កាលពីព្រឹកម្សិលមិញ នៅឯស្ថានទូតសហរដ្ឋអាមេរិក មន្ត្រីការទូត មន្ត្រីរដ្ឋាភិបាលកម្ពុជានិងសមាជិកសង្គមស៊ីវិលមួយចំនួន បាននាំគ្នាទស្សនាព័ត៌មានខណៈដែលលទ្ធផលនៃការបោះឆ្នោតប្រធានាធិបតីសហរដ្ឋអាមេរិករវាងគណបក្សប្រជាធិបតេយ្យរបស់លោក បារ៉ាក់ អូបាម៉ា (Barack Obama)ដែលជាគណបក្សកំពុងកាន់អំណាច និងគណបក្សសាធារណរដ្ឋរបស់លោក មីតរ៉ុមនី (Mitt Romney) ដែលជាគូប្រជែងបានឈានចូលមកដល់។
ដោយតាមដានព័ត៌មានរបស់ស៊ីអិនអិនតាមកញ្ចក់ទូរទស្សន៍ធំពីរ ពេលកំពុងបង្ហាញពីការរាប់សន្លឹកឆ្នោតពីរដ្ឋមួយទៅរដ្ឋមួយនោះ អ្នកចូលរួមទស្សនាការរាប់សន្លឹកឆ្នោតបានសម្ដែងនូវការគាំទ្ររបស់ខ្លួនចំពោះលោកបារ៉ាក់ អូបាម៉ា ឲ្យកាន់តំណែងជាប្រធានាធិបតីបន្ដទៀត។
លោក សុន ឆ័យ សមាជិកសភាមកពីគណបក្ស សម រង្ស៊ី មានប្រសាសន៍ថា “ ខ្ញុំជឿថា លោក អូបាម៉ា គឺជាមេដឹកនាំដ៏ល្អរបស់ពិភពលោក…លោកអាចយល់ដឹងអំពីវប្បធម៌ផ្សេងគ្នា”។
លោកបន្ដថា លោកអាចយល់អំពីនយោបាយអាមេរិកតាមរយៈគោលនយោបាយការបរទេសរបស់សហរដ្ឋអាមេរិក មកលើប្រទេសកម្ពុជា។លោកមានប្រសាសន៍ថា “ គោលនយោបាយរបស់គណបក្សសាធារណរដ្ឋមានលក្ខណៈគឃ្លើនជាង។ ចំណែកឯគោលនយោបាយរបស់គណបក្សប្រជាធិបតេយ្យវិញ មានលក្ខណៈបែបសម្របសម្រួលជាង”។
លោក សាន់ សៀកគីន សមាជិកគណៈកម្មាធិការនាយករបស់យុវជនគណបក្សសម រង្ស៊ី ក៏បានយល់ស្របផងដែរថា គោលនយោបាយការបរទេសរបស់គណបក្សប្រជាធិបតេយ្យគួរឲ្យចង់គាំទ្រ។
លោក សៀកគីន បានបន្ថែមថា “ លោកអូបាម៉ា ប្រើប្រាស់គោលនយោបាយទន់ភ្លន់។ លោក អូបាម៉ា តំណាងឲ្យជាតិសាសន៍ផ្សេងគ្នានៅលើពិភពលោក ពីព្រោះលោក កើតក្នុងប្រទេសកេនយ៉ា។ ហើយលោកក៏បានសម្លាប់ លោក អូសាម៉ា ប៊ីនឡាដិន (Osama Bin Laden)។អ្វីដែលខ្ញុំចង់បានពីអាមេរិកគឺលទ្ធិប្រជាធិបតេយ្យពិតប្រាកដមួយនៅកម្ពុជា”។
ភាគច្រើននៃអ្នកទស្សនាព័ត៌មានដែលបានសម្ពាសបានយល់ស្របថា លទ្ធផលនៃការបោះឆ្នោតជ្រើសរើសប្រធានាធិបតីសហរដ្ឋអាមេរិកមិនពាក់ព័ន្ធនឹងកម្ពុជាទេ ដោយសារគោលនយោបាយបរទេសរបស់អាមេរិកចំពោះកម្ពុជានឹងមិនប្រែប្រួលឡើយ។
លោក សេង ប៊ុនធឿន សាកលវិទ្យាធិការរងនៃសាកលវិទ្យាល័យជាតិគ្រប់គ្រងបានមានប្រសាសន៍ថា “ ខ្ញុំគិតថា លោក មីតរ៉ុមនីនិងលោក បារ៉ាក់ អូបាម៉ា មិនខុសគ្នាទេ ព្រោះអាមេរិកបានកំណត់គោលនយោបាយការបរទេសរបស់ខ្លួនរួចស្រេចហើយ”។
លោក រ៉ាមី សារ៉ាហ្វ (Rami Sharaf)នាយកប្រតិបត្តិរបស់ក្រុមហ៊ុន អអឹមអេ ខេមបូឌា (RMA Cambodia) តំណាងសាខាក្រុមហ៊ុន រថយន្ត ហ្វដ (Ford)អន្ដរជាតិ និង លោក ចន ឌៀ (John Deere) ក៏បានមានប្រសាសន៍ផងដែរថា លោកមានជំនឿថា អាមេរិកនឹងមិនផ្លាស់ប្ដូរគោលនយោបាយការបរទេសរបស់ខ្លួនចំពោះប្រទេសកម្ពុជានោះទេ ហើយលោកសង្ឃឹមថា សហរដ្ឋអាមេរិកនឹងបន្ដបើកទូលាយចំពោះឱកាសពាណិជ្ជកម្មថ្មីៗនៅកម្ពុជា។
លោក សារ៉ាហ្វ មានប្រសាសន៍ថា “ នេះគឺជាពេលដែលត្រូវគាំទ្រប្រទេសកម្ពុជា ឲ្យដើរតាមផ្លូវត្រូវហើយ។ ខ្ញុំគិតថា ការចូលរួមគាំទ្ររបស់អាមេរិកនឹងនៅតែបន្ដ”។ នៅក្នុងបន្ទប់ទស្សនាព័ត៌មានដែលមានពណ៌ចម្រុះនោះលោកឯកអគ្គរដ្ឋទូតវីលលៀមថដ (William Todd) មានប្រសាសន៍ថាមិនខ្វល់ថា នរណាឈ្នះឆ្នោតនោះទេគោលនយោបាយការបរទេសរបស់អាមេរិកចំពោះកម្ពុជានឹងនៅដដែល។
លោកឯកអគ្គរដ្ឋទូតបានមានប្រសាសន៍ ដោយសំដៅដល់លទ្ធផលនៃការរាប់សន្លឹកឆ្នោតសហរដ្ឋអាមេរិកថា “ យប់នេះ អ្នកនឹងឃើញសកម្មភាពបែបលទ្ធិប្រជាធិបតេយ្យពិតប្រាកដ។ មិនខ្វល់ថា ការបោះឆ្នោតនេះប្រែជាយ៉ាងណានោះទេ គោលនយោបាយរបស់អាមេរិកនឹងមិនប្រែប្រួលឡើយ… ប្រសិនបើមានរឿងអ្វីមួយកើតឡើងនោះ ចំនួនបុគ្គលិក និងគម្រោងនឹងកើនឡើងកាន់តែច្រើន”៕
ប្រែសម្រួលដោយ ហម សុផាណ្ណា