26 C
Phnom Penh

មនុស្ស​បួន​នាក់​ស្លាប់​ដោយសារ​ទឹក​ជំនន់​នៅ​ប្រាំបួន​ខេត្ត

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ម្សិលមិញថា មនុស្ស​បួន​នាក់​បាន​ស្លាប់​ក្នុង​ទឹក​ជំនន់​ ដែល​បាន​ធ្វើ​ឲ្យ​ប៉ះពាល់​ដល់​ខេត្ត​ចំនួន​ប្រាំបួន​កាលពី​សប្តាហ៍​មុន​នេះ។ មនុស្ស​ពីរ​ស្លាប់​ក្នុង​ទឹក​ជំនន់​នៅ​ខេត្ត​ក្រចេះ ម្នាក់​ស្លាប់​នៅ​ខេត្ត​ស្ទឹងត្រែង និង​ម្នាក់​ទៀត​នៅ​ខេត្ត​កណ្តាល។

យោងតាម​លោក​​​ ញឹម វណ្ណដា អនុប្រធាន​​​គណៈ​​​កម្មាធិការ​​​ជាតិ​​​គ្រប់​​​គ្រង​​​​​​គ្រោះ​​​​​​មហន្តរាយ​​​​​​បាន​ឲ្យ​ដឹង​​​ថា ទឹក​ជំនន់​បាន​ឡើង​លើស​កម្រិត​ប្រកាស​អាសន្ន​នៅ​ខេត្ត​ក្រចេះ​និង​ខេត្ត​ស្ទឹងត្រែង។

លោក ញឹម វណ្ណដា មាន​ប្រសាសន៍​ថា “ខេត្ត​ចំនួន​ប្រាំបួន​បាន​រង​ប៉ះពាល់​ដោយ​ទឹក​ជំនន់ ហើយ​រហូត​មក​ដល់​នេះ មនុស្ស​តែ​បួន​នាក់​ប៉ុណ្ណោះ​បាន​ស្លាប់។ កម្ពស់​ទឹក​នៅ​តែ​បន្ត​ឡើង ដូច្នេះ​យើង​មិន​អាច​ប្រមាណ​ទំហំខូចខាត​បាន​នៅ​ឡើយ​ទេ”។

លោក​បាន​បន្ថែម​ថា ឥទ្ធិពល​ព្យុះ​ទីហ្វុង Rammasun ដែល​បាន​បង្ក​ការ​ខូចខាត​នៅ​ប្រទេស​ចិន វៀតណាម និង​ប្រទេស​លាវ ក្នុង​ពេល​ប៉ុន្មាន​សប្តាហ៍​ថ្មីៗ​នេះ បាន​ធ្វើ​ឲ្យ​កម្ពស់​ទឹក​បណ្តា​ខេត្ត​ភាគឦសាន​ឡើង​ខ្ពស់​ថែម​ទៀត។

ក្រសួង​ធនធាន​ទឹក​​និង​ឧតុនិយម​បាន​ព្រមាន​អំពី​ផល​ប៉ះពាល់​ដោយសារ​ព្យុះ​ទី​ហ្វុង​នេះ​កាលពី​ថ្ងៃសុក្រ​ ដោយ​លើក​ឡើង​ថា ការ​ធ្លាក់​ភ្លៀង​ខ្លាំង​អាច​បណ្តាល​ឲ្យ​មាន​ទឹក​ជំនន់​នៅ​ចន្លោះថ្ងៃទី​២​ដល់​ថ្ងៃទី​៧ ខែ​សីហា។

លោក អ៊ុំ វិបុល ប្រធាន​មន្ទីរ​ធន​ធាន​ទឹក​និង​ឧតុនិយម​ខេត​្ត​កំពង់​ចាម​បាន​ចាត់​ទុក​​ព្យុះ​ទីហ្វុង​នេះ​ថា ជា​មូលហេត​ុ​ធ្វើ​ឲ្យ​កម្រិតទឹក​កើន​ឡើង​លឿន​ជា​ងឆ្នាំមុន​ ប៉ុន្តែ​បាន​បន្ថែម​ថា ការ​ជន់​លិចមួ​យចំនួន​គឺ​កើត​មានជា “ធម្មតា​”។

លោក ស ចំរ៉ុង​ អភិបាល​ខេត្ត​ក្រចេះ​បាន​មាន​ប្រសាសន៍ថា ស្រុក​បួន​បាន​ទទួលរង​គ្រោះ​ទឹក​ជំនន់​លើស​ពី​កម្រិត​ប្រកាស​អាសន្ន​។

លោក ចំរ៉ុង​ បាន​មាន​ប្រសាសន៍កាលពី​ម្សិលមិញថា ” ​វាមិន​ទាន់​ធ្ងន់​ធ្ងរ​នៅឡើយ​ទេ ហើយ យើ់ង​កំពុង​ត្រៀម​កម្លាំង​ជួយ​ជម្លៀស​ប្រជានជន​ទៅកាន់​ទីទួល​សុវត្ថិភាព”។ លោក​បាន​បន្ថែម​ថា ដី​ស្រែ​ទំហំ​ប្រហែល​១.៧០០​ហិកតា​បានរងការ​ជន់​លិច។

លោក ម៉ៅ តារា ស្នងការ​នគរ​បាល​ខេត្ត​ស្ទឹងត្រែង​​មិន​បាន​ដឹង​ថា ​មាន​មនុស្ស​ស្លាប់​នៅ​ក្នុង​ខេត្ត​របស់លោក​ទេ ប៉ុន្តែ​បាន​មាន​ប្រសាសន៍ថា មន្ទីរ​ពេទ្យ​បង្អែក​ខេត្ត​បាន​ជន់​លិច​ហើយ។ លោក​បាន​បន្ថែម​ថា មាន​ការ​ត្រៀម​លក្ខណ​សម្រាប់​ទប់​ទល់​គ្រោះ​ទឹក​ជំនន់​តាំងពី​ពេល​មួយ​ខែ​មុន។

លោក តារា បាន​មាន​ប្រសាសន៍ថា “យើង​បាន​ត្រៀម​ទូក​រួច​ហើយ​ដើម្បី​​ជម្លៀស​ប្រជាជន​ទៅ​កាន់ទីទួល​សុវត្ថិភាព​ ហើយ​ប្រជាជន​ក៏​បាន​ត្រៀម​ខ្លួន​ផង​ដែរ​ចាប់​តាំង​ពី​កម្រិត​ទឹ​ក​កើន​ឡើង”។

ប្រជា​ពល​រដ្ឋ​ជាង​១,៨​លាន​នាក់​បាន​រង​ផ​ល​ប៉ះពាល់​ដោយ​គ្រោះ​ទឹក​ជំនន់​កាលពី​ឆ្នាំ​មុន ដែល​បណ្តាល​ឲ្យ​មនុស្ស​ប្រហែល​១៦៨​នាក់​ស្លាប់​នៅទូ​ទាំង​ប្រទេស​៕ មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស