27.1 C
Phnom Penh

សម្ព័ន្ធ​កំណែទម្រង់​បោះ​ឆ្នោត​អំពាវ​នាវ​ឲ្យ​មាន​តម្លាភាព​កាន់​តែ​ខ្លាំង​នៅ​ក្នុង​ការ​ពិភាក្សា​​កំណែទម្រង់​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​​សមាជិក​នៃ​សម្ព័ន្ធ​កំណែទម្រង់​​បោះ​ឆ្នោត​ (ERA) បាន​រិះ​គន់​យ៉ាង​ខ្លាំង​ចំពោះ​កង្វះ​តម្លាភាព​ពី​គណបក្ស​ប្រជាជន​កម្ពុជា និង​ក្រុម​ការ​ងារ​របស់​គណបក្ស​សង្គ្រោះ​ជាតិ​ ដែល​កំពុង​ពិភាក្សា​គ្នា​ពី​សេចក្ដី​លម្អិត​នៃ​កិច្ច​ព្រម​ព្រៀង​ដែល​បាន​ឯកភាព​គ្នា​កាលពី​សប្ដាហ៍​មុន​ ដើម្បី​បញ្ចប់​ការ​ធ្វើ​​​ពហិការ​មិន​ចូល​សភា​រយៈ​ពេល​ជិត​មួយ​ឆ្នាំ​មក​នេះ​​​របស់​គណបក្ស​ប្រឆាំង​។

ពួកគេ​ក៏​បាន​អំពាវ​នាវ​ឲ្យ​ផ្អាក​ដំណើរ​ការ​ចុះ​ឈ្មោះ​បោះ​ឆ្នោត ដែល​ត្រូវ​បាន​ធ្វើ​ឡើង​រៀង​រាល់​ខែ​តុលា​ផង​ដែរ​សម្រាប់​ឆ្នាំ​នេះ​​រហូត​ដល់​ដំណើរ​ការ​នេះ​ធ្វើ​កំណែ​ទម្រង់​ស៊ី​ជម្រៅ​សិន​។

សម្ព័ន្ធ​កំណែទម្រង់​បោះ​ឆ្នោត​ដែល​​មាន​សមាជិក​ជា​អង្គការ​សិទ្ធិមនុស្ស អង្គការ​ច្បាប់ និង​​អង្គការ​តស៊ូមតិ​​ប្រជា​ធិបតេយ្យ​ និង​ដែល​ចូលរួម​ពាក់​ព័ន្ធ​យ៉ាង​សកម្ម​នៅ​ក្នុង​កិច្ច​ប្រឹង​ប្រែង​​ដើម្បី​ឲ្យ​មាន​កំណែ​ទម្រង់​ដំណើរ​ការ​បោះ​ឆ្នោត​ចាប់​តាំង​ពី​ការ​បោះ​ឆ្នោត​ដ៏ចម្រូង​ចម្រាស​កាលពី​ឆ្នាំ​មុន​មក បាន​ចេញ​លិខិត​បើក​ចំហ​​មួយ​ច្បាប់​​ផ្ញើជូន​​គណបក្ស​ទាំង​ពីរ​កាល​ពី​ម្សិលមិញ ដោយ​ដាក់​ចេញ​នូវ​អនុសាសន៍​ស្ដីពី​​គណៈ​កម្មាធិ​ការ​ជាតិ​រៀបចំ​ការ​បោះ​ឆ្នោត​ថ្មី និង​ការ​​ធ្វើ​វិសោធនកម្ម​រដ្ឋធម្មនុញ្ញ និង​ច្បា​ប់​បោះ​ឆ្នោត​។

លោក ព្រាប កុល នាយក​ប្រតិបត្តិ​អង្គការ​តម្លាភាព​កម្ពុជា បាន​មាន​ប្រសាសន៍​នៅ​ក្នុង​សន្និសីទ​កាសែត​មួយ​កាលពី​ម្សិលមិញ​ថា “ខ្ញុំ​ចង់​សង្កត់​ធ្ងន់​ថា នៅ​ក្នុង​ការ​បោះ​ឆ្នោត​មិន​គួរ​​មាន​ភាព​សម្ងាត់​ឡើយ​ លើ​កលែង​តែ​​នៅ​ពេល​រាប់​សន្លឹក​ឆ្នោត​”។

លោក​បាន​មាន​ប្រសាសន៍​បន្ត​ថា “អ្វី​ដែល​គណបក្ស​នយោបាយ​កំពុង​ពិភាក្សា​ ពលរដ្ឋ​ចង់​ដឹង​ និង​ចង់ឃើញ។ ​ថាតើ​អ្វី​ដែល​ពួកគាត់​កំពុង​ពិភាក្សា​? វា​ជាការ​​ប្រសើរ​ណាស់​​ប្រសិន​បើ​គណៈ​កម្មការ​ចម្រុះ​បើកចំហ​​សម្រាប់​​សាធារណជន​បញ្ចេញមតិ​​នោះ។ មនុស្ស​គ្រប់​រូប​មាន​ចំណែក​​ជាប់​ពាក់​ព័ន្ធ​នៅ​ក្នុង​រឿង​នេះ​”។

លោក ព្រាប កុល បាន​លើក​ឡើង​ថា កិច្ច​ព្រមព្រៀង​របស់​គណបក្ស​ទាំង​ពីរ​ដែល​បាន​ធ្វើ​ឡើង​​កាលពី​ថ្ងៃ​ទី​២២ ខែ​កក្កដា “មាន​ទិដ្ឋភាព​មូលដ្ឋាន​ ប៉ុន្តែ​គ្មាន​ភាព​ច្បាស់​លាស់​”។

លោក​បាន​មាន​ប្រសាសន៍​បន្ថែមថា “យើង​គិត​ថា សមាសភាព​របស់ ​គ.ជ.ប​. គឺ​​មិន​ដូច​នឹង​បំណង​ប្រាថ្នា​របស់​យើង​ទេ។ យើង​ចង់​បាន​សមាជិក​ឯករាជ្យ និង​ចង់​ឲ្យ​ដំណើរ​ការ​ជ្រើស​រើស​ត្រូវ​បាន​ធ្វើ​តាម​​អ្វី​ដែល​បាន​លើក​ឡើង​នៅ​ក្នុង​កិច្ច​ព្រមព្រៀង​។ អ្វី​ដែល​យើង​ចង់​បាន​នោះ​ គឺ​មាន​សមាជិក​បួនរូប​មក​ពី​គណបក្ស​នីមួយៗ​ និង​សមាជិក​អព្យាក្រឹត​ទី​៩​មួយ​រូប​”។

កាលពី​ខែ​មុន គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​បាន​ប្រកាស​ថា ខ្លួន​ឯកភាព​ជ្រើស​រើស​លោកស្រី ពុង​​​ ឈីវកេក ប្រធាន​អង្គការ​​​សិទ្ធិមនុស្ស​លីកាដូ ជា​សមាជិក​អព្យាក្រឹត​ទី៩​របស់​គណៈកម្មាធិការ​ជាតិ​រៀបចំ​ការ​បោះ​ឆ្នោត​ថ្មី​នេះ​។

តំណាង​សម្ព័ន្ធ​កំណែ​ទម្រង់​ការ​បោះ​ឆ្នោត​បាន​លើក​ឡើង​កាលពី​ម្សិលមិញ​ថា ការ​អនុវត្ត​ដំណើរ​ការ​ចុះ​ឈ្មោះ​បោះ​ឆ្នោត​នៅ​ក្នុង​ឆ្នាំ​នេះ នឹង​ “ជា​ការ​ខ្ជះ​ខ្ជាយ​ប្រាក់​” ប្រសិន​បើ​គណបក្ស​នៅ​មិន​ទាន់​រៀបចំ​ដំណើរ​ការ​នេះ​បាន​រួច​រាល់​ទាំង​ស្រុង​ទេ​នោះ​។

លោក​ យ៉ែម បុញ្ញប្ញទ្ធិ អ្នក​នាំពាក្យ​គណបក្ស​សង្គ្រោះ​ជាតិ​បាន​ឲ្យ​ដឹង​កាលពី​ម្សិលមិញ​ថា គណបក្ស​របស់​លោក​ចង់​ឲ្យ​ការ​ពិភាក្សា​ដែល​កំពុង​បន្ត​មាន​ការ​បើក​ចំហ​​ដល់​សាធារណជន​ដែរ ប៉ុន្តែ​គណបក្ស​ប្រជា​ជន​កម្ពុជា​ចង់​រក្សា​​ការ​ពិភាក្សា​នេះ​ជារឿង​សម្ងាត់​។

លោក​បាន​មាន​ប្រសាសន៍​ថា “តាម​ពិត​ គណបក្ស​សង្គ្រោះ​ជាតិ​ជានិច្ចកាល​តែង​តែ​ប្រកាន់​ជំហរ​ថា យើង​ចង់​ឲ្យ​អ្នក​យក​ព័ត៌មាន និង​អ្នក​អង្កេត​ការ​ណ៍​បាន​ចូល​ និង​ស្ដាប់​ការ​ពិភាក្សា​ ប៉ុន្តែ​ដៃ​គូ​របស់​យើង​មិន​យល់​ព្រម​ទេ​។ យើង​តែង​តែ​ពិគ្រោះ​យោបល់​ជាមួយ​សង្គម​ស៊ីវិល​ ប៉ុន្តែ​ការ​ពិភាក្សា​ទាំង​នេះ​​គឺ​ដើម្បី​ស្វែង​រក​ដំណោះ​ស្រាយ។ ហេតុដូច្នេះ យើង​មិន​អនុញ្ញាត​ឲ្យ​សង្គម​ស៊ីវិល​​ផ្សព្វ​ផ្សាយ​ ឬក៏ចូលរួម​ឡើយ​”។

លោក ជាម យៀប សមាជិក​សភា​មក​ពី​គណបក្ស​ប្រជាជន​កម្ពុជា បាន​លើក​ឡើង​​ថា អ្នក​អង្កេតការណ៍​​អាច​បំផ្លើស និង​រំខាន​ដល់​អ្វី​ដែល​កំពុង​ត្រូវ​បាន​ពិភាក្សា​ ប្រសិន​បើ​ពួកគេត្រូវ​បាន​អនុញ្ញាត​ឲ្យ​ចូលរួម​ក្នុង​កិច្ច​ប្រជុំ​នេះ​។

លោក​ ជាម យៀប បាន​មាន​ប្រសាសន៍​ថា ” ប្រសិន​បើ​​អ្នក​ចង់​​រំខាន [កិច្ច​ប្រជុំ​]​ វា​មិន​អាច​ទៅ​រួច​ទេ។ បន្ទាប់ពី​កិច្ច​ប្រជុំ យើង​នឹង​បើក​សន្និសីទ​កាសែត​មួយ​ ហើយ​ធ្វើ​សេចក្ដី​រាយ​ការណ៍​ដល់​មេដឹកនាំ​កំពូល​នីមួយៗ ហើយ​បន្ទាប់​មក​នឹង​ផ្សព្វផ្សាយ​លទ្ធផល​”៕ គឹមហឿន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស