29 C
Phnom Penh

​​​ក្រសួង​​​ធម្មការ និង​​​សាសនា​​​ដាក់​​​គំនាប​​​ឲ្យ​​​បុរស​​​តាំង​​​ខ្លួន​​​ជា​​​ព្រះ​​​សេអារ្យ​​​មេត្រី​​​ចូល​​​ខ្លួន​​​​​​ឆ្លើយ​​​​​​បំភ្លឺ​​​ចំពោះ​​​ទង្វើ​​​របស់​​​ខ្លួន​​​

ដោយ ឌឹ ខេមបូឌា ដេលី

បទវិភាគ

បុរស​​​ម្នាក់​​​ដែល​​​តាំង​​​ខ្លួន​​​ជា​​​ព្រះ​​​សេអារ្យ​​​មេត្រី ​​​កំពុង​​​រង​​គំនាប​​​​​​កាន់​​​តែ​​​ខ្លាំង​​​ឡើង​​​ៗ​​​​​​ បន្ទាប់​​​ពី​​​ទង្វើ​​​របស់​​​ខ្លួន​​​បាន​​​លេច​​​ឮ​​​ដល់​​​អាជ្ញាធរ​​​ ដែល​​​បាន​​​​​​​​កោះ​​​ហៅ​​​ឲ្យ​​​គាត់​​​ចូល​​​ខ្លួន​​​ដើម្បី​​​បក​​​ស្រាយ​​​​​​ពាក់​​​ព័ន្ធ​​​នឹង​​​រឿង​​​នេះ​​​។

ធាន វុទ្ធី ដែល​​​បាន​​​កសាង​​​វត្ត​​​មួយ​​​នៅ​​​ក្នុង​​​ស្រុក​​​កោះ​​​ធំ ​​​ខេត្ត​​​កណ្តាល បាន​​​អះ​​​អាង​​​ថា ខ្លួន​​​ជា​​​ព្រះ​​​។ ជន​​​នេះ​​​​​​​​​ប្រមូ​​ល​​​បាន​​​​​​ប្រាក់​​​យ៉ាង​​​ច្រើន​​​ពី​​​អ្នក​​​គោរព​​​បូជា​​​ដែល​​​មក​​​តាំង​​​ពី​​​ប្រទេស​​​ថៃ ដោយ​​​សារ​​​ពួកគេ​​​ជឿ​​​ថា ជន​​​នេះ​​​​​​មាន​​​បារមី​​​ខ្លាំង​​​ពូកែ។

លោក សេង សុមុនី អ្នក​​​នាំ​​​ពាក្យ​​​​​​ក្រសួង​​​ធម្មការ និង​​​សាសនា បាន​​​មាន​​​ប្រសាសន៍​​​ថា ធាន វុទ្ធី ដែល​​​គេ​​​ដឹង​​​​​​ឮថា បាន​​​អង្គុយ​​​លើ​​​បល្ល័ង្ក​​​ព្រះ​​​ពុទ្ធ​​​​​​​​​​​​ ត្រូវ​​​បាន​​​​​កោះ​​​ហៅ​​​​​​ឲ្យ​​​​​​ចូល​​​​​​មក​​​បំភ្លឺ​​​​​​ពាក់​​​ព័ន្ធ​​​នឹង​​​សកម្ម​​​ភាព​​​របស់​​​ខ្លួន​​​។

​​​ ការ​​​កោះ​​​ហៅ​​​​​​​​​ឲ្យ​​​ចូល​​​ខ្លួន​​មក​​​បំភ្លឺ​​​នេះ ​​​ធ្វើ​​​ឡើង​​​​​​ក្រោយ​​​ពី​​​ការ​​​ឆ្មក់​​​ចូល​​​វត្ត​​​ទួល​​​រា​​​ជា កាល​​​ពី​​​ថ្ងៃ​​​អាទិត្យ​​​ ដោយ​​​មន្ត្រី​​​ក្រសួង​​​​​​ធម្ម​​​ការ និង​​​សាសនា បាន​​​ដក​​​ហូត​​​វត្ថុ​​​​​​តាង​​​មួយ​​​ចំនួន​​​ដែល​​​តាំង​​​លក់​​​ រួម​​​មាន​​​ រូប​​​ថត​​​ និង​​​វីដេអូ​​​​​ជា​​​ដើម​​​។

លោក សេង សុមុនី បាន​​​មាន​​​ប្រសាសន៍​​​ថា ​​​ដំបូង​​​ឡើយ ធាន វុទ្ធី ​​​បាន​​​បួស​​​ជា​​​តា​​​បស​​​​​​​​​តាំង​​​ពី​​​ឆ្នាំ​​​១៩៩២​​​មក​​​ម្លេ៉ះ ហើយ​​​ត្រូវ​​​បាន​​​ក្រសួង​​​ព្រមាន​​​ជាច្រើន​​​លើក​​​មក​​​ហើយ​​​​​​ ប៉ុន្តែ នេះ​​​ជា​​​លើក​​​ទី​​​១​​​ហើយ​​​​​​ដែល​​​គេ​​​ដឹង​​​ថា ជន​​​នេះ​​​​​​បាន​​​តាំង​​​ខ្លួន​​​​​​ជា​​​ព្រះ​​​។

លោក​​​បាន​​​​​​​​​បន្ត​​​ថា “គាត់បាន​​​ធ្វើ​​​ខុស​​​ដោយ​​​ការ​​​​​​យក​​​សាសនា​​​ទៅ​​​បោក​​​ប្រាស​​​់​​​ប្រជា​​​ពល​​​រដ្ឋ​​​ [ហើយ​​​] គាត់​​​ក៏​​​បាន​​​បំពាន​​​ច្បាប់​​​ព្រះ​​​ពុទ្ធសាសនា​​ដែរ​​​​​​​​​ ពេល​​​​​​គាត់​​​អង្គុយ​​​លើ​​​បល្ល័ង្ក​​​ព្រះ ហើយ​​​ឲ្យ​​​ប្រជា​​​ពល​​​រដ្ឋ​​​គោរព​​​ខ្លួន ប៉ុន្តែ យើង​​​មិន​​​អាច​​​ផ្តន្ទា​​​ទោស​​​គាត់​​​ដូច​​​​​ជន​​​សង្ស័យ​​​បាន​​​ទេ​​​”។

ក្រសួង​​​ធម្មការ និង​​​សាសនា​​​បាន​​​លើក​​​ឡើង​​​នៅ​​​ក្នុង​​​សេចក្តី​​​ថ្លែង​​​ការណ៍​​​មួយ​​​​​​ចេញ​​​​​​ផ្សាយ​​​កាល​​​ពី​​​ថ្ងៃ​​​ច័ន្ទ​​​ថា ការ​​​អះអាង​​​របស់​​ ធាន វុទ្ធី បាន​​ធ្វើ​​​ឲ្យ​​​ប៉ះពាល់​​​យ៉ាង​​​ខ្លាំង​​​ដល់​​​តម្លៃ​​​សាសនា​​​​​​រដ្ឋ​​​របស់​​​កម្ពុជា​​​។

​​​ហើយ​​​មិន​​​មែន​​​មាន​​​តែ​​​ប្រជា​​​ពល​​​រដ្ឋ​​​ខ្មែរ​​​​​​ទេ ដែល​​​បាន​​​ចាញ់​​​បោក​​​ព្រះ​​​ក្លែង​​​ក្លាយ​​​នេះ​​​។ យោង​​​តាម​​​គេ​​​ហ​​​ទំព័រ​​​ព័ត៌​​​មាន​​​ Khaosod Daily បាន​​​ឲ្យ​​​ដឹង​​​ថា អ្នក​​​ធម្មយាត្រា​​​ថៃ​​​ បាន​​​ឆ្លង​​​ដែន​​​ចូល​​​មក​​​ប្រទេស​​​កម្ពុជា ​​​ដើម្បី​​​គោរព​​​​​​ថ្វាយ​​​បង្គំ​​​ព្រះ​​​ក្លែង​​​ក្លាយ​​​នេះ បណ្តាល​​​ឲ្យ​​​អាជ្ញាធរ​​​ថៃ​​​ចេញ​​​ការ​​​ព្រមាន​​​ណែនាំ​​​ប្រជា​​​ពល​​​រដ្ឋ​​​របស់​​​ខ្លួន​​​កុំ​​​ឲ្យ​​​​​​ចាញ់​​​បោក​​​​​​ជន​​​នេះ​​​។

ព្រះ​​​តេជគុណ ប៊ុត ប៊ុនទិញ ប្រធាន​​​បណ្តាញ​​​ព្រះសង្ឃ​​​ឯករាជ្យ​​​បាន​​​មាន​​​សង្ឃដីកា​​​ថា ក្រសួង​​​ធម្មការ​​​ និង​​​សាសនា គួរ​​​តែ​​​អន្តរាគមន៍​​​លឿន​​​​​​ជាង​​​នេះ​​​។ ព្រះ​​​អង្គ​​​មាន​​​សង្ឃដីកា​​​​​​ទៀត​​​ថា ” ធាន វុទ្ធី មិនមែន​​​ជា​​​មនុស្ស​​​ទៀង​​​ត្រង់​​​ទេ បុគ្គល​​​នេះ​​​បាន​​​កសាង​​​​វត្ត​​​មួយ​​​​​ដើម្បី​​​​​​ប្រមូល​​​ប្រាក់​​​​​​ ហើយ​​​បើ​​​ក្រសួង​​​ធម្មការ និង​​​សាសនា មិន​​​ដាក់​​​ទោស​​​ជន​​​នេះ​​​ទេ ជន​​​នេះ​​​នឹង​​​ប្រព្រឹត្ត​​​បែប​​​នេះ​ទៀត​​​។ វា​​​មិន​​​មែន​​​​​​​​​​​​​​​​​​ជា​​​លើក​​​ទី​​​១​​​ទេ​​​”។

ទោះ​​​ជា​​​យ៉ាង​​​ណា ​​​មន្ត្រី​​​អាច​​​ជួប​​​ការ​​​លំបាក​​​ក្នុង​​​ការ​​​​​​តាម​​​ចាប់​​​ខ្លួន​​​ ធាន វុទ្ធី ។ លោក ផៃ ប៊ុន​​​ឈឿន អភិបាល​​​ខេត្ត​​​កណ្តាល ​​​បាន​​​មាន​​​ប្រសាសន៍​​​ថា លោក​​​ជឿ​​​ថា ធាន​​​ វុទ្ធី លែង​​នៅ​​​វត្ត​​​ទួល​​​រាជា​​​ទៀត​​​ហើយ​​​។ លោក​​​បាន​​​បន្ត​​​ថា “គាត់​​​តែង​​​តែ​​​ទៅ​​​មក​​​ៗ ចេញ​​​ចូល​​​វត្ត​​​នេះ។ គាត់​​​មាន​​​ផ្ទះ​​​ច្រើន​​​ណាស់​​​”៕សុខុម​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស