34 C
Phnom Penh

ការនាំចេញ​កៅស៊ូ​កើន​ឡើង​ ប៉ុន្តែ​​ប្រាក់​ចំណូល​ធ្លាក់​ចុះ​

ដោយ ឌឹ ខេមបូឌា ដេលី

បទវិភាគ

ដោយ​ប្រឈម​​តម្លៃជ័រ​​កៅស៊ូ​ធ្លាក់​ចុះ​ ប្រាក់​ចំណូល​បាន​ពីការ​នាំ​ចេញ​ជ័រ​កៅស៊ូ​របស់​កម្ពុជា ​ក្នុង​រយៈ​ពេល​៦​ខែ​ដើម​ឆ្នាំ​នេះ ​បានធ្លាក់​ចុះ​តិច​តួច​​បើ​ប្រៀប​ធៀប​ទៅ​នឹង​រយៈ​ពេល​ដូច​គ្នា​កាលពី​ឆ្នាំ​មុន​ ទោះ​បីជា​ការ​នាំចេញ​​​កើន​ឡើង​ខ្លាំង​​ក្នុងរយៈ​ពេល​ដូច​គ្នា​ក្ដី។

យោងតាម​​តួលេខ​ថ្មីបំផុត​របស់​ក្រសួង​ពាណិជ្ជកម្ម​​បង្ហាញ​ថា ប្រទេស​កម្ពុជា ​បាន​​នាំ​ចេញ​​ជ័រ​កៅស៊ូ​ស្ងួត​ចំនួន​៤២.១៨៩​តោន​ពី​ខែ​មករា ដល់​ខែ​មិថុនា ​គឺ​កើន​​ឡើង​៤២ភាគរយ​បើ​ធៀប​ទៅ​នឹង​ការ​នាំចេញជ័រ​​កៅស៊ូ​អំឡុង​ឆមាស​ទី១​ដើម​​ឆ្នាំ​២០១៣​។ ទោះ​បី​​ជា​ការ​នាំ​ចេញ​កើនឡើង​​ក្តី ក៏​ប្រាក់​ចំណូល​​បាន​ពីការ​នាំ​ចេញ​ជ័រ​កៅស៊ូ​រយៈ​ពេល​កន្លះ​ឆ្នាំ​នេះ​ បាន​ធ្លាក់​ចុះ​ជិត​២ភាគរយ​ ពី​​៧៦,៥​លាន​ដុល្លារ​​មក​នៅ​ត្រឹម​​៧៥​លាន​ដុល្លារ​។

អ្នក​នាំពាក្យ​ក្រសួង​ពាណិជ្ជកម្ម​មិន​អាច​​ទាក់ទង​សុំការ​បំភ្លឺ​បាន​ទេ​។ លោក ម៉ក់ គឹមហុង ប្រធាន​សមាគម​អភិវឌ្ឍ​​ន៍​ជ័រកៅស៊ូ​​​​​កម្ពុជា បាន​បដិសេធ​មិន​ឆ្លើយ​បំភ្លឺ​ទេ។

ទោះ​ជាយ៉ាង​ណា កាលពី​ខែ​ឧសភា ​សមាគម​នេះ​បាន​លើក​ឡើង​ថា តម្លៃ​​សម្រាប់​​ការនាំ​ចេញ​ជ័រ​កៅស៊ូ​របស់​កម្ពុជា​ បាន​ធ្លាក់​ចុះ​ពី​២.២០០ដុល្លារ​មក​នៅ​ត្រឹម​​១.៥០០​ដុល្លារ​នៅ​ដើម​ឆ្នាំ​នេះ​​។ សមា​គម​នេះ​បាន​លើក​ឡើង​ថា​ការ​ធ្លាក់​ចុះ​តម្លៃ​នេះ​​បាន​បង្ខំ​ឲ្យ​​​យ៉ាង​ហោច​ណាស់​១ភាគ​៣ នៃ​រោង​ចក្រ​កែ​ច្នៃ​ជ័រ​កៅ​ស៊ូ​ក្នុង​ប្រទេស​កម្ពុជា ​ផ្អាក​​ប្រតិ​បត្តិ​ការ។

ទាំង​តម្លៃ​​​ជ័រ​កៅ​ស៊ូ​ក្នុង​ស្រុក និងក្នុង​ពិភពលោក​ បាន​​ធ្លាក់​ចុះ​ក្នុង​រយៈពេល​ពីរ​បី​ឆ្នាំ​ចុង​ក្រោយ​នេះដោយសារ​តែ​ទីផ្សារ​មាន​ការ​ផ្គត់​ផ្គង់​​ច្រើន​ហួស និង​តម្រូវ​ការ​ទាប​ពី​ប្រទេស​ចិន​ ដែល​ជា​ប្រទេស​នាំចូល​​ជ័រ​កៅស៊ូ​ឆៅ​​ដ៏ធំ​។

កាលពី​ឆ្នាំ​មុន លោក​​នាយក​រដ្ឋមន្ត្រី​ ហ៊ុន សែន បាន​កោត​សរសើរ​​ និង​ចាត់​ទុក​កៅស៊ូ​ថា ជា​ទំនិញ​​​​កសិកម្ម​នាំ​ចេញ​​ដ៏​សំខាន់​ទី២​របស់​កម្ពុជា ​ដែល​រក​​ចំណូល​បាន​ច្រើន ហើយ​កំណត់គោល​ដៅ​​បង្កើន​ផ្ទៃ​ដីកសិកម្ម​​ជិត​បី​ដង​​សម្រាប់​ដាំ​កៅ​ស៊ូ ពី​៣០០.០០០ហិកតា​ដល់​៨៤០.០០០ហិកតា​ក្នុង​រយៈពេល​៥ឆ្នាំ​។

លោក ហង់ ជួន ណារុ៉ន ដែល​ពេល​នោះ​ជា​រដ្ឋ​លេខាធិការ​ក្រសួង​សេដ្ឋកិច្ច​ និង​ហិរញ្ញវត្ថុ បានមាន​ប្រសាសន៍​ថា ការនាំចេញ​ជ័រ​កៅស៊ូ​ប្រចាំ​ឆ្នាំ​ នឹង​កើន​ដល់​១លាន​តោន​ ក្នុង​រយៈ​ពេល​មិនដល់​មួយ​ទសវត្សរ៍​​នោះ​ទេ​។
ប៉ុន្តែ​កាល​ពី​ម្សិលមិញ លោក លី ផល្លា ប្រធាន​នាយក​ដ្ឋាន​កៅស៊ូ​នៃ​ក្រសួង​កសិកម្ម​ បាន​មាន​ប្រសាសន៍​ថា លោកមិន​បាន​រំពឹង​​ថា តម្លៃ​ជ័រ​កៅស៊ូនឹ​ង​ចាប់​ផ្តើម​ឡើង​ខ្លាំង​​ក្នុង​ពេល​​ឆាប់ៗ​នេះ​ឡើយ។​

លោក​មាន​ប្រសាសន៍​ទៀត​ថា ” ពេល​នេះ ការ​​ផ្គត់​ផ្គង់​​​មានច្រើន​ហួស​នៅ​ក្នុង​ពិភព​លោក​​។ ទី២ ពេល​នេះ​សេដ្ឋកិច្ច​ពិភព​លោក​មិន​ទាន់​រើប​ឡើង​វិញ​នៅ​ឡើយ​​។ ខ្ញុំ​មាន​សុទិដ្ឋិ​និយម​ថា តម្លៃ​នឹង​រើប​ឡើង​ ប៉ុន្តែ​មិន​លើសពី​២.២០០ដុល្លារ​ទេ​ក្នុង​មួយ​តោន” ហើយ​​ក៏មិន​មែន​មុន​ឆ្នាំ​២០២០​ដែរ​។

លោក លី ផល្លា ​បាន​មាន​ប្រសាសន៍​ថា ​រហូត​​ដល់​ពេល​នោះ​ ផ្ទៃដី​ដាំ​ដុះ​​ទំនង​ជា​មិន​បន្ត​កើន​ឡើង​ដូច​ដែល​លោក​នាយក​រដ្ឋមន្ត្រី​សង្ឃឹម​ទុក​នោះទេ​។ លោក​មាន​ប្រសាសន៍​ទៀត​ថា “វា​នឹង​មិនធ្លាក់​ចុះ​ទេ ប៉ុន្តែ​វា​ប្រហែល​ជា​នៅ​ទ្រឹង​”៕ សុខុម​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស