​​​​​​​​​​​​​​ ទៅ​​​កាន់​​​ខេត្ត​​​ខុស ជួន​​​កាល​​​គាត់​​​​​ត្រូវ​​​បញ្ជូន​​​ទៅ​​​​​​ស្ថាន​​​ទូត​​​ [ ក្នុង​​​ទី​​​ក្រុង​​​ប៉េកាំង​​​ ] ឬ​​​ត្រូវ​​​បញ្ជូនបន្ត​​​​ទៅ​​​អគ្គ​​​កុងស៊ុល​​​ ក្នុង​​​ខេត្ត​​​ដែលនាង​​​រស់​​​នៅ​​​ពី​​​ព្រោះ​​​វា​​​អាច​​​ជា​​​បញ្ហា​​​ផ្នែក​​​រដ្ឋបាល​​​”។

អ្នក​​​នាំ​​​ពាក្យ​​​ក្រសួង​​​ការ​​​បរទេស​​​រូប​​​នេះ ក៏​​​បាន​​​លើក​​​ឡើង​​​ផង​​​ដែរ​​​ថា លោក​​​បាន​​​ស្នើ​​​ឲ្យ​​​ក្រសួង​​​ការបរទេស​​​ចិន​​​ណែ​​​នាំ​​​ស្ថាន​​​ទូត​​​របស់​​​ខ្លួន​​​ក្នុង​​​ប្រទេស​​​ឡាវ វៀតណាម និង​​​ថៃ ដែល​​​ជា​​ផ្លូវ​ចេញ​សម្រាប់​​​កូន​​​ក្រមុំ​​​ដែល​​​ត្រូវ​​​បាន​​​ជួញ​​​ដូរនោះ ឈប់​​​ផ្តល់​​​ទិដ្ឋាការ​​​ដល់​​​ស្ត្រី​​​ខ្មែរ​​​​​​​នៅ​លីវ។

នៅ​​​សន្និសីទ​​​កាសែត​​​កាល​​​ពី​​​ម្សិល​​​មិញ សម្ផស្ស អាយុ​​​៣៣​​​ឆ្នាំ ជា​​​ស្ត្រី​​​ដែល​​​ត្រូវ​​​បាន​​​ធ្វើ​​​មាតុ​​​ភូមិ​​​និវត្ត​​​ម្នាក់​​​ទៀត​​​ដែល​​​បាន​​​ទៅ​​​ប្រទេស​​​ចិន​​​ជាមួយនឹងការ​សន្យា​​​ផ្តល់​​​ការ​​​ងារ​​​ដែល​​​មាន​​​ប្រាក់​​​ខែ​​​ខ្ពស់​​​ក្នុង​​​រោង​​​ចក្រ​​​កាត់​​​ដេរ​​​​​​នោះបាន​​​និយាយ​​​ថា អ្នកស្រី​​​ត្រូវ​​​បាន​​​គេ​​​លក់​​​ឲ្យ​​​បុរស​​​ម្នាក់​​​ផ្ទុយ​​​​​​នឹង​​​ឆន្ទៈ​​​របស់​​​ខ្លួន។

អ្នកស្រីបាននិយាយថា អ្នកស្រី​​បាន​រត់​​​គេច​​​ខ្លួន​​​រួច ហើយ​​​បាន​​​​​​ទៅ​​​លាក់​​​ខ្លួន​​​ក្នុង​​​ព្រៃ​​​មុន​​​ពេល​​​ទាក់​​​ទង​​​អង្គការ​​​អាដ​​​ហុក​​​។ ប៉ុន្តែ បើ​​​ទោះ​​​ជា​​​ត្រឡប់​​​មក​​​ដល់ផ្ទះ​​​វិញ​​​ហើយ​​​ក៏​​​ដោយ​​​ ក៏​​​អ្នក​​​ស្រី​​​មិន​​​ទាន់​​​បាត់​​​ព្រួយ​​​បារម្ភ​​​ដែរ​​​។ អ្នកស្រី​​​បាន​​​និយាយ​​​ថា “អ្វី​​​ដែល​​​ខ្ញុំ​​​ព្រួយ​​​បារម្ភ​​​បំផុត​​​នោះ​​​គឺ​​​ថា ប្អូន​​​ស្រី​​​របស់​​​ខ្ញុំ​​​ដែល​​​មាន​​​​​​អាយុ​​​ទើប​​​តែ​​​១៨​​​ឆ្នាំ​ស្ថិត​​​ក្នុង​​​ប្រទេស​​​ចិន​​​នៅ​​​ឡើយ​​​ ដែល​​​នៅ​​​ទី​​​នោះ​​​នាង​​​ត្រូវ​​​ប្តី​​​របស់​​​នាង​​​រំលោភ​​​បំពាន៕សារុន​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស