29 C
Phnom Penh

អ្នក​​​ស្រុក​​​ខេត្ត​​​ក្រចេះ​​​​​​ត្រូវ​​​គេ​​​រារាំង​​​មិន​​​ឲ្យ​​​ដើរ​​​ហែ​​​ទៅ​​​គេ​​​ហដ្ឋាន​​​លោក​​​ ហ៊ុន សែន

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​សុក្រ អ្នក​​​ភូមិ​​​ប្រហែល​​​១៦០​​​នាក់​​​​​​មក​​​ពី​​​ស្រុក​​​ស្នួល​​​ ខេត្ត​​​ក្រចេះ ត្រូវ​​​បាន​​​គេ​​​រា​​​រាំង​​​មិន​​​ឲ្យ​​​ដើរ​​​ហែ​​​ទៅ​​​គេហដ្ឋាន​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន ដើម្បី​​​​​​ស្វែង​​​រក​​​អន្ត​​​រាគមន៍​​​ក្នុង​ជម្លោះ​​​ដីធ្លី​​​​​​របស់​​​ពួក​​​គាត់​​​។

សន្តិសុខ​​​ខណ្ឌ​​​មាន​​​ជ័យ​​​ជាង​​​២០​​​នាក់​​​​​​បាន​​​ជួប​​​ក្រុម​​អ្នក​ភូមិ​​នៅ​​​ក្លោង​​​ទ្វារ​​​វត្ត​​​សាមគ្គី​​​រង្សី​​​ ដែល​​​ពួកគាត់​កំពុង​​​ស្នាក់​​​នៅ​​​ មុន​​​ការ​​​ដើរ​​​ហែ​​​តាម​​​ការ​​​គ្រោង​​​ទុក​​​ ហើយ​​​បាន​​​រារាំង​​​ពួក​​​គាត់​​​មិន​​​ឲ្យ​​​ចាក​​​ចេញ​​​ពី​​​វត្ត​​​។

នៅ​​​ម៉ោង​​​ប្រហែល​​​៨​​​ព្រឹក​​​ មួយ​​​ម៉ោង​​​បន្ទាប់​​​ពី​​​ការ​​​ចាប់​​​ផ្តើម​​​តាម​​​ផែន​​​ការ​​​ មន្ត្រី​​​ម្នាក់​​​បាន​​​មក​​​វត្ត​​​នេះ​​​ ដើម្បី​​​ទទួល​​​ញត្តិ​​​ពី​​​ក្រុម​​​អ្នក​​ភូមិ​​​។

លោក ហៀក ចាន់​​​លៀង អភិបាល​​​រង​​​ខណ្ឌ​​​មានជ័យ​​​បាន​​​និយាយ​​​ថា “​​​តើ​មាន​​​ច្បាប់​​​ឯណា​​​ឲ្យ​​​ពួក​​​គេ​​​ដើរ​​​ហែ​នោះ? ខ្ញុំ​​​បាន​​​ទទួល​​​ [ ញត្តិ] ពីព្រោះ​​​សាលា​​​រាជ​​​ធានី​​​មិន​​​ចង់​​​ឲ្យ​​​អ្នក​​​ភូមិ​​​ទាំង​​​នោះ​​​បង្កការ​​​រំខាន​​​ក្នុង​​​ក្រុង​​​​​​”។ លោក លៀង បាន​​​និយាយ​​​ថា នឹង​​​មាន​​​ការ​​​ឆ្លើយ​​​តប​​​ក្នុង​​​ពេល​​​ពីរ​​​សប្តាហ៍​​​ខាង​មុខ។

អ្នក​​​ភូមិ​​​បាន​​​​​​មក​​​ដល់​​​វត្ត​​​នេះ​​​ពីរ​​​បី​​​សប្តាហ៍​​​មក​​​ហើយ​​​ ហើយ​​​បា​​​ន​​​ស្វះ​​​ស្វែង​​​រក​​​អន្តរាគមន៍​​​ពី​​​រដ្ឋាភិបាល​​​ជា​​​ច្រើន​​​លើក ឲ្យ​​​ជួយ​​​ដោះ​​​ស្រាយ​​​ជម្លោះ​​​ដី​​​ធ្លី​​​របស់​​​ពួក​​​គាត់​​​។ ក្រុម​​​អ្នក​​​ភូមិ​​​អះ​​​អាង​​​ថា ពួក​​​គាត់​​​បាន​​​ និង​​​កំពុង​​​ធ្វើ​​​ស្រែ​​​ចម្ការ​​​លើ​​​ដី​​​នោះ​​​តាំង​​​ពី​​​ឆ្នាំ​​​២០០០​​​មក​​​ ហើយ​​​សព្វ​​​ថ្ងៃ​​​​​​នេះ​​​កំពុង​​​មាន​​​ជម្លោះ​​​ជាមួយ​​​​​​ក្រុមហ៊ុន​​​អភិវឌ្ឍន៍​​ Horizon Agricultural Development ​​​ពាក់​​​ព័ន្ធ​​​នឹង​​​ដី​​​ប្រហែល​​​១.៥០០​​​ហិកតា​​​ ដែល​​​ក្រុមហ៊ុន​​​​​​នេះ​​​ចង់​​ធ្វើ​​​ចម្ការ​​​​​​ដំឡូង​​​មី និង​​​​​​ម្រេច។

