29 C
Phnom Penh

បេឡាជាតិ​របប​សន្ត​ិសុខសង្គមនឹង​ផ្តល់​សំណង​ដល់​គ្រួសារកម្មករ​រោងចក្រម្នាក់​ដែលស្លាប់ពេល​ធ្វើការ​

ដោយ ឌឹ ខេមបូឌា ដេលី

បទវិភាគ

មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​បាន​​​លើក​​​ឡើង​​​កាល​​​ពី​​​ម្សិលមិញ​​​ថា ខ្លួន​​​នឹង​​​ផ្តល់​​​សំណង​​​ដល់​​​ក្រុម​​​គ្រួសារ​​​បុរស​​​ម្នាក់​​​ដែល​​​បាន​​​ស្លាប់​​​ពេល​​​កំពុង​​​ធ្វើ​​​ការ​​​កាល​​ពី​​​ខែ​​​មុន​​​នៅ​​​រោង​​​ចក្រ​​​កាត់​​​ដេរ​​​មួយ​​​នៅ​​​ខេត្ត​​​កណ្តាល​​​ ដែល​​​ផលិត​​​សម្លៀក​​​បំពាក់​​​ឲ្យ​​​ក្រុមហ៊ុន H&M ។

មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​បាន​​​ឲ្យ​​​ដឹង​​​ថា ខ្លួន​​​បានដឹង​​​ថា លោក វ៉ន ស៊ី​​​ថា ដែល​​​បាន​​​ស្លាប់​​​កាល​​​ពី​​​ថ្ងៃ​​​ទី​​​១៩​​​ ខែ​​​កក្កដា ក្នុង​​​​អាយុ​​​៣៨​​​ឆ្នាំ​​​នៅ​​​បរិវេណ​​​រោង​​​ចក្រ​​​ New Archid បន្ទាប់​​​ពី​​​ធ្វើ​​​ការ​​​រយៈ​​​ពេល​​​១៦​​​ម៉ោងនោះ ​​​បាន​​​ស្លាប់​​​ដោយសារ​​​អស់​​​កម្លាំង​​​ខ្លាំង​​​។

ទោះ​​​ជា​​​យ៉ាង​​​ណា​​​ មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​មិន​​​អាច​​​បញ្ជាក់​​​ថា តើ​​​​​​មូល​​​និធិ​​​អ្វី​​នឹង​​​ត្រូវ​​​ផ្តល់​​​ទៅ​​​ឲ្យ​​​ប្រពន្ធ​​​ជា​​​ស្ត្រី​​​មេម៉ាយ​​​​​​របស់​​​លោក វ៉ន ស៊ីថា ឡើយ​​​ ហើយ​​​បាន​​​ឲ្យ​​​ដឹង​​​ថា ក្រៅ​​​ពី​​​​​​ប្រាក់​​​​​​សម្រាប់​​​រៀប​​​ចំ​​​ពិធី​​​បុណ្យ​​​សព​​​នោះ​​​ មូល​​​និធិ​​​នេះ​​​នឹង​​​មិនទាន់​​​មាន​​​ក្នុង​​​ពេល​​​​”ឆាប់​​​ៗ​​​ឡើយ”​​​​​​។

លោក ម៉េង ហុង អ្នក​​​នាំ​​​ពាក្យ​​​មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​បាន​​​មាន​​ប្រសាសន៍​​​ថា “រោង​​​ចក្រ​​​បាន​​​ដាក់​​​លក្ខខណ្ឌ​​​ឲ្យ​​​កម្មករ​​​ធ្វើ​​​ការ​​​ថែម​​​ម៉ោង​​​ហួស​​​ពី​​​កម្លាំង​​​របស់​​​​​​ខ្លួន​​​។ នោះជា​ការ​មិន​​​ត្រឹម​​​ត្រូវ​​​ទេ​​​”។

លោក​​​ ម៉េង ហុង​​​ បាន​​​បន្ថែម​​​ថា “និយាយ​​​អំពី​​​សំណង​​​ យើង​​​នឹង​​​ធ្វើ​​​តាម​​​ច្បាប់​​​ ប៉ុន្តែ យើង​​​មិន​​​អាច​​​ទទួលបាន​រហ័ស​​​​​​នោះ​​​ទេ​​​”។

មាត្រា​​​១៩​​​នៃ​​​ច្បាប់​​​ស្តី​​​ពី​​​បេឡា​​​របប​​​សន្តិសុខ​​​សង្គម​​​ចែង​​​ថា ក្នុង​​​ករណី​​​កម្មករ​​​​​​​​​របស់​​​​​​សមាជិក​​​​​​មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​ស្លាប់​​​នោះ​​​ មូល​​​និធិបេឡា​​​សង្គម​​​នឹង​​​ផ្ដល់​​​ប្រាក់​​​សម្រាប់​​​បុណ្យ​​​សព​​​និង​​​ប្រាក់​​​សោធននិវត្តន៍​​​សម្រាប់​​​អ្នក​​​នៅ​​​រស់​​​ដែល​​​ត្រូវ​​​ជា​​​សាច់​​​ញាតិ​​​ជន​​រងគ្រោះ។

លោក ម៉េង​​​ ហុង ដែល​​​ជា​​​អ្នក​​​នាំ​​​ពាក្យ​​​មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​បាន​​​មាន​​​ប្រសាសន៍​​​ថា លោក​​​មិន​​​ច្បាស់​​​ថា តើ​​​ប្រពន្ធ​​​ និង​​​កូន​​​ប្រុស​​​ពី​​រនាក់​​​អាយុ​​​៥​​​ឆ្នាំ និង​​​៨​​​ឆ្នាំ​​​របស់​​​លោក វ៉ន ស៊ីថា នឹង​​​ទទួល​​​បាន​​​ប្រាក់​​​សោធនិវត្តន៍​​​អ្វី​​​ឡើយ​​​។

លោក អឿន សំអុល អ្នក​​​គ្រប់​​​គ្រង​​​នៅ​​​រោង​​​ចក្រ New Archid​​​ បាន​​​មាន​​​ប្រសាសន៍​​​ថា  មូលនិធិ​​​បេឡា​​ជាតិ​​​របប​​​សន្តិសុខ​​​សង្គម និង​​​ច្បាប់​​​ការ​​​ងារ​​​លើក​​​ឡើង​​​ពី​​​ការ​​​​​​ផ្តល់​​​សំណង​​​ដល់​​​​​​ក្រុម​​​គ្រួសារ​​​ជន​​​រង​​​គ្រោះ។

លោក សំអុល​​​ បាន​​​មាន​​​ប្រសាសន៍​​​ថា “តាម​​​ច្បាប់​​​មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​តម្រូវ​​​ឲ្យ​​​បើក​​​ប្រាក់​​​៧០​​​ភាគ​​​រយ​​​​​​ក្នុង​​​ចំណោម​​​ប្រាក​​​់​​​ខែ​​​សរុប​​​របស់​​​លោក វ៉ន ស៊ី​​​ថា រហូត​​​ដល់​​​កូន​​​អាយុ​​​១៨​​​ឆ្នាំ​​​ ឬ​​​រហូត​​​ដល់​​​ស្ត្រី​​​ជា​​​ប្រពន្ធ​​​រៀប​​​ការ​​​ប្តី​​​ថ្មី​​​”។

លោក ម៉េង ហុង​​​ បាន​​​មាន​​​ប្រសាសន៍​​​ថា ​​​ទាក់​​​ទិន​​​នឹង​​​ការ​​​ស្លាប់​​​នេះ​​​ ​​​មន្ទី​​​រ​​​ការ​​​ងារ​​​ខេត្ត​​​កណ្តាល​​​គួរ​​​តែ​​​​​​សុើប​​​អង្កេត​​​លើ​​​លក្ខខណ្ឌ​​​ជុំ​​​វិញ​​​ការ​​​ថែម​​​ម៉ោង​​​របស់​​​កម្មករ​​​នៅ​​​រោង​​​ចក្រ New Archid ។

ទោះ​​​ជា​​​យ៉ាង​​​ណា​​​ លោក ផុល​​​ នាង ប្រធាន​​​មន្ទីរ​​​ការងារ​​​ខេត្ត​​​កណ្តាល​​​បាន​​​​​​មាន​​​ប្រសាសន៍​​​ថា ការ​​​សើុប​​​អង្កេត​​​អាច​​​ធ្វើ​​​ឡើង​​​ទាល់​​​តែ​​​​​​មាន​​​​​​ការ​​​ដាក់​​​ពាក្យ​​​បណ្តឹងផ្លូវ​​​ការ​​​តែ​​​ប៉ុណ្ណោះ ជា​​​ហេតុ​​​ការណ៍​​​​​​ដែល​​​លោក​​​គិត​​​ថា មិន​ទំនង​ដោយ​​​សារ​​​មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​បាន​​​យល់​​​ព្រម​​​ផ្ដល់​​​សំណង​​​នោះ​​​ហើយ​​​។

លោក ផុល នាង បាន​​​មាន​​​ប្រសាសន៍​​​ថា “នៅ​​​ពេល​​​ក្រុម​​​គ្រួសារ​​​លោក វ៉ន ស៊ីថា ទទួល​​​​​​បាន​​​ប្រាក់​​​ពី​​​​​​​​​​​​​​​​​​​​​ មូលនិធិ​​​បេឡា​​ជាតិ​​​របប​​​សន្តិសុខ​​​សង្គម​​​ ពួក​​​គេ​​​នឹង​​​មិន​​​​​​ដាក់​​​ពាក្យ​​​បណ្ដឹង​​​មក​​​យើង​​​ទេ​​​។ វា​​​ជា​​​កំហុស​​​របស់​​​ពួក​​​​​​គេ​​​ ពីព្រោះ​​​កម្មករ​​​ រោង​​​ចក្រ​​​ និង​​​ស​​​ហជីព​​​បាន​​​យល់​​​ព្រម​​​ [ធ្វើ​​​ការ​​​ថែម​​​ម៉ោង]​​​”៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស