លោក ប៉ា សុជាតិវង្ស អភិបាលក្រុងភ្នំពេញ និង លោក ជួន សុវណ្ណ ស្នងការនគរបាលរាជធានី បានរៀបចំពិធីមួយនៅពហុកីឡាដ្ឋានជាតិកាលពីម្សិលមិញ ដើម្បីចែកលុយប្រហែល២៥ដុល្លារដល់មន្ត្រីនគរបាលក្រុងម្នាក់ៗ ចំពោះការថែរក្សាសណ្តាប់ធ្នាប់នៅឆ្នាំនេះ បន្ទាប់ពីការបោះឆ្នោតជាតិដ៏ចម្រូងចម្រាសកាលពីខែកក្កដាឆ្នាំមុននោះ។
នៅម៉ោងប្រហែល៨ព្រឹក ប៉ូលិសប្រហែល២.០០០នាក់បានតម្រង់ជួរក្នុងពហុកីឡាដ្ឋាន និងឈរតាមអង្គភាពរបស់ខ្លួនជាមួយរថយន្តជាច្រើនដែលបានបិទផ្លូវនៅទីលានប្រជាធិបតេយ្យ ចាប់តាំងពីរដ្ឋាភិបាលបានបង្ក្រាបការតវ៉ាប្រឆាំងនៅខែមករាមកនេះ។
មុនពេលចែកប្រាក់ លោក សុវណ្ណ ដែលបានបញ្ជាផ្ទាល់លើការបង្ក្រាបការតវ៉ាថ្មីៗនេះ បានថ្លែងសរសើរនគរបាលចំពោះការធានាបាននូវសណ្តាប់ធ្នាប់អំឡុងពេលមួយឆ្នាំកន្លងមក។
“យើងបានឃើញសកម្មភាពគណបក្សសង្គ្រោះជាតិ សង្គមស៊ីវិល និងសហជីពមួយចំនួនដែលមាននិន្នាការប្រឆាំង ញុះញង់ និងបានទាក់ទាញការចាប់អារម្មណ៍ពីសមាជិកនិងបុគ្គលិករបស់ខ្លួន ហើយនិងពលរដ្ឋ ប្រមូលផ្តុំគ្នានិងធ្វើបាតុកម្មជាង៤៤៥លើក បាតុកម្មខ្លះបានបង្កឲ្យមានអំពើហិង្សាទៀតផង”។ លោកស្នងការបានមានប្រសាសន៍ថា មានកូដកម្មកម្មករ២៨៩លើកក្នុងរយៈពេលដូចគ្នានេះ។
លោក សុវណ្ណ មានប្រសាសន៍ថា ការតវ៉ា៨៦លើក បានបង្កឡើងដោយគណបក្សសង្គ្រោះជាតិ ហើយថា ការតវ៉ាមួយរបស់កម្មករនៅដើមឆ្នាំនេះ ដែលរដ្ឋាភិបាលបានបង្ក្រាបយ៉ាងព្រៃផ្សៃ និងការបញ្ចប់បាតុកម្មមហាជនជាច្រើនខែនោះ បានបណ្តាលឲ្យខូចខាតជាង៧២លានដុល្លារ។
កាលពីខែមីនា គណកម្មាធិការមួយរបស់រដ្ឋាភិបាលទទួលបន្ទុកវាយតម្លៃការខូចខាតពីការតវ៉ាទាំងនោះ បានកំណត់ការខូចខាតប្រហែល២៧៥.000ដុល្លារ។
លោក សុវណ្ណ បានមានប្រសាសន៍ថា “កាលពីថ្ងៃទី២និងទី៣ខែកមរា គណបក្សសង្គ្រោះជាតិ រួមទាំងសហជីពផង បានញុះញង់ និងលើកទឹកចិត្តឲ្យធ្វើបាតុកម្ម ដោយផ្តល់ឧបករណ៍និងប្រាក់ ដើម្បីទាមទារប្រាក់ខែគោល១៦០ដុល្លារក្នុងមួយខែ ហើយអ្នកតវ៉ាខ្លះបានបង្កភាពអនាធិបតេយ្យ បំផ្លាញនិងដុតទ្រព្យសម្បត្តិឯកជននិងសាធារណៈ”។
អំឡុងការបង្ក្រាបកូដកម្មនៅផ្លូវវេងស្រេង ខណ្ឌពោធិ៍សែនជ័យ ដែលមិនដឹកនាំដោយគណបក្សសង្គ្រោះជាតិ ប៉ុន្តែជាផ្នែកមួយនៃកូដកម្មរបស់កម្មករកាត់ដេរទូទាំងប្រទេស ដែលលើកទឹកចិត្តដោយគណបក្សនេះ កម្លាំងកងរាជអាវុធហត្ថកាន់កាំភ្លើងអាកា-៤៧បានបាញ់ស្លាប់កម្មករយ៉ាងហោចណាស់ប្រាំនាក់។
នៅពេលនោះ រដ្ឋាភិបាលបានវាយបណ្តេញយ៉ាងហិង្សានូវបាតុកម្មរយៈពេលពីរសប្តាហ៍របស់គណបក្សសង្គ្រោះជាតិ នៅទីលានប្រជាធិបតេយ្យ និងបានបិទទីលាននោះ ហើយព័ទ្ធលួសបន្លានិងនគរបាលប្រដាប់អាវុធ។
ការបិទទីលាននេះបាននាំឲ្យមានការតវ៉ាតូចៗជានិមត្តរូបជាច្រើនខែរបស់គណបក្សសង្គ្រោះជាតិ ដើម្បីចូលទីលាននោះ ដែលពេលនោះសន្តិសុខខណ្ឌបានវាយសំពងអ្នកតវ៉ាយ៉ាងឃោរឃៅ រហូតដល់មានអ្នកតវ៉ាវាយបកវិញយ៉ាងចាស់ដៃកាលពីថ្ងៃទី១៥ខែកក្កដា។
ស្នងការនគរបាលក្រុងរូបនេះបានពន្យល់ថា “គណបក្សសង្គ្រោះជាតិ បានធ្វើបាតុកម្មដោយខុសច្បាប់ ហើយក្រុមអនាធិបតេយ្យពពាក់ពពួនចូលទីលានប្រជាធិបតេយ្យ ក្រោមពាក្យស្លោកថា ‘រំដោះទីលានប្រជាធិបតេយ្យ’ ដោយធ្វើការវាយតប់យ៉ាងហិង្សាលើកម្លាំងសន្តិសុខខណ្ឌដូនពេញ”។
នគរបាលឈរជើងនៅឯទីលានប្រជាធិបតេយ្យនោះ បានចាប់ខ្លួនសមាជិកសភាគណបក្សសង្គ្រោះជាតិប្រាំពីរនាក់ដែលដឹកនាំការតវ៉ា និងមន្ត្រីបក្សជាន់ខ្ពស់ម្នាក់។
លោក ប៉ា សុជាតិវង្ស បានប្រាប់ក្រុមមន្ត្រីកាលពីម្សិលមិញថា “ជាការឆ្លើយតបទៅនឹងសកម្មភាពអនាធិបតេយ្យ អាជ្ញាធរបានអនុវត្តតួនាទីរបស់ខ្លួនយ៉ាងត្រឹមត្រូវ”។ មានិត