យោង​​​តាម​​​អ្នក​​​ភូមិ​​​បាន​​​ឲ្យ​​​ដឹង​​​ថា មន្ទីរ​​​រៀបចំ​​​ដែន​​​ដី​​​ខេត្ត​​​ក្រចេះ​​​​​​បាន​​​ផ្តល់​​​ដី​​​បី​​​ហិកតា​​​ទៅ​​​ឲ្យ​​​អ្នក​​​ភូមិ​​​ក្នុង​​​មួយ​​​គ្រួសារ​​​ ជា​​​ទំហំដី​​​មិន​​​គ្រប់​​​គ្រាន់។

លោក ឌិន សារឿន អាយុ​​​៣៩​​​ឆ្នាំ​​​បាន​​​សួរ​​​ថា “មន្ទីរ​​​រៀបចំ​​​ដែន​​​ដី​​​នៅ​​​ខេត្ត​​​ក្រចេះ​​​​​​បាន​​​ឲ្យ​​​ដឹង​​​ថា គេ​​​អាច​​​ឲ្យ​​​ត្រឹម​​​តែ​​​បី​​​ហិកតា​​​ប៉ុណ្ណោះ​​​ទៅ​​​អ្នក​​​ភូមិ​​​ក្នុង​​​មួយ​​​គ្រួសារ​​​ ហើយ​​​នឹង​ធ្វើ​ការ​ចាប់​​​ឆ្នោត។ ខ្ញុំ​​​បាន​​​ប្រឹង​​​ប្រែង​​​ធ្វើ​​​ស្រែ​​​ចម្ការ​​​ដើម្បី​​​រស់​​​នៅ​​​ទី​​​នោះ​​​យូរ​​​មក​​​ហើយ​​​ ហេតុ​​​អ្វី​​​ពួក​​​គេ​​​ឲ្យ​​​តែ​​​បី​​​ហិកតា​​​?”។

លោក ឡុង​​​ ឌីម៉ង់ អ្នក​​​នាំ​​​ពាក្យ​​​សាលា​​​រាជ​​​ធានី​​​បាន​​​និយាយ​​​ថា សាលា​​​រាជ​​​ធានី​​​បាន​​​អំពាវ​​​នាវ​​​ដល់​​​អ្នក​​​ភូមិ​​​ឲ្យ​​​ត្រឡប់​​​ទៅ​​​ស្រុក​​​វិញ​​​ ហើយ​​​ប្តឹង​​​ទៅ​​​អាជ្ញាធរ​​​ជាតិ​​​ដោះ​​​ស្រាយ​​​ទំនាស់​​​ដី​​​ធ្លី។

​​​លោក​​​បាន​​​បន្ថែម​​​ថា “ញត្តិ​​​ណា​​​មួយ​​​ពី​​​អ្នក​​​ភូមិ​​​ទៅ​​​នាយក​​​រដ្ឋ​​​មន្ត្រី​​​​​​ក្នុង​​​ការ​​​ស្វែង​​​រក​​​អន្តរា​​​គមន៍​​​ យើង​​​នឹង​​​ទទួល ពីព្រោះ​​​តាម​​​ពិត​​​​​​យើង​​​មិន​​​ចង់​​​ឲ្យ​​​ពួក​​​គេ​​​ធ្វើ​​​អ្វី​​​មួយ​​​ប៉ះ​​​ពាល់​​​ដល់​​​រាជ​​​ធានី​ឡើយ”។

កាល​​​ពី​​​ខែ​​​ឧសភា អ្នក​​​ភូមិ​​​មួ​​យ​​​ក្រុម​​​ផ្សេង​​​ទៀត​​​មក​​​ពី​​​ស្រុក​​​ដដែល​​​នេះ បាន​​​មក​​​ជ្រក​​​នៅ​​​វត្ត​​​សាមគ្គីរង្សី ពេល​​​ធ្វើការ​​​តវ៉ា​​​ប្រឆាំង​​​នឹង​​​ការ​​​បណ្តេញ​​​ចេញ​​​។នៅ​​​ទី​​​បញ្ចប់ ពួក​​​គេ​​​បាន​​​ទទួល​​​ដី​​​​​​សម្បទាន​​​​​​​​​​​​​​​​​​​​​សង្គម​​​កិច្ច​​​ចំនួន​៧៥០​​​ហិកតា។

ព្រះ​​​ចៅ​​​អធិការ​​​វត្ត​​​ស្តី​​​ទី ព្រះ​​​នាម ថាច់ ហាសំអាង បាន​​​មាន​​​សង្ឃដីកា​​​ថា ក្រុម​​​ចុង​​​ក្រោយ​​​នេះ​​​​​​ត្រូវ​​​បាន​​​ស្វាគមន៍​​​ឲ្យ​​​ស្នាក់​​​នៅ​​​​​​រយៈ​​​ពេល​​​ប៉ុន្មាន​​​ក៏​​​បាន​​​ដែរ​​​៕មានិត​​​

​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស