លោក សម រង្ស៊ី មេដឹកនាំបក្សប្រឆាំងបានមានប្រសាសន៍នៅថ្ងៃច័ន្ទនេះថា សមាជិកសភាជាប់ឆ្នោត៥៥រូបរបស់គណបក្សសង្គ្រោះជាតិនឹងស្បថចូលសភា ក្នុងពិធីមួយនៅឯព្រះបរមរាជវាំងនារសៀលថ្ងៃអង្គារ ដោយបញ្ចប់ការធ្វើពហិការមិនចូលសភា ដែលបានកើតឡើងជាង១០ខែមកហើយ ដោយសារការបោះឆ្នោតដ៏ចម្រូងចម្រាសកាលពីឆ្នាំមុន។
មេដឹកនាំបក្សប្រឆាំងរូបនេះបានមានប្រសាសន៍តាមទូរស័ព្ទអំពីគម្រោងចូលស្បថនេះថា “ស្អែកម៉ោង៤នៅព្រះបរមរាជវាំង”។
នៅព្រឹកថ្ងៃច័ន្ទនេះ លោក ឡេង ប៉េងឡុង អគ្គលេខាធិការរដ្ឋសភា បានសរសេរលិខិតទៅលោក គង់ សំអុល រដ្ឋមន្ត្រីក្រសួងព្រះបរមរាជវាំង ដោយស្នើឲ្យកំណត់កាលបរិច្ឆេទសម្រាប់ការចូលស្បថនេះ។ អ្នកនាំពាក្យគណបក្សប្រជាជនកម្ពុជាមិនអាចទាក់ទងសុំការបំភ្លឺបានទេ។
នៅពេលស្បថចូលសភា សមាជិកទាំង៥៥រូបរបស់គណបក្សសង្គ្រោះជាតិនឹងត្រូវចូលរួមដោយសមាជិកសភា៦៨រូបទៀតមកពីគណបក្សប្រជាជនកម្ពុជា ដើម្បីស្វាគមន៍អ្នកតំណាងបក្សប្រឆាំង។ កាលបរិច្ឆេទសម្រាប់សម័យប្រជុំពិសេសនេះមិនទាន់ត្រូវបានកំណត់នៅឡើយទេ៕ មានិត