33 C
Phnom Penh

លោក ហ៊ុន សែន ថ្លែង​កោត​សរសើរ​ពីការ​រីក​ចម្រើន​នៅ​​ក្នុង​​រាជ​ធានី​ភ្នំពេញ​ អំឡុង​​ពិធី​សម្ពោធ​ស្ពាន​អាកាស​ស្ទឹង​មានជ័យ

ដោយ ឌឹ ខេមបូឌា ដេលី

បទវិភាគ

លោក​នាយ​ក​រដ្ឋមន្ត្រី ហ៊ុន សែន បាន​ឆ្លៀតយក​ឱកាស​​នៃ​ពិធីសម្ពោធ​ដាក់​ឲ្យ​ប្រើ​ប្រាស់​ស្ពាន​អាកាស​ស្ទឹង​មាន​​ជ័យ ក្នុង​រាជធានីភ្នំពេញ​ កាលពី​ព្រឹក​ម្សិលមិញ ដើម្បី​កោត​សរសើរ​​រដ្ឋាភិបាល​របស់​លោក​ក្នុង​ការ​​ប្រឹង​ប្រែងអភិវឌ្ឍ​រាជ​ធានី​ភ្នំពេញ និង​ព្រមានប្រជា​ពល​រដ្ឋក្រី​ក្រ​កុំឲ្យ​សង់​លំនៅដ្ឋាន​ក្រោម​ស្ពាន​ថ្មី ដែល​ចំណាយ​​ទឹក​ប្រាក់​សាងសង់​អស់​ចំនួន​១៩​លាន​ដុល្លារ​នេះ​។front-photo

លោក ហ៊ុន សែន ក៏បាន​ឆ្លៀត​យក​ឱកាស​នេះ​ដើម្បី​រំឭក​ដាស់​តឿន​ដល់​លោក បា៉ សុជាតិ​វង្ស អភិបាល​រាជ​ធានី​ភ្នំពេញ ​ផង​ដែរ អំពី​​អាណត្តិ​​មាន​កំណត់​របស់​លោក​ក្នុង​មុខ​តំណែង​ជា​អភិបាល​រាជ​​ធានី​ ហើយ​បាន​​ប្រាប់​​ឲ្យ​លោក​ដោះ​ស្រាយ​បញ្ហា​កក​ស្ទះ​ចរាចរណ៍​តាម​ផ្លូវ​ និង​ខិត​ខំ​ឲ្យ​​បាន​​​​​ខ្លាំង​​​​​ក្លា​​​ថែម​​​ទៀត​​​ក្នុងការ​បង្កើត​សេវា​ដឹកជញ្ជូន​​សាធារណៈ​ មុន​ពេល​លោក​ចូល​និវត្ត។

ថ្លែង​មុន​ពិធី​កាត់​ខ្សែបូ​ លោក ហ៊ុន សែន បាន​ប្រៀប​ធៀប​ការ​កក​ស្ទះ​ចរាចរណ៍​ខ្លាំង​នៅ​ក្នុង​រាជ​ធានីភ្នំពេញ​ នាពេល​បច្ចុប្បន្ន​ ទៅ​នឹង​ស្ថានភាព​ដែល​លោក​​បានជួប​ប្រទះ នៅ​ពេល​ត្រឡប់​ចូល​ភ្នំពេញ​វិញ​នៅ​ក្នុង​ឆ្នាំ​១៩៧៩ជាមួយ​កង​ទ័ព​​វៀតណាម​ ដែល​បាន​ផ្ដួល​រំលំ​ខ្មែរ​ក្រហម​។

លោក​មាន​ប្រសាសន៍​ថា​ ” នៅ​ពេល​យើង​ចាប់​ផ្ដើម​កសាង​ភ្នំពេញ​ដំបូង​ ក្រោយ​ពី​យើង​ត្រូវបាន​រំដោះ​ពី​របប​ប្រល័យពូជ​សាសន៍​ និង​ស្ថិត​ក្នុង​ស្ថានភាព​ផ្ទះ​គ្មាន​មនុស្ស​នៅ ផ្លូវ​គ្មាន​មនុស្ស​ដើរ​ យើង​មិន​ដែល​ឮពាក្យ​ថា គ្រោះ​ថ្នាក់​ចរាចរណ៍​សម្លាប់​មនុស្ស​ទេ។ ចង់​មក​នៅ​លើ​ផ្លូវ​នេះ​មួយ​អាទិត្យ​ក៏គ្មាន​ប៉ះពាល់​អ្នក​ណាគេ​ដែរ​ ពីព្រោះ​គ្មាន​ឡាន​ធ្វើ​ដំណើរ​តាម​ផ្លូវ​ទេ​នៅ​ពេល​នោះ​”។

លោក ហ៊ុន សែន បាន​ពន្យល់​ថា ការ​កក​ស្ទះ​ចរាចរណ៍​ជាញឹក​ញាប់​នាពេល​បច្ចុប្បន្ន​ ដែល​លោក​មាន​ប្រសាសន៍​ថា ស្ពាន​អាកាស​ស្ទឹងមានជ័យថ្មី​នេះ​អាច​ជួយ​បញ្ចៀស​បាន​នោះ គឺចៀ​ស​មិន​ផុតទេ​​ ដោយ​សារ​តែ​មាន​ខុនដូ និង​អាផាតមិន​ថ្មីៗ​សាង​សង់​​​​យ៉ាង​ឆាប់រហ័ស​ទូទាំង​រាជធានី​។

ប៉ុន្តែ​​លោក​នាយក​រដ្ឋមន្ត្រី​ក៏​បាន​បញ្ជា​ឲ្យ​លោក បា៉ សុជាតិវង្ស កសាង​សួន​ច្បារ​នៅ​ចំណុចក្រោម​ស្ពាន​អាកាស​ ដើម្បី​ផ្ដល់​ទេសភាព​ពណ៌បៃតង​សម្រាប់​​​ប្រជាពល​រដ្ឋ​​ដែ​ល​មាន​​ចំនួន​កើន​ឡើង​យ៉ាង​ឆាប់​រហ័ស​នៅ​ក្នុង​រាជធានី ដោយ​ស្នើ​ឲ្យ​អភិបាល​រូប​នេះ​ធានា​​​ថា ប្រជា​ពល​រដ្ឋ​មិន​តាំង​លំនៅ​លើ​សួន ហើយ​បន្ទាប់​មក​អះអាង​ថា ដី​របស់​ពួកគេ​ត្រូវ​បាន​គេ​ចាប់​យក​។

លោក​មាន​ប្រសាសន៍​ថា ” តែ​សូម​អាណិត​មេត្តា​ប៉ុណ្ណេះ កុំយក​ក្រោម​ស្ពាន​ធ្វើ​ជា​ផ្ទះ​ដាក់​ស្អី​ៗ​ រៀបចំបេតុង រៀបចំ​ការ៉ាឡា​សង​ខាង​ស្អីៗ នាំគ្នា​មក​នៅ​ក្រោម​ហ្នឹង រួច​ហើយ​ប្រើ​ទ្រឹស្ដី​ឈ្នះ​បាន​ដី​ចាញ់​បាន​លុយ រួច​ហើយ​ទៅ​ប្ដឹង​សហគមន៍​អឺរ៉ុប”។​

លោក​ថ្លែង​ថា អ្នក​ចូលរួម​ប្រមាណ​៣០០​នាក់​នៅ​ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​កាល​ពី​ម្សិលមិញ គួរ​តែដឹង​​ច្បាស់ថា បច្ចុប្បន្ន​គ្មាន​សហគមន៍​រស់​នៅ​ក្រោម​ស្ពាន​អាកាស​ទេ”។

លោក​បាន​បន្ត​ថា “​ យើង​មក​សម្ពោធ​ដាក់​ឲ្យ​ប្រើ​ប្រាស់​រួម​គ្នា ហើយ​ឃើញ​ហើយ​ថា គ្មាន​អ្នក​រស់​នៅ​ទីនេះ​ទេ​។ អ៊ីចឹង​ទេ​ ​ថតទុក​​កន្លែង​ហ្នឹង​ថ្ងៃ​ហ្នឹង​ នាំ​គ្នា​ថត​ទុក​ទៅ​​ ដើម្បី​ថ្ងៃ​ក្រោយ ពេល​ដែលមាន​ការ​តវ៉ា​ ​បញ្ចាំង​ឲ្យ​មើល​”។

លោក​ ហ៊ុន សែន ក៏បាន​​ត្អូញត្អែរដែរ​​ចំពោះ​សេវា​រថយន្ត​ក្រុង​ក្មេងខ្ចី​​នៅ​ក្នុង​រាជ​ធានី ដោយ​​ស្នើ​​ឲ្យ​លោក ប៉ា សុជាតិវង្ស ខិត​ខំ​ធ្វើការ​ឆាប់​រហ័ស​ដើម្បី​ពង្រីក​សេវា​នេះ​ ដែល​បច្ចុប្បន្ន​មាន​តែ​មួយ​ខ្សែ​គត់ ហើយ​គ្រោង​នឹង​បន្ថែម​ពីរ​ខ្សែ​ទៀត​នៅ​ខែ​ក្រោយ​។

សាលា​រាជធានី​បាន​ដំណើរ​ការសេវា​​រថយន្ត​ក្រុង​សាធារណៈ​ចាប់​តាំង​​ពី​ខែ​មេសា​មក​ម្លេ៉ះ ពោល​គឺ​ពីរ​ខែ​បន្ទាប់ពី​សេវា​នេះ​បាន​ចាប់​ផ្ដើម ​នៅ​ពេល​ក្រុម​ហ៊ុន​ចិន​ ដែល​ទទួល​បាន​កិច្ច​សន្យា​ធ្វើ​ប្រតិបត្តិការ​​​សេវា​​នេះ​បាន​ដក​ខ្លួន​ចេញ​ ក្រោយ​ពី​សំណើ​សុំ​មិនបង់ពន្ធ​សម្រាប់​សេវា​រថ​យន្តតាក់ស៊ីម៉ែត្រ​របស់​ខ្លួន ​ត្រូវ​បាន​បដិសេធ​។

លោក ហ៊ុន សែន បាន​មាន​ប្រសាសន៍​ថា “​ ក្រុម​ហ៊ុន​ឯកជន​មក​ដេញ​ថ្លៃ​។ នៅ​ពេល​ពួកគេ​ដេញ​ថ្លៃ​ឈ្នះ​ហើយ បែរ​ជា​មិន​ធ្វើ​។ គេ​​តែង​តែ​ទុក​ឲ្យ​យើង​មេម៉ាយ​ចោល​”។ លោក​បាន​សួរ​ទៅ​លោក​ ប៉ា សុជាតិវង្ស​ ​ថា ” ឯកឧត្តម​ បា៉ សុជាតិវង្ស ពេល​នេះអាយុ​ប៉ុន្មាន​ហើយ? អាយុ​៥៧​ហើយ សល់​យ៉ាង​ហោច​ណាស់​បី​ឆ្នាំ​ទៀត​ចូល​និវត្តហើយ ដូច្នេះ​ត្រូវ​តែ​ធ្វើ​ឲ្យ​គម្រោង​នេះ​ជោគ​ជ័យ”។

នៅពេល​ទាក់​ទង​តាម​ទូរស័ព្ទ​ លោក ប៉ា សុជាតិវង្ស បាន​មាន​ប្រសាសន៍​ថា លោក​នឹង​ធ្វើ​តាម​បំណង​ប្រាថ្នា​របស់​​លោក ហ៊ុន សែន ហើយ​បាន​ធ្វើការ​យ៉ាង​សកម្ម​ផ្នែក​​ផ្ដល់​សេវា​នេះ​ឲ្យ​ដល់​ប្រាំបី​ខ្សែ​នៅ​ឆ្នាំ​ក្រោយ​។ ប៉ុន្តែ​លោក​មាន​ប្រសាសន៍​ថា ទម្លាប់​របស់​ប្រជាពល​រដ្ឋ​ដែល​ចូលចិត្ត​ជិះម៉ូតូ​ផ្ទាល់​ខ្លួន រ៉ឺម៉កម៉ូតូកង់បី​ កំពុង​​រារាំង​ដល់​​កិច្ច​ប្រឹង​ប្រែង​របស់​សាលា​រាធានី​ដើម្បី​ពង្រីក​សេវា​រថយន្ត​ក្រុង​នេះ​។

លោក​មាន​ប្រសាសន៍ទៀត​ថា ” បញ្ហា​ទី១គឺ​ថា ប្រជា​ពល​រដ្ឋ​មិនទាន់​​សាុំ​នឹង​សេវា​នេះ។ ប៉ុន្តែ​ដោយ​សារ​តែ​ការ​កក​ស្ទះ​ចរាចរណ៍​ និង​ប្រជាពល​រដ្ឋ​ចេះ​តែ​កើត​ឡើង​ វា​ល្មម​ដល់​ពេល​សម្រាប់​យើង​មាន​រថយន្ត​ក្រុង​សាធារណៈ​បែប​នេះ​​ហើយ​”។ លោក​បាន​បន្ត​ថា អាជីវករ​នៅ​តាម​បណ្ដោយ​ផ្លូវ​ក៏​​កំពុង​បង្ក​ជា​​​បញ្ហា​​​ដែរ​។ លោក​ថ្លែង​ទៀត​ថា “យើង​ចាំបាច់​ត្រូវ​មាន​ចំណត​រថយន្ត​ក្រុង​ និង​កន្លែង​សម្រាប់​​ប្រជាពល​រដ្ឋ​អង្គុយ​រង់ចាំ​រថយន្ត​ក្រុង​។ ពេល​នេះ​វាពិបាក​ណាស់​”៕ សុខុម​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស