28 C
Phnom Penh

អភ័យ​​​ឯកសិទ្ធិ​​​សម្រាប់​​​សមាជិក​​​ គ.ជ.ប.​​​ជា​​​ចំណុច​​​ជាប់​​​គាំង​​​​​​នៅ​​​ពេល​​​គណបក្ស​​​ទាំង​​​ពីរ​​​បញ្ចេញ​​​សេចក្តី​​​ព្រាង​​​

ដោយ ឌឹ ខេមបូឌា ដេលី

បទវិភាគ

​​​លោក ជាម យៀប តំណាង​​​រាស្ត្រ​​​មក​​​ពី​​​គណបក្ស​​​ប្រជា​​​ជន​​​កម្ពុជា​​​បាន​​​មាន​​​ប្រសាសន៍​​​ថា  កាល​​ពី​​​ថ្ងៃ​​​សុក្រ លោក ស ខេង រដ្ឋ​​​មន្ត្រី​​​ក្រសួង​​​មហាផ្ទៃ​​​បាន​​​ផ្ញើ​​​​​​ជូន​​​លោក​​​ សម រង្ស៊ី ប្រធាន​​​គណបក្ស​​​សង្គ្រោះ​​​ជាតិ​​​ នូវ​​​សេចក្តី​​​ព្រាង​​​វិសោធនកម្ម​​​របស់​​​គណបក្ស​​​ប្រជា​​​ជន​​​កម្ពុជា​​​ ចំពោះ​​​រដ្ឋ​​​ធម្ម​​​នុញ្ញ​​​​​​ និង​​​ច្បាប់​​​ស្តី​​​ពី​​​ការ​​​បោះ​​ឆ្នោត​​​ ដែល​​​​​​មិន​​​មាន​​ការ​​​លើក​​​ឡើង​​​​​​អំពី​​​អភ័យ​​​ឯកសិទ្ធិ​​​សម្រាប់​​​សមាជិក​​​នៃ​​​គណៈកម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ (គ.ជ.ប.)​​​ថ្មី។

សេចក្តី​​​ព្រាង​​​ថ្មី​​​នេះ​​​ធ្វើ​​​ឡើង​​​ក្នុង​​​ថ្ងៃ​​​តែ​​​មួយ​​​ដែល​​​សាលា​​​ដំបូង​​​រាជ​​​ធានី​​​ភ្នំពេញ​​​បាន​​​កោះ​​​ហៅ​​​តំណាង​​​រាស្ត្រ​​​ជាប់​​​ឆ្នោត​​​ចំនួន​​​ប្រាំបី​​​រូប​​​មក​​​ពី​​​គណបក្ស​​​សង្គ្រោះ​​​ជាតិ ដើម្បី​​​សាក​​​សួរ​​​ជុំ​​​វិញ​​​ការ​​​ពាក់​​​ព័ន្ធ​​​របស់​​​ពួក​​​គាត់​​​នៅ​​​ក្នុង​​​ការ​​​តវ៉ា​​​មួយ​​​ដឹក​​​នាំ​​​ដោយ​​​គណបក្ស​​​ប្រឆាំង​​​នៅ​​​ឯ​​​ទី​​​លាន​​​ប្រជា​​​ធិបតេយ្យ​​​កាល​​​ពី​​​ថ្ងៃ​​​ទី​​​១៥ ខែ​​​កក្កដា ដែល​​​អំឡុង​​​ពេល​​​នោះ​​​សន្តិសុខ​​​ខណ្ឌ​​​រាប់​​​សិប​​​នាក់​ ​​​បាន​​​រង​​​ការ​​​វាយ​​​ដំ និង​​​របួស​​​​​​​​​​​។

សេចក្តី​​​ព្រាង​​​របស់​​​គណបក្ស​​​ប្រជា​​​ជ​​​ន​​​កម្ពុជា​​​នេះ​​​ត្រូវ​​​បាន​​​បញ្ចេញ​​​មួយ​​​ថ្ងៃ​​​បន្ទាប់​​​ពី​​​លោក សម រង្ស៊ី ​​​បាន​​​គេច​​​វេះ​​​​​​ពី​​​ក្រុម​​​​​​ការងារ​​​​​​ចម្រុះ​​​របស់​​​គណបក្ស​​​ទាំង​​​ពីរ​​​​​​​​​ ដែល​​​ត្រូវ​​​បាន​​​បង្កើត​​​ឡើង​​​ដើម្បី​​​ដោះ​​​ស្រាយ​​​បញ្ហា​​​សេចក្តី​​​លម្អិត​​​នៃ​​​កិច្ច​​​ព្រម​​​ព្រៀង​​​មួ​​​យ​​​ធ្វើ​​​​​​ឡើង​​​កាល​​​ពី​​​សប្តាហ៍​​​មុន ដែល​​​បាន​​​បញ្ចប់​​​ការ​​​ធ្វើ​​​ពហិការ​​​មិន​​​ចូល​​​សភា​​​របស់​​​គណបក្ស​​​ប្រឆាំង​​​ ហើយ​​​លោក​​​បែរ​​​ជា​​​ផ្ញើ​​​​​​សេចក្ដី​​​ព្រាង​​​នៃ​​​ជំពូក​​​រដ្ឋធម្មនុញ្ញ​​​ថ្មី​​​មួយ​​​​​​ទៅ លោក​​​ ស ខេង។

លោក ជាម យៀប​​​ បាន​​​មាន​​​ប្រសាសន៍​​​ថា សេចក្ដី​​​ព្រាង​​របស់​​​គណបក្ស​​​ទាំង​​​ពីរ​​​ គឺ​​​ “​​​ដូច​​​គ្នា​​​​​​ប្រហែល​​​៨៥​​​ភាគ​​​រយ​​​”។

ទាំង​​​សេចក្ដី​​​ព្រាង​​​របស់​​​គណបក្ស​​​ប្រជា​​​ជន​​​កម្ពុជា និង​​​សេចក្ដី​​​ព្រាង​​​របស់​​​គណបក្ស​​​សង្គ្រោះ​​​ជាតិ​​​មាន​​​បទប្បញ្ញត្តិ​​​ ដែល​​​ចែង​​​ថា ស្ថាប័ន​​​រៀប​​​ចំ​​​ការ​​​បោះ​​​ឆ្នោត​​​ថ្មី​​​នេះ​​​នឹង​​​មាន​​​ស្វ័យ​​​ភាព​​​ហិរញ្ញវត្ថុ ប៉ុន្តែ សំណើ​​​តែមួយ​​​គត់​​​របស់​​​គណបក្ស​​​សង្គ្រោះ​​​ជាតិ​​​លើក​​​ឡើង​​​ថា សមាជិក​​​ គ.ជ.ប.ដែល​​​មាន​​​សមាជិក​​​បួន​​​រូប​​​មក​​​ពី​​​គណបក្ស​​​នីមួយ​​​ៗ​​​ និង​​​ប្រធាន​​​ឯករាជ្យ​​​ទី​​​៩ គួរ​​​ទទួល​​​បាន​​​អភ័យ​​​ឯកសិទ្ធិ​​​គេច​​​ផុត​​​ពី​​​ការ​​​ផ្តន្ទា​​​ទោស​​​។

លោក ជាម​​​ យៀប បាន​​​​​​មាន​​​ប្រសាសន៍​​​តាម​​​ទូរស័ព្ទ​​​ថា “ក្រុម​​​ការ​​​ងារ​​​របស់​​​គណបក្ស​​​ប្រជា​​​ជន​​​កម្ពុជា​​​ដឹង​​​នាំ​​​ដោយ​​​​​​ឯក​​​ឧត្ដម​​​ឧបនាយក​​​រដ្ឋ​​​មន្ត្រី​​​ ស ខេង ជាមួយ​​​​​​អ្នក​​ជំនាញ​​​ខាង​​​ច្បាប់​​​ប្រហែល​​​៣០​​​រូប​​​ បាន​​​សម្រេច​​​​​​​​​មិន​​​យល់​​​ព្រម​​​ផ្តល់​​​អភ័យ​​​ឯកសិទ្ធិ​​​ឲ្យ​​​សមាជិក​​​រដ្ឋ​​​សភា​​​ [ ដែល​​​នឹង​​​ក្លាយ​​​ជា​​​សមាជិក​​​នៃ​​​ស្ថាប័ន​​​​​​រៀប​​​ច​​​ំ​​​ការ​​​បោះ​​​ឆ្នោត​​​ថ្មី​​​]​​​​​​​​​​​ ទេ​​​”។

លោក ជាម យៀប បាន​​​មាន​​​ប្រសាសន៍​​​បន្ថែម​​​ទៀត​​​ថា “អ្នក​​​ជំនាញ​​​ខាង​​​ច្បាប់​​​របស់​​​យើង​​​បាន​​​សិក្សា​​​លម្អិត​​​អំពី​​​ច្បាប់​​​ជា​​​ធរមាន​​​​​​ ច្បាប់​​​អន្តរ​​​ជាតិ​​​ និង​​​ច្បាប់​​​ខុំ​​​មិន​​​ឡ (ប្រព័ន្ធ​​​ច្បាប់​​​មាន​​​ប្រភព​​​ពី​​​ប្រទេស​​​អង់​​​គ្លេស) ទាំង​​​អស់​​​ ហើយ​​​យើង​​​បាន​​​រក​​​ឃើញ​​​ថា មាន​​​តែ​​​អភ័យ​​​ឯកសិទ្ធិ​​​ពីរ​​​ប្រភេទ​​​ប៉ុណ្ណោះ​​​ ទី​​​១ អភ័យ​​​ឯកសិទ្ធិ​​​ផ្តល់​​​ឲ្យ​​​សម្រាប់​​​ស្ថាប័ន​​​នីតិប្បញ្ញត្តិ​​​ ដែល​​​មាន​​​ន័យ​​​ថា សភា​​​ ឬព្រឹទ្ធ​​​សភា​​​ ហើយ​​​ទី​​​២គឺ​​​អភ័យ​​​ឯកសិទ្ធិ​​​ការ​​​ទូត​​​ ដែល​​​ចេញ​​​ឲ្យ​​​សម្រាប់​​​តែ​​​ឯកអគ្គ​​​រាជ​​​ទូត​​​ប៉ុណ្ណោះ​​​។ ដូច្នេះ​​​គណបក្ស​​​ប្រជា​​​ជន​​​កម្ពុជា​​​មិន​​​អាច​​​ទទួល​​​យក និង​​​យល់​​​ព្រម​​​តាម​​​សំណើ​​​សុំ​​​​​​​​ឲ្យ​​​ផ្ដល់​​​អភ័យ​​​ឯកសិទ្ធិ​​​ដល់​​​សមាជិក​​​គណៈកម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​បាន​​​ទេ​​​ ដោយ​​​ផ្អែក​​​លើ​​​គោល​​​ការណ៍​​​ច្បាប់​​​ជាតិ​​​ និង​​​អន្តរ​​​ជាតិ​​​”។

លោក សម រង្ស៊ី បាន​​​មាន​​​ប្រសាសន៍​​​កាល​​​ពី​​​ថ្ងៃ​​​ព្រហស្បតិ៍​​​ថា  លោក​​​សង្ឃឹម​​​ថា លោក និង​​​តំណាង​​​រាស្ត្រ​​​ជាប់​​​ឆ្នោត​​​៥៤​​រូប​​​ទៀត​​​អាច​​​ស្បថ​​​ចូល​​​កាន់​​​មុខ​​​តំណែង​​​ក្នុង​​​រដ្ឋ​​​សភា​​​​​​នៅ​​​សប្ដាហ៍​​​ក្រោយ​​​។ នៅ​​​ពេល​​​បញ្ចេញ​​​សេចក្ដី​​​ព្រាង​​​ទាំង​​​ពីរ​​​នេះ ក្រុម​​​ការ​​​ងារ​​​មួយ ដែល​​​ទទួល​​​បន្ទុក​​​ធ្វើ​​​វិសោធនកម្ម​​​រដ្ឋ​​​ធម្មនុញ្ញ និង​​​ច្បាប់​​​ស្តី​​​ពី​​​ការ​​​បោះ​​​ឆ្នោត​​​​​​បាន​​​ធ្វើ​​​ការ​​​ចរចា​​​កាល​​​ពី​​​រសៀល​​​ថ្ងៃ​​​សុក្រ​​​។

លោកស្រី ពុង ឈីវកេក ប្រធាន​​​អង្គការ​​​សិទ្ធិ​​​មនុស្ស​​​ក្នុង​​​ស្រុក​​​លីកាដូ​​​ ត្រូវ​​​បាន​​​គណបក្ស​​​ទាំង​​​ពីរ​​​ជ្រើស​​​រើស​​​នៅ​​​សប្តាហ៍​​​នេះ​​​ឲ្យ​​​ធ្វើ​​​ជា​​​សមាជិក​​​ឯករាជ្យ​​​ទី​​​៩​​​នៃ​​​ស្ថាប័ន​​​រៀប​​​ចំ​​​ការ​​​បោះ​​​ឆ្នោត​​​ថ្មី​​​នេះ​​​។ លក្ខខណ្ឌ​​​មួ​​​យ​​​ក្នុង​​​​​​ចំណោម​​​លក្ខខណ្ឌ​​​ចំនួន​​​បី​​​ ដែល​​​លោក​​​ស្រី​​​បាន​​​មាន​​​ប្រសាសន៍​​​ថា មាន​​​សារ​​​ៈសំខាន់​​​ចំពោះ​​​លោកស្រី​​​ទទួល​​​មុខ​​​តំណែង​​​នេះ​​​គឺ​​​ថា សមាជិក​​​គ.ជ.ប.​​​ត្រូវ​​​មាន​​​អភ័យ​​​ឯកសិទ្ធិ​​​។ លោកស្រី ពុង ឈីវកេក មិន​​​បាន​​​ឆ្លើយ​​​តប​​​នឹង​​​សំណើ​​​សុំ​​​ការ​​​​​​ឆ្លើយ​​​បំភ្លឺ​​​ទេ​​​កាល​​​ពី​​​ថ្ងៃ​​​សុក្រ។

លោក​​​ គល់ បញ្ញា ជា​​​សមាជិក​​​មួយ​​​រូប​​​​​​​​​​​​​​​​​​​​​នៃ​​​សម្ព័ន្ធ​​​កំណែ​​​ទម្រង់​​​បោះ​​​ឆ្នោត (ERA) និង​​​ជា​​​នាយក​​​ប្រតិបត្តិ​​​នៃ​​​គណៈកម្មាធិការ​​​ដើម្បី​​​ការ​​​បោះ​​​ឆ្នោត​​​ដោយ​​​សេរី និង​​​យុត្តិធម៌​​​នៅ​​​កម្ពុជា​​​ (ខុម​​​ហ្វ្រែល) បាន​​​មាន​​​ប្រសាសន៍​​​ថា អភ័យ​​​ឯកសិទ្ធិ​​​នឹង​​​ធានា​​​ថា មន្ត្រី​​​បោះ​​​ឆ្នោត​​​អាច​​​ធ្វើ​​​ការ​​​បាន​​​ដោយ​​​គ្មាន​​​អារម្មណ៍​​​ភ័យ​​​ខ្លាច​​​ចំពោះ​​​ការ​​​បំភិត​​​បំភ័យ។

លោក​​​មាន​​​ប្រសាសន៍​​​បន្ត​​​ថា “ខ្ញុំ​​​គិត​​​ថា​​​ក្នុង​​​ប្រទេស​​​​​​មួយ​​​ចំនួន ដូច​​​ជា​​​ប្រទេស​​​ថៃ​​​ជា​​​ដើម​​​​​​ ពួក​​​គេ​​​ផ្តល់​​​សិទ្ធិ​​​អំណាច​​​ដល់​​​ប្រធាន គ.ជ.ប. ។ ពួក​​​គេ​​​មាន​​​អំណាច​​​ធានា​​​ឲ្យ​​​មាន​​​អភ័យ​​​ឯកសិទ្ធិ​​​សម្រាប់​​​ពួក​​​គេ​​​។ [គណបក្ស​​សង្គ្រោះ​​​ជាតិ​​​] មាន​​​ការ​​​ព្រួយ​​​បារម្ភ​​​ថា អ្នក​​​ដែល​​​មាន​​​អំណាច​​​​​​​​​អាច​​​ប្រើ​​​ប្រាស់​​​ស្ថាប័ន​​​ទាំ​ង​​​អស់​​​របស់​​​រដ្ឋ​​​ ដើម្បី​​​គំរាម​​​កំហែង​​​សមាជិក​​​របស់​​​ គ.ជ.ប. នៅ​​​ពេល​​​ពួក​​​គាត់​​​បំពេញ​​​ការ​​​ងារ​​​របស់​​​ខ្លួន​​​”។​​​

សម្ព័ន្ធ​​​កំណែ​​​ទម្រង់​​​បោះ​​​ឆ្នោត​​​បាន​​​ផ្តល់​​​អនុសាសន៍​​​ឲ្យ​​​ស្ថាប័ន​​​រៀប​​​ចំ​​​ការ​​​បោះ​​​ឆ្នោត​​​ថ្មី​​​នេះ​​​មាន​​​សមាជិក​​​ឯករាជ្យ​​​ទាំង​​​អស់​​​។ ពេល​​​នេះ​​​គេ​​​មិន​​​ទាន់​​​ដឹង​​​ថា តើ​​​អ្នក​​​ណា​​​ខ្លះ​​​ទៀត​​​មក​​​ពី​​​គណបក្ស​​​នីមួយ​​ៗ នឹង​​​​​​​​​​​​បំពេញ​​​មុខ​​​តំណែង​​​ចំនួន​​​ប្រាំ​​​បី​​​ផ្សេង​​​ទៀត​​​នៅ​​​ឡើយ​​​​​​ទេ ប៉ុន្តែ ការ​​​កោះ​​​ហៅ​​​របស់​​​តុលាការ​​​កាល​​​ពី​​​ថ្ងៃ​​​សុក្រ​​​ បាន​​​ធ្វើ​​​ឲ្យ​​​មាន​​​មន្ទិល​​​​​​ជុំ​​​វិញ​​​បញ្ហា​​​អភ័យ​​​ឯកសិទ្ធិ​​​សម្រាប់​​​អ្នក​​​នយោបាយ​​​ ដែល​​​មិន​​​ទាន់​​​ទទួល​​​យក​​​អាសនៈ​​​របស់​​​ខ្លួន​​​​​​ជា​​​ផ្លូវ​​​ការ​​​។

លោក យឹម សុវណ្ណ អ្ន​​​ក​​​នាំ​​​ពាក្យ​​​គណបក្ស​​​សង្គ្រោះ​​​ជាតិ​​​បាន​​​មាន​​​ប្រសាសន៍​​​ថា “មនុស្ស​​​ប្រាំ​​​បី​​​នាក់​​​ត្រូវ​​​បាន​​​កោះ​​​ហៅ រួម​​​ទាំង​​​លោក កឹម សុខា ផង។ [តំណាង​​​រាស្ត្រ​​​] ប្រាំពីរ​​​រូប​​​ដែល​​​ត្រូវ​​​បាន​​​ដាក់​​​ពន្ធ​​​នាគារ​​​ ហើយ​​​បន្ទាប់​​​មក​​​គឺ​​​លោក កឹម សុខា”។

កញ្ញា កឹម មនោវិទ្យា អគ្គ​​​នាយ​​​ក​​​រង​​​ទទួល​​​បន្ទុក​​​កិច្ច​​​ការ​​​សាធារណៈ​​​នៃ​​​គណបក្ស​​​សង្គ្រោ​​​ះ​​​ជាតិ​​​ បាន​​​ចាត់​​​ទុក​​​ការ​​​កោះ​​​ហៅ​​​ទាំង​​​នេះ​​​ថា ជា​​​ “ការ​​​គំរាម​​​កំហែង​​​​​​ផ្នែក​​​នយោបាយ​​​” ។ កញ្ញា បាន​​​លើក​​​ឡើង​​​ទៀត​​​ថា “តុលាការ​​​គឺ​​​គ្រាន់​​​តែ​​​ជា​​​ឧបករណ៍​​​របស់​​​គណបក្ស​​​កាន់​​​អំណាច​​​ប៉ុណ្ណោះ​​​ ដែល​​​ខុស​​​តាំង​​​ពី​​​ដំបូង​​​ដោយ​​​សារ​​​ការ​​​​ចោទ​​​ប្រកាន់​​​មក​​​លើ​​​តំណាង​​​រាស្ត្រ​​​ជាប់​​​ឆ្នោត​​​ និង​​​សកម្ម​​​ជន​​​របស់​​​​​​គណបក្ស​​​សង្គ្រោះ​​​ជាតិ”។

លោក​​​ស្រី មូរ​​​ សុខហួរ ជា​​​តំណាង​​​រាស្ត្រ​​​​​​ជាប់​​​ឆ្នោត​​​មក​​​ពី​​​គណបក្ស​​​សង្គ្រោះ​​​ជាតិ​​​​​​​​​​​​​​​​​​ ដែល​​​បាន​​​ជាប់​​​ឃុំ​​​នៅ​​​មន្ទី​​​រ​​​អប់រំ​​​កែ​​​ប្រែ​​​ទី២​​​នៃ​​​ពន្ធនាគារ​​​ព្រៃ​​​ស អស់​​​រយៈ​​​ពេល​​​មួយ​​​សប្តាហ៍​​​ ក្រោយ​​​ពី​​​​​​លោក​​​ស្រី​​​ត្រូវ​​​ចាប់​​​ខ្លួន​​​ បាន​​​មាន​​​ប្រសាសន៍​​​កាល​​​ពី​​​​​​ថ្ងៃ​​​សុក្រ​​​ថា មេធាវី​​​របស់​​​លោក​​​ស្រី​​​​​​​​​ត្រូវ​​​គេ​​​បដិសេធ​​​​​​មិន​​​ឲ្យ​​​ទទួល​​​សំណុំ​​​រឿង​​​របស់​​​លោក​​​ស្រី​​​ឡើយ​​​។

លោក​​​ស្រី​​​បាន​​​មាន​​​ប្រសាសន៍​​​ទៀត​​​ថា “ពេល​​​នេះ​​​ខ្ញុំ​​​ត្រូវ​​​តុលាការ​​​​​​កោះ​​​ហៅ​​​នៅ​​​ថ្ងៃ​​​ទី​​​១១​​​ ប៉ុន្តែ តើ​​​មេធាវី​​​របស់​​​ខ្ញុំ​​​អាច​​​ការពារ​​​ខ្ញុំ​​​ដោយ​​​គ្មាន​​​សំណុំ​​​រឿង​​​របស់​​​ខ្ញុំ​​​ម៉េច​​​នឹង​​​បាន​​​…?​​​ ខ្ញុំ​​​នឹង​​​ទៅ​​​តុលាការ​​​ ពីព្រោះ​​​ខ្ញុំ​​​គិត​​​ថា​​​ ពួក​​​គេ​​​កំពុង​​​ព្យាយាម​​​អនុវត្ត​​​នីតិវិធី​​​​​​ ប៉ុ​​​ន្តែ ពួក​​​គេ​​​បាន​​​ល្មើស​​​​​​នីតិវិធី​​​តាម​​​រយៈ​​​ការ​​​ឃំ​​​ុ​​​ខ្លួន​​​ខ្ញុំ ចោទ​​​ប្រកាន់​​​ខ្ញុំ​​​ក្នុង​​​នាម​​​ខ្ញុំ​​​ជា​​​សមាជិក​​​សភា​​​។ ប៉ុន្តែ ខ្ញុំ​​​នឹង​​​កំដរ​​​លេង​​​ហ្គេម​​​នេះ​​​”៕សុខុម​​​​​​​​​​​​

​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស